[1] دَجِ مَجِلِسْوُ سَمَّ ثِجَࢽٜ عِیسَىٰ ࢻُوُ غُومْࢽَ بِلَتُسّٜرُو ثَادٜ
[2] أَیَوْ غْࢽَدُوُ بَدِیٜرَ؞ تَیِیٜ: «کَمْ أَدْ جَمَࢽْدٜیَ تُرُ ثَدُورُو تْمْبَلْجِیے ࢽَیٜىٰیْیٜ؞ کَیْسَرُّو أَکِّ ࢽجُو دَࢻْثِیے، کُورُو تِمَ أَلْمَسِیوُ مَیْدْ وُو ثْࢽِ،» یٜرَ؞
[3] بِلَتُسّٜ تِرُو: «ࢽِمَ وَ مَیْ یَوْدِیَیٜدْ وُو؟» ثْࢽٜ تِیَ کِوُورُو؞ عِیسَیٜ: «ࢽِمَ وُلّْمْ، وُمَ!» یٜࢽُو؞
[4] دَجِ بِلَتُسّٜ وُرَوَ رِمَࢽَّیٜیَ جَمَ ثَࢻْتَࢽَدَرُو: «کَمْ أَدْلَࢽْ أَیَوْ ࢻِمَ ࢻَࢽْدْکّْࢽِ،» یٜࢽُو؞
[5] أَمَّ أَمْدْ ثَیٜیَ کُوجْࢽَرُو کُواْ سَࢻْثَࢽٜ: «أَلَمْدُࢽْجُࢽْ جَمَࢽْدٜ ثِدِ یَحُدِیَیٜ سَمَّا جَوَلَّࢽْ ثُتُّلُوِ، ثِدِ غَلِلٜىٰࢽْ بَدِجٜ حَرْ ࢽَ أَدْرُو کَدِیُو،» یٜرَ؞
[6] بِلَتُسْ أَدَ ࢻَࢽْغٜࢽِّیَ، عِیسَى کَمْ غَلِلٜىٰ وَرُو کِوُورُو؞
[7] عِیسَى کَمْ غَلِلٜ ثِدِ دُوُوࢽْ مَیْ حِرُدُسْ ثُࢽُودِدْیٜرُو أَسُیٜࢽِّیَ، ثَکّٜ عِیسَىٰ ࢽَ مَیْدْیٜرُو کٜسَدُو، سَ أَدْࢽْ تِ یٜ جٜرُجَلٜمْࢽِࢽْ ࢽَࢽْغَرُو؞
[8] مَیْ حِرُدُسْ عِیسَىٰ کِرُࢽِّیَ، کَرْوُࢽْجُ جَوْرُو کْجِیٜࢽُو؞ تُسّْࢽَ تِیَ تَدُو ثْرَاࢽَ، دَلِلْࢽْجُدْ ثَلَࢽْ لَوَرْࢽْجُ ࢻَࢽْجْࢽَ، کُورُو أَلَمَ لَا سَمٜىٰ تِیٜࢽْ کُرُورُو تْمَجْࢽَ ࢽَࢽْغَرُو؞
[9] کُورُو کَدَ تِرُو کِدُّو، أَمَّ عِیسَى أَوِمَ تِرُو کَلَکْثْغْࢽِّ؞
[10] وُرَوَ رِمَࢽَّیٜیَ مَلْمْبَ أَتَّوْرَیٜیَ یٜ ࢽَدْࢽْ دَادَ تِیَ جَوْرُو بُرْوُجَیْ؞
[11] مَیْ حِرُدُسْ یٜ سُوجِیَࢽْجُوَ رُوکُّو تِرُو رُدُ غْࢽَجَغَࢽٜ رَرَیٜرَ؞ دَجِ کَلْوُ دَرَجَا تِرُو لُجَغَࢽٜ ࢽَ بِلَتُسّٜرُو کَلَکّٜرَ؞
[12] ثَمَࢽْ مَیْ حِرُدُسَّ غُومْࢽَ بِلَتُسَّیٜ کَتّٜࢽْجَ کُتُّ دُوُوࢽْ، یِمْ أَدْمَࢽْ کْجِجَࢽٜ سَوَرُو وَلْیٜرَ؞
[13] دَجِ غُومْࢽَ بِلَتُسْ وُرَوَ رِمَࢽَّیٜیَ أَمْوُرَوَ جَمَیٜیَ جَمَدَا بُواْجٜ
[14] تَیِرُو: «کَمْ أَدْ جَمَدَ تُرُ ثَدُورُو تْمْبَلْجِیے ࢽُوٜ ࢽَࢽِرُو کِوُدُوْ؞ ࢻُوُࢽْدُوࢽْ تِرُو کُورُو کِدّْکّْࢽِیَ، أَیَوْ تِرُو غْࢽَغْوَّدْࢽْ ࢻَلْمَ ࢻَࢽْدْکّْࢽِ؞
[15] کُورُو مَیْ حِرُدُسْ یٜ ثُوَࢽْدْࢽِّ ࢽَࢽْغَرُو، ثَکّٜ تِیَ کَلَکّٜرَ؞ أَکُّو أَوِمَ تِیَ رُورُو ࢽجٜجُویٜ ثْدْࢽَ بَوُو؞
[16] أَدْ ࢽَࢽْغَرُو یَکّْکّٜ تِیَ کِرْوُوࢽْ جَجَرْجَࢽٜ سَلَمّْکِّ،» یٜࢽُو؞
[17] [ثَمَࢽْ کْلَ أَدَیٜࢽْ سَلَ أَدْࢽْ کُوسُومَ ࢻَلْ تَیِرُو سَلَمْجِیے؞]
[18] دَجِ جَمَ سَمَّ ثِ تِلُووَرُو کُواْ سَࢻْثَࢽٜ: «أَعَ! کَمْ أَدْیٜ رُوࢽْجُ تُلُوٜ! بَرَبَّسَّ أَࢽْدِرُو سَلَمْسَغَࢽٜ!» یٜرَ؞
[19] تِ بَرَبَّسْدْ، بْرْࢽِلَࢽْ تُرُ ثَدٜ کَمْ لَآ ثٜىٰسْࢽَدْرُو، تِیَ کُوسُورُو ثَسَکّْࢽَ؞
[20] بِلَتُسْ عِیسَىٰ سَلَمْدُرُو ثْرَاࢽَدْ، وَلْدٜ تَیِرُو مَࢽَیٜىٰࢽُو،
[21] أَمَّ کُواْ سَࢻْثَࢽٜ: «کْسْکَرُو تِیَ جَغْࢽٜ! کْسْکَرُو تِیَ جَغْࢽٜ ࢽُو!» ثَࢽِ؞
[22] یَکُّیٜدْࢽْ وَلْدٜ تَیِرُو: «أَوِرُو؟ أَیَوْ أَوِیٜ ثْدُو؟ أَوِمَ رُورُو ࢽجٜجُویٜ تِلَࢽْ ࢻَࢽْدْکّْࢽِ؞ أَدْ ࢽَࢽْغَرُو یَکّْکّٜ تِیَ کِرْوُوࢽْ جَجَرْجَࢽٜ سَلَمّْکِّ،» یٜࢽُو؞
[23] أَمَّ جَمَدْ ثَیٜ بَوُورُو کُواْ سَࢻْثَࢽٜ عِیسَىٰ کْسْکَرُو جَجُوُو ࢽُو ثَࢽٜ، حَرْ کُواْࢽْجَࢽْ ࢽَسَرْغَدَرَ؞
[24] دَجِ بِلَتُسْ شَرَ کَمْجٜ أَوُو ثَوُورْࢽَدْ تْدِ یٜࢽُو؞
[25] کَمْ تِیَ ثَوُورْࢽَ، کَمْ دُوُوࢽْ تُرُوَ کَمْ ࢽجٜجُووَ ࢽَࢽْغَرُو کُوسُورُو ثَسَکّْࢽَدَ سَلَمْغٜࢽُو، أَمَّ عِیسَىٰ أَوُو ثَرَاࢽَدَ ثَدُورُو مُکُّوࢽْجَرُو کٜکُّو؞
[26] سُوجِیَ عِیسَىٰ ثَادِ دُوُوࢽْ، کَمْ لَا بْلَ کُرَࢽٜىٰ ثُࢽْجُ سِمَࢽْ کَرَاࢽْ إِسِدَ ثَدَࢽٜ کْسْکَ کَرْمُویٜدَ ࢽغُوجٜ ࢽغَوُو عِیسَیٜ جْغَࢽٜ لٜىٰرَ؞
[27] ثُرُو جَمَ تْرْمْ ࢽغَوُوࢽْجُ جَغَیْدْیٜࢽْ کَمُوَ کَدَ تِ ࢽَࢽْغَرُو کَرْوُکُتَّرُو ࢽغَࢽْجِ بَکْثَیْ یٜ، ثٜسِرِ یٜ مبٜجِ؞
[28] دَجِ عِیسَى سُوُورْدٜ تَیِرُو: «کَمُوَ جٜرُجَلٜمْبٜ، بَرٜ وُ ࢽَࢽْغَرُو یِرُوِّ! کْلَࢽْدُووَ ࢽجُرِیَࢽْدُووَرُو یِکِّرُواْ!
[29] ࢽُوࢽُواْ، سَ لَا ثْدٜ أَمْبٜ: ‹بَرْغَࢽْجَ کَمُوَ رَکْثَࢽٜ ثَسَمْبِوَوُودْ! بَرْغَࢽْجَ کَمُوَ ࢽغَلْتٜمَ ثَسَمْبْࢽٜ تْغَمْ ثَدْࢽِّدْ!› ثَࢽِ؞
[30] سَدْࢽْ کَوْوَ کُرُوُرُو: ‹کْلَࢽْدٜرُو یُکُّرُواْ!› کُورُو کْرِسُو یٜرُو: ‹أَࢽْدِیَ جَࢽْسَࢽُواْ!› وُلْدُ بَدِجَیْ؞
[31] أَوُووَ کْسْکَ کْرِدْرُو ࢽغَیْ ثَدِّیَ، أَوِ غْلٜ کْسْکَ ࢽغَمْدُدْرُو وَکَّجِیے؟»
[32] سُوجِیَدْ غْࢽْدٜوُ یِࢽْدِ یٜیَ تِیَ رُوکُّو ࢽجٜجُورُو کٜسَدُو؞
[33] ࢽَ تِرُو بُوُو کْلَیٜ ثَࢽِدْرُو کَدِرَࢽِّیَ، ࢽَدْࢽْ عِیسَىٰ کْسْکَدْرُو جَیٜىٰرَ؞ غْࢽْدٜوُ یِࢽْدِدْ یٜیَ جَیٜىٰرَ، ࢻَلْدْ کْمْبُورَمْࢽْجُلَࢽْ، ࢻَلْدْ یٜ وَیْلَࢽْجُلَࢽْ؞
[34] دَجِ عِیسَیٜ: «بَوَ، تَیِیَ غَوُرْࢽٜ، أَوُو ثَدِ ࢽُوجَࢽِّ ࢽَࢽْغَرُو،» یٜࢽُو؞ سُوجِیَدْ کَجْمُࢽْجُ ࢽغُوجَࢽٜ وَلَوَلَ ثَدٜ دَغَرْیٜرَ؞
[35] جَمَدْ ࢽَدْࢽْ دَادَ ثَرُیْ ࢽغَیْ دُوُوࢽْ، أَمْوُرَوَدْ تِرُو رُدُ غْࢽَجَغَࢽٜ: «أَمْ غَدٜیَ ثْکَّاࢽَ؞ تِمَ أَلْمَسِیوُ اللَّه کْرٜجْࢽَا، ࢽدَ کْلَࢽْجُ ثْمُواْ!» ثَࢽِ؞
[36] سُوجِیَدْ یٜ تِیَ رُجَࢽٜ ࢽَࢽْجُرُو إِسَࢽٜ تِرُو دِبٜࢽْ ثُومْثُومْ سَجَغَࢽٜ:
[37] «ࢽِ مَیْ یَوْدِیَیٜدَ، کْلَࢽْمْ مُویٜ!» ثَࢽِ؞
[38] کْلَکَجِࢽْجُࢽْ أَدْ أَلُّولَࢽْ رُوُوَدَ: تِ أَدْمَ مَیْ یَوْدِیَیٜ وُو؞
[39] غْࢽْدٜوُ یِࢽْدِ جَجَاࢽَدْیٜ ࢻَلْࢽْجَ عِیسَرُو مَࢽَکُتُّ ثْدّٜ: «ࢽِمَ غْࢽَ أَلْمَسِیوُدْ وُو؟ ࢽدَ کْلَࢽْمْ مُویٜ، أَࢽْدِ یٜیَ سَکَّیٜ!»
[40] أَمَّ ࢻَلْدْ یٜ کَمَࢽْجُرُو جْکَّدٜ: «أَ! ࢽِ یٜرُو شَرَ رُو تُلُوُویٜ ࢽجَدّْࢽَمَ، اللَّهَ رِࢽْمْبَوُودْ؟
[41] کَاࢽدٜدْ جُسّْࢽَ، دِوِ دِیٜࢽَ ࢽَࢽْغَرُو أَجَوُ غْࢽَسَاࢽَ، أَمَّ کَمْ أَدْ أَوِمَ دِوِ ثْدْࢽِّ،» یٜࢽُو؞
[42] دَجِ وَلْدٜ: «عِیسَى، کْرْمَیْࢽْمْ ࢻَࢽْدْمِیَ، وُوَ کْلَࢽْ سْدَیْ،» یٜࢽِّیَ،
[43] عِیسَیٜ: «جِرٜمَرُو ࢽِرُو وُلْࢽْجْغْکِّ، کُمَرُو وُوَ رُوکُّو جَࢽَّلَࢽْ دْغَیْیٜ،» یٜࢽُو؞
[44] کَوْسُ کْلَ دَوُ دُوُوࢽْ، دُࢽِیَ ࢽغَ تْمْجٜ ثْلْمْبُو وَلْجٜ، حَرْ سَ یَکُّ کَجِرِیٜرُو کِیَدُو،
[45] کْࢽْغَلْ یٜ وَسْتُرُو وَیٜࢽُو؞ سَ أَدْࢽْ جُوَ ثُرُو ࢻَدُو اللَّهیٜࢽْ دْغَࢽَدْ ࢻَرَکْ یِࢽْدِرُو کَرْغَدَࢽْ؞
[46] دَجِ عِیسَى کُواْ دُࢽُووَرُو سَࢻْثٜ: «بَوَ، رُوࢽِ ثُرُو مُکُّوࢽْمْبٜرُو یَکّْکِّ،» یٜࢽِّیَ، رُو کِرْمْبُو؞
[47] کَجَلَّ سُوجِیَیٜدْ أَوُو وَکَّجْࢽَ سَمَّا کِرُࢽِّیَ، اللَّهَ جَجَکْثٜ: «ࢻَغَتُّو کَمْ أَدْ جِرٜمَ!» یٜࢽُو؞
[48] جَمَ کَدَ ࢽَ لَمَرْ أَدْیٜࢽْ ثَࢻْتَࢽَدْ یٜ أَوُو وَکَّجْࢽَ سَمَّا کٜرُࢽِّیَ، کَرْوُکُتَّرُو ࢽغَࢽْجِ بَکْثَیْیَرُو وَلَّدَرَ؞
[49] أَمَّ أَمْ عِیسَىٰ ࢽُوجَࢽَدَ کَمُوَ تِیَ ثِدِ غَلِلٜىٰࢽْ جَاࢽٜ إِسَࢽَدَ سَمَّ کُرُوُࢽِࢽْ دَادَ أَوُو أَࢽِیَ لَوَرْجَیْ کَسَرْغَ؞
[50] کَمْ لَا ࢽَدْࢽْ مبٜجِ، ثُࢽْجُ یُوسُࢻُ؞ تِدْ کَمْ ࢽغْلَمَ یٜ، جِرٜمَ یٜ،
[51] کَمْ أَرِمَتِیَ ثِدِ یَحُدِیَیٜ، کُورُو ࢽُودُو بَرْغَا اللَّهیٜدَ غُرٜجِ؞ تِ مَجِلِسْوُدْیٜ ࢻَلْࢽْجَ یَیٜ، أَوُو أَمَࢽْجُ ࢽِیَجَࢽٜ عِیسَرُو ثَدّْࢽَدَ کَسَثّْࢽِّ؞
[52] دَجِ یُوسُࢻُ ࢽَ غُومْࢽَ بِلَتُسّٜرُو لٜجٜ کَمِࢽْ عِیسَیٜدَ کِوُورُو؞
[53] کَمِࢽْدَ کْسْکَدْلَࢽْ ثْسَیٜ لُووُواْࢽْ بَتَّ لِࢽّٜࢽْ کْکْرْجٜ کَوْرِ دُوُوࢽْ ثُرُو کَوْیٜࢽْ لَجَࢽَ لَا وُࢽْدُمَا ثَسَکّْࢽِّرُو ثَکّٜ سْࢽَیٜࢽُو؞
[54] یِمْدْ یِمْ دَبَّرْدُیٜ، کُورُو یِمْ تُسْتُیٜ بَدِدُࢽْجُ دٜلْ کَرْࢽْجْࢽَ؞
[55] کَمُوَ دُوُوࢽْ عِیسَىٰ رُوکُّو ثِدِ غَلِلٜىٰࢽْ إِسَࢽَدْ یٜ جَاࢽٜ کَوْرِدَ لَوَرْجَࢽٜ جِرِ کَمِࢽّجُ سْࢽَجَࢽَدَ کٜرُو؞
[56] دَجِ وَلْدَࢽٜ کَوُدِیَ کْࢽْدَوُوَ دَبَّرْیٜرَ؞ یِمْ تُسْتُیٜیَ کْلَ وَدَیٜࢽْ تُسْکٜرَ؞