[1] یِمْ لَا عِیسَى ࢽَ لَاࢽْ مُودُوَ ثْدٜ کٜرْࢽِّیَ، ࢻُوُرَوَࢽْجُیٜ ࢻَلْࢽْجَ تِرُو: «کْمَ، أَࢽْدِرُو مُودُوَ دِیُو سَکَّرَیْ، جِرِ یَحْیـَى ࢻُوُرَوَࢽْجُرُو ثْکّْرَࢽَدْ غَیْ،» یٜࢽُو؞
[2] عِیسَیٜ تَیِرُو: «سَ مُودُوَ دِوِیَ، ࢽغَیْ وُلُّواْ: «‹بَوَ، ثُࢽْمْبُو دَرَجَ تِیُو! ࢽُودُوࢽْمْ بَرْغَا إِسُو!
[3] یِمْبِ یَیٜ کْمْبُوࢽْدٜ سَدٜ؞
[4] بِوُࢽْدٜ غَوُرْسَغَࢽٜ، أَࢽْدِ یٜ أَمْ بِوُ سَدّْࢽَدَ غَوُرْࢽِیٜ ࢽَࢽْغَرُو؞ بَرٜ کُولْسَمٜ جَرَࢻْتِیٜࢽْدٜ؞›»
[5] کُورُو عِیسَى وَلْدٜ تَیِرُو: «کَمْࢽْدُو لَا سَوَࢽْجُوَ دُوُوࢽْ دْرْدُ ࢻَࢽّجُرُو لٜجٜ تِرُو: ‹سَوَ، بُرُودِ یَکُّ تَغَرِسْغْࢽٜ؞
[6] کْرْمَمَ سَوَࢽِ لَا ثُرُو بْلَوُرُویٜࢽْ دُوُوࢽْ، ࢽَࢽِࢽْ جْࢻْکٜࢽُو، کُورُو وُ یٜ أَوِمَ تِرُو یِکّٜ جُوُیْ بَوُو،› یٜࢽِّیَ،
[7] سَوَࢽْجُدْ ثُرُو ࢻَدُودْیٜࢽْ تِرُو: ‹کُولْسْࢽٜ، بَرٜ سُوُولْسْمِّ! ثِࢽَّ یٜ جَکَّدَ، کُورُو وُوَ یَلَّࢽِیَ یٜ بُوࢽِیٜࢽَ؞ رَࢽْغْکّٜ ثِکّٜ ࢽجِکِّوَوُو،› ثْࢽِ؞
[8] ࢽَیِرُو وُلْࢽْجَغَکِّ، ࢽَࢽْسَوَࢽْجَ ࢽَࢽْغَرُو غْࢽِ، أَمَّ دُولٜرُو ثِجٜ أَوُو ثْرَاࢽَ سَمَّا ثِ؞ دَلِلْࢽْجُدْ کَمْدْ ࢽَࢽْغُجْࢽِّ تِیَ ثُوُورِیَ، ثُوُورِ ࢽَࢽْغَرُو؞
[9] «کُورُو ࢽَیِرُو وُلْࢽْجَغَکِّ، کُورُواْ ࢽجَدِ، مَࢽُواْ ࢻَࢽْدُوِ، ثِࢽَّ بَࢽْغُواْ کَࢽْجَغَیْ؞
[10] وُࢽْدُ دُوُوࢽْ ثُوُورِمَدْرُو ثَدِ، کَمْ مَجِمَدْ یٜ ثُوَࢽْدِ، کُورُو کَمْ ثِࢽَّ بَکْثِمَدْ یٜرُو کَجَغَیْ؞
[11] بَوَ ࢻِ ثُرُوࢽْدُوࢽْ تَدَࢽْجُ تِیَ بُࢽِرُو ثُوُورِیَ، ثُجُࢽْجُرُو کَدِ ثِدْ؟
[12] بِ ࢽغْوُلُّو ثُوُورِیَ، کْلَࢽْجِ ثِدْ؟
[13] ࢽَیِ دِوِسُو أَوُووَ ࢽغْلَ تَدَوَࢽْدُورُو ࢽجُو ࢽُوࢽُوَّا، بَلّٜ بَوَ مَیْ سَمٜمَ رُحُࢽْجُدْمَا أَمْ تِیَ ثَوُورِرُو ثِدْ!» یٜࢽُو؞
[14] یِمْ لَا عِیسَى سٜدَࢽْ کَمْ لَآ مُوَرُو ثْدْࢽَا دُجٜ کِلُوُࢽِّیَ، کَمْدْ مَࢽَ بَدِیٜࢽُو؞ جَمَدْ أَجَࢻْکٜرَ،
[15] أَمَّ لَایٜ: «کْࢽْدُوُو بٜلْجَبُلْ مَیْ سٜدَࢽَّیٜࢽْ سٜدَࢽَّا دُجِ،» یٜرَ؞
[16] لَاࢽجَ یٜ تِیَ رِجَࢻْتُرُو أَلَمَ لَا سَمٜىٰ تَیِرُو ࢻْلٜجُوُورُو مَیٜرَ؞
[17] أَمَّ عِیسَى أَوُو کَرْوُࢽْجَیٜ أَسُجٜ تَیِرُو: «کْرْمَیْ ࢻِ یَیٜ کْلَࢽْجُرُو یَکْتْغْࢽَدْ دْغَیْوَوُو، کُورُو ࢻَدُو دُوُوࢽْ کْلَࢽْجُرُو یَکْتْغْࢽَدْ دْغَیْوَوُو؞
[18] وُ سٜدَࢽَّا کْࢽْدُوُو بٜلْجَبُلّٜࢽْ دُکِّ ࢽُوَّ؞ تُو، إِوُلِیسْ یٜ کْلَࢽْجُرُو یَکْتِییَ، ࢽدَیِلَࢽْ غْلٜ کْرْمَیْࢽْجُدْ دْغَیْ؟
[19] کُورُو وُدْ کْࢽْدُوُو بٜلْجَبُلّٜࢽْ سٜدَࢽَّا دُکِّیَ، ࢻُوُرَوَࢽْدُو کْࢽْدُوُو وُࢽْدُیٜࢽْ غْلٜ سٜدَࢽَّا دُجَیْ؟ أَدْمَرُو تَیِ شَرَوُࢽْدُورُو وَلْجَیْ؞
[20] أَمَّ کْࢽْدُوُو اللَّهیٜمَࢽْ سٜدَࢽَّا دُکِّیَ، دَجِ ࢽُودُو بَرْغَا اللَّهیٜ ࢽَࢽْدُورُو إِسْࢽَ، دِیٜ!
[21] «کَمْ دُࢽُووَ مُکُّوࢽْ بَرِمِیَ ࢻَࢽّجُ غُرٜجِیَ، کْࢽْدَࢽْجُ سَمَّ کْلٜوَ؞
[22] أَمَّ کَمْ لَا تِیَ دُࢽُوࢽْ کُوجْࢽَ إِسٜ تِیَ لَوَلَجٜ ࢽَسَرْدِیَ، بَرِمِࢽْجُ أَرْدِجْࢽَدَ ثْمُویٜ کْࢽْدَࢽْجُ سَمَّا ࢽغُوجٜ دَغَرْجِ؞
[23] ࢽُوࢽُواْ، کَمْ وُرُو کْلْدْغْࢽِّدْ لَوَلَمَࢽِ، کُورُو کَمْ وُوَ بَࢽَسِیٜ رُوکُّو ثَمِّیٜوَوُودْ تَرْدُمَ؞
[24] «سٜدَࢽْ کَمْلَࢽْ ثُلُوِیَ، لٜجٜ ثُرُو کَرَا دْرِیٜࢽْ ࢽَ ࢽَࢻْتُیٜ مَجِ، ثُوَࢽْدِوَوُودْ، دَجِ کْلَࢽْجُرُو: ‹ࢽدَ ࢻَࢽِّ کُولّْکّْࢽَدْرُو وَلْدْکّٜ،› ثْࢽِ؞
[25] وَلْدِیَ، ࢻَدُودَ تَسْ ࢻْرَادَ یٜ، تَسَّࢽَ یٜ ࢽَجِیے؞
[26] دَجِ لٜجٜ سٜدَࢽْ تُلُرْ غَدٜ تِیَ ࢽَࢽْدِوِࢽْ کُوجَࢽَ ثَࢻْثٜ ثُوُدٜ ࢽغَسَیٜ ࢽَࢻْثَیْ؞ أَدْ ࢽَࢽْغَرُو ࢽَࢻْتُ کَمْ أَدْیٜدْ ثَیٜمَا کُوجْࢽَرُو کُتَّجِ،» یٜࢽُو؞
[27] عِیسَى مَࢽَجِ ࢽغَیْ دُوُوࢽْ، کَمُ لَا ثُرُو جَمَدْیٜࢽْ کُواْ سَࢻْثٜ: «بَرْغَا کَمُ ࢽِیَ ࢽجَمْبٜ تْغَمْ ࢽجِࢽَدْ!» یٜࢽُو؞
[28] عِیسَیٜ: «أَتّْرُووَ، بَرْغَࢽْجَ أَمْ مَࢽَ اللَّهیٜ ࢻَࢽْجَࢽٜ جَاࢽَدْ!» یٜࢽُو؞
[29] جَمَدْ ࢽَ عِیسَیٜࢽْ ثَثَࢻْتَیْ أَدْغَیْ دُوُوࢽْ، عِیسَیٜ: «أَمْ جَمَࢽْ أَدْیٜ جَوْرُو دِوِ؞ أَلَمَ لَا سَمٜىٰ مَجَیْ، أَمَّ أَلَمَ ࢽَوِ یُونُسّٜ غْࢽِیَ، أَلَمَ ࢻِمَ تَیِرُو ࢻْلٜدِیوَوُو؞
[30] جِرِ ࢽَوِ یُونُسْ کُرٜࢽْ أَمْ بْرْࢽِ ࢽِࢽِوٜىٰرُو أَلَمَرُو وَلْجْࢽَدْ غَیْ، تَدَ کَمْبٜدْ یٜ أَمْ جَمَࢽْ أَدْیٜرُو أَلَمَرُو وَلْجِ؞
[31] کِیَمَ وَکَّجِیَ، مَیْ کَمُیٜ لَرْدُ أَࢽْمْبٜدْ ثِجٜ أَمْ جَمَࢽْ أَدْیٜدَ جِرٜࢽَمْبُوُرُو شٜدَجِ، دَلِلْࢽْجُدْ تِ ثِ دُࢽِیَیٜࢽْ ثِجٜ ࢽَ مَیْ سُلَیْمَـٰࢽَیٜرُو ࢽَࢽْرَشِدُࢽْجُ ࢻَࢽْدُرُو إِسْࢽَ ࢽَࢽْغَرُو؞ أَکُّو أَوُو لَا مَیْ سُلَیْمَـٰࢽَا کُوجْࢽَ ࢽَدْࢽْ مبٜجِ؞
[32] کِیَمَ وَکَّجِیَ، أَمْ بْرْࢽِ ࢽِࢽِوٜىٰ یٜ ثِجَࢽٜ أَمْ جَمَࢽْ أَدْیٜدَ جِرٜࢽَمْبُوُرُو شٜدَجَیْ، دَلِلْࢽْجُدْ تَیِ مَࢽَ ࢽَوِ یُونُسّٜ ࢽغُوجَࢽٜ تُوَ ثَدْࢽَ ࢽَࢽْغَرُو؞ أَکُّو أَوُو لَا ࢽَوِ یُونُسَّ کُوجْࢽَ ࢽَدْࢽْ مبٜجِ؞
[33] «وُࢽْدُمَ ࢻَتْلَ وَسّٜ ࢽَ تُرُیْوَوُولَࢽْ بِ کْمُوࢽْ تْمْجِوَوُو؞ کَمْ ࢻَتْلَ وَسِّیَ، أَمْ ࢽغَسَیِدْ ࢽُرْدَ ثَرُورُو تِیَ کْلَ غْࢽَدُرَمْࢽْجُیٜࢽْ غْࢽَجِ؞
[34] سِمّْمْدْ تِمَ ࢻَتْلَ تِیࢽْمْبٜ وُو؞ سِمّْمْ ࢽغَا، تِیࢽْمْ سَمَّ یٜ ࢽُرَّرُو وَلْجِ؞ أَمَّ سِمّْمْ کُتُّوَ، تِیࢽْمْ سَمَّ یٜ دُوُوَرُو وَلْجِ؞
[35] تُو، حَࢽْغَلْ غْࢽَࢽٜ، بَرٜ ࢽُرْ ࢽِلَࢽْ دْغَࢽَدْ دُوُرُو وَلْجْࢽِّرُو!
[36] تِیࢽْمْلَࢽْ ࢽدَرَمَ دُوُ بَوُو سَمَّ ࢽُرَّا، أَلَمَ ࢻَتْلَ ࢽُرْࢽْجُلَࢽْ ࢽِیَ وَسْࢽْجِدْ غَیْ کْرْغَمْ؞»
[37] عِیسَى مَࢽَ ثْدِ ࢽغَیْ دُوُوࢽْ، ࢻَرِسَ لَا ࢻَࢽّجُرُو تِیَ مَسْࢽَ دِیُورُو دُویٜࢽُو؞ لٜجٜ ࢻَدُودْرُو ࢽغَیٜ مَسْࢽَرُو ࢽَࢻْکٜرَ؞
[38] ࢻَرِسَدْ کْلَ عِیسَى مُکُّوࢽْجُ تُلْجٜ تَیِرُّو ثْدْࢽِّࢽْ مَسْࢽَرُو ࢽَࢻْثْࢽَیٜࢽْ أَجَࢻْکٜࢽُو؞
[39] دَجِ کْمَیٜ تِرُو: «ࢽَیِ ࢻَرِسَوَدْ ࢽغَوُو تَسَیٜیَ غْمْدُواْلُومْبٜیَدَ تُلُّوٜ تَیِرُّو کَلَࢽْغُوِ، أَمَّ ثُرُوࢽْدُودْ کْࢽْدَ أَمْ غَدٜىٰ لُوَࢻْتُ سُو، ࢽِیَدِوِ دِیُو سُولَࢽْ ثْمْبْرْࢽَ؞
[40] ࢽَیِ حَࢽْغَلْ کُتُّوَ! تِ ࢽغَوُودَ أَلَکْثْࢽَدْ ثُرُودْ یٜیَ أَلَکْثْࢽِّ وَ؟
[41] کَرْوُ تِلُووَرُو سَدَا یُواْ، دَجِ أَوِسُو ࢽَیِرُو تَیِرُّو وَلْࢽْجَغَیْ؞
[42] «کُتُّࢽْدُو ࢽَیِ ࢻَرِسَوَ! بُلُ کَسْکَسِ سُو، ࢽَࢽَ سُو، کْرِجُوُو سَمَّ سُولَࢽْ جَکَّ تُلُوُوِ، أَمَّ جِرٜ دِیُو سُو، اللَّهَ رَوُو سُووَ کُولُّوَّ؞ تَیِدَ کُولُّوِّࢽْ أَوُو أَࢽِ یٜیَ دِیُو وَجِمْࢽْجَاࢽَ؞
[43] کُتُّࢽْدُو ࢽَیِ ࢻَرِسَوَ! دَࢽْدَلَّࢽْ ࢽَࢻْتُرَمْ ࢻُوُیٜیَ کَسُوُلَࢽْ لٜوَ دَرَجَآ رَاوَّ؞
[44] کُتُّࢽْدُو، ࢽَیِ أَلَمَ کَوْرِ ࢽُودُرَمْ بَوُووَ أَمْ ࢽُوجَࢽِّلَࢽْ تِیَ غُوَثَّࢽٜ کُوجَیْدْ غَیْ،» یٜࢽُو؞
[45] مَلْمْبَ أَتَّوْرَیٜ ࢻَلْࢽْجَیٜ تِرُو: «سَیِࢽَّ، أَدْغَیْ وُلّْمِیَ، أَࢽْدِ یٜیَ رَسَمَّ، دِیٜ!» یٜࢽُو؞
[46] دَجِ عِیسَیٜ تِرُو: «ࢽَیِ یٜ کُتُّࢽْدُو، مَلْمْبَ أَتَّوْرَیٜ! کَتْکُࢽْ کُرْوُووُ دَمَ بَوُو أَمْبُو غْࢽَغْوِ، أَمَّ ࢽَیِ ࢽغُلُوࢽْدُومَ سَࢽْغُوٜ تَیِیَ بَࢽَغْوَّوُو؞
[47] کُتُّࢽْدُو! کَوْرِیَ ࢽَوِیَ کُرٜىٰ تَࢽْدُوِ، کُورُو أَمْوُرَوَࢽْدُودْمَ تَیِیَ ثٜىٰسُو!
[48] ࢽغَیْࢽِࢽْ أَوُووَ أَمْوُرَوَࢽْدُو ثَدْࢽَ سَمَّا کَسَدُّوَّرُو شٜدَࢽُوِ، دَلِلْࢽْجُدْ تَیِ ࢽَوِیَا ثٜىٰسْࢽَ، ࢽَیِ یٜ کَوْرِیَࢽْجَ تَࢽْدُوَّ!
[49] أَدْ ࢽَࢽْغَرُو ࢽَࢽْرَشِدُࢽْجُلَࢽْ اللَّهیٜ: ‹ࢽَوِیَا کْࢽْغَیَمْبَا تَیِرُو جُوَغْکِّ؞ لَاࢽجَا ثٜىٰسِ، لَاࢽجَ یٜیَ بَسَرْجَیْ،› ثْࢽَّ؞
[50] أَدْمَ ࢽَࢽْغَرُو بُ ࢽَوِیَ سَمَّیٜ کَوُ دُࢽِیَ أَلَکْتْࢽَمَࢽْ أَمْ جَمَࢽْ أَدْیٜرُو ثُکُّرِ،
[51] بُ دُوُوࢽْ جَمَࢽْ ࢽَوِ حَابِلَیٜࢽْ تَمِیَ حَرْ جَمَࢽْ ࢽَوِ جَکَرِیَّ کَتّٜ لَیَ دُوَدُرَمْبٜیَ ࢻَدُو اللَّهیٜیَیٜࢽْ بَوُوجْࢽَدْیٜرُو کُدٜرُو سَمَّ ࢻِدْࢽَدْ؞ أَیْ، ࢽَیِرُو وُلْࢽْجَغَکِّ، کْلَ أَمْ جَمَࢽْ أَدْیٜمَرُو ثُکُّرِ؞
[52] کُتُّࢽْدُو، مَلْمْبَ أَتَّوْرَیٜ! أَوُووَ ثُوُرَمْ إِلْمُیٜ ࢽغُوࢽُوَّ، ࢽَیِ کْلَࢽْدُو یٜ ࢽغَوُوِّ، کُورُو أَمْ تِرُو ࢽغَوُورُو مَجَیْدْ یٜرُو دَࢻْکْوَّ؞»
[53] عِیسَى ࢽَدَ کُولْیٜࢽِّیَ، مَلْمْبَ أَتَّوْرَیٜیَ ࢻَرِسَوَا تِرُو جَوْرُو غْرْغَجَغَࢽٜ کُورُو کْلَ أَوُو ࢽغْوُیٜلَࢽْ تِیَ جْکْثَࢽٜ
[54] جَوَلْ مَࢽَࢽْجُلَࢽْ تِیَ تَیٜ مَدُ بَدِیٜرَ؞