[1] عِیسَى مَࢽَࢽْجُ سَمَّ جَمَرُو ثْدّٜ کٜرْࢽِّیَ، بْرْࢽِ کَࢻَرْࢽَامبٜرُو لٜىٰࢽُو؞
[2] ࢽَدْࢽْ سُوجِ کُرَ رُومْبٜ لَا کَرٜیَࢽْجُ جَوْمَرُو ثْرَاࢽَ دُوࢽْدِ ࢽُو ثْدِ مبٜجِ؞
[3] سُوجِ کُرَدْ لَوَرْ عِیسَیٜ ࢻَࢽْغٜࢽِّیَ، أَمْوُرَوَ یَوْدِیَیٜ لَآ ࢽَࢽْجُرُو ثُࢽُودٜ تِیَ لُواْجَ إِسُو کَرٜیَࢽْجُ إِسَࢽْغَجُوُو یٜࢽُو؞
[4] ࢽَ عِیسَیٜرُو کَدِرَࢽِّیَ، تِیَ جَوْرُو لُواْجَࢽٜ: «مَرْࢽٜ، أَدَ تِرُو یِدّْمِیَ جُسّْࢽَ،
[5] دَلِلْࢽْجُدْ جَمَࢽْدٜ یَوْدِدَ ثْرَاࢽَ، حَرْ دَࢽْدَلْ أَࢽْدِرُو سٜتَّࢽْدُو،» یٜرَ؞
[6] دَجِ عِیسَى تَیِیَ رُوکُّو لٜىٰرَ؞ عِیسَى ࢻَدُودَ کَرْࢽْغٜࢽِّیَ، سُوجِ کُرَدْ سَوَوَࢽْجُ لَآ ࢽَ عِیسَیٜرُو ثُࢽُودٜ تِرُو: «سُوجِ کُرَیٜ یٜࢽُو: ‹کْمَ، بَرٜ سُوُولْدْمِّ، ࢽِیَ ࢻَࢽِّࢽْ سَوُو تِکّْࢽِ؞
[7] ࢽَࢽْمْبُو کْࢽْدٜمَ یٜ تِکّْࢽِ؞ بِیَ وَدَ یٜ، کَرٜیَࢽِ ࢽغَجِ؞
[8] وُدْ ثِدِیَ کْࢽْدُوُو أَمْبٜࢽْ کْرْغَکُّو، ࢻْرْدُࢽِ یٜࢽْ سُوجِیَ تَکّْࢽَ؞ ࢻَلْࢽْجَرُو: لٜࢽٜ! ࢽْکِّیَ، لٜجِ؞ ࢻَلْ لَارُو: أَرٜ! ࢽْکِّیَ، إِسِ؞ کُورُو کَرٜیَࢽِرُو: أَدَ دٜ! ࢽْکِّیَ، ثْدِ؞›»
[9] عِیسَى أَدَ ࢻَࢽْغٜࢽِّیَ، أَجَࢻْثٜ سُوُورْدٜ جَمَ تِیَ جَغَیْدْرُو: «ࢽَیِرُو وُلْࢽْجَغَکِّ، ثُرُو جَمَ إِسْرَاءِیلَیٜمَࢽْ کَمْبْرْسٜ کُرَ أَدْ غَیْ ࢻَࢽْدْکّْࢽِ!» یٜࢽُو؞
[10] دَجِ أَمْ سُوجِ کُرَ ثُࢽُودْࢽَدْ ࢻَدُودْرُو وَلَّدَرَࢽِّیَ، کَرٜیَدَ کْلٜوَࢽْجُ سَلَیْ ࢽَیٜىٰرَ؞
[11] ࢽغَوُو أَدْیٜࢽْ تُسّْࢽِّ عِیسَى بْلَ لَا ࢽَیِࢽْ ثَࢽِدْرُو لٜىٰࢽُو؞ ࢻُوُرَوَࢽْجُوَ أَمْ ࢽغْوُوَ یٜ تِیَ ثَسَدُّوٜ لٜىٰرَ؞
[12] ࢽغَوُورَمْ بْلَیٜدَ کَرْࢽْجَࢽَ دُوُوࢽْ، کَمْ لَا ࢽُࢽَ ࢽغُوجَࢽَ کَوْرِلَرُو ثَادِ؞ یَࢽْجُدْ تَدَ غَدٜ ثْدَࢽِّ، کوَࢽْجُ یٜ ࢻَثّْغْࢽَ، کُورُو جَمَ کَدَ بْلَدْیٜ یَدَ ثَسَدُّوِ؞
[13] کْمَدْ تِیَ کِرُࢽِّیَ، ࢽجُࢽُوجٜ تِرُو: «بَرٜ یِرْمِّ!» یٜࢽُو؞
[14] بَلَࢽْغَرْدَ کَرْࢽْجٜ لٜجٜ أَمْ تِیَ ࢽغُوجَࢽَدْ غْمْ دَیٜرَ؞ عِیسَیٜ: «جَیْرُو، ࢽِرُو وُلْࢽْجْغْکِّ، ثِࢽٜ!» یٜࢽِّیَ،
[15] کَمْ ࢽُࢽَدْ ثِجٜ ࢽَࢻْثٜ مَࢽَ بَدِیٜࢽُو؞ دَجِ عِیسَى تِیَ یَࢽْجُرُو کَلَکّٜىٰࢽُو؞
[16] أَمْ سَمَّ رِجَࢽٜ اللَّهَ ثُوࢽْغُورْࢽٜ: «ࢻَغَتْ، ࢽَوِ کُرَ ثُرُوࢽْدٜࢽْ ثُلُوُࢽَ، اللَّه جَمَࢽْجُوَ بَࢽَدُوُرُو إِسْࢽَ!» یٜرَ؞
[17] لَوَرْ عِیسَیٜ أَدْ ثِدِ یَحُدِیَیٜیَ لَرْدُوَ تِیَ دِرِجَࢽٜ کْلْجَࢽَا سَمَّرُو تَتَرْغَادَ؞
[18] ࢻُوُرَوَ ࢽَوِ یَحْیـَیٜ أَوُو أَࢽِ سَمَّا تِرُو وُلْیٜىٰرَ؞ دَجِ یَحْیـَى ثُرُوࢽْجَࢽْ یِࢽْدِ بُواْجٜ
[19] ࢽَ کْمَ عِیسَیٜرُو کُورُو أَدَ ࢽجْدُّورُو کِࢽُودُو: «ࢽِمَ وَ ࢻُوُࢽْ إِسِمَدْ وُو، رَ غَدٜ غُرٜࢽِیٜ؟»
[20] ࢽَ عِیسَیٜرُو کَدِرَࢽِّیَ، تِرُو: «یَحْیـَى کَسَلَمَ أَࢽْدِیَ ࢽَࢽْمْبُو کُورُو أَدَ ࢽجْدُّورُو سَࢽُودُو: ‹ࢽِمَ وَ ࢻُوُࢽْ إِسِمَدْ وُو، رَ غَدٜ غُرٜࢽِیٜ؟›» ثَࢽٜ تِیَ کٜوُورُو؞
[21] سَ أَدْࢽْ عِیسَى أَمْ کْࢽْدُوࢽْدِیَا کَسُوَآ کَرُوَآ کَدَ إِسَࢽْغَجِیے، کُورُو کَمْبُوَ ࢽغْوُوَ سِمْبَرُو ثْدِ؞
[22] دَجِ عِیسَیٜ ࢻُوُرَوَ یَحْیـَیٜرُو: «وَلْدْࢽُواْ، أَوُو رُوَّا ࢻَࢽُّوَّآ یَحْیـَرُو وُلْغْࢽُواْ: کَمْبُوَ سِمْ ثَوَࢽْدِ، ࢽغُرْدِییَ یٜ سِࢽْجَࢽْ لٜجَیْ، أَمْ بَرَسُوَ ࢽغَجَࢽٜ تَیِرُّو وَلْجَیْ، مُوَسُو یٜ ࢻَࢽْجَیْ، أَمْ سَࢽُࢽَ رُووَرُو وَلْجَیْ، کُورُو تَلَاوَ یٜ کَوُرِ کْجِدَ ࢻَࢽْجَیْ؞
[23] بَرْغَࢽْجُ کَمْ وُ ࢽَࢽْغَرُو تَلْجِوَوُودْ!» یٜࢽُو؞
[24] ࢻُوُرَوَ یَحْیـَیٜدْ سَࢻْکَدَرَࢽِّیَ، عِیسَى کْلَ یَحْیـَیٜࢽْ جَمَدْرُو مَࢽَ ࢽجْدُّو بَدِیٜࢽُو؞ تِیٜ: «أَوِ ثُرُو کَرَایٜࢽْ کُرُورُو لٜىٰوْ؟ ࢽغْلَیْ لَا کَࢽْجِ کَࢽْجِرُو کَرُوَیٜ ثَکّٜ مُوجِ ثْدِ وَ؟
[25] أَعَ؞ أَوِ غْلٜ کُرُورُو لٜىٰوْ؟ کَمْ کَجْمُ شَوَ ثَکّْࢽَا وَ؟ أَعَ، أَمْ کَجْمُ شَوَ ثَسَکّٜ ثُرُو لَرَسُیٜࢽْ دَسَاࢽَدْ مَیْرِلَࢽْ کَسَرْغَ؞
[26] تُو، أَوِ غْلٜ کُرُورُو لٜىٰوْ؟ ࢽَوِیَ وَ؟ آه، ࢽَیِرُو وُلْࢽْجَغَکِّ، ࢽَوِمَا کُوجْࢽَ؞
[27] تِمَ کَمْ دُوُوࢽْ کْلَࢽْجُࢽْ کِتَوُلَࢽْ أَدْ رُوُوَدَدْ: ‹ࢽِࢽْ ࢻُوُࢽُّو کْࢽْغَیَمِّ ࢽُودْکّٜ، ࢽِرُو جَوَلْࢽْمْ ثَسَّیْ؞›
[28] ࢽَیِرُو وُلْࢽْجَغَکِّ، ثُرُو کَمْ کَمُلَࢽْ تَمْبْࢽَ سَمَّیٜࢽْ وُࢽْدُمَ یَحْیـَىٰ کُوجْࢽَ بَوُو؞ أَمَّ ثُرُو ࢽُودُو بَرْغَا اللَّهیٜࢽْ تْࢽْغْرِدْ تِیَ کُوجْࢽَ؞»
[29] (جَمَ سَمَّ أَکِّ مُواْمَسُوࢽْ کُࢽْدٜࢽُّو ثَمَࢽْ کَوُرِ یَحْیـَیٜ ࢻَࢽْجَࢽَدْ، اللَّهَ جِرٜمَرُو أَسُجَࢽٜ کَسَثَّࢽٜ تَیِرُو کَسَلَ تُوَیٜ کِدُّو؞
[30] أَمَّ ࢻَرِسَوَا مَلْمْبَ أَتَّوْرَیٜیَ أَوُو اللَّه تَیِرُو ࢽِیَجْغْࢽَدَ وَجَࢽٜ کَسَلَ تُوَیٜ یَحْیـَیٜدَ کَسَثَّࢽِّ؞)
[31] «وُࢽْدُسُورُو أَمْ جَمَࢽْ أَدْیٜدَ رَتَّلْغْکِّ؟ أَوِ غْلٜ تَیِیَ ثَمُࢽْ وُو؟
[32] تَیِ أَلَمَ یَلَّ ثِ کَسُوُیٜࢽْ ࢽَࢻْکَدَ کُواْ سَࢻْثَࢽٜ أَمَࢽْجَرُو: ‹أَلْغَیْتَ ࢽَیِرُو ࢻُࢽْجَغَیْیٜࢽَ دُوُوࢽْ، بِکّٜ رَࢽْدُوِّ؞ کُورُو سُو لَغَرَࢽّٜ دِیٜࢽَ دُوُوࢽْ، یِرُوِّ،› ثَࢽِ غَیْ؞
[33] تُو، یَحْیـَى کَسَلَمَ إِسٜ کْمْبُو یٜ جُوُࢽِّ، دِبٜࢽْ یٜ ثَࢽِّ، ‹تِ کَرُوَمَ!› یٜوْ؞
[34] کُورُو تَدَ کَمْبٜدْ إِسٜ جُوُیْ، ثَیْ، ‹أَکُّو کْمْبُومَ، کْࢽْجَمَ، سَوَ أَکِّ مُواْمَسُووَ بِوُمَسُووَیٜ!› یٜوْ؞
[35] أَمَّ ࢽَࢽْرَشِدُدْ کْࢽْدُوࢽْجُ ࢽغَࢽْ أَسُدِ؞»
[36] ࢻَرِسَ لَا عِیسَىٰ مَسْࢽَ دِیُورُو دُویٜࢽِّیَ، عِیسَى ࢻَࢽّجُرُو ࢽغَیٜ مَسْࢽَرُو ࢽَࢻْکٜࢽُو؞
[37] بْلَدْࢽْ کَمُ بِوُمَ لَا مبٜجِ؞ عِیسَى ࢻَدُو ࢻَرِسَدْیٜࢽْ مَسْࢽَ ثْدِرُو ࢻَࢽْغٜࢽِّیَ، سْࢽْدَلْ ثُرُوࢽْجُࢽْ کَوُدِ تَمَࢽَّا ࢽغُوجٜ إِسٜ
[38] ࢽغَوُو عِیسَیٜࢽْ دَجٜ ثِرِیَرُو سِ عِیسَیٜرُو سِمَلُو کُوکُولْجِیٜ کَࢽْدُرِ کْلَࢽْجُیٜࢽْ ثِࢽْجٜ کَ ثِࢽْجُیٜ غْࢽَجِیٜ کَوُدِدَ ࢻِجِیٜ سَمْغٜىٰࢽُو؞
[39] أَدَ کِرُࢽِّیَ، ࢻَرِسَ عِیسَىٰ دُوجْࢽَدْ کَرْوُࢽْجُࢽْ: «ثَ کَمْ أَدْ ࢽَوِیَ، کَمُ تِیَ لٜجِدْ بِوُمَرُو ࢽُوجِ،» یٜࢽُو؞
[40] عِیسَیٜ تِرُو کَلَکْثِیٜ: «سِمَࢽْ، أَوُو لَا ࢽِرُو وُلْࢽْجْغْکِّیَ، رَاکّْࢽَ،» یٜࢽِّیَ، تِیٜ: «سَیِࢽَّ، وُلّٜ!» یٜࢽُو؞
[41] عِیسَیٜ: «أَمْ یِࢽْدِ کَمْ لَایٜࢽْ وُرِ تَغَرِیٜرَ؞ ࢻَلْدْ کَسُرُو دِࢽَرِیُسْ یٜرْ أُوُ ࢽغُویٜࢽُو، ࢻَلْدْ یٜ دِࢽَرِیُسْ ࢻِوُ ࢽغُویٜࢽُو؞
[42] ثَوَࢽْدٜ ثَرْمْبْࢽِّدْ، کَمْدْ کَسُدَ تَیِ یِࢽْدِ سَمَّرُو وَیٜىٰࢽُو؞ وُࢽْدُࢽْجَ غْلٜ تِیَ جَوْمَرُو ثْرَیِ؟» ثْࢽٜ تِیَ کِوُورُو؞
[43] سِمَࢽّٜ: «تْمَࢽِدْࢽْ کَمْ تِرُو ࢽغْوُ وَجْغْࢽَدْمَ،» یٜࢽِّیَ، عِیسَیٜ: «جِرٜ وُلّْمْ،» یٜࢽُو؞
[44] دَجِ عِیسَى کَࢽْجِ کَمُدْیٜرُو سُوُورْدٜ سِمَࢽُّو: «کَمُ أَدَ رُمَّ، غْࢽَ؟ ࢻَࢽّْمْبُو ࢽغَاکّْࢽَدْࢽْ، إِࢽْغِ سِ تُلْدَیٜ سُکُّدْمِّ، أَمَّ کَمُ أَدْ سِمَلُوࢽْجُ سِࢽِرُو کُوکُولْجِیٜ کَࢽْدُرِ کْلَࢽْجُیٜلَࢽْ ثِࢽْغٜࢽُو؞
[45] کَࢻْتُوُ دَرَجَا یٜ سْدّْمِّ، أَمَّ ࢽغَاکّْࢽَمَࢽْ، تِ وُرُو سِࢽِلَࢽْ کْرَوُو ࢻْلٜدُوُ کُولْجْࢽِّ؞
[46] ࢽِ کْلَࢽِرُو کْࢽْدَوُ جَیْتُࢽّٜمَ ࢻِغْمِّ، أَمَّ تِ سِࢽِرُو کَوُدِ تَمَࢽَّ ࢻِجِیٜ سَمْغٜىٰࢽُو؞
[47] أَدْ ࢽَࢽْغَرُو ࢽِرُو وُلْࢽْجْغْکِّ، بِوُࢽْجُ ࢽغْوُ غَوُرْدْࢽَرُو کْرَوُو کُرَ وُرُو ࢻْلٜسْغْࢽَ، أَمَّ کَمْ بِوُ غَࢽَا غَوُرْدْࢽَدْ کْرَوُو غَࢽَمَ ࢻْلٜجِ؞»
[48] دَجِ عِیسَیٜ کَمُدْرُو: «بِوُࢽْمْ غَوُرْدْࢽَ،» یٜࢽُو؞
[49] أَمْ مَسْࢽَ دِیُورُو تِیَ کَلُّو ࢽَࢻْثَࢽَدْیٜ أَمَࢽْجَرُو: «وُࢽْدُ کَمْ بِوُ غَوُرْدُمَ أَتّْ؟» یٜرَ؞
[50] دَجِ عِیسَیٜ کَمُدْرُو: «کَمْبْرْسٜࢽْمْ ࢽَࢽْغَرُو ࢽجْکَّوُو ࢻَࢽْدْمَّ، کْلٜوَࢽْ لٜࢽٜ!» یٜࢽُو؞