[1] جَمَࢽْ أَدْࢽْ کَیْسَرْ أَغُسْتَسْ وَدَ ثٜ أَمْ لَرْدُوَࢽْجُیٜ سَمَّا کُومْجَ یٜࢽُو؞
[2] سَ کُومْ بُرْوُویٜ أَدَ ثَدِدْࢽْ، کْرِࢽِیُسْ تِمَ غُومْࢽَ ثِدِ سِرِیٜ وُو؞
[3] دَجِ أَمْ سَمَّ بْلَࢽْجَ بْلَࢽْجَرُو تَیِیَ کُومْجَرُو لٜىٰرَ؞
[4] ࢽغَیْمَ دُوُوࢽْ یُوسُࢻُ یٜ، تِ کَدُوُ مَیْ دَاوُدَیٜ ࢽَࢽْغَرُو، بْلَ ࢽَجَرَتْ ثِدِ غَلِلٜىٰلَࢽْ ثِجٜ بْلَ مَیْ دَاوُدَیٜ بَیْتَلَمِ ثَࢽِ ثِدِ یَحُدِیَیٜدْرُو لٜجِ ثْࢽٜ
[5] تْمَجِࢽْجُ مَرْیَمْ ثُرُووَدَ ࢽغُوجٜ تَیِیَ کُومْجَرُو کَلُّو لٜىٰرَ؞
[6] تَیِ بَیْتَلَمِلَࢽْ دُوُوࢽْ، مَرْیَمْبٜ سَࢽْجُ ࢽجَمْبُویٜ کِدْࢽِّیَ،
[7] تَدَ کُوࢽغوَ کَرُرُو کٜمْبُو؞ کُسُوتُّورَمْࢽِࢽْ ࢽَ جْࢻْتُرَمْ ثَوَࢽْدْࢽِّ ࢽَࢽْغَرُو، مَرْیَمْ تِیَ جٜࢽٜࢽْ کْلٜجٜ ثُرُو کَلْوُو کْمْبُورَمْ لْمَࢽَّیٜࢽْ سْࢽَیٜࢽُو؞
[8] ثِدِ أَدْࢽْ سْࢽِیَ لَا کَرَاࢽْ دَسَاࢽَ لْمَࢽَّࢽْجَ بُࢽٜ غُرٜجَیْ دُوُوࢽْ،
[9] مَلَیْیَ کْمَࢽْدٜىٰ لَا تَیِرُو ࢻْلٜدِیٜ دَرَجَ کْمَࢽْدٜىٰ ࢽُرْ غَیْ تَیِیَ وَسّٜ دِرِجٜ کْلْیٜࢽِّیَ، تَیْ دَجَࢽٜ رِیٜرَ؞
[10] أَمَّ مَلَیْیَدْیٜ تَیِرُو: «بَرٜ رِࢽُوِّ، أَکُّو کَوُرِ کْجِ ࢽَیِرُو وُلْࢽْجَغَکِّ، کَوُرِ دُوُوࢽْ جَمَ سَمَّیٜ کَرْوُ کْجِجِیدْ؞
[11] کُ بْلَ مَیْ دَاوُدَیٜࢽْ ࢽجْکَّیِمَࢽْدُو تَمْبْࢽَ؞ تِمَ أَلْمَسِیوُ کْمَدْ وُو!
[12] أَکُّو أَوُو ࢽَیِرُو ࢽَࢻْتُ أَلَمَیٜرُو وَلْࢽْجَغَیْدْ: تِمَلْ جٜࢽٜࢽْ کْلٜیَدَ ثُرُو کَلْوُو کْمْبُورَمْ لْمَࢽَّیٜࢽْ بُووَدَ ࢽَغْوِ،» یٜࢽُو؞
[13] سَدْمَࢽْ مَلَیْیَدْرُو مَلَیْیَوَ کْرِوُوُ کْمَࢽْدٜىٰ کْلْدَغَࢽٜ اللَّهَ ثُوࢽْغُورْࢽٜ:
[14] «سَمٜلَࢽْ اللَّهرُو دَرَجَ تِیُو، دُࢽِیَ یٜࢽْ أَمْ ࢽغُرْࢽُوجْࢽَرُو ࢽَࢽْلٜوَ جْࢻْثُوُو!» یٜرَ؞
[15] مَلَیْیَوَدْ تَیِیَ کُولْجَࢽٜ سَمٜرُو وَلَّدَرَࢽِّیَ، سْࢽِیَدْیٜ کَتّٜࢽْجَࢽْ: «ثِࢽِیُو بَیْتَلَمِرُو لٜࢽِیُو، أَوُو وَکَّجٜ کْمَࢽْدٜ أَࢽْدِرُو إِسَࢽُوسَاࢽَ أَدَ رُیْیُو!» یٜرَ؞
[16] دَجِ دُوَدُوَࢽْ لٜجَࢽٜ مَرْیَمْبَ یُوسُࢻُوَ تِمَلْ ثُرُو کَلْوُو کْمْبُورَمْ لْمَࢽَّیٜࢽْ بُووَدَدَا ࢽَیٜىٰرَ؞
[17] تِیَ کٜرُࢽِّیَ، تَیِ یٜ أَوُو مَلَیْیَدْ کْلَ تَدَدْیٜࢽْ تَیِرُو وُلْجْغْࢽَدَ إِسَࢽُویٜىٰرَ؞
[18] أَمْ لَوَرْ سْࢽِیَدْ تَیِرُو وُلْجَاࢽَدَ ࢻَࢽْجَࢽَدْ ࢽغَ أَجَࢻْکٜرَ؞
[19] مَرْیَمْ یٜ أَوُو أَࢽِ سَمَّا کَرْوُࢽْجُࢽْ رُوجْࢽَ تَیِیَ تَکْثِ کْرْغَ؞
[20] دَجِ أَوُو مَلَیْیَدْ تَیِرُو وُلْجْغْࢽَ سَمَّا کَلْکَلُّو ࢻَࢽْجَࢽَ یٜ ثَرُࢽَ یٜ ࢽَࢽْغَرُو، سْࢽِیَدْ اللَّهَ ثُوࢽْغُورْࢽٜ تِرُو دَرَجَ ثَدِیَرُو کَرَاࢽجَرُو وَلَّدَرَ؞
[21] کَوُ مَوُوَ یِمْ تَدَدَ کَجَدُیٜ کِدْࢽِّیَ، تِرُو ثُ عِیسَى کٜسَکُّو، ثُ دُوُوࢽْ مَلَیْیَدْ کَوُ یَࢽْجُ ثُرُو ࢽغُوجِرُو وُلْجْࢽَدْ؞
[22] کْلَ أَتَّوْرَ ࢽَوِ مُوسَیٜࢽْ سَࢽْجَ تَیِرُّو وَلْدُیٜ کِدْࢽِّیَ، یُوسُࢻُوَ مَرْیَمْبَ تَدَدَ ࢽغُوجَࢽٜ کْمَࢽْدٜرُو سَدُوُرُو جٜرُجَلٜمْبُو کٜسَدُو،
[23] أَتَّوْرَلَࢽْ رُوُوَدَدْ غَیْ: «تَدَ کُوࢽغوَ کَرُ تَمْبْࢽَ ࢽغُسُوࢽْ کْمَࢽْدٜىٰرُو وَلْجُو!»
[24] کُورُو سَدَا یٜیَ کْلَ أَوُو أَتَّوْرَلَࢽْ وُلْدْࢽَدْیٜࢽْ کٜدُو: «بُلَّمْ یِࢽْدِ بِ تَتَّوَرْ سَࢽَࢽَ یِࢽْدِ؞»
[25] سَ أَدْࢽْ جٜرُجَلٜمْلَࢽْ کَمْ لَا مبٜجِ، ثُࢽْجُ سِمِیُوࢽْ؞ تِدْ جِرٜمَ یٜ، أَدِࢽْمَ یٜ، سَ سِمَلُو جَمَ إِسْرَاءِیلَیٜ ثِࢽْدُیٜدَ غُرٜجِ، کُورُو رُحُ اللَّهیٜ تِلَࢽْ کْرْغَ؞
[26] ثَمَࢽْ رُحُ اللَّهیٜدْ تِرُو أَلْمَسِیوُ کْمَࢽْدٜىٰدَ ثُرُࢽِّ دُوُوࢽْ ࢽُیْوَوُو وُلْجْغْࢽَ؞
[27] ࢽغَیْمَ دُوُوࢽْ رُحُ اللَّهیٜدْ سِمِیُوࢽَّ ثَکّٜ بَلْبَلَّ ࢻَدُو اللَّهیٜرُو کْرْغَوُو؞ یُوسُࢻُوَ مَرْیَمْبَ أَوُو أَتَّوْرَ وُلْجْࢽَدَ دِیُورُو عِیسَىٰ کٜوُدْࢽِّیَ،
[28] سِمِیُوࢽْ تِیَ ࢽغَࢽْجِرُو ࢽغُوجٜ اللَّهَ ثُࢽْغُورٜ:
[29] «کْمَࢽْدٜ، وُرُو وُلْسْغْمَّدْ غَیْ، کْرْمَ وُ کَࢽْجِࢽْمْبَ کُولْسْࢽٜ کْلٜوَࢽْ ࢽُکُّو!
[30] أَکُّو ࢽجْکَّوُوࢽْمْ سِمِّࢽْ رُکّْࢽَ،
[31] ࢽجْکَّوُو دُوُوࢽْ ࢻُوُ جَمَ دُࢽِیَیٜ سَمَّیٜࢽْ دَبَّرْࢽْمَّدْ؞
[32] أَدْ جَمَ کْرْدِیَیٜرُو ࢽُرْ اللَّهیٜ ࢽجُکُّدُومَ یٜ، جَمَࢽْمْ إِسْرَاءِیلَیٜرُو دَرَجَ ࢽجُومَ یٜ،» یٜࢽُو؞
[33] بَوَࢽْجُوَ یَࢽْجُوَ أَوُو کْلَࢽْجُࢽْ وُلْجْࢽَدَ ࢻَࢽْغٜرَࢽِّیَ، أَجَࢻْکٜرَ؞
[34] سِمِیُوࢽْ تَیِرُو بَرْغَ دْࢻْثِیٜ مَرْیَمْبُو: «أَکُّو اللَّه کَدَرْجْࢽَ تَدَ أَدْ ࢽَࢽْغَرُو ثُرُو جَمَ إِسْرَاءِیلَیٜࢽْ أَمْ کَدَ یٜ ثِجَیْ، کَدَ یٜ ثَسُرِ؞ تِ ࢽَࢻْتُ أَلَمَ وَادَیٜ ثْدِ،
[35] أَوُووَ کَرْوُ أَمْ کَدَیٜࢽْ غْرَادَ ࢻٜدٜرُو ثُلُوُورُو؞ ࢽِدْ یٜ، کَشَغَرْ کَرْوُࢽْمْ سُکْثِ،» یٜࢽُو؞
[36] ࢽَدْࢽْ ࢽَوِ کَمُیٜ لَا یٜ مبٜجِ، ثُࢽْجُ حَࢽَّتُ؞ تِ ࢻٜرُو ࢻَࢽُوٜلّٜ یٜ، کَدُوُ أَشٜرّٜ یٜ؞ کَوُ ࢽغْوُ جُوُࢽَ، کْلَیَکُّࢽْ کوَࢽْجُوَ رُوکُّو کْرْوُ تُلُرُّو ࢽَࢻْکٜࢽِّیَ،
[37] کوَدْ بَوُویٜࢽُو، ࢽغَوُو أَدْیٜࢽْ رُࢽْجُ ࢽَࢻْثٜ، حَرْ کْرْوُ ࢻِسْکُࢽْ لُکُّو دٜوُࢽْ کِوَࢽْدُو؞ ࢽغَلْتٜمَ ࢻَدُو اللَّهیٜدَ کُولْجْࢽِّ، أَسٜمْبَ مُودُوَا ثْدِلَࢽْ بُࢽٜیَ کَوْسُوَ اللَّهرُو أَمْبْثِّیے کْرْغَ؞
[38] سَ أَدْࢽْ حَࢽَّتُ یٜ إِسٜ اللَّهرُو أَرْدِجٜ کْلَ تَدَدْیٜࢽْ أَمْ دُوُوࢽْ مٜرُدُ جٜرُجَلٜمْبٜ غُرٜجَیْ سَمَّرُو مَࢽَ کِدُّو؞
[39] دَجِ کْلَ وَدَ کْمَࢽْدٜىٰࢽْ أَوُو سَمَّا کٜدْࢽِّیَ، یُوسُࢻُوَ مَرْیَمْبَ بْلَࢽْجَ ࢽَجَرَتّٜ ثِدِ غَلِلٜىٰرُو وَلَّدَرَ؞
[40] أَدْغَیْمَ تَدَدْ وُرَجِ یٜ، دُࢽُووَجِ یٜ، جَوْرُو رَشِدُجِ یٜ، کُورُو بَرْغَ اللَّهیٜ تِلَࢽْ کْرْغَ؞
[41] سَا ࢽغُسُوࢽْ عِیسَیٜ بَوَࢽْجُوَ یَࢽْجُوَ جٜرُجَلٜمْبُو سَلَ لَیَ ࢽجْکَّیِرَمْبٜرُو لٜجَیْ؞
[42] ࢽغَیْ دُوُوࢽْ عِیسَى کْرْوُࢽْجُ مٜوُࢽْ یِࢽْدِࢽْ کِدْࢽِّیَ، کْلَ أَدَیٜࢽْ کَلُّو سَلَدْرُو لٜىٰرَ؞
[43] ࢽغَوُو سَلَ کُوجْࢽَیٜࢽْ، ࢻَدُورُو وَلْدَیْ دُوُوࢽْ، ࢽُوجَࢽِّلَࢽْ تَدَ عِیسَدْ جٜرُجَلٜمْࢽِࢽْ ࢽَࢻْکٜࢽُو؞
[44] تِ دَوُ جَمَدْیٜࢽْ ثَࢽٜ لٜدُ کَوُ ࢻَلّٜ کٜدْࢽِّیَ، ثُرُو کْرَمِیَࢽْجَا سَوَوَࢽْجَایٜࢽْ تِیَ مَدُ بَدِیٜرَ؞
[45] ثَوَࢽْدْࢽِّدْ، جٜرُجَلٜمْبُو تِیَ مَدُرُو وَلَّدَرَ؞
[46] ࢽغَوُو کَوُ یَکُّیٜࢽْ عِیسَى ࢻَدُو اللَّهیٜࢽْ دَوُ مَلْمْبَیٜࢽْ ࢽَࢻْکَدَ تَیِیَ کْرْࢽْجِ یٜ، ثُوُورِ یٜ ࢽَیٜىٰرَ؞
[47] أَمْ تِیَ کْرْࢽْدُ ثَدِ سَمَّ کْلَ حَࢽْغَلْکْجِࢽْجُوَ جَاوُࢽْجُوَیٜࢽْ أَجَࢻْثَࢽَ؞
[48] بَوَࢽْجُوَ یَࢽْجُوَ تِیَ کٜرُࢽِّیَ، جَوْرُو أَجَࢻْثَࢽٜ یَࢽْجُیٜ تِرُو: «تَدَࢽِ، أَوِرُو أَدَ أَࢽْدِرُو سٜدّْمْ؟ وُوَ بَوَࢽْمْبَ حَࢽْغَلْࢽْدٜ ࢽغَ ثِجْࢽَ ࢽِیَ مَࢽْجِیٜ،» یٜࢽُو؞
[49] عِیسَیٜ تَیِرُو: «أَوِرُو وُوَ مَسٜوْ؟ ࢻَدُو بَوَࢽِیٜدْࢽْ ࢽَࢻْتُدْ وُرُو وَجِࢻْدْرُو ࢽُوࢽُوِّ وَ؟» یٜࢽُو؞
[50] أَمَّ مَࢽَࢽْجُ أَدَ أَسُجَࢽِّ؞
[51] دَجِ عِیسَى تَیِیَ جْغَࢽٜ کَلُّو بْلَ ࢽَجَرَتّٜرُو وَلْدَࢽٜ مَࢽَࢽْجَ ࢽغُوجِ کْرْغَ؞ یَࢽْجُ أَوُو أَࢽِ سَمَّا کَرْوُࢽْجُࢽْ رُویٜࢽُو؞
[52] أَدْغَیْمَ عِیسَى وُرَجِ یٜ، رَشِدُجِ یٜ، ࢽَ اللَّهیٜیَ أَمْبٜیَࢽْ أَرْدِیَ ثُوَࢽْدِ یٜ کْرْغَ؞