[1] یِمْ لَا عِیسَى ࢻَدُو اللَّهیٜࢽْ جَمَا أَلَمْجٜ تَیِرُو کَوُرِ کْجِ اللَّهیٜدَ وُلْجِیے دُوُوࢽْ، وُرَوَ رِمَࢽَّیٜیَ مَلْمْبَ أَتَّوْرَیٜیَ أَمْوُرَوَا ࢽَࢽْجُرُو إِسَࢽٜ
[2] تِرُو: «أَࢽْدِرُو وُلْسَغَࢽٜ، کْࢽْدُوُو ࢻِلَࢽْ أَوُو أَࢽِیَ دِمِ؟ وُࢽْدُ ࢽِرُو کْࢽْدُوُو أَدَ ࢽجُو؟» ثَࢽٜ تِیَ کٜوُورُو؞
[3] عِیسَیٜ تَیِرُو: «وُ یٜ ࢽَیِرُو کُورُو ࢻَلْ ࢽجَدّْکِّ، وُلْسْغْࢽُواْ!
[4] کَسَلَ یَحْیـَى جَمَرُو ثْدّْࢽَدْ، سَمٜىٰࢽْ کَدِیُو رَ کَمْبٜࢽْ؟» ثْࢽٜ تَیِیَ کِوُورُو؞
[5] دَجِ کَتّٜࢽْجَࢽْ سَوَرْدَࢽٜ: «‹سَمٜىٰࢽْ› وُلِّیٜیَ، أَࢽْدِرُو: ‹تُو، أَوِرُو غْلٜ تِیَ کَسَدُّوِّدْ؟› ثْࢽٜ سَوُورِ؞
[6] أَمَّ ‹کَمْبٜࢽْ› وُلِّیٜیَ، جَمَ سَمَّ أَࢽْدِرُو کَوْ غْغْمْسَغَࢽٜ سٜىٰسِ، دَلِلْࢽْجُدْ یَحْیـَىٰ ࢽَوِرُو ࢽغُوجَࢽَ ࢽَࢽْغَرُو؞»
[7] دَجِ عِیسَرُو ࢽدَرَࢽْ کَدِیُومَرُو ࢽُوجَࢽِّ یٜرَ؞
[8] عِیسَیٜ تَیِرُو: «وُ یٜ کْࢽْدُوُو ࢻِلَࢽْ أَوُو أَࢽِیَ دِکِّدَ وُلْࢽْجَغَکِّوَوُو،» یٜࢽُو؞
[9] دَجِ عِیسَى مِسَلْ أَدَ جَمَرُو مَࢽَدُوُ بَدِیٜࢽُو؞ تَیِرُو: «کَمْ لَا جْرْوُ إِࢽَبّٜ ثْدٜ جْرْوُوُ لَارُو أَغْرِجِیٜ بْلَوُرُو کَوُ کَدَیٜرُو سَࢻْکَدَ؞
[10] سَ ࢻْرْدُویٜ کِدْࢽِّیَ، ࢽُوَࢽْجُ ثُوَࢽْدُورُو کَرٜیَࢽْجُ لَآ ࢽَ جْرْوُوُدْیٜرُو کِࢽُودُو؞ أَمَّ جْرْوُوُدْ تِیَ ثَدَࢽٜ بَکْثَࢽٜ مُکُّو دٜیَ دُیٜرَ؞
[11] کُورُو وَلْدٜ کَرٜیَ غَدٜ کِࢽُودُو؞ تِ یٜیَ ثَدَࢽٜ بَکْثَࢽٜ بَسَرْجَࢽٜ مُکُّو دٜیَ دُیٜرَ؞
[12] کُورُو وَلْدٜ کَرٜیَ یَکُّیٜ کِࢽُودْࢽِّیَ، ثَیٜ غَیْ تِ یٜیَ لُورُجَࢽٜ دُیٜرَ؞
[13] دَجِ کْمَ جْرْوُدْیٜ: ‹أَوِ غْلٜ دِکِّ؟ تَدَࢽِ رَاکّْࢽَدْمَا ࢽُودْکِّ؞ وَࢽٜىٰ تِرُو دَرَجَ ثَدِ،› یٜࢽُو؞
[14] أَمَّ جْرْوُوُدْ تَدَࢽْجُدَ کٜرُࢽِّیَ، کَتّٜࢽْجَࢽْ: ‹أَدْمَ وَرَسَمَدْ وُو! تِیَ یٜجِیُو، وَرَسَدْ کَاࢽدٜرُو وَلْجُو!› یٜرَ؞
[15] دَجِ تِیَ ثَدَࢽٜ جْرْوُدْلَࢽْ ثَتُّلُوٜ رُورُو کٜىٰسُو؞ «تُو، کْمَ جْرْوُیٜدْ أَوِ ثْدِ؟
[16] إِسٜ جْرْوُوُ أَࢽِیَ رُورُو ثٜجٜ أَمْ غَدٜرُو جْرْوُࢽْجُدَ ثِ،» یٜࢽُو؞ جَمَدْ أَدَ ࢻَࢽْغٜرَࢽِّیَ، تَیِیٜ: «سُوَࢽَ! بَرٜ ࢽغَیْرُو وَلْجْࢽِّ!»
[17] أَمَّ عِیسَى تَیِیَ ࢽِࢽِجٜ: «تُو، أَوِ مَاࢽَ أَوُو کِتَوُلَࢽْ رُوُوَدَ أَدْیٜ؟ «‹کَوْ دُوُوࢽْ ࢻَدُو تَࢽْدُومَسُو وَجَࢽَمَدْ، تِمَ کَوْ تَࢽْدُویٜ سَمَّرُو ࢻَیْدَارُو وَلْجْࢽَدْ وُو؞›
[18] «ࢽُوࢽُواْ، کَمْ کْلَ کَوْ أَدْیٜرُو ثُکُّرْࢽَمَدْ ࢽَࢽَمْدِ، کُورُو کَوْدْ کَمْبُو ثُکُّرِیَ، کْلُوُرُو کَلَکْثِ،» یٜࢽُو؞
[19] مَلْمْبَ أَتَّوْرَیٜیَ وُرَوَ رِمَࢽَّیٜیَ جَوَلْ تِیَ تَیٜ مَجَیْ دُوُوࢽْ، جَمَدَ رِیٜرَ، دَلِلْࢽْجُدْ کْلَࢽْجَمَࢽْ مِسَلْدَ کِدُورُو أَسُجَࢽَ ࢽَࢽْغَرُو؞
[20] دَجِ وُرَوَ أَدِࢽْوُیٜ أَࢽِ عِیسَىٰ مْلَسْتُ بَدِجَࢽٜ ثُرُو مَࢽَࢽْجُیٜࢽْ ثَدَ مُکُّو غُومْࢽَیٜرُو ثَسَکُّورُو أَمْ لَا جِرٜوُ غَیْرُو کْلَࢽْجَ کَلَکْثَࢽَا ࢽَࢽْجُرُو کٜࢽُودُو؞
[21] تِرُو: «سَیِࢽَّ، مَࢽَ وُلْدُࢽْمْبَ جَمَا أَلَمْدُࢽْمْبَ سَمَّ جِرٜرُو ࢽُوࢽِیٜࢽَ، کُورُو وُࢽْدُمَا غَیِرْࢽْمْبَوُو یٜ، جَوَلْ اللَّهیٜ کَلْکَلُّو یِکّْرَمِ یٜ؞
[22] تُو، کَیْسَرُّو أَکِّ ࢽجُودْ، أَࢽْدِرُو حَلَلْ رَ حَرَمْ؟» ثَࢽٜ تِیَ کٜوُورُو؞
[23] أَمَّ عِیسَى ࢽِیَدِوِࢽْجَدَ أَسُجٜ تَیِرُو:
[24] «وُرُو دِࢽَرِیُسْ ࢻْلٜسْغْࢽُواْ رُکّٜ! ثُوَ کْلَا وُࢽْدُیٜ تِلَࢽْ دَسَا؟» ثْࢽٜ تَیِیَ کِوُورْࢽِّیَ، تِرُو «کَیْسَرّٜ،» یٜرَ؞
[25] عِیسَیٜ تَیِرُو: «دَجِ أَوُو کَیْسَرّٜدَ کَیْسَرُّو یُواْ، کُورُو أَوُو اللَّهیٜدَ اللَّهرُو یُواْ!» یٜࢽُو؞
[26] أَدْغَیْمَ رَکْثَࢽٜ ࢻُوُ جَمَیٜࢽْ عِیسَىٰ ثُرُو مَࢽَࢽْجُیٜࢽْ ثَدَࢽِّ؞ جَاوُࢽْجُدَ جَوْرُو أَجَࢻْثَࢽٜ مْدْکْ ࢽَࢻْکٜرَ؞
[27] سَدُسِیَ لَا، تَیِ ثِࢽُواْ دُࢽِیَیٜیَ کَسَثَّࢽِّدْ، ࢽَ عِیسَیٜرُو إِسَࢽٜ
[28] تِرُو کُورُو ثَدّٜ: «سَیِࢽَّ، ࢽَوِ مُوسَیٜ: ‹کَمْ لَا یَࢽْجُغْࢽَ تَدَ بَوُووَ بَوُوجٜ کَمُ کُولْجِیَ، کَمُ یَࢽْجُغْࢽَ ࢻَثّْغْࢽَیٜدَ ࢽِیَجُو یَࢽْجُغْࢽَرُو کَدُوُ مَجُوُو!› رُوُجْࢽَ؞
[29] أَکُّو یَاࢽَ تُلُرْ مبٜجِ؞ بُرْوُویٜدْ کَمُ ࢽغُوجٜ تَدَ ثُوَࢽْدْࢽِّࢽْ بَوُویٜࢽُو؞
[30] یِࢽْدِیٜدْ یٜ کَمُدَ ࢽِیَیٜࢽِّیَ، ࢽغَیْ؞
[31] یَکُّیٜدْ یٜ ࢽغَیْ؞ أَدْغَیْمَ تَیِ تُلُرْ سَمَّ تَدَ ثَوَࢽْدْࢽِّࢽْ بَوُویٜرَ؞
[32] ࢽغَوُو أَدْیٜࢽْ کَمُدْ یٜ بَوُویٜࢽُو؞
[33] تُو، تَیِ تُلُرْسُو تِیَ ثَمُواْࢽَدْ، ثِࢽُواْ دُࢽِیَیٜࢽْ کَمُ وُࢽْدُࢽْجَیٜرُو وَلْجِ؟» ثَࢽٜ تِیَ کٜوُورُو؞
[34] عِیسَیٜ تَیِرُو: «أَمْ جَمَࢽْ أَدْیٜ لَرُسَ سُو، ࢽِیَ سُو ثَدِ،
[35] أَمَّ أَمْ دُوُوࢽْ لٜیْرَا کَرْمُولَࢽْ ثِدُوَا ثَوَࢽْدْࢽَدْ لَرُسَ سُو، ࢽِیَ سُو ثَدِوَوُو؞
[36] کَرْمُولَࢽْ ثِدُدْࢽْ ࢽُوَࢽْجَا ࢽَࢽْغَرُو، تَیِدْ تَدَوَ اللَّهیٜ، مَلَیْیَوَ غَیْ رَکْثَࢽٜ غَدٜرُو سَࢽُیْوَوُو؞
[37] کُورُو ࢽَوِ مُوسَى کْلَࢽْجُمَ کِتَوُلَࢽْ ࢽَ کَࢽُّ دَوُ ثُوثُّورِ ثَمْبِیٜدْࢽْ أَمْ بَوُوجَࢽَ ثِجَیْدَ تَبَّثّْغْࢽَ؞ تِدْ کْمَࢽْدٜیَ اللَّه إِبْرَاهِیمْبٜیَ اللَّه إِسْحَٰࢼُیٜیَ اللَّه یَعْࢼُوبَیٜیَلَࢽْ بُواْیٜࢽُو؞
[38] کْمَࢽْدٜدْ اللَّه أَمْ سَࢽُࢽَیٜ غْࢽِ، أَمْ رُووَیٜ، ࢽَࢽْجُࢽْ تَیِ سَمَّ رُوࢽْجَا ࢽَࢽْغَرُو،» یٜࢽُو؞
[39] دَجِ مَلْمْبَ أَتَّوْرَیٜ لَایٜ تِرُو: «سَیِࢽَّ، جَاوُࢽْمْدْ کَلْکَلْ!» یٜرَ،
[40] أَدْغَیْمَ وُࢽْدُمَ ثِࢽْجُ مُدُ کَجٜ تِرُو کُورُو غَدٜ ثْدّْࢽِّ؞
[41] دَجِ عِیسَیٜ تَیِرُو: «ࢽدَیِلَࢽْ أَلْمَسِیوُدْ تَدَ مَیْ دَاوُدَیٜ ثَࢽِدْ؟
[42] مَیْ دَاوُدَ کْلَࢽْجُمَ کِتَوُ جَوُرَیٜلَࢽْ مَࢽَجٜ: ‹کْمَࢽْدٜىٰ کْمَࢽِرُو: ࢽَمّٜ کْمْبُورَمِّلَࢽْ دُوُوࢽْ،
[43] کْلَدُووَࢽْمْبَ ثِدِیَ سِࢽْمْبٜرُو یَکّْکُّو! ثْࢽَّ؞›
[44] مَیْ دَاوُدَیٜ تِیَ کْمَلَࢽْ بُواْجْࢽَدْ، ࢽدَیِلَࢽْ غْلٜ أَلْمَسِیوُدْ تَدَࢽْجُرُو وَلْجِ؟» یٜࢽُو؞
[45] جَمَ سَمَّ تِیَ کْرْࢽْجَیْ دُوُوࢽْ، عِیسَیٜ ࢻُوُرَوَࢽْجُرُو:
[46] «مَلْمْبَ أَتَّوْرَیٜرُو حَࢽْغَلْ غْࢽَࢽُواْ! کَلْوُ کُرُوُوَ دَدَدُ ثَرَاࢽَ، کُورُو کَسُوُلَࢽْ لٜوَ دَرَجَآ دَࢽْدَلَّࢽْ بِ مَسْࢽَ کُرَلَࢽْ ࢽَ دَرَجَآ جَوْمَرُو ثَرَاࢽَ؞
[47] کَمُ کوَ ࢻَثّْغْࢽَاسُویٜ کْࢽْدَࢽْجَ سَمَّا جَوُیْ یٜ، حَلْࢽْجَ غْرَدُرُو ࢻُوُ جَمَیٜࢽْ مُودُوَ کُرُوُرُو غْرْجَیْ یٜ؞ أَمْ أَࢽِیٜ أَجَوُࢽْجَ لٜیْرَࢽْ جَوْرُو کُرَ!» یٜࢽُو؞