[1] عِیسَى بْلَ جٜرِکُویٜرُو ࢽغَیٜ رٜجٜ کُودُ بَدِیٜࢽُو؞
[2] بْلَدْࢽْ کَمْ لَا مبٜجِ، ثُࢽْجُ جَکَیَ؞ تِ کُرَ أَکِّ مُواْمَسُویٜ یٜ، جَوْرُو غَرِوُ یٜ؞
[3] وُࢽْدُ تِ عِیسَى وُو ثْࢽٜ تِیَ کُرُورُو مَجِ، أَمَّ کْلَ جَمَ کَدَیٜࢽْ رَࢽْغْمٜ کُرُورُو تِرُو کَتْکٜرُو، تِ کُورِ ࢽَࢽْغَرُو؞
[4] دَجِ عِیسَىٰ کُرُورُو ثْغَسٜ ࢻُوُرُو لٜجٜ ࢽَ عِیسَى کُوجِدْیٜࢽْ کْلَ تَرْمُ لَایٜرُو تَتْکٜࢽُو؞
[5] عِیسَى ࢽَدْرُو کَدِࢽِّیَ، کْلَ سَࢻْثٜ تِرُو: «جَکَیَ، دُوَࢽْ جْمّٜ، کُ سَیْ ࢻَࢽّْمْلَࢽْ جْمّْکِّیَ!» یٜࢽُو؞
[6] جَکَیَ غَࢽْجٜ جْࢻْثٜ کَرْوُ کْجِیَرُو تِیَ کَࢻْثِیٜ سُوسَیٜࢽُو؞
[7] جَمَدْ أَدَ کٜرُࢽِّیَ، کَرْوُࢽْجَ وَجٜ: «ࢻَدُو بِوُمَیٜࢽْ جْࢻْثْࢽَ!» ثَࢽِ؞
[8] أَمَّ جَکَیَ ثِجٜ دَجٜ کْمَدْرُو: «کْمَ، رٜدَ کْࢽْدَࢽِیٜدَ تَلَاوَرُو یِکِّ؞ کُورُو کَمْ لَایٜࢽْ وُرِ ثُکُّواْࢽَرُو مُواْکّْࢽَا، کَوَکْ دٜوُ تِرُو کَلَکّْکِّ،» یٜࢽُو؞
[9] دَجِ عِیسَیٜ: «کُ ࢻَدُو أَدْࢽْ ࢽجْکَّوُو جْࢻْثْࢽَ، دَلِلْࢽْجُدْ کَمْ أَدْ یٜ کَدُوُ ࢽَوِ إِبْرَاهِیمْبٜ ࢽَࢽْغَرُو؞
[10] ࢽُوࢽُواْ، تَدَ کَمْبٜدْ أَمْ ࢻَثَّاࢽَا مَجٜ ࢽجْکَّوُورُو کَدِیُو،» یٜࢽُو؞
[11] جَمَدْ أَوُو أَࢽِیَ کْرْࢽْجَیْ ࢽغَیْ دُوُوࢽْ، عِیسَى تَیِرُو مِسَلْ وُلْدُوُ بَدِیٜࢽُو، دَلِلْࢽْجُدْ جٜرُجَلٜمْبَ کَرْࢽْجْࢽَ یٜ، کُورُو تَیِدْ ࢽُودُو بَرْغَا اللَّهیٜ سَدْمَࢽْ دُࢽِیَرُو جْࢻْثِیرُو تْمَجَࢽَ یٜ ࢽَࢽْغَرُو؞
[12] تَیِرُو: «مَیْࢽَ لَا لَرْدُ کُرُوُ لَارُو لٜجٜ کْرْمَیْ لَرْدُࢽْجُیٜ ثُوَࢽْدٜ وَلْدٜ إِسِ ثْࢽٜ سَࢻْتُرُو ثِیٜࢽُو؞
[13] دَجِ وُولُودِیَࢽْجُ مٜوُ بُواْجٜ وُࢽْدُࢽْجَ یَیٜرُو مِࢽَ ࢻَلْ ࢻَلْ ثٜ تَیِرُو: ‹کَوُ وَلْدْکّٜ إِسْکِّرُو تِلَࢽْ سَوُرْ دٜوُو،› یٜࢽُو؞
[14] أَمَّ أَمْ لَرْدُدْیٜ تِیَ وَجَࢽٜ، حَرْ ࢽغَوُوࢽْجُࢽْ أَمْ ثَࢽُودٜ: ‹کَمْ أَدْ مَیْࢽْدٜرُو وَلْجِرُو رَیِیٜࢽْدٜ!› یٜرَ؞
[15] «مَیْجٜ کَدِࢽِّیَ، وَدَ ثٜ وُولُودِیَࢽْجُ تَیِرُو وُرِ ثِࢽَدَ بُواْجَ إِسَ أَوِسُو سَوُرْلَࢽْ ثَوَࢽْدُورُو ࢽُوجُو یٜࢽُو؞
[16] بُرْوُویٜدْ إِسٜ تِرُو: ‹بَرْغَࢽْمِّࢽْ، أَکُّو مِࢽَ سِمَّدْࢽْ مِࢽَ غَدٜ مٜوُ ࢻَࢽْدْکُّو،› یٜࢽُو؞
[17] مَیْیٜ تِرُو: ‹وُسٜ، وُولُودِ ࢽغْلَمَ! أَوُو غَࢽَࢽْ أَمَࢽْ دِمَّ ࢽَࢽْغَرُو، ࢽِیَ لَوَࢽْ بْلَ مٜوُیٜرُو غَلَࢽْجْکِّ،› یٜࢽُو؞
[18] یِࢽْدِیٜدْ یٜ إِسٜ تِرُو: ‹بَرْغَࢽْمِّࢽْ، مِࢽَ سِمَّدْࢽْ غَدٜ أُوُ ࢻَࢽْدْکُّو،› یٜࢽِّیَ،
[19] مَیْیٜ: ‹ࢽِیَ لَوَࢽْ بْلَ أُوُیٜرُو غَلَࢽْجْکِّ،› یٜࢽُو؞
[20] دَجِ وُولُودِ غَدٜ یٜ إِسٜ تِرُو: ‹بَرْغَࢽْمِّࢽْ، أَکُّو مِࢽَࢽْمْ؞ تِیَ کٜسُولَࢽْ کْرْࢽْکّٜ دَمْ غْࢽَیٜکُّو؞
[21] ࢽِ کَمْ جَوْ ࢽَࢽْغَرُو، رِࢽْغٜکُّو؞ أَوُو غْࢽَࢽْمِّدَ ࢽغُوࢽْمِ، أَوُو ࢽَدْمِّدْ یٜیَ کَلَࢽْمِ،› یٜࢽُو؞
[22] مَیْیٜ تِرُو: ‹مَࢽَ ثِࢽْمْبٜࢽْ شَرَ ࢽجْدّْکِّ، وُولُودِ کْلَدُو! وُ کَمْ جَوْ، أَوُو غْࢽَکّْࢽِ ࢽغُوکِّ، کُورُو أَوُو ࢽَدْکّْࢽِ کَلَࢽْکِّرُو ࢽُوࢽْمَّ، غْࢽَ؟
[23] تُو، أَوِرُو غْلٜ وُرِࢽِدَ بَࢽْکِلَࢽْ غْࢽَࢽْمِّدْ؟ ثَ ࢽغَیْ دِمَّا، وَلْدُࢽِدْࢽْ وُرِࢽِ رِوَࢽْجُوَ مُواْکّْࢽَ،› یٜࢽُو؞
[24] دَجِ مَیْیٜ أَمْ ࢽَدْࢽْ دَادَدْرُو: ‹مِࢽَدَ ࢽَࢽْجُࢽْ مُووُواْ، کَمْ ࢽَࢽْجُࢽْ مٜوُوَدْرُو یُواْ!› یٜࢽُو؞
[25] تَیِیٜ: ‹أَ! بَرْغَࢽْمِّࢽْ، ࢽَࢽْجُࢽْ مٜوُ مبٜجِ، دِیٜ!› یٜرَࢽِّیَ،
[26] مَیْیٜ: ‹ࢽَیِرُو وُلْࢽْجَغَکِّ، وُࢽْدُ دُوُوࢽْ ࢽَࢽْجُࢽْ أَوُووَمَدْ، تِرُو ثَسَرْغَیْ، أَمَّ کَمْ ࢽَࢽْجُࢽْ بَوُومَدْ، أَوُو ثْدَࢽَدْمَا تِلَࢽْ ثَمُویِ؞
[27] کْلَدُووَࢽِ مَیْࢽْجَرُو وَلّْکِّرُو وَجَࢽَدَ کُدُواْ ࢻُوُࢽِࢽْ رُورُو یٜجُواْ!› یٜࢽُو؞»
[28] ࢽغَوُو عِیسَى أَدَ وُلْجْࢽَیٜࢽْ، کُورُو وَلْدٜ کْلَ ࢻُوُࢽَّ جٜرُجَلٜمْبُو لٜدُ بَدِیٜࢽُو؞
[29] غْرٜ بْلَ بَیْتْࢻَجٜىٰیَ بَیْتَࢽِیٜیَ ࢽَ کَوْ جَیْتُࢽّٜ ثَࢽِدَ کَرْࢽْغٜرَࢽِّیَ، عِیسَى ࢻُوُرَوَࢽْجُیٜ یِࢽْدِ ثُࢽُودٜ
[30] تَیِرُو: «بْلَ ࢻُوُࢽْدُویٜدْرُو لٜࢽُواْ! ࢽغَوُوِیَمَ، کُتَّ کُورُویٜ وُࢽْدُمَ تِرُو ࢽغَلْتٜ جُوَࢽِّ تُوَدَ ࢽَغْوِ؞ ࢻْرَࢽْغُواْ کُدُواْ!
[31] کَمْ لَایٜ: ‹أَوِرُو ࢻْرَࢽْغُوِ؟› ثْࢽٜ ࢽَیِیَ ࢽجَوُورِیَ، تِرُو: ‹کْمَدْ تِلَࢽْ مْرَدُࢽْجُوَ،› وُلْغْࢽُواْ!»
[32] دَجِ أَمْ تَیِیَ ثُࢽُودْࢽَدْ لٜجَࢽٜ عِیسَى تَیِرُو وُلْجْغْࢽَدْ غَیْ ࢽَیٜىٰرَ؞
[33] کُتَّدَ ࢻْرَکْثَیْ دُوُوࢽْ، کْمَࢽْجُسُویٜ تَیِرُو: «أَوِرُو ࢻْرَࢽْغُوِ؟» یٜرَࢽِّیَ،
[34] تَیِیٜ: «کْمَدْ تِلَࢽْ مْرَدُࢽْجُوَ،» یٜرَ؞
[35] دَجِ کُتَّدَ ࢽَ عِیسَیٜرُو ثَوُدٜ کَلْوُوَࢽْجَ کْلَدْرُو ࢻٜرْجَغَࢽٜ تِیَ ࢽغُویٜىٰرَ؞
[36] لٜجِ أَدْغَیْ دُوُوࢽْ، أَمْ کَلْوُوَࢽْجَ کْلَ جَوَلّٜࢽْ ࢻٜرْیٜرَ؞
[37] ࢽَ جَوَلْ کَوْ جَیْتُࢽّٜدْࢽْ جْࢻْثِدَ کَرْࢽْغٜࢽِّیَ، ࢻُوُرَوَࢽْجُ سَمَّ کَرْوُ کْجِیَرُو کُواْ سَࢻْثَࢽٜ کْلَ أَوُو أَجَبَّ أَجَبَّ ثَرُࢽَیٜࢽْ اللَّهَ ࢽجُࢽْغُورُو بَدِیٜرَ؞
[38] تَیِیٜ: «بَرْغَا مَیْ ثُ کْمَࢽْدٜىٰࢽْ إِسِمَدْ! کْرْمَ دُوُوࢽْ کَتّٜ اللَّهَ أَمْࢽْجُوَیٜࢽْ ࢽَࢽْلٜوَ کْرْغَ، مَیْ سَمٜمَرُو دَرَجَ تِیُو!» ثَࢽِ؞
[39] ثُرُو جَمَدْیٜࢽْ ࢻَرِسَوَ لَایٜ عِیسَرُو: «سَیِࢽَّ، ࢻُوُرَوَࢽْمْبُو وُلْغْࢽٜ غْمْ ثَدُو!» یٜرَࢽِّیَ،
[40] تِیٜ: «ࢽَیِرُو وُلْࢽْجَغَکِّ، ࢽْمْغٜرَا، دُوࢽْغُرْ کَوْیٜسُومَ بُرْوُ ثَسَکِّ،» یٜࢽُو؞
[41] عِیسَى جٜرُجَلٜمْبَ دٜلْ کَرْࢽْجٜ بْرْࢽِدَ کِرُࢽِّیَ، تِرُو کِکِّرُو؞
[42] بْرْࢽِدْرُو: «کَیْ! ثَ کُ أَوُو ࢽَࢽْلٜوَ ࢽجُکُّدِدَ ࢽُوࢽْمَّا، أَمَّ کْرْمَ ࢽُودُ أَدْ ࢽِرُو غْرَآدَرُو وَلْجْࢽَ؞
[43] أَدْ ࢽَࢽْغَرُو یِمْ لَا إِسٜ کْلَدُووَࢽْمْ دِرِࢽْجَࢽٜ کْلْࢽْجَࢽٜ کَࢽْجِ ࢻِ یَیٜࢽْ کِکِمِࢽْجَغَࢽٜ غَرُࢽْمْبُو ثِدِ ثَࢻْثَغَࢽٜ تِیٜࢽْ کُوجَࢽٜ
[44] ࢽِیَ أَمْ ثُرُوࢽْمْلَࢽْ دَسَاࢽَا سَمَّا تْغْمْبُو سِࢽْجَغَیْ، حَرْ کَوْ ࢻَلْمَ کْلَ کَمَࢽْجُیٜࢽْ غْࢽَادَ بَوُورُو ثَدِ، دَلِلْࢽْجُدْ سَ کْمَࢽْدٜ أَمْࢽْجُوَ ثْکَّیِیٜ إِسْࢽَرُو ࢽُوࢽْمِّ ࢽَࢽْغَرُو،» یٜࢽُو؞
[45] دَجِ عِیسَى بَلْبَلَّ ࢻَدُو اللَّهیٜرُو کْرْغَاࢽِّیَ، کَرٜ لَدُومَسُووَ دُدُ بَدِیٜࢽُو؞
[46] تَیِرُو: «کِتَوُلَࢽْ رُوُوَدَ: ‹ࢻَࢽِّدْ ࢻَدُو مُودُوَیٜ!›، أَمَّ ࢽَیِدْ تِیَ جُوࢽْغُو غْࢽْدٜوُیٜرُو کَلَکّٜوْ!» یٜࢽُو؞
[47] یِمْ ࢽغُسُوࢽْ عِیسَى ࢻَدُو اللَّهیٜࢽْ جَمَا أَلَمْدُ ثْدِ دُوُوࢽْ، وُرَوَ رِمَࢽَّیٜیَ مَلْمْبَ أَتَّوْرَیٜیَ أَمْوُرَوَ جَمَیٜیَ تِیَ ࢽجٜجُورُو مَجَیْ،
[48] أَمَّ جَوَلْ ثَوَࢽْدْࢽِّ، دَلِلْࢽْجُدْ جَمَ سَمَّ حَࢽْغَلْࢽْجَ ࢽَࢽْجُࢽْ تِیَ ࢻَࢽْجَࢽَ ࢽَࢽْغَرُو؞