[1] رُحُ اللَّهیٜ عِیسَلَࢽْ دْغَࢽَ دُوُوࢽْ، عِیسَى بْرْمْ جُورْدَࢽِیٜ کُولْجٜ رُحُ اللَّهیٜ تِیَ سِمُوجِیٜ کَرَا دْرِرُو ثُلُوٜ
[2] کَوُ ࢻِدٜوُرُو إِوُلِیسْ تِیَ جَرَࢻْثِ کْرْغَ؞ یِمْ أَࢽِࢽْ عِیسَى أَوِمَ جُوُࢽِّ، ࢽغَوُو أَدْیٜࢽْ کْࢽَ تِیَ کِدَ؞
[3] دَجِ إِوُلِیسّٜ تِرُو: «ࢽِ تَدَ اللَّهیٜیَ، دُوࢽْغُرْ کَوْیٜ أَدْرُو وُلْغْࢽٜ کْمْبُورُو وَلْجُو!» یٜࢽُو؞
[4] عِیسَیٜ: «أَعَ، کِتَوُلَࢽْ رُوُوَدَ: ‹کَمْ کْمْبُو بَسْلَࢽْ غْࢽِ دْغَیْ،›» یٜࢽُو؞
[5] کُورُو إِوُلِیسْ تِیَ ࢽَ تُورِ لَارُو ثَدٜ سَمْدْࢽْ تِرُو لَرْدُوَ دُࢽِیَیٜ سَمَّا ࢻْلٜیٜىٰࢽِّیَ، تِرُو:
[6] «کْࢽْدُوُووَ دَرَجَا لَرْدُوَ أَࢽِ سَمَّیٜدَ ࢽِرُو ࢽجِکِّ؞ أَوُو أَࢽِیَ وُرُو سَدْࢽَ، وُ یٜ کَمْ رَاکّْࢽَرُو تَیِیَ یِکِّ؞
[7] وُرُو سُجَدَ سْدّْمِیَ، أَࢽِ سَمَّ کَاࢽْمْبُو وَلْجَیْ،» یٜࢽُو؞
[8] عِیسَیٜ: «أَعَ، کِتَوُلَࢽْ رُوُوَدَ: ‹اللَّه کْمَࢽْدٜرُو سُجَدَ یِدّٜ، تِ تِلُوࢽْجُرُو أَمْبْتْکْࢽٜ!›» یٜࢽُو؞
[9] کُورُو یَیٜ إِوُلِیسْ تِیَ جٜرُجَلٜمْبُو ثَدٜ لُویْلُویْرَمْ ࢻَدُو اللَّهیٜࢽْ غْࢽَیٜࢽِّیَ، تِرُو: «ࢽِ تَدَ اللَّهیٜیَ، ࢽَ أَدْࢽْ سْکْتْࢽٜ ثِدِرُو یُکُّرٜ!
[10] أَوُووَ کِتَوُلَࢽْ رُوُوَدَ: ‹اللَّه مَلَیْیَوَࢽْجُرُو وَدَ ثٜ ࢽِیَ ࢽجَرِوِ،›
[11] کُورُو: ‹ࢽِیَ مُکُّوࢽْجَࢽْ کَمْࢽْجَغَیْ بَرٜ سِࢽْمْ کَوْرُو غْمْدْغْࢽِّرُو،›» یٜࢽُو؞
[12] عِیسَیٜ تِرُو کَلَکْثِیٜ: «أَعَ، کِتَوُیٜ وُلْجْࢽَ: ‹بَرٜ اللَّه کْمَࢽْدٜیَ رِجَمّْمِّ!›» یٜࢽُو؞
[13] تِیَ جَرَࢻْثٜ کٜرْࢽِّیَ، إِوُلِیسْ تِیَ حَرْ سَ غَدٜ لَارُو کُولْیٜࢽُو؞
[14] دَجِ عِیسَى کْࢽْدُوُو رُحُ اللَّهیٜیَ ثِدِ غَلِلٜىٰرُو وَلَّدَ؞ لَوَرْࢽْجُ یٜ لَرْدُ سَمَّرُو تَتَرْغَادَ؞
[15] دَࢽْدَلْ دَࢽْدَلُّو لٜجٜ جَمَا أَلَمْغٜࢽِّیَ، وُࢽْدُسُو تِیَ جَجَکّٜࢽُو؞
[16] ࢽغَیْ دُوُوࢽْ عِیسَى ࢽَجَرَتْ بْلَ وُرَجْࢽَدْرُو کَدِیُو؞ کْلَ أَدَࢽْجُیٜࢽْ یِمْ تُسْتُیٜیَ دَࢽْدَلُّو ࢽغَیٜ جَمَدْرُو کْرَ ࢽجْدُّورُو ثِجٜ دَیٜࢽُو؞
[17] تِرُو کِتَوُ ࢽَوِ إِشَیَیٜ ثَدٜ کَیٜࢽِّیَ، ࢽَ أَدْ رُوُوَدَدَ کِوَࢽْدُو؞ تِیٜ:
[18] «رُحُ کْمَࢽْدٜىٰ وُلَࢽْ کْرْغَ، تِمَ کَوُرِ کْجِ تَلَاوَرُو وُلْغْکُّورُو وُوَ غَلَسْࢽَ ࢽَࢽْغَرُو؞ أَمْ ثَدَࢽٜ کَرٜیَرُو وَلْجَࢽَرُو ࢽَࢽْکَمْ کْلَیٜ ثَوَࢽْدِ، کَمْبُوَ یٜرُو سِمْ ثَوَࢽْدِ وُلْدُوُرُو وُوَ سِࢽُودُو؞ کُورُو أَمْ ثُرُو جْکْتُیٜࢽْ دَسَاࢽَیٜ أَسْرْࢽْجَ جَکْتُرُو وُوَ سِࢽُودُو؞
[19] ࢽغَیْمَ ‹سَ سٜرْ کْمَࢽْدٜىٰ ࢻَࢽْدُویٜ ثْدْࢽَ!› جَمَرُو وُلْغْکّٜ مَوُودُرُو کَدِکُّو،» یٜࢽُو؞
[20] دَجِ کِتَوُدَ جَکْثٜ کِسْتُوُمَدْرُو کَلَکْثِیٜ ࢽَࢻْکٜࢽُو؞ أَمْ سَمَّ دَࢽْدَلْدْࢽْ تِرُو سِمْ ࢻِجَاࢽَ دُوُوࢽْ،
[21] تَیِرُو: «کُمَ أَوُو کِتَوُلَࢽْ رُوُوَدَ سْمُوࢽْدُوࢽْ ࢻَࢽُّوَّ أَدْ وَکَّجْࢽَ،» یٜࢽُو؞
[22] تَیِ سَمَّ کْلَ مَࢽَ سٜرَّ ثِࢽْجُࢽْ ثُلُوُࢽَ أَدْیٜࢽْ أَجَࢻْثَࢽٜ تِیَ جَجَکْثَࢽٜ أَمَࢽْجَرُو: «أَ! کَمْ أَتّْ تَدَ یُوسُࢻُیٜدْمَ، غْࢽَ؟» ثَࢽِ؞
[23] دَجِ عِیسَیٜ تَیِرُو: «ࢻَغَتُّو کَرَوْ أَدَ سْدُّوٜ: ‹کَرْوُࢽْمَ، کْلَࢽْمْ إِسَࢽْغَاࢽٜ! أَوُو أَجَبَّ أَجَبَّ بْرْࢽِ کَࢻَرْࢽَامبٜࢽْ دِمَّ ࢻَࢽِّیٜࢽَدَ بْلَࢽْدٜ یٜࢽْ دٜ، رُیْیٜ!› ࢽُوِ؞
[24] جِرٜمَرُو ࢽَیِرُو وُلْࢽْجَغَکِّ، ࢽَوِ ࢻِمَا بْلَ وُرَجْࢽَلَࢽْ کَسَثَّࢽِّ؞
[25] «جِرٜمَرُو ࢽَیِرُو وُلْࢽْجَغَکِّ، کُرٜࢽْ جَمَࢽْ ࢽَوِ إِلْیَیٜࢽْ لَرْدُ إِسْرَاءِیلَیٜࢽْ کَمُوَ کوَ ࢻَثَّاࢽَا کَدَ مبٜجِ، کُورُو کْرْوُ یَکُّ رٜدَارُو إِࢽْغِ دُرُو وَجٜ لَرْدُ سَمَّرُو کْࢽَ کُرَ کْرْغَوُو؞
[26] أَدْ یَیٜ کَمُ کوَ ࢻَثّْغْࢽَا لَا بْلَ سَرٜࢻْتَ لَرْدُ سِدُوࢽّٜدْرُو غْࢽِیَ، اللَّه ࢽَوِ إِلْیَا ࢽَ وُࢽْدُࢽْجَمَیٜرُو ثُࢽُودْࢽِّ؞
[27] کُورُو جَمَࢽْ ࢽَوِ إِلْیَسَیٜࢽْ لَرْدُ إِسْرَاءِیلَیٜࢽْ أَمْ بَرَسُوَ کَدَ مبٜجِ؞ أَدْ یَیٜ ࢽَامَࢽْ کَمْ لَرْدُ سِرِیٜیَ غْࢽِیَ، ࢽَوِ إِلْیَسَ وُࢽْدُࢽْجَمَا إِسَࢽْغَجْغْࢽِّ،» یٜࢽُو؞
[28] أَدَ ࢻَࢽْغٜرَࢽِّیَ، أَمْ دَࢽْدَلْࢽِࢽْ دَسَاࢽَ سَمَّ تِرُو ࢻُمْ غْرْغَیٜىٰرَ؞
[29] ثِجَࢽٜ تِیَ ثَدَࢽٜ ࢽغَوُو بْلَیٜرُو ثَتُّلُوٜ ثِ کَوْ کُرَ بْلَࢽْجَ کْلَدْࢽْ غَرْجَࢽَدْیٜرُو کٜسَدُو؞ ࢽَدْࢽْ تِیَ ثِدِیَرُو غْࢻْتُوُ مَجَیْ دُوُوࢽْ،
[30] عِیسَى دَوُࢽْجَیٜࢽْ رٜجٜ کُوجٜ لٜىٰࢽُو؞
[31] دَجِ عِیسَى بْرْࢽِ کَࢻَرْࢽَامبٜ ثِدِ غَلِلٜىٰرُو کَدِیُو؞ یِمْ تُسْتُیٜ کِدْࢽِّیَ، دَࢽْدَلُّو ࢽغَیٜ جَمَا أَلَمْدُ بَدِیٜࢽُو؞
[32] جَمَدْ أَلَمْدُࢽْجُدَ أَجَࢻْکٜرَ، کْࢽْدُوُووَرُو مَࢽَجِ ࢽَࢽْغَرُو؞
[33] ثُرُو دَࢽْدَلْدْیٜࢽْ کَرُوَمَ لَا مبٜجِ، کَمْدْ بُرْوُ دُࢽُووَرُو ثَکّٜ:
[34] «أَ! عِیسَى کَمْ ࢽَجَرَتّٜ، أَوِ لَمْبُوࢽْمْ أَࢽْدِرُو؟ أَࢽْدِیَ سِدُوُرُو وَ کَدِمْ؟ ࢽِیَ أَسُࢽْجْکّْࢽَ، ࢽِمَ تَیِرْ اللَّهیٜدْ وُو!» یٜࢽُو؞
[35] أَمَّ عِیسَى سٜدَࢽْدْرُو جْکَّدٜ مَࢽَ دَࢻْثِیٜ: «ثِࢽْمْ جَࢽْغٜ کَمْدَ کُولّٜ لُوٜ!» یٜࢽُو؞ سٜدَࢽْدْ کَمْدَ دَوُࢽْجَࢽْ ثِدِرُو یَࢻْکٜىٰࢽِّیَ، تِیَ لُورُجْࢽِّࢽْ کُولْجٜ کِلُوُو؞
[36] تَیِ سَمَّ أَجَࢻْثَࢽٜ أَمَࢽْجَرُو: «أَتّْ مَࢽَ جِرِ ࢻِ؟ کْࢽْدُوُووَرُو سٜدَࢽْسُورُو وَدَ ثِیَ، ثَلُوِ!» ثَࢽِ؞
[37] لَوَرْ عِیسَیٜ ثِدِدْ ࢽغَرُو تَتَرْغَادَ؞
[38] عِیسَى دَࢽْدَلْدْࢽْ کِلُوُࢽِّیَ، ࢻَدُو سِمَࢽّٜرُو لٜىٰࢽُو؞ یَ کْسَیْ سِمَࢽّٜدْ دُوࢽْدِ، کَࢽْغٜ تِیَ جَوْرُو ثْدَࢽَ؞ دَجِ عِیسَرُو لَوَرْࢽْجُ وُلْیٜىٰرَࢽِّیَ،
[39] إِسٜ تِرُو ࢽغُجِیٜ کَࢽْغٜدْرُو کِکَّدُو؞ کَࢽْغٜدْ تِیَ کُولْجٜ، یَ کْسَیْ یٜ سَدْمَࢽْ ثِجٜ تَیِیَ سُوسَیٜࢽُو؞
[40] کْࢽْغَلْ کِکُّرْࢽِّیَ، أَمْࢽْجَ دُوࢽْدِ کَسُوَ جِرِ جِرِیَ سَمَّا ࢽَ عِیسَیٜرُو کٜوُدُو؞ وُࢽْدُࢽْجَ یَیٜرُو مُکُّو غْࢽَجِیٜ إِسَࢽْغَیٜىٰࢽُو؞
[41] سٜدَࢽَّ یٜ أَمْ ࢽغْوُࢽْ ثَلُوٜ یِلْجَیْیَرُو: «أَ! ࢽِ تَدَ اللَّهیٜ!» ثَࢽِ؞ أَمَّ عِیسَى تَیِرُو جْکَّدٜ مَࢽَدُ أَمَرْجْغْࢽِّ، تِ أَلْمَسِیوُرُو ࢽُوجَࢽَ ࢽَࢽْغَرُو؞
[42] وَجْࢽَࢽْجُوَ سُوَ لْࢻْ عِیسَى ثِجٜ ثُلُوٜ ࢽَ وُࢽْدُمَ بَوُورُو لٜىٰࢽُو؞ أَمْ ࢽغْوُ تِیَ مَدَرُو کٜلُوُو؞ کٜوَࢽْدْࢽِّیَ، بَرٜ تَیِیَ کُولْجْࢽِّرُو تِیَ رُودُرُو مَیٜرَ؞
[43] أَمَّ عِیسَیٜ تَیِرُو: «دُولٜ بْلَوَ غَدٜرُو لٜکّٜ کَوُرِ کْجِ ࢽُودُو بَرْغَا اللَّهیٜدَ وُلْغْکِّ؞ أَدْمَ ࢽَࢽْغَرُو اللَّه وُوَ سِࢽُودُو،» یٜࢽُو؞
[44] أَدْغَیْمَ ثِدِ یَحُدِیَیٜ یٜࢽْ دَࢽْدَلْࢽْجَࢽْ جَمَرُو کَوُرِ کْجِدَ وُلْیٜىٰࢽُو؞