[1] یِمْ لَا عِیسَى ثِ بْرْمْ غٜࢽٜسَرٜتّٜࢽْ دَادَ، أَمْ ࢽغْوُ یٜ مَࢽَ اللَّهیٜ ࢻَࢽْدُرُو غْغْرْࢻْتَغَࢽٜ تِیَ کِمِثَّغَیْ ࢽغَیْ دُوُوࢽْ،
[2] مَارَ یِࢽْدِ ثِ إِࢽْغِدْیٜࢽْ تُوَدَ کِرُو؞ بُࢽِ تَوُدْ جْࢻْثَࢽَ، کَرٜࢽْجَ بُࢽِ تَیٜ تُلْدُ ثَدِ؞
[3] دَجِ عِیسَى لٜجٜ مَارَ سِمَࢽّٜدْرُو ࢽغَیٜ تِرُو: «ثِ إِࢽْغِدْیٜࢽْ غَࢽَرُو لٜࢽٜ!» یٜࢽُو؞ ࢽغَیْ کِدْࢽِّیَ، عِیسَى ثِ مَارَدْیٜࢽْ ࢽَࢻْثٜ کُورُو یَیٜ جَمَدَ أَلَمْدُ بَدِیٜࢽُو؞
[4] مَࢽَ ثْدٜ کٜرْࢽِّیَ، سِمَࢽُّو: «مَارَدَ ࢽَ کُرُوُرُو یَدٜ، بُࢽِ تَرَمْࢽْدُو ࢻِغْࢽُواْ بُࢽِ تَیْوُو!» یٜࢽُو؞
[5] سِمَࢽّٜ تِرُو: «مَلْمْ، بُࢽٜ ࢻَرَیْ ࢽغْࢽْࢻْتِیٜ دِیٜࢽَسُوࢽْ، أَوِمَ تَیْیٜࢽْدٜ! أَمَّ وُلْسْغْمَّدْرُو، بُࢽِ تَرَمْدَ إِࢽْغِدْرُو ࢻِغْکِّ،» یٜࢽُو؞
[6] ࢻِیٜىٰرَࢽِّیَ، بُࢽِ کَدَ کَدَمِ ثَدَࢽٜ، حَرْ بُࢽِ تَرَمْࢽْجَدْ کَکَمْدُ بَدِیٜࢽُو؞
[7] دَجِ أَمَࢽْجَ مَارَ تُویٜدَ مُکُّوࢽْ ثْغَࢻْثَࢽٜ إِسَ تَیِیَ بَࢽَجَارُو بُواْیٜرَ؞ إِسَࢽٜ مَارَ یِࢽْدِ سَمَّا بُࢽِࢽْ کٜکْ ثَسْمْبْرٜ، حَرْ مَارَ یِࢽْدِسُو لْࢻْتُرُو مَیٜرَ؞
[8] سِمَࢽْ تِرُو بِتُرُسْ ثَࢽِدْ أَدَ کِرُࢽِّیَ، ࢻُوُ عِیسَیٜࢽْ تُࢽْغُرُمْجٜ: «کْمَ، مَرْࢽٜ ࢽَࢽِ کُولّٜ! وُ بِوُمَ، دِیٜ!» یٜࢽُو؞
[9] أَوُووَ تِیَ أَمْ رُوکُّوࢽْجُیٜیَسُو کْلَ بُࢽِ ࢽغْوُ ثَدَࢽَدْیٜࢽْ أَجَࢻْکٜرَ؞
[10] کُورُو سَوَوَࢽْجُ کِدَیٜ یَعْࢼُوبَا یَحْیـَىٰ تَدَوَ جَبَدِیٜ یٜ أَجَࢻْکٜرَ؞ دَجِ عِیسَیٜ سِمَࢽُّو: «بَرٜ رِࢽْمِّ، کُوَ أَدْࢽْ ࢻُوُࢽْ کَمْ تَمَرُو وَلّْمِ!» یٜࢽُو؞
[11] مَارَࢽْجَ ثِ إِࢽْغِیٜرُو کٜوُدْࢽِّیَ، أَوُوࢽْجَ سَمَّا کُولْجَࢽٜ تِیَ غٜیَ؞
[12] عِیسَى بْلَ لَاࢽْ دُوُوࢽْ، کَمْ لَا تِیࢽْجُ ࢽغَࢽْ بَرَسُوَ مبٜجِ؞ عِیسَىٰ کِرُࢽِّیَ، ࢻْدْرْیٜرُو تْمْدٜ تِیَ لُواْجٜ: «کْمَ، رَامَّا، رَࢽْغْمٜ وُوَ إِسَࢽْغَسْغْمٜ تَیِرُّو وَلّْکِّ،» یٜࢽُو؞
[13] عِیسَى مُکُّو سَجِیٜ کَمْدَ لٜجٜ: «رَاکّْࢽَ، تَیِرُّو وَلّٜ!» یٜࢽُو؞ سَدْمَࢽْ بَرَسُدْ تِیَ کُولْیٜࢽُو؞
[14] دَجِ عِیسَى تِرُو وَدَ ثٜ: «بَرٜ وُࢽْدُمَرُو أَدَ وُلْغْمِّ، أَمَّ لٜࢽٜ رِمَࢽْدْرُو ࢻْلٜدْغْࢽٜ؞ تَیِرُّو وَلّْمَّدْ، سَدَا ࢽَوِ مُوسَى وُلْجْࢽَدَ دٜ، جَمَرُو شٜدَرُو وَلْجُو!» یٜࢽُو؞
[15] أَدْسُوࢽْ لَوَرْ عِیسَیٜ ثَیٜیَ کُوجْࢽَرُو ࢽدَرَسُورُو تَتَرْغَادَ؞ أَمْ کَدَ کَدَمِ تِیَ کْرْࢽْدُوَ کَسُوَࢽْجَࢽْ ࢽغَدُوَرُو ࢽَࢽْجُرُو ثَࢻْکَدَرَ؞
[16] أَمَّ عِیسَى ࢽغْوُسُورُو کَرَا وُࢽْدُمَ بَوُورُو لٜجٜ مُودُوَ ثْدِ؞
[17] یِمْ لَا عِیسَى ࢻَدُو لَاࢽْ جَمَا أَلَمْدُ ثْدِ دُوُوࢽْ، ࢻَرِسَوَا مَلْمْبَ أَتَّوْرَیٜیَ ࢽَدْࢽْ ࢽَࢻْکَدَ یٜ مبٜجِ؞ تَیِدْ بْلَوَ سَمَّ ثِدِ غَلِلٜىٰیَ یَحُدِیَیٜیَ بْرْࢽِ جٜرُجَلٜمْبٜیَلَࢽْ إِسَࢽَ، کُورُو ࢽَ عِیسَیٜࢽْ کْࢽْدُوُو کْمَࢽْدٜىٰ أَمْ دُوࢽْدِ إِسَࢽْغَدُوُیٜ مبٜجِ؞
[18] دَجِ أَمْ لَا کَمْ تِیے ࢽُࢽَا کْلَ بْࢽَرَمْبٜࢽْ ࢽغُوجَࢽٜ کَدِرَ؞ کَمْدَ ثَوُدٜ ࢻُوُ عِیسَیٜࢽْ غْࢽَجَیْ ثَࢽٜ مَیٜرَسُوࢽْ،
[19] جَمَ ثَࢻْتَࢽَ ࢽَࢽْغَرُو رَکْثَࢽٜ ࢽَࢽْجُرُو إِسَیْوَوُودْ، دَجِ سُورُودْرُو جَوَࢽٜ کَجَࢽٜ کَمْدَ کْلَ بْࢽَرَمْࢽْجُیٜࢽْ دَوُ جَمَیٜࢽْ ࢻُوُ عِیسَیٜرُو سَیٜىٰرَ؞
[20] عِیسَى کَمْبْرْسٜࢽْجَ کِرُࢽِّیَ، کَمْدْرُو: «کَمْ، بِوُࢽْمْ غَوُرْدْࢽَ،» یٜࢽُو؞
[21] دَجِ مَلْمْبَ أَتَّوْرَیٜیَ ࢻَرِسَوَادْ کَرْوُࢽْجَࢽْ: «وُࢽْدُ غْلٜ کَمْ اللَّهَ غَسْکَجْࢽَ أَتّْ؟ اللَّه غْࢽِیَ، وُࢽْدُمَ کَمْبُو بِوُ غَوُرْجِیے بَوُو، مَرٜ؟» ثَࢽِ؞
[22] أَمَّ عِیسَى أَوُو کَرْوُࢽْجَیٜ أَسُجٜ تَیِرُو: «أَوِرُو کَرْوُࢽْدُوࢽْ ࢽغَیْ وُلُّوِدْ؟
[23] ࢽدَسُو غْلٜ بُدُ وُو: ‹بِوُࢽْمْ غَوُرْدْࢽَ› وُلْدُمَ رَ ‹ثِࢽٜ لٜࢽٜ!› وُلْدُمَ؟
[24] ࢽُوࢽُواْ، تَدَ کَمْبٜدْ ࢽَࢽْجُࢽْ کْࢽْدُوُو بِوُ أَمْبٜ دُࢽِیَلَࢽْ غَوُرْدُیٜ مبٜجِ!» یٜࢽُو؞ دَجِ کَمْ تِیࢽْجُ ࢽُࢽَدْرُو: «ࢽِرُو وُلْࢽْجْغْکِّ، ثِࢽٜ بْࢽَرَمّْمْ ࢽغُوࢽٜ ࢻَࢽّْمْبُو لٜࢽٜ!» یٜࢽُو؞
[25] سَدْمَࢽْ کَمْدْ ࢻُوُ جَمَدْیٜࢽْ ثِجٜ بْࢽَرَمْࢽْجُ ࢽغُوجٜ اللَّهَ ثُࢽْغُورِیَرُو ࢻَࢽّجُرُو لٜىٰࢽُو؞
[26] تَیِ سَمَّ جَوْرُو أَجَࢻْثَࢽٜ رِجَࢽٜ اللَّهَ ثُوࢽْغُورْࢽٜ: «کُ أَوُو أَجَبَّ أَجَبَّ رُیْیٜࢽَ!» یٜرَ؞
[27] ࢽغَوُو أَدْیٜࢽْ عِیسَى ثُلُوٜ أَکِّ مُواْمَ لَا ثُࢽْجُ لٜوِ کِدَرَمْࢽْجُࢽْ ࢽَࢻْکَدَا کِرُو؞ عِیسَیٜ تِرُو: «وُوَ سْغَیْ!» یٜࢽِّیَ،
[28] ثِجٜ کَرٜ سَمَّا کُولْجٜ تِیَ غِیَ؞
[29] دَجِ لٜوِ ࢻَࢽّجُࢽْ عِیسَرُو مَسْࢽَ کُرَ دَبَّرْیٜىٰࢽُو؞ أَکِّ مُواْمَسُووَ أَمْ غَدٜسُووَ کَدَ یٜ عِیسَىٰ ࢻُوُرَوَࢽْجُوَ رُوکُّو مَسْࢽَ دِیُورُو ࢽَࢻْکٜرَ؞
[30] ࢻَرِسَوَا مَلْمْبَࢽْجَ أَتَّوْرَیٜیَ أَدَ کٜرُࢽِّیَ، کَرْوُࢽْجَ وَجٜ ࢻُوُرَوَࢽْجُرُو: «أَوِرُو أَکِّ مُواْمَسُووَ بِوُمَ غَدٜسُووَ رُوکُّو مَسْࢽَ دِوِدْ؟» یٜرَ؞
[31] عِیسَیٜ تَیِرُو: «کَمْ دُوࢽْدِ غْࢽِیَ، کَمْ ࢽغَدْ لُواْتُورْ مَجِوَوُو؞
[32] جِرٜمَسُووَ غْࢽِ، بِوُمَسُووَ بُواْکّٜ تُوَ ثَدُورُو کَدِکُّو،» یٜࢽُو؞
[33] أَمْ لَایٜ عِیسَرُو: «ࢻُوُرَوَ ࢽَوِ یَحْیـَیٜیَ ࢻَرِسَوَیٜیَ ࢽغْوُسُورُو أَسٜمْ ثَدَیْ یٜ، مُودُوَ ثَدِ یٜ، أَمَّ کَاࢽْمْ جَوُیْ یٜ، ثَسَیْ یٜ،» یٜرَ؞
[34] عِیسَیٜ تَیِرُو: «مَیْ لَرُسَیٜ دَوُࢽْجَࢽْ دُوُوࢽْ، ࢽغَلَدِیَا یَکُّوٜ أَسٜمْ ثَدَیْ وَ؟
[35] أَعَ، أَمَّ سَ إِسٜ مَیْ لَرُسَیٜدَ دَوُࢽْجَࢽْ ثَتُّلُوِیَ، سَ أَدْࢽْ دُوُوࢽْ أَسٜمْ ثَدَیْ؞»
[36] کُورُو وَلْدٜ تَیِرُو مِسَلْ أَدَ ثْدّٜ: «وُࢽْدُمَ کَجْمُ بْرِࢽْ کَرْجٜ غُࢽْتُ ࢽغُوجٜ کَجْمُ دِࢽَرُو ثُکُّدُدِوَوُو؞ ࢽغَیْ ثْدِیَ، کَجْمُ بْرِࢽْ یٜ کَرْدْࢽَ، غُࢽْتُ بْرِࢽْ یٜ دِࢽَدْرُو ثَࢽْدْࢽِّ؞
[37] کُورُو وُࢽْدُمَ دِبٜࢽْ بْرِࢽْ ࢽغُوجٜ سَتْکِ دِࢽَرُو ࢻِجِیوَوُو؞ ࢽغَیْ ثْدِیَ، دِبٜࢽْ بْرِࢽْدْ سَتْکِدَ ࢻَلْجٜ ثِدِرُو ࢻِدِیے، سَتْکِ یٜ بَࢽَّدِ؞
[38] أَعَ، أَمْسُو دِبٜࢽْ بْرِࢽْدَ سَتْکِ بْرِࢽُّو ࢻِجَغَیْ؞
[39] کُورُو وُࢽْدُمَ دِبٜࢽْ دِࢽَ ثَࢽَدْ بْرِࢽْدَ مَجِوَوُو، تِیٜ: ‹دِبٜࢽْ دِࢽَدْ کْجِ،› ثْࢽِ ࢽَࢽْغَرُو؞»