[1] کُورُو عِیسَى وَلْدٜ ࢻُوُرَوَدْرُو: «غَرِوُ لَا وَکِّلْࢽْجُوَ دُوُوࢽْ، أَمْ ࢽَࢽْجُرُو إِسَࢽٜ وَکِّلْࢽْجُدَ ࢽغَدَرْجَࢽٜ أَرْسِیࢽْجُ بَسَرْجِ یٜرَ؞
[2] غَرِوُدْ تِیَ بُواْجٜ: ‹أَوِ کْلَࢽْمْلَࢽْ وُلْجَیْ ࢻَکّْࢽَدْ؟ بَلَسْ سْدّٜ، کُوَ أَدْࢽْ ࢻُوُࢽْ ࢽِ وَکِّلْࢽِ غْࢽِ،› یٜࢽُو؞
[3] دَجِ وَکِّلْدْیٜ کَرْوُࢽْجُࢽْ: ‹بَࢽِ ࢽغِمْبَ ࢽَࢽْوَکِّلْࢽِࢽْ وُوَ سُتُّلُوُࢽَدْ، أَوِ غْلٜ دِکِّ؟ دُࢽُوࢽِ بَرٜىٰ بَوُو، کُورُو لُواْ دِیُو یٜ وُرُو ࢽَࢽْغُوَ؞
[4] تُو، أَوُو وُوَ کِدَࢽِࢽْ سُتُّلُوِیَ دِکّٜ أَمْ ࢻَࢽّجَࢽْ سَمُویِدَ ࢽُوکّْࢽَ،› یٜࢽُو؞
[5] «دَجِ أَمْ دُوُوࢽْ بَࢽْجُ ࢽغِمْبَ کَسُرُو جْغَیْ سَمَّا تِلُو تِلُویٜࢽْ بُواْجٜ بُرْوُویٜدْرُو: ‹ࢽدَوُرُو بَࢽِ ࢽغِمْبَ ࢽِیَ ࢽجْغَیْ؟› ثْࢽٜ تِیَ کِوُورُو؞
[6] تِیٜ: ‹کْࢽْدَوُ جَیْتُࢽّٜ تُوࢽُو مِیَرُو،› یٜࢽِّیَ، وَکِّلْدْیٜ تِرُو: ‹کَکَّدُࢽْمْ کَسُیٜ ࢽغُوࢽٜ دُوَࢽْ ࢽَمّٜ ࢻِوُ رُوُࢽٜ؞›
[7] کُورُو کَمْ غَدٜرُو: ‹ࢽِ ࢽدَ، ࢽدَوُرُو ࢽِیَ ࢽجْغَیْ؟› یٜࢽُو؞ ‹أَلْغَمَ بُوُ مِیَرُو،› یٜࢽِّیَ، وَکِّلْدْیٜ: ‹کَکَّدُࢽْمْ ࢽغُوࢽٜ ࢻِسْکُ رُوُࢽٜ،› یٜࢽُو؞
[8] بَࢽْجُ ࢽغِمْبَدْ وَکِّلْ جِرٜ بَوُووَدَ کْلَ ࢽَࢽْغَࢽْجُ أَدْیٜࢽْ کِࢽْغُورُو، دَلِلْࢽْجُدْ أَمْ دُࢽِیَیٜ أَرْسِیࢽْجَلَࢽْ ࢽَࢽْغَ کَمْ ࢻَࢽْدُویٜࢽْ أَمْ ࢽُرّٜیَ کُوجَࢽَ ࢽَࢽْغَرُو؞
[9] ࢽَیِرُو وُلْࢽْجَغَکِّ، أَرْسِیے دُࢽِیَ أَدْیٜلَࢽْ سَوَوَ ࢻَࢽْدُواْ؞ سَ دَجْࢽَلَࢽْ، ࢽَیِیَ کْࢽْدْغَیْرَمْ سَوِسُویٜࢽْ ࢽغْلَرُو ࢽجَمُویِ؞
[10] «کَمْ أَوُو غَࢽَࢽْ جِرٜیَدْ، ࢽغْوُ یٜࢽْ جِرٜیَ؞ کُورُو کَمْ أَوُو غَࢽَࢽْ جِرٜ بَوُووَدْ، ࢽغْوُ یٜࢽْ جِرٜ بَوُووَ؞
[11] أَرْسِیے دُࢽِیَ أَدْیٜࢽْ جِرٜࢽَمْبُ دِوَّا، وُࢽْدُ غْلٜ أَرْسِیے جِرٜىٰ سَمٜىٰدَ مُکُّوࢽْدُورُو ثَکِّ؟
[12] کُورُو لْمَࢽْ کَاࢽدُو غْࢽِدْلَࢽْ جِرٜࢽَمْبُ دِوَّا، وُࢽْدُ غْلٜ ࢽَیِرُو ࢽُوَ کَاࢽدُو ࢽجَدِ؟
[13] وُولُودِ ࢻِمَ رَکْثٜ وُولُودِ کْمَ یِࢽْدِیٜرُو وَلْجِوَوُو؞ بِ ࢻَلْ وَجٜ ࢻَلْ ثْرَیِ، بِ ࢻَلْ بْرْسْمْجٜ ࢻَلْ رُجِ؞ ࢽَیِ یٜ رَࢽْغُوٜ وُولُودِ اللَّهَ وُرِیَیٜرُو وَلُّوَّوُو؞»
[14] ࢻَرِسَوَ تَیِ وُرِ رَوُووُ ࢽَࢽْغَرُو أَوُو أَࢽِ سَمَّا ࢻَࢽْغٜرَࢽِّیَ، عِیسَرُو رُدُ غْࢽَیٜىٰرَ؞
[15] عِیسَیٜ تَیِرُو: «ࢽَیِ ࢻُوُ أَمْبٜࢽْ کْلَࢽْدُووَ جِرٜوُرُو ࢽغُوࢽُوَّ، أَمَّ اللَّه أَوُو کَرْوُࢽْدُویٜ ࢽُوجْࢽَ؞ أَوُو ࢻُوُ أَمْبٜࢽْ ࢽغْلَرُو جَجَکْثَیْدْ ࢽَ اللَّهیٜࢽْ وَادَ؞
[16] «أَتَّوْرَا کِتَوُوَ ࢽَوِیَیٜیَدْ دَسَاࢽَ دُوُوࢽْ حَرْ جَمَࢽْ یَحْیـَى کَسَلَمَیٜ کَدِیُو؞ تْࢽْ سَ أَدْࢽْ کَوُرِ کْجِ ࢽُودُو بَرْغَا اللَّهیٜ أَمْبُو وُلْدِیے، کُورُو وُࢽْدُ یَیٜ تِرُو ࢽغَوُورُو مْلْدِ؞
[17] أَدْ یَیٜ سْکَّلْ ࢻَلْ أَتَّوْرَیٜ بَوُورُو وَلْدُدْرُو سَمٜیَ ثِدِیَ بَوُورُو وَلْدُمَ بُدُ وُو؞
[18] وُࢽْدُ دُوُوࢽْ کَمُࢽْجُوَ دْࢻْثٜ غَدٜ ࢽِیَجْࢽَدْ کْࢽْجْࢽَ ثْدْࢽَ؞ کُورُو کَمْ دُوُوࢽْ کَمُ دْࢻْکَدَا ࢽِیَجْࢽَدْ، تِ یٜ کْࢽْجْࢽَ ثْدْࢽَ؞
[19] «غَرِوُ لَا مبٜجِ، یِمْ ࢽغُسُوࢽْ کَجْمُ کِمٜ سُو، کَرٜ لِࢽّٜ ࢽغَلْوُو سُو لُجِ یٜ، کُلُّمْ تَمْتَمْبَ دَرَجَالَࢽْ ࢽَࢻْثِ یٜ؞
[20] ثِࢽَّ ࢻَࢽّجُیٜࢽْ ࢽغُدِ لَا یٜ بُووَدَ تِیࢽْجُ سَمَّࢽْ تُࢽُووَ مبٜجِ، ثُࢽْجُ لَجَرُسْ؞
[21] کْࢽَࢽْجُوَدْرُو، کْمْبُو تٜوُرْ غَرِوُدْیٜࢽْ ثِدِرُو ࢻِدْࢽَدَ بُورُو مَࢽْغَرْجِ کْرْغَ، کُورُو کْرِیَمَ إِسَࢽٜ تُࢽُووَࢽْجُدَ مْمْلَثَّیْ؞
[22] ࢽغُدِدْ بَوُویٜࢽِّیَ، مَلَیْیَوَ تِیَ ࢽغُوجَࢽٜ غْرٜ ࢽَوِ إِبْرَاهِیمْبٜرُو کٜسَدُو؞ غَرِوُدْ یٜ بَوُوجٜ تِیَ سِتّْرَیٜرَ؞
[23] «ثُرُو کَࢽُّیٜࢽْ أَجَوُ جَوْرُو ثَیْ دُوُوࢽْ، کْلَ سَࢻْکٜࢽِّیَ، کُرُوُࢽْ ࢽَوِ إِبْرَاهِیمْبَ غْرٜࢽْجُࢽْ لَجَرُسَّ کِرُو؞
[24] دَجِ یِلْجٜ: ‹بَوَ إِبْرَاهِیمْ، وُوَ ࢽجُࢽُوسْࢽٜ لَجَرُسَّ ࢽُودٜ ثِ ࢽغُلُوࢽْدُوࢽْجُیٜ إِࢽْغِرُو لْࢻْثُوُو تْلَمِّ سَمْجُو، ثُرُو کَࢽُّ أَدْیٜࢽْ جَوْرُو بُوࢽٜ یَکِّ، دِیٜ!› یٜࢽُو؞
[25] أَمَّ ࢽَوِ إِبْرَاهِیمْبٜ تِرُو: ‹تَدَࢽِ، تَࢽْغٜ سَ دُࢽِیَلَࢽْ جَوْرُو کْجِ یَمِدْ، لَجَرُسْ یٜ جَوْرُو کُتُّ ثَیْدْ؞ أَمَّ کْرْمَ تِ ࢽَ أَدْࢽْ رُوࢽْجُ بُووَدَ، ࢽِ یٜ ثُرُو بُوࢽٜىٰࢽْ کْرْغَمْ؞
[26] کُورُو ࢽغَوُو أَدْیٜمَࢽْ کَتّٜࢽْدٜࢽْ بْلَا کُرَ کُرُوُ ࢻٜتَّ، بَرٜ ࢽَࢽْدٜࢽْ وُࢽْدُمَ ثِجٜ ࢽَࢽْدُورُو لٜجْࢽِّ، بِ ࢽَࢽْدُو یٜࢽْ وُࢽْدُمَ ࢽَࢽْدٜرُو إِسْࢽِّ ࢽَࢽْغَرُو!› یٜࢽُو؞
[27] تِیٜ: ‹مَرْࢽٜ، بَوَ، لُواْࢽْجْکّْࢽَ، لَجَرُسَّ ࢻَدُو بَوَࢽِیٜرُو ࢽُودٜ،
[28] یَاࢽَࢽِ أُوُ مبٜجِ؞ تَیِیَ غَلَجُو، بَرٜ تَیِ یٜ ࢽَ أَجَوُیٜ أَدْرُو إِسَࢽِّرُو!›
[29] أَمَّ ࢽَوِ إِبْرَاهِیمْبٜ تِرُو: ‹أَتَّوْرَا کِتَوُوَ ࢽَوِیَیٜیَ ࢽَࢽْجَࢽْ مبٜجِ؞ کُولّٜ تَیِیَ ࢻَࢽْجَ!› یٜࢽُو؞
[30] کُورُو تِیٜ: ‹أَعَ، بَوَ إِبْرَاهِیمْ! أَمَّ کَمْ لَا کَرْمُولَࢽْ ثِجٜ ࢽَࢽْجَرُو لٜىٰࢽُووَ، تُوَ ثَدِ،› یٜࢽِّیَ،
[31] ࢽَوِ إِبْرَاهِیمْبٜ: ‹أَتَّوْرَا کِتَوُوَ ࢽَوِیَیٜیَ ࢻَࢽْدُرُو وَیٜرَا، کَمْ ࢽُࢽَ رُووَرُو وَلْجٜ ثِجْࢽَمَ کَسَثَّیْوَوُو؞›»