[1] یِمْ تُسْتُیٜیَ لَا عِیسَى مَسْࢽَ دِیُورُو ࢻَدُو ࢻَرِسَوَیٜ کُرَࢽْجَ لَایٜرُو لٜىٰࢽِّیَ، أَمْدْ جَوْرُو عِیسَىٰ ࢽِࢽِجَیْ دُوُوࢽْ،
[2] کَمْ لَا تِیࢽْجُ ࢽغَ ࢻُوَدَا ࢻُوُࢽْجُࢽْ کِرُو؞
[3] عِیسَیٜ مَلْمْبَ أَتَّوْرَیٜیَ ࢻَرِسَوَارُو: «یِمْ تُسْتُیٜیَ کَمْبَ إِسَࢽْغَدُوُمَ حَلَلْ رَ حَرَمْ؟» ثْࢽٜ تَیِیَ کِوُورُو؞
[4] غْمْ کٜدْࢽِّیَ، عِیسَى کَمْدَ ثْدَࢽٜ إِسَࢽْغَجِیٜ سَلَمْجٜ لٜىٰࢽُو؞
[5] دَجِ تَیِرُو: «وُࢽْدُࢽْدُو تَدَࢽْجُ بِ دَلُوࢽْجُ یِمْ تُسْتُیٜیَ بَرَمْبُو ثُکُّرِیَ، سَدْمَࢽْ ثُتُّلُوِوَوُودْ؟» یٜࢽُو؞
[6] کُورُو مَࢽَ تِرُو کَلَکْتُوُیٜ تَیِرُو کَتْکٜرُو؞
[7] عِیسَى أَمْ مَسْࢽَ دِیُورُو دُوجَࢽَدْ ࢽَ دَرَجَا کْرٜجَࢽٜ ࢽَࢻْثَیْ کِرُࢽِّیَ، تَیِرُو مِسَلْ ثْدّٜ:
[8] «کَمْ لَا مَسْࢽَ لَرُسَیٜرُو ࢽِیَ دُوࢽْجِیَ، بَرٜ ࢽَ دَرَجَادْࢽْ ࢽَمّْمِّ، دَلِلْࢽْجُدْ وَࢽٜىٰ سُوسَمَࢽْمْ کَمْ ࢽِیَ دَرَجَࢽْ کُوࢽْجْࢽَ لَآ دُوجْࢽَ؞
[9] أَدْغَیْیَ، سُوسَمَࢽْدُودْ ࢽَࢽْمْبُو إِسٜ ࢽِرُو: ‹ثِࢽٜ ࢽَدَ تِرُو کُولْغْࢽٜ!› ثْࢽِ؞ دَجِ ࢽَࢽْغُࢽْمْبَرُو ثِࢽْمٜ لٜࢽْمٜ ࢽَ دَرَجَ بَوُودْلَࢽْ ࢽَمّْمِ؞
[10] أَمَّ کَمْ لَا ࢽِیَ دُوࢽْجِیَ، لٜࢽٜ ࢽَ دَرَجَ بَوُولَࢽْ ࢽَمّٜ؞ دَجِ سُوسَمَࢽْمْدْ إِسِیَ، ࢽِرُو: ‹سَوَࢽِ، أَرٜ ࢽَ دَرَجَاࢽْ ࢽَمّٜ!› ثْࢽٜ ࢻُوُ جَمَ دُوجْࢽَ سَمَّیٜࢽْ دَرَجَ ࢻَࢽْدْمِ؞
[11] ࢽُوࢽُواْ، وُࢽْدُ دُوُوࢽْ کْلَࢽْجُوَ جَجَکْثْࢽَمَدْ، تِیَ أَوِمَرُو ࢽغُوجَیْوَوُو؞ کُورُو کَمْ دُوُوࢽْ کْلَࢽْجُوَ أَوِمَرُو ࢽغُوجْࢽِّمَدْ، تِیَ جَجَکْثَیْ؞»
[12] دَجِ عِیسَیٜ سُوسَمَࢽْجُدْرُو: «ࢽغْمْرِ مَسْࢽَ کَوْسُیٜ بِ لٜسَیٜ دَبَّرْࢽْمِیَ، بَرٜ سَوَوَࢽْمْ، بِ یَࢽْمْغْࢽَوَ، بِ کْرَمِیَࢽْمْ، بِ کْمَسْکِیَࢽْمْ غَرِوُوَ دُوࢽْمِّ؞ أَدْغَیْ کِدْمْبَ، تَیِ یٜ ࢽِیَ دُوࢽْجَࢽٜ ࢽجَکّْرْمْبِ؞
[13] أَمَّ ࢽغْمْرِ مَسْࢽَ دِیُویٜ دَبَّرْࢽْمِیَ، ࢽغُدِیَ سُو، مَسْکِࢽَّ سُو، ࢽغُرْدِییَ سُو، کَمْبُوَ سُووَ دُوࢽٜ؞
[14] أَدْغَیْࢽِࢽْ بَرْغَارُو وَلّْمِ، تَیِ رَکْثَࢽٜ ࢽِرُو ࢽجَکّْرْمْبِوَوُو ࢽَࢽْغَرُو؞ یِمْ ثِࢽُواْ جِرٜوُیٜیَ اللَّه ࢽِرُو ࢽجْکّْرْمْبِ؞»
[15] ثُرُو مَسْࢽَوُیٜࢽْ ࢻَلْࢽْجَ أَدَ ࢻَࢽْغٜࢽِّیَ، عِیسَرُو: «بَرْغَࢽْجُ کَمْ ࢽُودُو بَرْغَا اللَّهیٜࢽْ مَسْࢽَ جُوُیْدْ!» یٜࢽُو؞
[16] عِیسَیٜ تِرُو: «کَمْ لَا مَسْࢽَ ࢽغْمْرِیٜ ثْدِ ثْࢽٜ أَمْ کَدَ دُویٜࢽُو؞
[17] سَ مَسْࢽَیٜدْ کِدْࢽِّیَ، وُولُودِࢽْجُوَ ثُࢽُودٜ أَمْ دُوجْࢽَدْرُو: ‹أَرُواْ، أَوِسُو کْرْمَ دَبَّرْغَدَ!› یٜࢽُو؞
[18] أَمَّ تَیِ سَمَّ وَجَࢽٜ ࢻَلْ ࢻَلّٜࢽْ غَوَرَ کُورُو ࢽغْسْکٜرَ؞ بُرْوُویٜدْ تِرُو: ‹لُواْࢽْجْکّْࢽَ کَࢽَدِ تَیْ، کُلُو یُوُکّْࢽَ دُولٜرُو لٜکّٜ رُکِّ،› یٜࢽُو؞
[19] ࢻَلْ یٜ: ‹لُواْࢽْجْکّْࢽَ کَࢽَدِ تَیْ، دَلُو بَرٜىٰ مٜوُ یُوُکّْࢽَ لٜکّٜ تَیِیَ رِجَمّْکِّ،› یٜࢽُو؞
[20] ࢻَلْدْ یٜ: ‹بْرِࢽْمَرُو لَرُسَ کِدْکُّو؞ أَدْمَرُو رَࢽْغْکّٜ لٜکِّوَوُودْ،› یٜࢽُو؞
[21] دَجِ وُولُودِدْ ࢽَ کْمَࢽْجُیٜرُو وَلْدٜ أَوُو أَࢽِ سَمَّا وُلْیٜىٰࢽُو؞ أَدَ ࢻَࢽْغٜࢽِّیَ، کْمَ ࢻَدُویٜدْ غْرْغَجٜ وُولُودِࢽْجُدْرُو: ‹دُوَࢽْ لُوٜ بْلَیٜ ࢻَرْسَمْ ࢻَرْسَمْ سُو، لَیْ لَیْ سُو غَیْ، تَلَاوَا مَسْکِࢽَّا کَمْبُوَا ࢽغُرْدِییَا سَمَّا مَࢽٜ کُدٜ!›
[22] دَجِ وُولُودِدْ وَلْدٜ تِرُو: ‹کْمَࢽِ، أَوُو وُلّْمَّدْ تْدْࢽَ، أَمَّ کُورُو یَیٜ ࢽَ غَࢻْثْࢽَ مبٜجِ،› یٜࢽُو؞
[23] کُورُو کْمَدْیٜ وُولُودِࢽْجُرُو: ‹بْلَࢽْ لُوٜ جَوَلْ کُرَࢽْ غَࢽَࢽْسُو غَیْ أَمْبَ یَکّٜ إِسَ، ࢻَࢽِّ ثَࢻُّو تْمْبْرُو!
[24] ࢽَیِرُو وُلْࢽْجَغَکِّ، أَمْ بُرْوُوࢽْ دُوکّْࢽَدْیٜ ࢻَلْࢽْجَمَ مَسْࢽَࢽِ جُوُیْوَوُو، دِیٜ!›»
[25] أَمْ کَدَ کَدَمِ عِیسَىٰ ثَسَدُّوُࢽَ کَلُّو لٜدُ ثَدِ دُوُوࢽْ، عِیسَى سُوُورْدٜ تَیِرُو:
[26] «کَمْ لَا ࢽَࢽِرُو إِسٜ بَوَࢽْجُوَ یَࢽْجُوَ، کَمُࢽْجُوَ یَلَّࢽْجُوَ، یٜیْیَوَࢽْجُوَ کَࢽَّوَࢽْجُوَ، حَرْ رُوࢽْجُدْمَا وَجْࢽِّیَ، رَکْثٜ ࢻُوُرَࢽِرُو وَلْجِوَوُو؞
[27] کُورُو وُࢽْدُ دُوُوࢽْ کْسْکَࢽْجُ کَرْمُویٜ ࢽغُوجٜ وُوَ سْغَࢽِّمَدْ، رَکْثٜ ࢻُوُرَࢽِرُو وَلْجِوَوُو؞
[28] وُࢽْدُࢽْدُو غْلٜ سُورُو سَمٜىٰ تَࢽْدُو ثْرَاࢽَ دُوُوࢽْ، دُࢽُوࢽْجُ کُوجِ رَ کُوجِوَوُورُو ࢽُوجُورُو ࢽَࢻْثٜ وُرِ ثٜجِ سَمَّا بُرْوُوࢽْ کُومْجْࢽِّ تَࢽْدُو بَدِجِدْ؟
[29] ࢽغَیْ غْࢽِیَ، ࢻْرْدُدَ غْࢽَجٜ رَکْثٜ سُورُودَ تُمُوجْغْࢽِّرُو وَلْیٜࢽُووَ، أَمْ ثَرُࢽَ سَمَّ رُدُ تِرُو غْࢽَجَغَࢽٜ:
[30] ‹رُیْوُو، کَمْ أَدْ سُورُو تَࢽْدُو بَدِجْࢽَ دُوُوࢽْ، تُمُودُوُ تِرُو کَتْکٜرُو!› ثَࢽِ؞
[31] کُورُو مَیْ لَا أَمْࢽْجُ دْوُ مٜوُوَ دُوُوࢽْ مَیْ کَمَࢽْجُ أَمْ دْوُ ࢻِࢽْدِیَرُو کْرِوُ ࢽجْکَّدُو مَجِیَ، بُرْوُوࢽْ ࢽَࢻْثٜ رَکْثٜ تَیِیَ کْرِوُࢽْ جُوُیْ رَ جُوُیْوَوُودَ ثُرُیْ، مَرٜ؟
[32] تِیَ جَوُیْرُو کِرُووَ، لَوَلَمَࢽْجُ کُرُوُࢽِࢽْ دُوُوࢽْ، ࢽَࢻْتُ ࢽَࢽْلٜوَیٜ کُورُورُو أَمْ ثُکُّࢽُودِ؞
[33] أَدْغَیْمَ کَمْ دُوُوࢽْ کْࢽْدَࢽْجُ ࢽغَا وَجْࢽِّدْ رَکْثٜ ࢻُوُرَࢽِرُو وَلْجِوَوُو؞
[34] «مَࢽْدَدْ ࢽغْلَ، أَمَّ کْلَمْبُو وَلْیٜࢽُووَ، جِرِ ࢻِࢽْ غْلٜ ثَیٜࢽْجُ غَیْرُو وَلْجِ؟
[35] مَࢽْدَ کْلَمْدْ کَتِّرُو بِ مُرِرُو ࢻِدُوُرُو ࢻَیْدَا غْࢽِ، تِیَ دٜیَࢽْ یِرْجَیْ؞ کَمْ سْمُوࢽْجُوَمَدْ ࢻَࢽْجُو!» یٜࢽُو؞