[1] یِمْ تُسْتُیٜیَ لَا عِیسَىٰ ࢻُوُرَوَࢽْجُوَ کُلُو أَلْغَمَیٜ رٜجَࢽٜ کُوجَیْ دُوُوࢽْ، ࢻُوُرَوَدْ کْلَ أَلْغَمَیٜ ࢻِثَّࢽٜ مُکُّوࢽْجَࢽْ کْمْسَّࢽٜ ࢽغْرُو بَدِیٜرَ؞
[2] ࢻَرِسَوَ لَایٜ تَیِرُو: «أَوِ ࢽَࢽْغَرُو أَوُو یِمْ تُسْتُیٜیَ کْࢽْدُورُو حَرَمْدَ دِوِدْ؟» یٜرَ؞
[3] عِیسَیٜ تَیِرُو: «سَ ࢽَوِ دَاوُدَا أَمْࢽْجُوَ کْࢽَ ࢻَࢽْجَࢽَدْࢽْ، أَوُو ثْدْࢽَدَ کِتَوُلَࢽْ کْرَࢽُوِّ وَ؟
[4] ثُرُو ࢻَدُو اللَّهیٜرُو ࢽغَیٜ بُرُودِ سَدَایٜ ࢽغُوجٜ جْغْرٜ أَمْࢽْجُ یٜرُو ثٜ غٜوُو؞ رِمَࢽَّرُو غْࢽِیَ، أَمْ غَدٜرُو بُرُودِ سَدَایٜ ࢽغْرُودْ حَرَمْ!»
[5] دَجِ عِیسَیٜ تَیِرُو: «تَدَ کَمْبٜدْ کْمَ یِمْ تُسْتُیٜ، دِیٜ!» یٜࢽُو؞
[6] کُورُو یِمْ تُسْتُیٜیَ لَا عِیسَى دَࢽْدَلُّو ࢽغَیٜ جَمَا أَلَمْدُ بَدِیٜࢽُو؞ ࢽَدْࢽْ کَمْ لَا مُکُّوࢽْجُ کْمْبُورَمْ ثَࢽَا مبٜجِ؞
[7] مَلْمْبَ أَتَّوْرَیٜیَ ࢻَرِسَوَا عِیسَرُو أَیَوْ غْࢽَدُوُ مَجَیْ ࢽَࢽْغَرُو حَࢽْغَلْࢽْجَیٜࢽْ تِیَ ࢽِࢽِجَیْ، یِمْ تُسْتُیٜیَمَࢽْ کَمْدَ إِسَࢽْغَیٜىٰࢽُووَرُو؞
[8] أَمَّ عِیسَى أَوُو کَرْوُࢽْجَیٜ أَسُجٜ کَمْ مُکُّو ثَࢽَادْرُو: «ثِࢽٜ دَوُࢽْدٜࢽْ دَࢽٜ!» یٜࢽُو؞ کَمْدْ ثِجٜ دَیٜࢽِّیَ،
[9] عِیسَیٜ جَمَدْرُو: «ࢽَیِیَ ࢽجَوُورْکِّ، یِمْ تُسْتُیٜیَ سٜرْ دِیُو رَ ࢽِیَدِوِ دِیُومَ حَلَلْ وُو؟ رُو کَمْبٜ ࢽجْکَّوُو رَ رُو تُلُوُومَ حَلَلْ وُو؟»
[10] عِیسَى مٜمٜجِیَرُو تَیِ سَمَّا ثُرُیْ دُوُوࢽْ، کَمْدْرُو: «مُکُّوࢽْمْ سَࢽٜ!» یٜࢽُو؞ سَیٜࢽِّیَ، مُکُّوࢽْجُ کْلٜوَ سَلَیْرُو وَلْیٜࢽُو؞
[11] مَلْمْبَ أَتَّوْرَیٜیَ ࢻَرِسَوَا جَوْرُو غْرْغَجَࢽٜ سَوَرْدَࢽٜ أَوُو عِیسَرُو ࢽجْدُّویٜ مَیٜرَ؞
[12] یِمْ أَࢽِࢽْ عِیسَى لٜجٜ کْلَ کَوْیٜرُو جُوَࢽٜ بُࢽٜ ࢻَرَیْ مُودُوَ کِدُو؞
[13] دُࢽِیَ وَیٜࢽِّیَ، ࢻُوُرَوَࢽْجُوَ بُواْجٜ ثُرُوࢽْجَࢽْ مٜوُࢽْ یِࢽْدِࢽْ کْرٜجٜ تَیِیَ کْࢽْغَیَمْبَࢽْجُرُو غَلَیٜࢽُو؞
[14] تَیِمَ سِمَࢽْ کَمْ تِرُو ثُ بِتُرُسْ ثَکّْࢽَدْ، یَࢽْجُغْࢽَ أَࢽْدَرَوُسْ، یَعْࢼُوبَ، یَحْیـَى، ࢻِلِبُسْ، بَرْتُولُومِ،
[15] مَتِیُ، تُومَ، یَعْࢼُوبَ تَدَ أَلْࢻَوُسّٜ، سِمَࢽْ تِرُو کَمْ لَرْدُࢽْجُ رَوُومَ ثَࢽِدْ،
[16] یَحُسَ تَدَ یَعْࢼُوبَیٜ، یَحُسَ إِسْکَرِیُوتْ کَمْ ࢻُوُࢽْ أَمَࢽْ بُومَرُو وَلْجْࢽَدْ؞
[17] عِیسَى کْࢽْغَیَمْبَࢽْجُوَ رُوکُّو کَوْدْلَࢽْ جْࢻْثٜ ࢻَیَ لَاࢽْ ࢽَ ࢻُوُرَوَࢽْجُ کَدَ ثَࢻْتَࢽَلَࢽْ دَیٜࢽُو؞ کُورُو جَمَ غَدٜ جَوْرُو ࢽغْوُ بْرْࢽِ جٜرُجَلٜمْبٜیَ لَرْدُ یَحُدِیَیٜ سَمَّا بْرْࢽِیَ ثِ تٜکُیٜ تِرْ سُو، سِدُوࢽْ سُووَلَࢽْ یٜ
[18] مَࢽَࢽْجُ کْرْࢽْدُوَ کَسُوَࢽْجَࢽْ ࢽغَدُوَرُو ࢽَࢽْجُرُو کَدِرَ؞ أَمْ دُوُوࢽْ کَرُوَ تَیِیَ بَسَرْجَیْدْ ࢽغَیٜرَ؞
[19] جَمَ سَمَّ عِیسَىٰ لٜدُرُو مَیٜرَ، دَلِلْࢽْجُدْ کْࢽْدُوُو تِیࢽْجُࢽْ ثُلُوٜ تَیِ سَمَّا إِسَࢽْغَجِیے ࢽَࢽْغَرُو؞
[20] دَجِ عِیسَى ࢻُوُرَوَࢽْجُوَ ࢽِࢽِیٜࢽِّیَ، تَیِرُو: «بَرْغَࢽْدُو ࢽَیِ تَلَاوَدْ، ࢽُودُو بَرْغَا اللَّهیٜدْ ࢽُوَࢽْدُودْرُو؞
[21] بَرْغَࢽْدُو ࢽَیِ کْرْمَ کْࢽَࢽْدُووَدْ، ࢻُوُࢽْ کُلُّوِدْرُو؞ بَرْغَࢽْدُو ࢽَیِ کْرْمَ یِرُوِدْ، ࢻُوُࢽْ کَاسُ دِوِدْرُو؞
[22] «أَمْ تَدَ کَمْبٜدْ ࢽَࢽْغَرُو ࢽَیِیَ وَࢽْجَࢽٜ دُࢽْجَࢽٜ رَرَࢽْجَࢽٜ دِوِࢽْدُو وُلْجَیْیَ، بَرْغَࢽْدُو!
[23] سَ أَدْࢽْ کْجِ ࢻَࢽُّواْ، بِکّٜ یٜ ࢻَرْࢽُواْ، دَلِلْࢽْجُدْ سَمٜلَࢽْ مُکُووَࢽْدُو جَوْرُو ࢽغْوُ ࢽَࢽْغَرُو؞ ࢽُوࢽُواْ، أَدْغَیْمَࢽْ أَمْوُرَوَࢽْجَ کُرٜىٰسُو ࢽَوِیَرُو کٜدُّو؞
[24] «کُتُّࢽْدُو ࢽَیِ غَرِوُوَدْ، ࢽُوَࢽْدُو دُࢽِیَلَࢽْ ࢻَࢽْدُوَّدْرُو؞
[25] کُتُّࢽْدُو ࢽَیِ کْرْمَ کُلُّوَّدْ، ࢻُوُࢽْ کْࢽَ ࢻَࢽُّوِدْرُو؞ کُتُّࢽْدُو ࢽَیِ کْرْمَ کَاسُ دِوِدْ، ࢻُوُࢽْ کَرْوُکُتَّ ࢽَیِیَ ࢽجَدَࢽٜ یِرُوِدْرُو؞
[26] «أَمْ سَمَّ ࢽغْلَࢽْدُو وُلْجَیْیَ، کُتُّࢽْدُو! ࢽُوࢽُواْ، أَدْغَیْمَࢽْ أَمْوُرَوَࢽْجَ کُرٜىٰسُو ࢽَوِیَ کَتُّوُیٜرُو کٜدُّو؞
[27] «أَمَّ ࢽَیِ مَࢽَࢽِ ࢻَࢽُّوِدْرُو وُلْࢽْجَغَکِّ، کْلَدُووَࢽْدُووَ رَوُواْ، وَدُوُࢽْدُورُو سٜرْ یِدُّواْ،
[28] أَمْ ࢽَیِیَ بَسْکُࢽْجَࢽَدْرُو بَرْغَ دْࢻْکْࢽُواْ، کُورُو أَمْ ࢽَیِیَ بَسَرْࢽْجَࢽَدْ یٜرُو اللَّهَ یُکُّورُواْ؞
[29] کَمْ ࢻٜرِࢽْمْ مَرِࢽْ بَکْثِیَ، ࢻٜرِ ࢻَلْدْ یٜیَ ࢻْلٜغْࢽٜ؞ کُورُو کَمْ کَلْوُࢽْمْ غَرِ ࢽغُوجِیَ، بَرٜ غْمَجٜدَ دَࢻْکْمِّ؞
[30] وُࢽْدُ دُوُوࢽْ ࢽجُوُورْࢽَدْرُو یٜ، کُورُو بَرٜ کَمْ کَرٜࢽْمْ ࢽغُوجْࢽَدَ یُکُّورْمِّ؞
[31] جِرِ أَمْ ࢽَیِرُو ࢽجَدِّیَ رَاوَّدْ غَیْ، ࢽَیِ یٜ تَیِرُو یِدُّواْ!
[32] «أَمْ ࢽَیِیَ ࢽجَرَاࢽَا رَاوِیَ، أَوِ مُکُووَیٜ دِوْ؟ بِوُمَسُو یٜ أَمْ تَیِیَ ثَرَاࢽَدَ ثَرَاࢽَ؞
[33] أَمْ ࢽَیِرُو سٜرْ ࢽجَدِّرُو سٜرْ یِدُّوِیَ، أَوِ مُکُووَیٜ دِوْ؟ بِوُمَسُو یٜ ࢽغَیْ ثَدِ؞
[34] أَمْ ࢽَیِرُو ࢽجَکّْرْمْبِرُو کَسُ یِوِیَ، أَوِ مُکُووَیٜ دِوْ؟ بِوُمَسُو یٜ تَیِرُو کَلْکَلْ کَلَکْثَارُو أَمَࢽْجَرُو کَسُ ثَدِ؞
[35] أَمَّ ࢽَیِدْ، کْلَدُووَࢽْدُووَ رَوُواْ، سٜرْ یِدُّواْ، کَسُ یِوِیَ، بَرٜ أَوِمَ ࢻَࢽْدُوِرُو تْمَࢽُوِّ؞ دَجِ مُکُووَࢽْدُو ࢽغْوُرُو وَلْجٜ، ࢽَیِ یٜ تَدَوَ مَیْ سَمٜمَیٜرُو وَلُّوِ، دَلِلْࢽْجُدْ تِ أَمْ کْلَدُووَ سُو، سٜرْࢽَمْبُوُ سُویٜ سٜرْمَ ࢽَࢽْغَرُو؞
[36] بَوَࢽْدُو کَࢽْجِمَرِمَدْ غَیْ، ࢽَیِ یٜ أَمْبَ ࢽجُࢽُوࢽُواْ!»
[37] «بَرٜ وُࢽْدُمَرُو شَرَ یِدُّوِّ، ࢽَیِ یٜرُو شَرَ ࢽجَدِّوَوُو؞ بَرٜ وُࢽْدُمَرُو أَیَوْ غْࢽَغْوِّ، ࢽَیِ یٜرُو أَیَوْ غْࢽَࢽْجَغَیْوَوُو؞ غَوُرْࢽُواْ، ࢽَیِ یٜیَ غَوُرْࢽْجَیْ؞
[38] یُواْ، ࢽَیِ یٜرُو ࢽجَدِ، جَکَّ کٜکْ ثْمْبْرْࢽَ، حَرْ ࢻِدُࢽْ ࢻِدِ غَیْرُو ࢽَیِرُو ࢽجَدِ؞ جِرِ أَمْبُو ࢽغَلْغْوِدْ غَیْ، ࢽَیِ یٜرُو ࢽغَلْࢽْجَغَیْ؞»
[39] دَجِ عِیسَى تَیِرُو مِسَلْ أَدَ ثٜ: «کَمْبُ کَمْبُ کَمَࢽْجُوَ جٜجِ وَ؟ تَیِ یِࢽْدِ سَمَّ بْلَارُو ثَسُکُّرِ، مَرٜ؟
[40] ࢻُوُرَ مَلْمْࢽْجُوَ کُوجْࢽِّ؞ أَمَّ ࢻُوُرَ ࢻِ یَیٜ ࢽغْلَرُو أَلَمْغَدَرُو وَلْجِیَ، مَلْمْࢽْجُ غَیْرُو وَلْجِ؞
[41] «أَوِرُو کَلْمْ سِمْ کَمَࢽْمْبٜࢽْ رُمِ دُوُوࢽْ، کَرْجْمْ ثُرُو سِمّْمْبٜࢽْ أَسُࢽْمْبَوُودْ؟
[42] أَکُّوࢽِ سِمّْمْلَࢽْ کَرْجْمْبَدْ، أَوِیَوِࢽْ غْلٜ کَمَࢽْمْبُو: ‹سَوَࢽِ، کُولّٜ کَلْمْ سِمّْمْبٜدَ تُلُوُکّٜ،› ࢽْمِ؟ مْࢽَࢻْکْ! کَرْجْمْ سِمّْمْبٜدَ تُلُوُمِیَ دُوُوࢽْ، دَجِ ࢽغْلَرُو رُمٜ کَلْمْ سِمْ کَمَࢽْمْبٜدَ تُلُوُمِ؞
[43] «کْسْکَ ࢽغْلَ تَدَ دِوِ ثَکِّوَوُو، کُورُو کْسْکَ دِوِ یٜ تَدَ ࢽغْلَ ثَکِّوَوُو؞
[44] کْسْکَ ࢻِ یَیٜ تَدَࢽْجُلَࢽْ أَسُدِ؞ تَرْمُ کُولُولَّࢽْ ثَدُورِوَوُو، کُورُو إِࢽَبْ یٜ ثُوثُّورِلَࢽْ ࢽجَکْثَیْوَوُو؞
[45] کَمْ ࢽغْلَدْ أَوُو ࢽغْلَ کَرْوُࢽْجُلَࢽْ دْغَࢽَ ࢽَࢽْغَرُو ࢽغْلَ ثْدِ، کُورُو کَمْ دِوِدْ یٜ أَوُو دِوِ کَرْوُࢽْجُلَࢽْ دْغَࢽَ ࢽَࢽْغَرُو دِوِ ثْدِ؞ أَدْغَیْمَ أَوُو کَرْوُلَࢽْ دْغَࢽَدْمَا ثِ مَࢽَجِ؞
[46] «أَوِرُو وُوَ کْمَ، کْمَلَࢽْ بُواْسُوِ، أَمَّ أَوُو وُلّْکّْࢽَدَ دِوَّوُودْ؟
[47] وُࢽْدُ دُوُوࢽْ ࢽَࢽِرُو إِسٜ مَࢽَࢽِ ࢻَࢽْجٜ جْغَࢽَمَدْ، ࢽَیِرُو ثَمُࢽُوࢽْجُ ࢻْلٜࢽْجَغَکِّ:
[48] تِ أَلَمَ کَمْ سُورُو ثْدَࢽْدِ ثْࢽٜ لٜجٜ کُرُوُرُو لَجٜ ࢻْرْدُدَ کْلَ کَوْیٜࢽْ غْࢽَجْࢽَدْ غَیْ؞ إِࢽْغِ بْرْمْبٜ ࢽغْوُجٜ ࢻَلَ تَرْجٜ سُورُودَ بَبَکّٜࢽِّیَ، وُرْجْࢽِّ، دَلِلْࢽْجُدْ سُورُودْ ࢽغْلَرُو تْدَࢽْدْࢽَ ࢽَࢽْغَرُو؞
[49] أَمَّ کَمْ دُوُوࢽْ مَࢽَࢽِ ࢻَࢽْجْࢽَ جْغَࢽِّمَدْ، تِ أَلَمَ کَمْ سُورُو ࢻْرْدُ بَوُو ثِدِلَࢽْ ثْدَࢽْدْࢽَدْ غَیْ؞ إِࢽْغِ بْرْمْبٜ ࢽغْوُجٜ ࢻَلَ تَرْجٜ سُورُودَ بَکّٜࢽِّیَمَ، وُرْغَدَ؞ وُرْدُ سُورُودْیٜ جَوْرُو دِوِ،» یٜࢽُو عِیسَیٜ؞