[1] عِیسَى کْلَ سَࢻْکٜࢽِّیَ، أَرْسِیوُ لَا ثُرُو سَࢽْدُوُ سَدَا ࢻِدَرَمْبٜدْرُو وُرِ ࢻِجَغَیْ کِرُو؞
[2] کُورُو کَمُ ࢽغُدِ کوَ ࢻَثّْغْࢽَا لَا یٜ غُرْسُ کِمٜ یِࢽْدِ ࢻِجِیے کِرُو؞
[3] دَجِ عِیسَیٜ: «جِرٜمَرُو ࢽَیِرُو وُلْࢽْجَغَکِّ، کَمُ ࢽغُدِ کوَ ࢻَثّْغْࢽَا أَدْ تَیِ سَمَّا کُوجْࢽَرُو ࢻِجْغْࢽَ؞
[4] تَیِ سَمَّ أَرْسِیࢽْجَلَࢽْ ࢽغُوجَࢽٜ ࢻِیٜىٰرَ، أَمَّ تِ ࢽغُدِ دُوُوࢽْ أَوُو رُوࢽْجُ رِوُویٜ ࢽغَا ࢻِیٜىٰࢽُو،» یٜࢽُو؞
[5] ࢻُوُرَوَࢽْجُ لَایٜ کْلَ جِرِ ࢻَدُو اللَّهیٜدَ کَوْوَࢽْجُ شَوَ شَوَا سَدَا اللَّهرُو سَدَکْثَاࢽَالَࢽْ جَࢽٜجَࢽَدْیٜࢽْ مَࢽَجَیْ دُوُوࢽْ، عِیسَیٜ:
[6] «أَوُو رُوِ أَࢽِدْ، سَࢽْجَ ثْدٜ کَوْ أَࢽِ سَمَّا وُرْجَࢽٜ ࢻِجَیْ، حَرْ تِلُومَ کْلَ کَمَࢽْجُیٜࢽْ غَࢻْثِوَوُورُو وَلْجِ،» یٜࢽُو؞
[7] تَیِیٜ: «سَیِࢽَّ، سَوِ أَوُو أَࢽِ وَکَّجَیْ؟ کُورُو أَوُو أَࢽِ سَمَّیٜ سَࢽْجَ ثْدِیَ، أَوِ أَلَمَ دُوُوࢽْ أَمْبُو ࢻْلٜدِیدْ وُو؟» ثَࢽٜ تِیَ کٜوُورُو؞
[8] عِیسَیٜ تَیِرُو: «حَࢽْغَلْ غْࢽَࢽُواْ، بَرٜ وُࢽْدُمَ ࢽَیِیَ ࢽجَوَتْکْࢽِّ! أَمْ ࢽغْوُ ثُࢽِلَࢽْ إِسَࢽٜ: ‹وُمَ تِ وُو!› کُورُو ‹سَدْ ثْدْࢽَ!› ثَࢽِ؞ بَرٜ تَیِیَ غَوِّ!
[9] کْرِوُ سُو، حَࢽْغَلْسَࢽْغُو سُویٜ لَوَرْ ࢻَࢽُّوِیَ، بَرٜ یَاࢽُوِّ! سَیْ أَوُو أَࢽِ بُرْوُوࢽْ وَکَّجَیْیَ دُوُوࢽْ، أَمَّ سَ ࢽجٜرُورَمْبٜ کُوَ یَیٜ ثْدْࢽِّ؞»
[10] کُورُو عِیسَى وَلْدٜ تَیِرُو: «لَرْدُوَ لَرْدُ غَدٜیَ لَوَلَدَیْ، کُورُو کْرْمَیْیَ کْرْمَیْ غَدٜیَ یٜ کَتّٜࢽْجَࢽْ کْرِوُ غْرْجَیْ؞
[11] ثِدِ یٜ ࢽَ غَدٜغَدٜࢽْ جَوْرُو لُولُوجِ، وُووَا کْࢽَا یٜ ࢽَ ࢽَرُو ࢽغَسَیِ؞ کُورُو أَوُووَ رِدُیٜیَ أَلَمَ أَجَبَّ أَجَبَّا یٜ سَمٜلَࢽْ ࢻْلٜدَیْ؞
[12] أَمَّ کَوُ أَوُو أَࢽِ سَمَّ وَکَّجَیْدْرُو، ࢽَیِیَ ࢽجَدَࢽٜ بَسَرْࢽْجَࢽٜ دَࢽْدَلْࢽِࢽْ سْرْࢽّجَغَیْ، کُوسُورُو ࢽجَسَکِّ، کُورُو ثُࢽِ ࢽَࢽْغَرُو ࢻُوُ مَیْ سُو، غُومْࢽَ سُو یٜرُو ࢽجَسَدِ؞
[13] ࢽغَیْࢽِࢽْ دَمَ شٜدَرُو وَلْدُیٜ ࢻَࢽْدُوِ؞
[14] أَدْ ࢽَࢽْغَرُو کَوُدْرُو ࢽِیَ ࢽغُوࢽُواْ، بَرٜ کْلَ أَوُو کْلَࢽْدُو مُواْرُو وُلُّوِیٜࢽْ کَرْوُࢽْغَیْ دِوِّ،
[15] دَلِلْࢽْجُدْ وُمَ أَوُو کَلْکَلْ وُلُّوِدَ ࢽجَدْکِّ، کُورُو ثُرُو وَدُوُࢽْدُویٜࢽْ وُࢽْدُࢽْجَمَ رَکْثٜ ࢽَیِیَ کَمْبِوُࢽْجَیْوَوُو؞
[16] بَوَࢽْدُووَ یَࢽْدُووَ سُو، یَاࢽَوَࢽْدُو سُو، کْرَمِیَࢽْدُو سُو، سَوَوَࢽْدُو سُو ࢽَیِیَ ࢽجَدَࢽٜ لَاࢽدُووَ رُورُو ثٜىٰسِ؞
[17] ثُࢽِ ࢽَࢽْغَرُو أَمْ سَمَّ ࢽَیِیَ وَࢽْجَیْ،
[18] أَمَّ کَࢽْدُرِ کْلَࢽْدُویٜمَ ࢻَثِّیوَوُو؞
[19] ࢽٜدُّوِیَ، ࢽجْکَّوُو ࢻَࢽْدُوِ؞
[20] «سَ کْوُوَ کْرِوُیٜ إِسَࢽٜ بْرْࢽِ جٜرُجَلٜمْبٜیَ دِرِجَࢽٜ کْلْجَࢽَ رُوِیَ، وُرْدُࢽْجُ کَرْࢽْجْࢽَرُو ࢽُوࢽُواْ؞
[21] سَ أَدْࢽْ أَمْ لَرْدُ یَحُدِیَیٜࢽْ دَسَاࢽَدْ ثِجَ کَوْرُو ثَغَسُو لٜجَ! أَمْ ثُرُو بْرْࢽِدْیٜࢽْ دَسَاࢽَدْ یٜ ثَلُوُو، کُورُو أَمْ کَرَالَࢽْ دَسَاࢽَدْ یٜ بَرٜ بْرْࢽِدْرُو ࢽغَسَاࢽِّ!
[22] دَلِلْࢽْجُدْ أَدْمَ سَ أَجَوُ غْࢽَدُوُیٜدْ وُو، ࢽغَیْࢽِࢽْ أَوُو کِتَوُلَࢽْ رُوُوَدَ سَمَّ وَکَّجَیْ؞
[23] یِمْ أَࢽِࢽْ کَمُ ثُرُووَ سُو، ࢽغَࢽْجِ ثْمْبِیَ سُودْ، کُتُّࢽْجَ! مَسِوَ کُرَ لَرْدُدْرُو ࢽغَیِ، اللَّه جَمَ أَدْرُو غْرْغَجْغْࢽَ ࢽَࢽْغَرُو؞
[24] لَاࢽجَا کَشَغَرْسُولَࢽْ ثٜىٰسِ، لَاࢽجَ یٜیَ ثَدَࢽٜ کَرٜیَ غَیْ لَرْدُوَ غَدٜ سَمَّرُو ثَادِ؞ کْرْدِیَدْ جٜرُجَلٜمْبَ غُغُوَثَّیْ، حَرْ سَ اللَّه تَیِرُو کَدَرْجْغْࢽَدْ ثْدِیَ؞
[25] «سَمٜلَࢽْ أَلَمَسُو کْࢽْغَلَّ کُمْبَلَّ سِلُّووُوَالَࢽْ تَرُیْ، دُࢽِیَ یٜلَࢽْ ࢽُکْتُ تٜکُیٜیَ ثَمْبَلْدُࢽْجُوَ ثَسَکّٜ جَمَ لَرْدُوَیٜ حَࢽْغَلْࢽْجَ ثِجِ؞
[26] کْلَ أَوُو دُࢽِیَلَࢽْ وَکَّجِیٜࢽْ أَمْبٜ کَرْوُࢽْجَ کَمْدٜ، حَرْ مُوَجَیْ، کْࢽْدُوُووَ سَمٜىٰ جَوْرُو لُولُوجَیْ ࢽَࢽْغَرُو؞
[27] دَجِ تَدَ کَمْبٜدْ کْࢽْدُوُووَا جَوْرُو دَرَجَآ ثُرُو ࢻُوࢻُووْیٜࢽْ إِسِ ثَرُیْ؞
[28] أَوُو أَࢽِ وَکَّدُ بَدِجَیْیَ، دَࢽُواْ کْلَࢽْدُو سَࢽْغُواْ، سَ ࢽَیِیَ مٜرُدُیٜ کَرْࢽْجْࢽَ ࢽَࢽْغَرُو؞»
[29] دَجِ عِیسَى تَیِرُو مِسَلْ أَدَ ثْدّٜ: «أَکُّو یَ تَرْمُیٜیَ کْسْکَ غَدٜسُو سَمَّا رُیْوُو!
[30] سَ کَلُوَࢽْجَ رِدُ بَدِجَࢽَ رُوِیَ، ࢽَیِ کْلَࢽْدُو ࢽَࢽْغْرِ کَرْࢽْجْࢽَرُو ࢽُوࢽُوَّ؞
[31] ࢽغَیْمَ أَوُو أَࢽِ وَکَّجَیْ رُوِیَ، ࢽُودُو بَرْغَا اللَّهیٜ کَرْࢽْجْࢽَرُو ࢽُوࢽُواْ!
[32] جِرٜمَرُو ࢽَیِرُو وُلْࢽْجَغَکِّ، أَمْ جَمَࢽْ أَدْیٜ سَࢽُیْوَوُو، سَیْ أَوُو أَࢽِ سَمَّ وَکَّجَیْیَ دُوُوࢽْ؞
[33] سَمٜیَ ثِدِیَ بَوُورُو وَلْجَیْ، أَمَّ مَࢽَࢽِ تْمَّرُو بَوُورُو وَلْجِوَوُو؞
[34] «حَࢽْغَلْ غْࢽَࢽُواْ! بَرٜ ثُرُو ࢽجْمْبْرُو سُو، سَغَرَࢽْدُ سُو، دُࢽِیَسُوُولْ سُو حَࢽْغَلْࢽْدُو ࢽغُوجَࢽٜ یِمْ أَدْ إِسٜ کٜلْ غَیْ تَدُ بَوُو ࢽَیِیَ رْࢻْ ࢽجَدَࢽِّ؞
[35] ࢽُوࢽُواْ، یِمْ أَدْ أَمْ دُࢽِیَلَࢽْ دَسَاࢽَ سَمَّرُو ثُکُّرِ؞
[36] ࢻَادَرُو دْغَیْوُو، دُࢽُو أَوُو وَکَّجِ سَمَّرُو کَࢽُوٜ ࢻُوُ تَدَ کَمْبٜدْیٜࢽْ دَدُیٜ ࢻَࢽْدُواْرُو سَوِسُورُو اللَّهَ کُورُواْ،» یٜࢽُو عِیسَیٜ؞
[37] أَدْغَیْمَ یِمْ ࢽغُسُوࢽْ کَوْسُ عِیسَى ࢻَدُو اللَّهیٜࢽْ جَمَا أَلَمْجِ، بُࢽٜ بْرْࢽِدْࢽْ ثُلُوٜ لٜجٜ ࢽَ کَوْ جَیْتُࢽّٜ ثَࢽِدْیٜࢽْ وَجِ؞
[38] کُورُو جَمَ سَمَّ تَوَجَࢽٜ تِیَ کْرْࢽْدُرُو ࢻَدُو اللَّهیٜرُو إِسَیْ کَسَرْغَ؞