[1] ࢽغَوُو أَدْیٜࢽْ تُسّْࢽِّ عِیسَى بْلَ کُرَࢽْ غَࢽَࢽْسُووَ جْغَࢽٜ جَمَرُو کَوُرِ کْجِ ࢽُودُو بَرْغَا اللَّهیٜ وُلْیٜىٰࢽُو؞ ࢻُوُرَوَࢽْجُ مٜوُࢽْ یِࢽْدِࢽْدَ
[2] کَمُوَ لَا کَرُوَ سُو، کَسُوَ سُوࢽْ إِسَࢽْغَجْغْࢽَا تِیَ کٜسَدُّوُو؞ کَمُوَدْ تَیِمَ مَرْیَمْ کَمُ تِلَࢽْ سٜدَࢽْ تُلُرْ ثَلُوُࢽَ تِیَ مَغْدَلَࢽْ بُواْجَیْیَ
[3] یَࢽَّ کَمُ بَ کُجَ ثُوُرَمَّ مَیْ حِرُدُسّٜیَ سُسَࢽَّا کَمُ غَدٜ ࢽغْوُوَ؞ کُورُو کَمُوَ لَا غَدٜ ࢽغْوُ کْࢽْدَࢽْجَلَࢽْ عِیسَىٰ ࢻُوُرَوَࢽْجُوَا بَࢽَجَغَیْ کَسَرْغَ؞
[4] أَمْ کَدَ کَدَمِ بْلَ بْلَࢽْ إِسَیْ دُوُوࢽْ، جَمَ ࢽغْوُ ࢽَ عِیسَیٜࢽْ ثَࢻْکَدَرَࢽِّیَ، تَیِرُو مِسَلْ أَدَ وُلْیٜىٰࢽُو؞
[5] تِیٜ: «کَمْ لَا کُلُورُو أَلْغَمَ جْجْرْدُرُو کِلُوُو؞ جْجْرْجِ ࢽغَیْ دُوُوࢽْ، کَسُࢽِ لَا جَوَلْࢽِࢽْ ࢻِیَدَ؞ دَجِ أَمْ کُودُوُ غُغُوَثَّࢽٜ ࢽغُدُووَ إِسَࢽٜ ثُوتُّو غٜوُو؞
[6] کَسُࢽِ لَا یٜ ࢽَ کَوْ کَوْوَࢽْ ࢻِیَدَ؞ رِیٜࢽِّیَ، ࢽُوسُوࢽَمْبُ ࢽَࢽْغَرُو رِمْجٜ ࢽغَمْغٜࢽُو؞
[7] کَسُࢽِ لَا یٜ ࢽَ ࢽغِوِیَࢽْ ࢻِیَدَ؞ ࢽغِوِدْ تِیَ کَلُّو رِجٜ أَلْغَمَدَ کِمِتْکٜىٰࢽُو؞
[8] أَمَّ کَسُࢽِ لَادْ یٜ ࢽَ کَتِّ ࢽغْلَاࢽْ ࢻِیَدَࢽِّیَ، رِجٜ تَدَ مِیَ مِیَ کٜکُّو،» یٜࢽُو؞ عِیسَى أَدَ وُلْیٜࢽِّیَ، کُواْ سَࢻْثٜ: «کَمْ سْمُوࢽْجُوَمَدْ ࢻَࢽْجُو!» یٜࢽُو؞
[9] ࢻُوُرَوَࢽْجُ مَاࢽَ مِسَلْ أَدْیٜدَ کٜوُورْࢽِّیَ،
[10] عِیسَیٜ: «ࢽَیِرُو أَسْرْ ࢽُودُو بَرْغَا اللَّهیٜ ࢽُودُرُو أَمَرْدْغْࢽَ، أَمَّ أَمْ غَدٜسُودْرُو مِسَلْࢽِࢽْ وُلْدِیے؞ ࢽغَیْمَ: ‹ثَرُیْمَ، أَسُجَیْوَوُو؞ ࢻَࢽْجَیْمَ، ثَرِوَوُو؞›
[11] «أَکُّو مَاࢽَ مِسَلْدْیٜ: کَسُࢽِدْ مَࢽَ اللَّهیٜ؞
[12] کَسُࢽِ کْلَ جَوَلّٜࢽْ ࢻِدَࢽَسُودْ، تَیِمَ أَمْ مَࢽَدَ ࢻَࢽْجَࢽَ دُوُوࢽْ، بَرٜ کَسَثَّࢽٜ ࢽجْکَّوُو ثَوَࢽْدْࢽِّرُو، إِوُلِیسْ إِسٜ مَࢽَدَ کَرْوُࢽْجَࢽْ ثُتُّلُوِدْ وُو؞
[13] کَسُࢽِ ࢽَ کَوْوَࢽْ ࢻِدَࢽَسُودْ، تَیِمَ أَمْ مَࢽَدَ ࢻَࢽْجَیْیَ، کَرْوُ کْجِیَرُو ثَمُویِدْ وُو؞ أَمَّ تَیِلَࢽْ ࢻْرْدُ بَوُو ࢽَࢽْغَرُو، کَوُ غَࢽَرُو کَسَثَّیْ یَیٜ، کْلَ مَࢽَدْیٜࢽْ کُتُّ ثَسَیْیَ، وَجَࢽٜ کُولْجَیْ؞
[14] کَسُࢽِ ࢽَ ࢽغِوِیَࢽْ ࢻِدَࢽَسُودْ، تَیِمَ أَمْ مَࢽَدَ ࢻَࢽْجَࢽَ دُوُوࢽْ، کَرْوُࢽْغَیْ دِیُو سُو، أَرْسِیے مَࢽْغَرْدُ سُو، دُࢽِیَارَمْ سُو کَرْوُࢽْجَرُو ࢽغَسَیٜ کُࢽْ بَرِࢽْ مَࢽَدَ کْࢻْثَࢽٜ تَیِرُو ࢻَیْدَجِیوَوُودْ وُو؞
[15] أَمَّ کَسُࢽِ ࢽَ کَتِّ ࢽغْلَاࢽْ ࢻِدَࢽَسُودْ، تَیِمَ أَمْ مَࢽَدَ ࢻَࢽْجَࢽٜ ࢽغُوجَࢽٜ کَرْوُࢽْجَ ࢽغْلَࢽْ رُوجَࢽَ تَیِرُو ࢻَیْدَجِیے، کَࢽَدِࢽْ ࢽٜمَ لَا ثَسَکِّدْ وُو؞
[16] «وُࢽْدُمَ ࢻَتْلَ وَسّٜ کْمُوࢽْ تْمْجِوَوُو بِ ثِدِیَ دْغْلّٜࢽْ غْࢽَجِوَوُو؞ کَمْ ࢻَتْلَ وَسِّیَ، أَمْ ࢽغَسَیِدْ ࢽُرْدَ ثَرُورُو تِیَ کْلَ غْࢽَدُرَمْࢽْجُیٜࢽْ غْࢽَجِ؞
[17] أَوِمَ غْرَادَ ࢻٜدٜرُو ثُلُوِوَوُودْ بَوُو، کُورُو أَوِمَ أَسْرّٜ إِسَࢽُودِوَوُودْ یٜ بَوُو؞
[18] أَدْ ࢽَࢽْغَرُو جِرِ مَࢽَࢽِ ࢻَࢽُّوِرُو حَࢽْغَلْ غْࢽَࢽُواْ! کَمْ ࢽَࢽْجُࢽْ أَوُووَمَدْ، تِرُو ثَسَرْغَیْ، أَمَّ کَمْ ࢽَࢽْجُࢽْ بَوُومَدْ، أَوُو ثْدَࢽَ تْمَجْࢽَدْمَا تِلَࢽْ ثَمُویِ،» یٜࢽُو؞
[19] دَجِ عِیسَیٜ یَࢽْجُوَ یَࢽْجُغْࢽَسُووَ ࢽَࢽْجُرُو کَدِرَ، أَمَّ جَمَ ࢽغْوُ ࢽَࢽْغَرُو رَکْثَࢽٜ تِیَ غْرٜجَࢽِّ؞
[20] أَمْ لَایٜ تِرُو: «یَࢽْمْبَ یَࢽْمْغْࢽَسُووَ دٜیَࢽْ دَادَ ࢽِیَ مَࢽْجَیْ،» یٜرَࢽِّیَ،
[21] عِیسَیٜ تَیِرُو: «ࢽُوࢽُواْ، یَࢽِیَ یَࢽِغْࢽَسُووَدْ، تَیِمَ أَمْ مَࢽَ اللَّهیٜ ࢻَࢽْجَࢽٜ جَغَیْدْ وُو!» یٜࢽُو؞
[22] یِمْ لَا عِیسَى ࢻُوُرَوَࢽْجُوَ رُوکُّو ثُرُو مَارَیٜرُو ࢽغَسَیٜ تَیِرُو: «لٜࢽِیُو بْرْمْدَ ࢻَلِّیُو ثِ إِࢽْغِیٜ تُودْرُو کُوࢽِیُو!» ثْࢽٜ لٜدُ بَدِیٜرَ؞
[23] لٜجَیْ دُوُوࢽْ، کْࢽْمْ عِیسَىٰ ࢽغُویٜࢽُو؞ دَجِ کَرُوَ دُࢽُووَ ثِجٜ إِࢽْغِ مَارَدَ لْࢻْتُ مَجٜ، حَرْ مَسِوَ تَیِیَ ࢻَࢽْدُو کَرْࢽْغٜࢽُو؞
[24] ࢻُوُرَوَدْ إِسَࢽٜ تِیَ کْࢽْمْࢽِࢽْ کٜسَࢽْغْرَࢽِّیَ، تِرُو: «مَلْمْ، مَلْمْ، ࢽُیْیٜ!» یٜرَ؞ عِیسَى ثِجٜ کَرُوَدَ ثَمْبَلْدُ إِࢽْغِیٜدَرُو کِکَّدْࢽِّیَ، دَجَࢽٜ دُࢽِیَ غْمْبُو وَلْیٜࢽُو؞
[25] دَجِ عِیسَیٜ تَیِرُو: «ࢽدَ کَمْبْرْسٜࢽْدُودْ؟» یٜࢽُو؞ ࢻُوُرَوَࢽْجُدْ رِجَࢽٜ أَجَࢻْثَࢽٜ أَمَࢽْجَرُو: «أَ! وُࢽْدُ غْلٜ کَمْ أَتّْ؟ کَرُوَا إِࢽْغِیَمَرُو وَدَ ثِیَ، جَغَیْ!» یٜرَ؞
[26] دَجِ عِیسَىٰ ࢻُوُرَوَࢽْجُوَ بْرْمْدَ ࢻَلْجَࢽٜ کُوجَࢽٜ ثِدِ غْرَسَوُیٜ ࢻُوُ ثِدِ غَلِلٜىٰرُو کَدِرَ؞
[27] عِیسَى مَارَدْلَࢽْ جْࢻْکٜࢽِّیَمَ، کَرُوَمَ لَا بْلَدْࢽْ إِسٜ تِیَ کَࢻْکٜىٰࢽُو؞ تُسّْࢽَ کَمْدْ کَجْمُ یٜ لُجْࢽِّ، ࢻَدُو یٜࢽْ ࢽَࢻْثْࢽِّ، کَوْرِلَلَࢽْ کْرْغَ؞
[28] کَمْدْ عِیسَىٰ کِرُࢽِّیَ، بُرْوُ ثَکّٜ ࢻُوُࢽْجُࢽْ تُࢽْغُرُمْجٜ ࢽغُجٜ دُࢽُوࢽْجُرُو یِلْجٜ: «أَوِ لَمْبُوࢽْمْ وُرُو، عِیسَى تَدَ اللَّه مَیْ سَمٜمَیٜ؟ لُواْࢽْجْکّْࢽَ، بَرٜ وُرُو أَجَوُ غْࢽَسْغْمِّ!» یٜࢽُو؞
[29] أَدَ وُلْدُࢽْجُدْ، عِیسَى بُرْوُوجٜ سٜدَࢽْدْرُو وَدَ ثٜ کَمْدَ کُولْجُو ثُلُوُو ثْࢽَّ ࢽَࢽْغَرُو؞ ثَلَࢽْ ࢽغْوُرُو سٜدَࢽْدْ کَمْدَ ثْدَࢽَ؞ مُکُّوࢽْجُوَ سِࢽْجُوَ سَرْغَسُولَࢽْ تِکّٜرْࢽَ یَیٜ، تَیِیَ تْࢽْ کَکَمْجٜ سٜدَࢽْدْ تِیَ کَرَارُو ثُتُّلُوِ؞
[30] دَجِ عِیسَیٜ تِرُو: «وُࢽْدُ ثُࢽْمْ؟» ثْࢽٜ کِوُورْࢽِّیَ، تِیٜ: «کْوُ سُوجِیَیٜ،» یٜࢽُو، سٜدَࢽْ کَدَ تِرُو ࢽغَسَاࢽَ ࢽَࢽْغَرُو؞
[31] بَرٜ تَیِیَ ࢽَ أَجَوُیٜدْرُو دُجْغْࢽِّرُو سٜدَࢽَّدْ عِیسَىٰ لُواْیٜرَ؞
[32] ࢽَدْࢽْ أَلَدٜ کَدَ کْلَ کَوْ کُرُوُیٜࢽْ ࢽٜوُو ثَدِ یٜ مبٜجِ؞ کُورُو سٜدَࢽَّدْ عِیسَىٰ لُواْجَࢽٜ تَیِیَ کُولْجُو ثُرُو أَلَدٜیَدْیٜرُو ࢽغَسَوُورُو؞ تَیِرُو أَمَرْجِیٜ
[33] کَمْدْࢽْ ثَلُوٜ ثُرُو أَلَدٜیَدْیٜرُو کَسَرْغَوُو؞ دَجِ أَلَدٜیَدْ ࢽغْرْمْجَࢽٜ کَوْلَࢽْ جْࢻْثَࢽٜ بْرْمْدْرُو ࢻِدَغَࢽٜ إِࢽْغِیٜ ࢽغُوجٜ کَسُࢽُو؞
[34] سْࢽِیَ أَلَدٜیَیٜدْ أَوُو وَکَّجْࢽَدَ کٜرُࢽِّیَ، ثَغَسٜ لٜجَࢽٜ بْلَدَ کَرَاࢽجُوَلَࢽْ لَوَرْدَ أَمْبُو وُلْیٜىٰرَ؞
[35] دَجِ أَمْدْ یٜ أَوُو وَکَّجْࢽَدَ کُرُورُو کٜلُوُو؞ ࢽَ عِیسَیٜرُو إِسَࢽٜ کَمْ دُوُوࢽْ تِلَࢽْ سٜدَࢽَّ ثَلُوُࢽَدْ کَجْمُࢽْجُ یٜ لُجْࢽَ، حَࢽْغَلْࢽْجُ یٜ کَلْکَلْجْࢽَ ࢻُوُ عِیسَیٜࢽْ ࢽَࢻْکَدَ ࢽَیٜىٰرَࢽِّیَ، رِیٜرَ؞
[36] أَمْ لَمَرْ أَدَ ثَرُࢽَدْ جِرِ کَرُوَمَدْ ࢽَࢽْلٜوَ ثُوَࢽْدْࢽَدَ تَیِرُو وُلْیٜىٰرَ؞
[37] کَرْوُࢽْجَ جَوْرُو کَمْدْࢽَ ࢽَࢽْغَرُو، أَمْ ثِدِ غْرَسَوُیٜ سَمَّ عِیسَى ثِدِࢽْجَ کُولْجُورُو تِیَ لُواْیٜرَ؞ دَجِ ثِ بْرْمْبٜ تُودْرُو وَلْدُرُو عِیسَى مَارَدْرُو کْرْغَوُو؞
[38] کَمْ تِلَࢽْ سٜدَࢽَّ ثَلُوُࢽَدْ یٜ عِیسَىٰ لُواْجٜ کَسَثُّو رُوکُّو لٜجَ یٜࢽُو؞ أَمَّ عِیسَى تِیَ سَلَمْجٜ:
[39] «وَلْدْࢽٜ ࢻَࢽّْمْبُو، سٜرْ کُرَ اللَّه ࢽِرُو ࢽجْدّْࢽَدَ تَیِرُو سَتْکْࢽٜ!» یٜࢽُو؞ دَجِ کَمْدْ لٜجٜ بْلَࢽْجَ سَمَّࢽْ سٜرْ کُرَ عِیسَى تِرُو ثْدّْࢽَدَ أَمْبُو وُلْیٜىٰࢽُو؞
[40] عِیسَى ثِدِ غَلِلٜىٰرُو وَلَّدَࢽِّیَ، جَمَدْ ثِجَࢽٜ مُکُّو یِࢽْدِࢽْ تِیَ کٜمُواْ، تَیِ سَمَّ تِیَ غُرٜجَیْ ࢽَࢽْغَرُو؞
[41] دَجِ ࢻُوُمَ دَࢽْدَلّٜ لَا ثُࢽْجُ جَیْرُسْ ࢽَ عِیسَیٜرُو إِسٜ ࢻُوُࢽْجُࢽْ تُࢽْغُرُمْجٜ ࢻَࢽّجُرُو إِسُورُو تِیَ جَوْرُو لُواْیٜࢽُو،
[42] دَلِلْࢽْجُدْ ࢻٜرُوࢽْجُ تُوکْ تِلُو کْرْوُ مٜوُࢽْ یِࢽْدِࢽَّ غَیْ ࢽُو ثْدِ ࢽَࢽْغَرُو؞ عِیسَى لٜدُ ثْدِ دُوُوࢽْ، جَمَدْ جَوْرُو تِرُو کْکْلْدَغَࢽٜ تِیَ غْغْرْࢻْکٜىٰرَ؞
[43] کَمُ لَا یٜ ࢽَدْࢽْ مبٜجِ، کْرْوُ مٜوُࢽْ یِࢽْدِࢽُّو بُ ࢻِدُࢽْجُ دَجْࢽِّ؞ کُورُو کْࢽْدَࢽْجُ سَمَّا کَرْوُࢽْمَسُویٜࢽْ ثُوَتْکْࢽَ یَیٜ، وُࢽْدُمَ تِیَ رَکْثٜ إِسَࢽْغَجْغْࢽِّ؞
[44] دَجِ کَمُدْ إِسٜ ࢽغَوُو عِیسَیٜࢽْ سُسُجٜ ثِ کَلْوُࢽْجُیٜدَ لٜىٰࢽُو؞ سَدْمَࢽْ بُ ࢻِدُࢽْجُ دَیٜࢽُو؞
[45] عِیسَیٜ: «وُࢽْدُ وُوَ لٜسُو؟» ثْࢽٜ کِوُورُو؞ وُࢽْدُ یَیٜ تِ غْࢽِ یٜࢽِّیَ، بِتُرُسّٜ: «مَلْمْ، جَمَدْ ࢽِیَ دِرِࢽْجَࢽٜ کْلْࢽْجَࢽَ غْغْرْمْࢽْجَغَیْ، دِیٜ!» یٜࢽُو؞
[46] أَمَّ عِیسَیٜ: «کَمْ لَا وُوَ لٜسْࢽَ، کْࢽْدُوُو وُلَࢽْ ثُلُوُࢽَرُو أَسُࢽْکّْࢽَ،» یٜࢽُو؞
[47] کَمُدْ رَکْثٜ غْرَدِوَوُورُو کِرُࢽِّیَ، لُولُوجِیَرُو إِسٜ ࢻُوُࢽْجُࢽْ تُࢽْغُرُمْجٜ تِرُو ࢻُوُ جَمَ سَمَّیٜࢽْ دَلِلْ تِیَ لٜجْࢽَا جِرِ ࢽَࢽْلٜوَ سَدْمَࢽْ ثُوَࢽْدْࢽَادَ وُلْیٜىٰࢽُو؞
[48] عِیسَیٜ تِرُو: «ࢻٜرُوࢽِ، کَمْبْرْسٜࢽْمْ ࢽَࢽْغَرُو ࢽجْکَّوُو ࢻَࢽْدْمَّ! کْلٜوَࢽْ لٜࢽٜ!» یٜࢽُو؞
[49] عِیسَى مَࢽَجِ ࢽغَیْ دُوُوࢽْ، کَمْ لَا ࢻَدُو جَیْرُسّٜࢽْ إِسٜ تِرُو: «ࢻٜرُوࢽْمْ بَوُوجْࢽَ، بَرٜ غَدٜرُو مَلْمْدَ سُوُولّْمِّ،» یٜࢽُو؞
[50] أَمَّ عِیسَى أَدَ ࢻَࢽْغٜࢽِّیَ، تِرُو: «بَرٜ رِࢽْمِّ، بِیَ یَسَرَیْ، ࢽغَجِ،» یٜࢽُو؞
[51] ࢻَدُودْرُو کَدِرَࢽِّیَ، عِیسَیٜ بِتُرُسَّ یَحْیـَىٰ یَعْࢼُوبَا ࢻٜرُودْیٜ بَوَا یَا أَࢽِ غْࢽِیَ، بَرٜ وُࢽْدُمَ تِیَ رُوکُّو ࢽغَاࢽِّ یٜࢽُو؞
[52] سَ أَدْࢽْ أَمْ سَمَّ کْلَ ࢻٜرُودْیٜࢽْ کَرْوُکُتَّرُو ثٜسِرِ؞ دَجِ عِیسَیٜ تَیِرُو: «بَرٜ یِرُوِّ؞ ࢻٜرُودْ بَوُوجْࢽِّ، کْࢽْمْ ثْدِ،» یٜࢽُو؞
[53] أَمَّ ࢻٜرُودْ ࢽُࢽَ ࢽُوجَࢽَدْرُو، تِیَ رُجَࢽٜ تِرُو کَاسُ کٜدُّو؞
[54] دَجِ ࢻٜرُودَ مُکُّویٜࢽْ ثْدَࢽٜ کُواْ سَࢻْثٜ: «ࢻٜرُومَ، ثِࢽٜ!» یٜࢽُو؞
[55] ࢻٜرُودْ رُو ثُوَࢽْدٜ سَدْمَࢽْ ثِیٜࢽُو؞ عِیسَیٜ أَوُو کْمْبُویٜ ࢻٜرُودْرُو ثَدُو یٜࢽُو؞
[56] بَوَࢽْجُوَ یَࢽْجُوَ جَوْرُو أَجَࢻْکٜرَ؞ أَمَّ عِیسَى وَدَ ثٜ تَیِرُو بَرٜ وُࢽْدُمَرُو أَوُو وَکَّجْࢽَدَ وُلْجَغَࢽِّ یٜࢽُو؞