[1] سَ أَدْࢽْ أَمْ کَدَ کَدَمِ إِسَࢽٜ ثَࢻْتَࢽٜ، حَرْ أَمَࢽْجَا غُغُوَثَّیْ دُوُوࢽْ، عِیسَى بُرْوُولَࢽْ ࢻُوُرَوَࢽْجُرُو مَࢽَدُوُ بَدِیٜࢽُو؞ تَیِرُو: «ࢻَرِسَوَدْرُو حَࢽْغَلْ غْࢽَࢽُواْ، ࢽَࢽْمْࢽَࢻْکْࢽْجَ یِسْ غَیْ؞
[2] أَوِمَ غْرَادَ ࢻٜدٜرُو ثُلُوِوَوُودْ بَوُو، کُورُو أَوِمَ أَسْرّٜ إِسَࢽُودِوَوُودْ یٜ بَوُو؞
[3] أَدْغَیْمَ أَوُو ثُرُو بُࢽٜىٰࢽْ وُلُّوَّدَ کَوْسُلَࢽْ ࢻَࢽْجَیْ، کُورُو أَوُو ثُرُو ࢽغِمْبٜࢽْ تَتَࢻْکْوَّدَ ࢻَرْسَمْلَࢽْ کُرُکْثَیْ؞
[4] «سَوَوَࢽِ، ࢽَیِرُو وُلْࢽْجَغَکِّ، بَرٜ أَمْ رُو کَمْبٜ ثَتُّلُوٜ ࢽغَوُو أَدْیٜࢽْ أَوِمَ غَدٜ رَکْثَࢽٜ ثَدِوَوُودَ رِࢽُوِّ؞
[5] أَمَّ تِ رِࢽُوِمَدَ ࢽَیِرُو ࢻْلٜࢽْجَغَکِّ: تِ دُوُوࢽْ ࢽغَوُو رُو کَمْبٜ ثُتُّلُوُࢽَیٜࢽْ کْࢽْدُوُو تِیَ کَࢽُّ جَاࢽَمَیٜرُو ࢽجَکُّویٜ ثْدَࢽَدَ رِࢽُواْ؞ آه، ࢽَیِرُو وُلْࢽْجَغَکِّ، اللَّهَ رِࢽُواْ!
[6] بِࢽَرُ أُوُ غُرْسُ یِࢽْدِرُو ثَلَدِ، غْࢽَ؟ أَدْ یَیٜ اللَّه ࢻَلْࢽْجَمَا ثْࢻْثِیوَوُو؞
[7] ࢽُوࢽُواْ، کَࢽْدُرِ کْلَࢽْدُویٜمَ سَمَّ کُومْغَدَ؞ بَرٜ رِࢽُوِّ، بِࢽَرُ ࢽغْوُوَ دَرَجَࢽْ کُوࢽُوَّ؞
[8] «ࢽَیِرُو وُلْࢽْجَغَکِّ، وُࢽْدُ دُوُوࢽْ ࢻُوُ أَمْبٜࢽْ تِ کَکّٜ ثْࢽَّمَدْ، تَدَ کَمْبٜدْ یٜ ࢻُوُ مَلَیْیَوَ اللَّهیٜࢽْ کَمْدْ کَاࢽجُ ثْࢽِ؞
[9] أَمَّ کَمْ دُوُوࢽْ ࢻُوُ أَمْبٜࢽْ وُوَ أَࢽْغْرْسْࢽَمَدْ ࢻُوُ مَلَیْیَوَ اللَّهیٜࢽْ أَࢽْغْرْدِ؞
[10] وُࢽْدُ دُوُوࢽْ کْلَ تَدَ کَمْبٜدْیٜࢽْ مَࢽَکُتُّ وُلْجِدْ، تِرُو غَوُرْدِیے؞ أَمَّ کَمْ رُحُ اللَّهیٜیَ بَسِّمَدْ، تِرُو غَوُرْدِیوَوُو؞
[11] سَ ࢽَیِیَ دَࢽْدَلُّو، بِ شَرَرَمْبُو، بِ مَیْرِرُو ࢽجَسَدِیَ، کْلَ أَوُو وُلُّوِیٜࢽْ بِ جِرِ کْلَࢽْدُو مُووُوِیٜࢽْ بَرٜ حَࢽْغَلْࢽْدُو ثِجْࢽِّ،
[12] دَلِلْࢽْجُدْ سَ أَدْࢽْ رُحُ اللَّهیٜ أَوُو وُلْدُیٜدَ ࢽَیِرُو ࢽجَکّْرَیْ ࢽَࢽْغَرُو،» یٜࢽُو؞
[13] ثُرُو جَمَدْیٜࢽْ کَمْ لَایٜ عِیسَرُو: «سَیِࢽَّ، یٜیْیَࢽِرُو وُلْغْࢽٜ، ثُرُو وَرَسَࢽْدٜىٰࢽْ ࢽُوَࢽِ سِیُو!» یٜࢽِّیَ،
[14] عِیسَیٜ تِرُو: «أَ! وُࢽْدُ وُوَ شَرَ کَمْدَمَࢽْدُورُو بِ وَرَسَ دَغَرْدُمَࢽْدُورُو سْدُو؟» یٜࢽُو؞
[15] دَجِ جَمَدْرُو: «حَࢽْغَلْ غْࢽَࢽُواْ! أَرْسِیے لُوَࢻْتُرُو کَࢽُواْ، کَمْ لْمَࢽْ ࢽغْوُ جْغَࢽْدْࢽَ ࢽَࢽْغَرُو غْࢽِ رُووَ دْغَیْ،» یٜࢽُو؞
[16] دَجِ تَیِرُو مِسَلْ ثْدّٜ: «غَرِوُ لَا کُلُوࢽْجُ ࢽٜمَ جَوْرُو کٜکّْࢽِّیَ،
[17] کْلَࢽْجُرُو: ‹ࢽَ ࢽٜمَࢽِ أَدَ ثَمّْمٜ ࢽجَکُّویٜ بَوُودْ، أَوِ غْلٜ دِکِّ؟› یٜࢽُو؞
[18] دَجِ وَلْدٜ: ‹أَکُّو أَوُو دِکِّدْ: جَوُوَࢽِسُووَ وُرْࢽْکّٜ غَدٜ کُرَ کُرَ تَࢽْدْکّٜ ثُرُوࢽْجَࢽْ أَلْغَمَࢽِیَ أَوُو غَدٜ غَࢽْدْکّْࢽَ سَمَّا ثَمّْکّٜ یَکّْکِّ؞
[19] دَجِ وُیٜ کَرْوُࢽِࢽْ: أَکُّو کْمْبُوسُو کْرْوُ کَدَیٜ تَکّْࢽَ؞ غَرَلْ ࢽَمّْکّٜ بُکّٜ یَکّٜ، کْجِ ࢻَکِّ! ࢽْکِّ؞›
[20] أَمَّ اللَّهیٜ تِرُو: ‹ࢽِ حَࢽْغَلْ بَوُووَ! بُࢽٜ أَدْمَࢽْ کَوُࢽْمْ دَجٜ ࢽُمِ! دَجِ أَوُو أَࢽِ کْلَࢽْمْبُو ثَࢻْکْمَّدْ، وُࢽْدُ غْلٜ تَیِیَ جْغَࢽْدِ؟› یٜࢽُو؞
[21] ࢽغَیْمَ کَمْ کْلَࢽْجُرُو أَرْسِیے ثَࢻْثْغْࢽَ، أَمَّ ࢽَ اللَّهیٜࢽْ غَرِوُرُو وَلْجْࢽِّمَدْ، تِ یٜرُو وَکَّجِیے،» یٜࢽُو؞
[22] دَجِ عِیسَیٜ ࢻُوُرَوَࢽْجُرُو: «أَدْ ࢽَࢽْغَرُو ࢽَیِرُو وُلْࢽْجَغَکِّ، بَرٜ کْلَ أَوُو رُوࢽْدُورُو بُوِیٜࢽْ بِ کْلَ أَوُو تِیࢽْدُورُو یَکُّوِیٜࢽْ کَرْوُࢽْغَیْ دِوِّ؞
[23] رُودْ کْمْبُووَ کُوجْࢽَ، کُورُو تِیدْ یٜ کَجْمُوَ کُوجْࢽَ؞
[24] ࢽغَوُسُووَ رُیْوُو، کُلُو یٜ ثَࢽَدِوَوُو، کَلَ یٜ ثَدِوَوُو، کُورُو ࢽغَجِرَمْبَ جَوُوَ یٜ ثَدَࢽِّ یَیٜ، اللَّه تَیِیَ أَمْبَجِ؞ ࢽَیِدْ جَوْرُو ࢽغُدُووَا دَرَجَࢽْ کُوࢽُوَّ، دِیٜ!
[25] وُࢽْدُࢽْدُو غْلٜ رَکْثٜ کَرْوُࢽْغَیْࢽْجُلَࢽْ سَ ࢻَلْ کَوُࢽْجُرُو ثْرْغَیْ؟
[26] تُو، رَࢽْغُوٜ أَوُو کْسْکٜ أَدْمَا دِوَّوُووَ، أَوِرُو غْلٜ کْلَ أَوُووَ غَدٜدْیٜࢽْ کَرْوُࢽْغَیْ دِوِ؟
[27] «ࢻْرٜسُو جِرِ رِجَیْدَ رُیْوُو، ࢽغْࢽْࢻْثَیْوَوُو، کُورُو ثَا ثَدِوَوُو؞ أَمَّ ࢽَیِرُو وُلْࢽْجَغَکِّ، مَیْ سُلَیْمَـٰࢽَ جَوْرُو دَرَجَا یَیٜ، ࢽغَلْتٜمَ کَجْمُ ࢻْرٜ أَࢽِیٜ ࢻَلْࢽْجَا ࢽَࢽْشَوَࢽْ ࢽَجْغْࢽَ ثَکّْࢽِّ؞
[28] اللَّه ࢻْرٜسُو کُ کَرَاࢽْ رِجَیْ بَرِ کَࢽُّرُو ࢻِجَغَیْ أَࢽِیَ ࢽغَیْ جَکْثِدْ، ࢻَغَتُّو ࢽَیِ یٜیَ جَࢽّجَیْ، ࢽَیِ کَمْبْرْسٜ غَࢽَادْ!
[29] بَرٜ أَوُو بُوِیَ یَوِیَا مَࢽُوِّ، بَرٜ کَرْوُࢽْغَیْ دِوِّ؞
[30] جَمَ دُࢽِیَیٜ سَمَّ أَوُو أَࢽِیَ مَجَیْ، أَمَّ بَوَࢽْدُو ࢽَیِ یٜ أَوُو أَࢽِࢽْ مْرَدُࢽْدُووَرُو ࢽُوجْࢽَ؞
[31] أَتّْرُووَ، ࢽُودُوࢽْجُ مَࢽُواْ دُوُوࢽْ، أَوُو أَࢽِ یٜیَ ࢽَیِرُو ࢽجَدِ؞
[32] «ࢽَیِ جَمَ غَࢽَ، بَرٜ رِࢽُوِّ، بَوَࢽْدُو ࢽُودُوࢽْجُ بَرْغَا ࢽَیِرُو ࢽجُورُو ثْرَاࢽَ ࢽَࢽْغَرُو؞
[33] کْࢽْدَࢽْدُو لَدُواْ، وُرِدَ تَلَاوَرُو یُواْ؞ کْلَࢽْدُورُو أَرِتَّ دِࢽْجِوَوُو یِکُّدُدُواْ، أَرْسِیࢽْدُو سَمٜلَࢽْ حَرْ أَبَدَرُو ثٜرِوَوُو، ࢽَ دُوُوࢽْ بَرْوُ یٜ لٜجِوَوُو، کَࢽَمْ یٜ جُوُیْوَوُودْ؞
[34] ࢽُوࢽُواْ، ࢽَ أَرْسِیࢽْدُو دْغَࢽَدْمَࢽْ کَرْوُࢽْدُو یٜ کْرْغَ؞
[35] «ثَࢽْجَࢽْدُو یٜ غٜرُواْ، ࢻَتْلَوَࢽْدُو یٜ وَسْکَدَ کُولُّواْ!
[36] وُولُودِیَ وَلْدُ کْمَࢽْجَیٜ غُرٜجَیْ غَیْرُو دَبَّرْدْࢽُواْ؞ سَ کْمَࢽْجَ لَرُسَرَمْلَࢽْ إِسٜ ثِࢽَّدَ بَکْثِیَمَ، تِرُو کَجَغَیْ؞
[37] بَرْغَࢽْجَ وُولُودِیَ کْمَࢽْجَ إِسٜ تَیِیَ ࢻَادَ ࢽَجِیدْ! جِرٜمَرُو ࢽَیِرُو وُلْࢽْجَغَکِّ، دَبَّرْدٜ تَیِیَ ثَکّٜ مَسْࢽَ دِیُورُو ࢽَࢻْثَࢽٜ إِسٜ تِ کْلَࢽْجُ کْمْبُو تَیِرُو سَجِیے؞
[38] بُࢽٜ دْرْدُ بِ دْرْدُ کُوجْࢽَمَࢽْ کَدِیُورُو وَلْیٜࢽُووَ، تَیِیَ ࢻَادَ ࢽَجِییَ، بَرْغَࢽْجَ!
[39] أَمَّ أَدَ ࢽُوࢽُواْ، ثَ کْمَ ࢻَدُویٜدْ سَ بَرْوُ ࢻَࢽّجُرُو إِسِدَ ࢽُوجْࢽَا، تِیَ کُولْجٜ ࢻَࢽّجُرُو ࢽغَیِوَوُو؞
[40] ࢽَیِ یٜ ࢻَادَرُو دْغَیْوُو، دَلِلْࢽْجُدْ سَ تْمَࢽُوِّلَࢽْ تَدَ کَمْبٜدْ إِسِ ࢽَࢽْغَرُو،» یٜࢽُو؞
[41] دَجِ بِتُرُسّٜ: «کْمَ، مِسَلْ أَدَ أَࢽْدِرُو وَ وُلْسَغَمِ، رَ جَمَ سَمَّرُو؟» ثْࢽٜ تِیَ کِوُورُو؞
[42] کْمَیٜ تِرُو: «وُࢽْدُ غْلٜ وُولُودِ أَمَࢽَّ یٜ، حَࢽْغَلَّ یٜدْ وُو، تِ دُوُوࢽْ کْمَࢽْجَ تِیَ کْرٜجٜ وُولُودِیَ أَمَࢽْجُرُو ࢽُوَࢽْجَ کْمْبُویٜ سَ تْرَاࢽَࢽْ ࢽجُورُو غَلَجِدْ؟
[43] کْجِࢽْجُ وُولُودِ کْمَࢽْجُ وَلْدِیَ، ࢽغَیْ ثْدِ ࢽَجِیدْ!
[44] جِرٜمَرُو ࢽَیِرُو وُلْࢽْجَغَکِّ، کْمَدْ کْࢽْدَࢽْجُ سَمَّا مُکُّو وُولُودِ أَدْیٜرُو ثَکِّ؞
[45] أَمَّ وُولُودِ أَدْ کَرْوُࢽْجُࢽْ: ‹کْمَࢽِ دُوَࢽْ إِسِوَوُو،› ثْࢽٜ وُولُودِیَ أَمَࢽْجُوَ کَمُࢽْ کوَࢽْ بَبَکْتُ بَدِجٜ جُوٜ دِبٜࢽْ ثَࢽٜ سَغَرَࢽْدِ کْرْغَرُو وَلْیٜࢽُووَ،
[46] دَجِ وُولُودِ أَدْیٜ کْمَࢽْجُ یِمْ تْمَجْࢽِّیَ سَ ࢽُوجْࢽِّیَلَࢽْ إِسٜ تِیَ کِرْوُولَࢽْ جَجَرْجٜ ثُرُو أَمَࢽْ بُووُیٜرُو ثَکِّ؞
[47] وُولُودِ مْرَدُ کْمَࢽْجُیٜ ࢽُوجْࢽَ دُوُوࢽْ دَبَّرْدُرُو بِ مْرَدُ کْمَࢽْجُیٜدَ غَلْدُرُو وَجْࢽَمَدْ، جَوْرُو تِیَ کُواْجَیْ؞
[48] أَمَّ وُولُودِ أَوُو کْمَࢽْجُ ثْرَاࢽَ ࢽُوجْࢽِّ دُوُوࢽْ أَوُو تِرُو وُواْمْ غْࢽَدُوُیٜ ثْدْࢽَمَدْ، تِیَ غَࢽَمَرُو کُواْجَیْ؞ وُࢽْدُ دُوُوࢽْ تِرُو أَوُو ࢽغْوُ ثَدْࢽَدْ، ࢽَࢽْجُࢽْ ࢽغْوُ ثَوُورِ؞ کُورُو کَمْ مُکُّوࢽْجُرُو أَوُو جَوْرُو ࢽغْوُ ثَسَکّْࢽَدْ، ࢽَࢽْجُࢽْ ࢽغْوُدْمَا کُوجْࢽَ ثَوُورِ؞
[49] «کَࢽُّ دُࢽِیَرُو ࢽجْتَّرُو کَدِکُّو؞ کَࢽُّدْ کْرْمَمَࢽْ ثَمْبْࢽَا، جَوْرُو رَاکُّو!
[50] وُرُو کَسَلَ لَآ سَدِّ مبٜجِ؞ کَوُ ثٜرِدْرُو، کَسَلَ أَدْیٜ کُرْوُووُࢽْجُ جَوْرُو جَوْ ࢻَکِّ؞
[51] دُࢽِیَرُو ࢽَࢽْلٜوَ وَ کُدُورُو کَدِکُّورُو تْمَیٜوْ؟ أَعَ، ࢽَیِرُو وُلْࢽْجَغَکِّ، ࢽَࢽْلٜوَ غْࢽِ، ࢻِرْدَ؞
[52] ࢽَ أَدْࢽْ ࢻُوُࢽْ ࢻَدُو ࢻَلْࢽِࢽْ کَمْ أُوُ ࢻِرْدَیْ، یَکُّدْ کْلَدُو أَمْ یِࢽْدِیٜرُو وَلْجَیْ، یِࢽْدِدْ یٜ کْلَدُو أَمْ یَکُّیٜرُو وَلْجَیْ؞
[53] أَدْغَیْمَ ࢻِرْدَیْ، بَوَ کْلَدُو تَدَࢽْجُیٜرُو وَلْجِ، تَدَ یٜ بَوَࢽْجُیٜرُو، یَ کْلَدُو ࢻٜرُوࢽْجُیٜرُو وَلْجِ، ࢻٜرُو یٜ یَࢽْجُیٜرُو، یَ کْسَیْ کْلَدُو کَمُ تَدَࢽْجُیٜرُو وَلْجِ، کَمُ تَدَیٜ یٜ کْسَیْࢽْجُیٜرُو؞»
[54] دَجِ عِیسَیٜ جَمَدْرُو: «کٜىٰرَ ࢻْدٜࢽْ ثِجْࢽَ رُوِیَ، سَدْمَࢽْ ࢽَیِیٜ: ‹إِࢽْغِ ࢻَࢽْدِیٜ،› ࢽُوِ، أَدْغَیْمَ وَکَّجِ؞
[55] کُورُو کَرُوَ أَࢽْمْبٜ ثِجْࢽَ رُوِیَ، ࢽَیِیٜ: ‹کُ جَوْرُو کَوْسُوَرُو وَلْجِ،› ࢽُوِ، أَدْغَیْمَ وَکَّجِ؞
[56] ࢽَیِ مْࢽَࢻْکَّسُو، أَوُو سَمٜیَ ثِدِیَلَࢽْ ࢻْلٜدِدَ ࢻِسَرْدُ ࢽُوࢽُوَّدْ، أَوِرُو غْلٜ أَوُو جَمَࢽْ أَدْࢽْ وَکَّجِدَ ࢻِسَرْدُ ࢽُوࢽُوِّدْ؟
[57] «أَوِ ࢽَࢽْغَرُو ࢽَیِدْ کْلَࢽْدُورُو کُومُّوٜ أَوُو دِیُویٜ جُسّْࢽَدَ ࢽُوࢽُوَّوُودْ؟
[58] سَ لَوَلَمَࢽْمْبَ رُوکُّو شَرَرَمْبُو لٜࢽُوِیَ، کْلَ جَوَلّٜدْمَࢽْ کُواْرِ دٜ تَوَکْتْࢽٜ، بَرٜ ࢽِیَ ࢻُوُ أَلْکَلِیٜرُو ࢽجَدْࢽِّرُو؞ أَدْ غْࢽِیَ، أَلْکَلِ ࢽِیَ مُکُّو سُوجِیٜرُو ࢽجَکّٜ، سُوجِ یٜ ࢽِیَ کُوسُولَࢽْ جَࢽّجِیے؞
[59] ࢽِرُو وُلْࢽْجْغْکِّ، ࢽَدْࢽْ تْمَّرُو لُوُمْبَوُو، سَیْ وُرِدَ ثُوتُّو رْمْبْمِیَ دُوُوࢽْ،» یٜࢽُو؞