[1] دَجِ عِیسَى مٜوُࢽْ یِࢽْدِࢽْدَ بُواْجٜ تَیِرُو کْࢽْدُوُو سٜدَࢽْ سَمَّا دُدَیٜیَ أَمْ کَسُوَا إِسَࢽْغَدُوُیٜیَ ثٜ
[2] تَیِرُو لٜجَ کَوُرِ کْجِ ࢽُودُو بَرْغَا اللَّهیٜ جَمَرُو وُلْجَا أَمْ دُوࢽْدِ یٜیَ إِسَࢽْغَجَا یٜࢽُو؞
[3] تَیِرُو: «بْلَوُرُودْرُو بَرٜ أَوِمَ ࢽغُوࢽُوِّ: کَ، بِ ࢽغْرْوُ، بِ کْمْبُو، بِ وُرِ، بِ غْمَجٜ یِࢽْدِ؞
[4] ࢽدَرَࢽْ یَیٜ ࢻَدُو ࢽغَوُوَّدْࢽْ ࢽَمُّواْ، حَرْ کَوُ ࢽَدَ کُولُّوِرُو؞
[5] أَمَّ ࢽدَرَࢽْ یَیٜ ࢽَیِیَ ࢽجَمُواْࢽِّدْ، بْلَࢽْجَ کُولُّوِیَ، کَتِّ سِࢽْدُویٜ کَغَࢽْغُواْ، تَیِرُو شٜدَرُو وَلْجُو!» یٜࢽُو؞
[6] أَدْغَیْمَ کْࢽْغَیَمْبَࢽْجُدْ سَࢻْتَࢽٜ بْلَ بْلَرُو لٜجَࢽٜ کَوُرِ کْجِ اللَّهیٜ جَمَرُو وُلْیٜىٰرَ، کُورُو ࢽدَرَسُولَࢽْ أَمْ دُوࢽْدِ إِسَࢽْغَیٜىٰرَ؞
[7] مَیْ حِرُدُسْ أَوُو وَکَّجْࢽَ سَمَّا ࢻَࢽْغٜࢽِّیَ، حَࢽْغَلْࢽْجُ ثَا ثِجْࢽَ، دَلِلْࢽْجُدْ أَمْ لَایٜ: «یَحْیـَى کَسَلَمَ رُووَرُو وَلْجٜ ثِجُو!» ثَࢽِ،
[8] لَایٜ: «ࢽَوِ إِلْیَ أَمْبُو وَلْدٜ ࢻْلٜدُوُو!» ثَࢽِ، لَایٜ: «ࢽَوِیَ کُرٜىٰ ࢻَلْࢽْجَ رُووَرُو وَلْجٜ ثِجُو!» ثَࢽِ؞
[9] مَیْ حِرُدُسّٜ: «وُمَ کْلَ یَحْیـَیٜدَ کَمّْکُّو؞ وُࢽْدُ غْلٜ کَمْ أَوُو کَدَ کْلَࢽْجُࢽْ ࢻَکِّ أَتّْ؟» یٜࢽُو؞ أَدْغَیْمَ عِیسَىٰ کُرُورُو مَجِ؞
[10] کْࢽْغَیَمْبَدْ وَلَّدَرَࢽِّیَ، أَوُو ثَدْࢽَ سَمَّا عِیسَرُو وُلْیٜىٰرَ؞ دَجِ تَیِ رُࢽْجَا ࢽغُوجٜ کَرَا بْلَ لَا بَیْتْسَیْدَ ثَࢽِدْیٜرُو لٜىٰرَ؞
[11] أَمَّ جَمَ أَدَ أَسُیٜرَࢽِّیَ، تِیَ غٜیَ؞ عِیسَى جَمَدَ ثْمُویٜ تَیِرُو مَࢽَ کْلَ ࢽُودُو بَرْغَا اللَّهیٜࢽْ وُلْجِیٜ أَمْࢽْجَ دُوࢽْدِدَ إِسَࢽْغَیٜىٰࢽُو؞
[12] دُࢽِیَ لْمْدُ بَدِیٜࢽِّیَ، تَیِ مٜوُࢽْ یِࢽْدِࢽْدْ إِسَࢽٜ تِرُو: «ࢽَ دْغَیْیٜࢽَدْ کَرَا؞ جَمَدَ سَلَمّٜ، بْلَدٜیَا بْلَاسُورُو لٜجَ بْࢽَرَمْبَ کْمْبُووَ مَجَ!» یٜرَ؞
[13] أَمَّ عِیسَیٜ تَیِرُو: «ࢽَیِمَ أَوُو کْمْبُویٜ تَیِرُو یُواْ!» یٜࢽُو؞ تَیِیٜ: «أَ! بُرُودِ أُوُوَ بُࢽِ یِࢽْدِیَ غْࢽِیَ، أَوِمَ غَدٜ تَیْیٜࢽْدٜ؞ لٜࢽِیٜ کْمْبُو جَمَ أَࢽِ سَمَّرُو یِکِّوِیٜ وَ؟» یٜرَ؞
[14] ࢽَدْࢽْ کُوࢽغوَ أَلَمَ دْوُ أُوُ غَیْ مبٜجِ؞ عِیسَیٜ ࢻُوُرَوَࢽْجُرُو: «جَمَدَ یَکُّواْ، کْوُ ࢻِوُ ࢻِوُیٜرُو ࢽَࢻْثَ،» یٜࢽُو؞
[15] أَدْغَیْ ثَدٜ أَمْ سَمَّ ࢽَࢻْکٜرَ؞
[16] دَجِ بُرُودِ أُوُدَ بُࢽِ یِࢽْدِدَ ࢽغُوجٜ کْلَ سَمٜرُو سَࢻْثٜ اللَّهرُو أَرْدِیٜࢽِّیَ، بُرُودِدَ ࢻْسَکْثٜ ࢻُوُرَوَࢽْجُرُو ثٜ ࢻُوُ جَمَدْیٜࢽْ غْࢽَیٜرَ؞
[17] تَیِ سَمَّ جَوُࢽٜ کُلْیٜرَ؞ ࢻُوُرَوَدْ غَࢻْتُواْدَ ثَࢻْکٜرَࢽِّیَ، جُواْ مٜوُࢽْ یِࢽْدِࢽْ کٜسْمْبْرُو؞
[18] یِمْ لَا عِیسَى رُࢽْجُ مُودُوَ ثْدِ، ࢻُوُرَوَࢽْجُ یٜ رُوکُّوࢽْجُࢽْ دُوُوࢽْ، تَیِرُو: «وُࢽْدُرُو وُوَ أَمْسُودْ ࢽغُوسٜرَ؟» ثْࢽٜ تَیِیَ کِوُورُو؞
[19] تَیِیٜ: «أَمْ لَا ࢽِمَ یَحْیـَى کَسَلَمَ وُو ثَࢽِ، لَایٜ ࢽَوِ إِلْیَ ثَࢽِ، لَایٜ ࢽَوِیَ کُرٜىٰ ࢻَلْࢽْجَ رُووَرُو وَلْجُو ثَࢽِ،» یٜرَ؞
[20] دَجِ عِیسَى وَلْدٜ: «ࢽَیِدْ، وُࢽْدُرُو وُوَ ࢽغُوسٜوْ؟» ثْࢽٜ تَیِیَ کِوُورْࢽِّیَ، بِتُرُسّٜ: «ࢽِمَ أَلْمَسِیوُ اللَّهیٜدْ وُو!» یٜࢽُو؞
[21] أَمَّ عِیسَى سْمُوࢽْجَ کَسّٜ تَیِرُو وَدَ ثٜ بَرٜ وُࢽْدُمَرُو أَدَ وُلْجَغَࢽِّ یٜࢽُو؞
[22] کُورُو عِیسَى وَلْدٜ تَیِرُو: «اللَّه کَدَرْجْࢽَ تَدَ کَمْبٜدْ کُتُّ تَیْ دَجٜ ثَࢽٜ أَمْوُرَوَا وُرَوَ رِمَࢽَّیٜیَ مَلْمْبَ أَتَّوْرَیٜیَ تِیَ وَجَࢽٜ رُورُو ثٜىٰسِ، کُورُو کَوُ یَکُّوَ رُووَرُو وَلْجٜ ثِجِ،» یٜࢽُو؞
[23] دَجِ عِیسَیٜ تَیِ سَمَّرُو: «کَمْ لَا وُوَ غَ ثْرَاࢽَا، مْرَدُ کْلَࢽْجُیٜ وَجُو وَجِسُورُو کْسْکَࢽْجُ کَرْمُویٜ ࢽغُوجُو وُوَ سْغَ؞
[24] دَلِلْࢽْجُدْ وُࢽْدُ دُوُوࢽْ رُوࢽْجُ رِوُو ثْرَاࢽَمَدْ رُوࢽْجُدَ ثُوَتْکِ، أَمَّ کَمْ دُوُوࢽْ وُ ࢽَࢽْغَرُو رُوࢽْجُ ثُوَتْکْࢽَمَدْ رُوࢽْجُدَ ثْرِوِ؞
[25] کَمْ دُࢽِیَ أَدْ ࢽغَا جْغَࢽْدٜ رُوࢽْجُ أَسَرْجِیَ، ࢽدَ رِوَࢽْجُ؟
[26] وُࢽْدُ دُوُوࢽْ کْلَ وُوَ مَࢽَࢽِیَیٜࢽْ ࢽَࢽْغُجْࢽَمَدْ، تَدَ کَمْبٜدْ یٜ دَرَجَࢽْجُوَ دَرَجَ بَوَدْیٜیَ مَلَیْیَوَࢽْجُیٜیَا إِسِیَ، تِیَ ࢽَࢽْغُجِ؞
[27] جِرٜمَرُو ࢽَیِرُو وُلْࢽْجَغَکِّ، أَمْ لَا ࢽَ أَدْࢽْ دَادَ مبٜجِ، کَوُ کَوُࢽْجَ دَجِدْرُو، ࢽُودُو بَرْغَا اللَّهیٜ ثَرُیْ،» یٜࢽُو؞
[28] ࢽغَوُو عِیسَى أَوُو أَࢽِیَ وُلْجْࢽَیٜࢽْ کَوُ وُسْکُوَ غَیْ، مُودُوَ دِیُورُو ثِجٜ بِتُرُسَّ یَحْیـَىٰ یَعْࢼُوبَا ࢽغُوجٜ کْلَ کَوْ کُرُوُ لَایٜرُو غٜوَ؞
[29] مُودُوَ ثْدِ دُوُوࢽْ، أَلَمَ ࢻْکَّࢽْجُیٜ ࢻَلْدٜ کَجْمُࢽْجُ یٜ بُلْ ࢻُوکْ تَیْ دَجٜ یِیلْجِرُو وَلْیٜࢽُو؞
[30] سَدْمَࢽْ أَمْ یِࢽْدِ عِیسَىٰ جَࢽْدٜجَیْ مبٜجِ، تَیِمَ ࢽَوِ مُوسَىٰ ࢽَوِ إِلْیَا؞
[31] جَوْرُو ࢽُرَّ ࢻْلٜدَࢽٜ کْلَ کَرْمُو عِیسَیٜ جٜرُجَلٜمْࢽِࢽْ وَکَّجِیٜࢽْ مَࢽَجَیْ؞
[32] بِتُرُسَّ أَمَࢽْجُوَا کْࢽْمْ دَمَ بَوُو ࢽغُوجْࢽَ دُوُوࢽْ، ࢻَیٜرَࢽِّیَ، عِیسَیٜ دَرَجَࢽْجُدَ أَمْ یِࢽْدِ ࢽَࢽْجُࢽْ دَادَدَا کٜرُو؞
[33] سَ أَمْ یِࢽْدِدْ ࢽَࢽْجُࢽْ سَࢻْتَیْدْࢽْ، بِتُرُسّٜ عِیسَرُو: «مَلْمْ، أَࢽْدِ ࢽَ أَدْࢽْ مبٜجِدْ جَوْرُو ࢽغْلَ؞ کُولّٜ ࢽغُرْوُو یَکُّ لَمِّیُو: ࢻَلْ کَاࢽْمْ، ࢻَلْ ࢽَوِ مُوسَیٜ، ࢻَلْ یٜ ࢽَوِ إِلْیَیٜ،» یٜࢽُو، أَمَّ أَوُو وُلْجِدْمَا ࢽُوجْࢽِّ؞
[34] مَࢽَجِ ࢽغَیْ دُوُوࢽْ، ࢻُوࢻُووْ إِسٜ تَیِیَ جَکّٜࢽُو؞ ࢻُوࢻُووْ تَیِیَ جَکْثْࢽَرُو کٜرُࢽِّیَ، رِیٜرَ؞
[35] دَجِ ثُرُو ࢻُوࢻُووْدْیٜࢽْ کُواْ ࢽُکْثٜ: «أَدْمَ تَدَࢽِ وُو، تِیَ کْرٜࢽْکّْࢽَ؞ مَࢽَࢽْجُ ࢻَࢽُّواْ!» یٜࢽُو؞
[36] کُواْدْ ࢽْمْغٜࢽِّیَ، عِیسَىٰ تِلُوࢽْجُ لُوࢽْ کٜرُو؞ یِمْ أَࢽِࢽْ وُࢽْدُمَرُو أَوُو ثَرُࢽَدَ وُلْجَغَࢽِّ غْمْ ࢽَࢻْکٜرَ؞
[37] وَجْࢽَࢽْجُوَ عِیسَىٰ ࢻُوُرَوَࢽْجُ یَکُّدَ کَوْدْࢽْ جْࢻْکٜرَࢽِّیَ، أَمْ کَدَ کَدَمِ ࢽَࢽْجُرُو إِسَࢽٜ تِیَ کَࢻْکٜىٰرَ؞
[38] دَجِ ثُرُو جَمَدْیٜࢽْ کَمْ لَا کُواْ سَࢻْثٜ: «سَیِࢽَّ، ࢽِیَ لُواْࢽْجْکّْࢽَ، تَدَࢽِیَ ࢽجُࢽُوࢽٜ! تِ غْࢽِیَ، غَدٜ تَکّْࢽِ؞
[39] سٜدَࢽْ تِیَ ثْدَیْیَ، سَدْمَࢽْ بُرْوُ ثَکّٜ ثِࢽْجُ ࢽغَ بِلْوُوَ کَرْ کَرْ لُولُوجِ؞ تُسّْࢽَرُو بَسَرْجْࢽِّیَ، تِیَ کُولْجِوَوُو؞
[40] سٜدَࢽْدَ دُجَرُو ࢻُوُرَوَࢽْمْبَ لُواْیٜکّْࢽِیَ، تَیِرُو کَتْکٜرُو،» یٜࢽُو؞
[41] عِیسَیٜ تَیِرُو: «ࢽَیِ أَمْ جَمَࢽْ أَدْیٜسُو کَمْبْرْسٜࢽَمْبُوُ کَرْوُ یٜسْکَدَا، حَرْ سَوِ غَیْرُو دَوُࢽْدُوࢽْ دْغَکّٜ ࢽَیِیَ رَࢽّجَکِّ؟» یٜࢽِّیَ، کَمْدْرُو: «تَدَࢽْمْ کُدٜ!» یٜࢽُو؞
[42] تَدَدْ کْࢽْدٜ ثْدِ دُوُوࢽْ، سٜدَࢽْدْ تِیَ بَبَکْثٜ ثُرٜ ࢻْرْدَکْتُ بَدِیٜࢽُو؞ أَمَّ عِیسَى سٜدَࢽْدْرُو جْکَّدٜ تَدَدَ إِسَࢽْغَجِیٜ بَوَࢽْجُرُو کَلَکّٜىٰࢽُو؞
[43] جَمَ سَمَّ کْࢽْدُوُو اللَّهیٜدَ جَوْرُو أَجَࢻْکٜرَ؞ جَمَدْ أَوُو عِیسَى ثْدِ ࢽغَا أَجَࢻْثَࢽَ دُوُوࢽْ، عِیسَیٜ ࢻُوُرَوَࢽْجُرُو:
[44] «أَوُو کْرْمَ وُلْࢽْجَغَکِّدَ ࢽغْلَرُو کْلَࢽْدُوࢽْ تَیْوُو، تَدَ کَمْبٜدَ مُکُّو أَمْبٜرُو سْرْثَّغَیْ،» یٜࢽُو؞
[45] أَمَّ ࢻُوُرَوَدْ مَࢽَ أَدَ أَسُجَࢽِّ، مَاࢽَࢽْجُ تَیِرُو غْرَآدَ، کُورُو کْلَ مَࢽَ أَدْیٜࢽْ تِیَ کُورُورُو رِیٜرَ؞
[46] دَجِ کَتّٜࢽْجَࢽْ کَمْبِوُ کْلَ وُࢽْدُࢽْجَ کُرَ وُویٜࢽْ ثِیٜࢽُو؞
[47] عِیسَى أَوُو کَرْوُࢽْجَیٜ أَسُجٜ تَدَاࢽَ لَآ ࢽغُوجٜ غْرٜࢽْجُࢽْ إِسَدَجِیٜ
[48] تَیِرُو: «وُࢽْدُ دُوُوࢽْ ثُࢽِلَࢽْ تَدَ أَدَ ثْمُواْࢽَمَدْ، وُمَا سْمُواْ؞ کُورُو وُࢽْدُ دُوُوࢽْ وُوَ سْمُواْࢽَمَدْ، تِ وُوَ سُࢽُودْࢽَمَدَ ثْمُواْ؞ أَوُووَ کَمْ ثُرُوࢽْدُوࢽْ غَࢽَدْ، تِمَ کُرَ وُو،» یٜࢽُو؞
[49] یَحْیـَیٜ عِیسَرُو: «مَلْمْ، کَمْ لَا سٜدَࢽْسُو ثُࢽْمْلَࢽْ دُجِ کِرُیْیٜࢽْدٜیَ، أَࢽْدِیَ سَاࢽِّ ࢽَࢽْغَرُو، تِرُو دَࢻْکٜىٰیْیٜ!» یٜࢽُو؞
[50] أَمَّ عِیسَیٜ: «بَرٜ تِرُو دَࢻْکْوِّ، أَوُووَ کَمْ لَوَلَمَࢽْدُو غْࢽِدْ کَاࢽدُو،» یٜࢽُو؞
[51] عِیسَیٜ سَࢽْجُ سَمٜرُو سَࢻْتَیٜ کَرْࢽْغٜࢽِّیَ، ࢽِیَ جٜرُجَلٜمْبُو لٜدُیٜ تَیْ دَجٜ ࢽغُویٜࢽُو؞
[52] کْࢽْغَیَمْبَ تِࢽْ ࢻُوُࢽُّو ثُࢽُودٜ تِرُو جْࢻْتُرَمْ دَبَّرْدُوُرُو لٜجَࢽٜ بْلَ لَا ثِدِ سَمَرِیَیٜرُو کَسَرْغَوُو؞
[53] أَمَّ جٜرُجَلٜمْبُو لٜجِ ࢽَࢽْغَرُو، أَمْ بْلَدْیٜ تِیَ سَوُورُو وَیٜرَ؞
[54] ࢻُوُرَوَࢽْجُ یَعْࢼُوبَا یَحْیـَىٰ أَدَ کٜرُࢽِّیَ، تِرُو: «کْمَ، وَدَ یِیٜ سَمٜلَࢽْ کَࢽُّ جْࢻْثٜ تَیِیَ جُوُیْیَ، رَامَّ وَ؟» ثَࢽٜ تِیَ کٜوُورُو؞
[55] أَمَّ عِیسَى سُوُورْدٜ تَیِرُو کِکَّدُو؞
[56] دَجِ بْلَ غَدٜرُو کُویٜرَ؞
[57] جَوَلْࢽِࢽْ لٜجَیْ ࢽغَیْ دُوُوࢽْ، کَمْ لَایٜ عِیسَرُو: «ࢽدَرَ لٜࢽْمِ یَیٜ ࢽِیَ ࢽجْغَکِّ،» یٜࢽُو؞
[58] عِیسَیٜ تِرُو: «کْلُوُسُو بْلَاࢽجَا، ࢽغُدُوسُو سَمٜىٰ یٜ ࢻَࢽّجَا، أَمَّ تَدَ کَمْبٜدْیٜ ࢽَࢽْجُ تُسْتُیٜمَ بَوُو،» یٜࢽُو؞
[59] عِیسَیٜ کَمْ لَارُو: «وُوَ سْغَیْ!» یٜࢽِّیَ، کَمْدْیٜ تِرُو: «کْمَ، أَمَرْسْغْࢽٜ لٜکّٜ بَوَࢽِیَ سِتّْرَکِّیَ دُوُوࢽْ،» یٜࢽُو؞
[60] أَمَّ عِیسَیٜ تِرُو: «کُولّٜ أَمْ سَࢽُࢽَ أَمَࢽْجَ سَࢽُࢽَدَ سِتّْرَجَ! أَمَّ ࢽِدْ، لٜࢽٜ ࢽُودُو بَرْغَا اللَّهیٜدَ أَمْبُو سَتْکْࢽٜ!» یٜࢽُو؞
[61] کُورُو کَمْ لَایٜ عِیسَرُو: «کْمَ، ࢽِیَ ࢽجْغَکِّ، أَمَّ أَمَرْسْغْࢽٜ لٜکّٜ جَمَࢽِیَ أَلَکْلٜوَکِّیَ دُوُوࢽْ،» یٜࢽُو؞
[62] دَجِ عِیسَیٜ تِرُو: «کَمْ بَرٜرُو ࢽغُجْࢽَ دُوُوࢽْ ࢽغَوُو ثُرُیْمَدْ، ࢽُودُو بَرْغَا اللَّهیٜدْࢽْ ࢻَیْدَࢽْجُ بَوُو،» یٜࢽُو؞