[1] ࢽغَوُو أَدْیٜࢽْ کْمَدْ ثُرُو ࢻُوُرَوَࢽْجُیٜࢽْ أَمْ ࢻِتُلُرْ یِࢽْدِࢽْ غَدٜ کْرٜجٜ تَیِیَ یِࢽْدِ یِࢽْدِیٜࢽْ ثُࢽُودٜ بْلَ سُو، بْلَدٜیَ سُو، ࢽَ لٜجِ سَمَّرُو تِࢽْ ࢻُوُࢽُّو لٜىٰرَ؞
[2] تَیِرُو: «کَلَدْ ࢽغْوُ، أَمَّ کِدَوُدْ غَࢽَ؞ أَدْ ࢽَࢽْغَرُو کْمَ کَلَیٜدَ لُواْࢽُواْ، کِدَوُ غَدٜ یٜیَ تِرُو کَلَ ࢽجْدُّورُو ثُࢽُودُو!
[3] لٜࢽُواْ، دِمِیَ ثُرُو بُلْدُوَیٜرُو ࢽغَسَاࢽَ غَیْرُو ࢽَیِیَ ࢽجَࢽُودْکِّ؞
[4] بَرٜ وُرِ، بِ ࢽغْرْوُ، بِ سُࢽُو غَدٜ ࢽغُوࢽُوِّ، کُورُو بَرٜ کْلَ جَوَلّٜࢽْ دَࢽُوٜ وُࢽْدُمَا لٜوَࢽُوِّ؞
[5] ࢻَدُو ࢻِ یَیٜرُو ࢽغَوُوِیَ، بُرْوُوࢽْ أَمْبُو: ‹ࢻَدُو أَدْ بَرْغَ ثُوَࢽْدُو!› وُلْغْࢽُواْ؞
[6] کَمْ ࢽَࢽْلٜوَیٜ ࢽَدْࢽْ مبٜجِیَ، بَرْغَࢽْدُودْ تِلَࢽْ دْغَیْ؞ أَمَّ بَوُووَ، بَرْغَࢽْدُودْ ࢽَࢽْدُورُو وَلْدِ؞
[7] ࢻَدُو أَدْࢽْ جْمُّواْ ࢽَمُّواْ، أَوُو ࢽجَدْࢽَدَ بُیْوُو یَیْوُو، کِدَمَرُو ࢽغْࢽْوُرَمْࢽْجُ وَجِࢻْثْغْࢽَ ࢽَࢽْغَرُو؞ بَرٜ ࢻَدُو أَدَ کُولُّوٜ ࢻَدُو ࢻَدُورُو لٜࢽُوِّ؞
[8] بْلَ ࢻِ یَیٜرُو ࢽغَوُوٜ ࢽَیِیَ ࢽجَمُویِیَ، أَوُو ࢽجَدْࢽَدَ بُیْوُو،
[9] أَمْࢽْجَ دُوࢽْدِ ࢽَدْࢽْ إِسَࢽْغَغْࢽُواْ، کُورُو جَمَدْرُو: ‹ࢽُودُو بَرْغَا اللَّهیٜ ࢽَیِیَ کَرْࢽّجَࢽَ!› وُلْغْࢽُواْ؞
[10] أَمَّ سَ بْلَ لَارُو ࢽغَوُوٜ ࢽَیِیَ مُواْ وَجَیْیَ، ࢻَرْسَمْبُو لُوُواْ تَیِرُو:
[11] ‹کَتِّ بْلَࢽْدُویٜ سِࢽْدٜرُو تَࢽْدْغْࢽَدْمَا ثِࢽِّیٜ ࢽَیِرُو کُولْࢽْجَغَیْیٜ! أَمَّ أَدَ ࢽُوࢽُواْ، ࢽُودُو بَرْغَا اللَّهیٜ کَرْࢽْجْࢽَ!› وُلْغْࢽُواْ؞
[12] ࢽَیِرُو وُلْࢽْجَغَکِّ، کِیَمَ وَکَّجِیَ، وُواْمْ أَمْ بْلَ أَدْیٜدْ أَمْ بْرْࢽِ سُودُومْبٜیَ ࢽَࢽْجَوْࢽِࢽْ کُوجِ؞
[13] «کُتُّࢽْدُو أَمْ بْرْࢽِ کُورَجِࢽّٜ! کُتُّࢽْدُو أَمْ بْرْࢽِ بَیْتْسَیْدَیٜ! ثَ أَوُو أَجَبَّ أَجَبَّ ࢽَࢽْدُوࢽْ تْدْࢽَسُودْ بْرْࢽِ تِرّٜیَ سِدُوࢽّٜیَلَࢽْ تْدْࢽَا، تْࢽْ کُرٜࢽْ أَمْࢽْجَ تُوَ ثَدٜ أَجَجَا بُوُوَلَࢽْ ࢽَࢻْثَࢽَ؞
[14] أَمَّ کِیَمَ وَکَّجِیَ، وُواْمْࢽْدُو أَمْ بْرْࢽِ تِرّٜیَ سِدُوࢽّٜیَیٜدَ ࢽَࢽْجَوْࢽِࢽْ کُوجِ؞
[15] ࢽَیِ یٜ أَمْ بْرْࢽِ کَࢻَرْࢽَامبٜ، سَمٜرُو وَ سَمْࢽْجَیْ تْمَیٜوْ؟ أَعَ، کَࢽُّرُو کُولْࢽْجَغَیْ؞
[16] «کَمْ مَࢽَࢽْدُو ࢽغُوجْࢽَمَدْ مَࢽَࢽِمَا ࢽغُوجُو؞ کَمْ ࢽَیِیَ وَࢽْجَࢽَمَدْ وُمَا وَسُو؞ کُورُو کَمْ وُوَ وَسْࢽَمَدْ یٜ تِ وُوَ سُࢽُودْࢽَدْمَا وَجُو،» یٜࢽُو؞
[17] ࢻُوُرَوَࢽْجُ ࢻِتُلُرْ یِࢽْدِࢽْدْ کَرْوُ کْجِیَرُو وَلَّدَرَࢽِّیَ، عِیسَرُو: «کْمَ، ثُࢽْمْلَࢽْ سٜدَࢽَّمَ مَࢽَࢽْدٜ جَاࢽَ،» یٜرَ؞
[18] عِیسَیٜ تَیِرُو: «إِوُلِیسْ رَدُ غَیْ سَمٜلَࢽْ ثُرِ کِرُکُّو؞
[19] ࢻَࢽُّواْ، ࢽَیِرُو کْࢽْدُوُو کَدِ سُو، کْلَࢽْجِ سُو غُوَتُّیٜ ࢽجَدْکّْࢽَ، کُورُو کْࢽْدُوُو کْلَ دُࢽُو کْلَدُودْیٜ سَمَّیٜࢽْ ࢽجَدْکّْࢽَ؞ أَوِمَ ࢽجَوَࢽْدِوَوُو؞
[20] أَدْ یَیٜ بَرٜ سٜدَࢽَّ مَࢽَࢽْدُو جَغَیْدْرُو کَرْوُࢽْدُو کْجِجْࢽِّ، ثُࢽْدُو سَمٜلَࢽْ رُوُوَدَدْرُو کْجِجُو!»
[21] سَ أَدْࢽْ رُحُ اللَّهیٜ ثَکّٜ کَرْوُ عِیسَیٜ تَیْ دَجٜ کْجِجٜ: «بَوَࢽِ، کْمَ سَمٜیَ دُࢽِیَایٜ، وُسٜࢽْجْکّْࢽَ، دَلِلْࢽْجُدْ أَوُو أَࢽِیَ رَشِدُوَ سُو، إِلْمُوُ سُورُو غْرَامٜ تَدَوَ سَࢽَࢽَرُو إِسَࢽُوغْمَّ ࢽَࢽْغَرُو؞ آه، بَوَ، أَدْمَ أَوُو رَامَّ وُو؞
[22] «بَوَࢽِ أَوُو سَمَّا مُکُّوࢽِرُو ثَکّْࢽَ؞ تِ غْࢽِیَ، وُࢽْدُمَ تَدَدَ ࢽُوجْࢽِّ؞ کُورُو وُࢽْدُمَ بَوَدَ ࢽُوجْࢽِّ، سَیْ تَدَدَ أَمْ تَیِرُو تَدَدْ إِسَࢽُوجِییَ، ثْرَاࢽَا،» یٜࢽُو؞
[23] عِیسَى سُوُورْدٜ ࢻُوُرَوَࢽْجُ رُࢽْجَرُو: «سِمْ دُوُوࢽْ أَوُو رُوَّدَ ثَرُیْدْ، بَرْغَࢽْجَ!
[24] ࢽَیِرُو وُلْࢽْجَغَکِّ، کُرٜࢽْ ࢽَوِیَ سُو، مَیْیَ سُو کَدَ أَوُو رُوَّدَ کُرُورُو ثَرَاࢽَ، أَمَّ ثَرُࢽِّ؞ کُورُو أَوُو ࢻَࢽُّوَّدَ ࢻَࢽْدُرُو ثَرَاࢽَ، أَمَّ ࢻَࢽْجَࢽِّ،» یٜࢽُو؞
[25] مَلْمْ أَتَّوْرَیٜ لَا عِیسَىٰ رِجَࢻْتُرُو ثِجٜ تِرُو: «سَیِࢽَّ، أَوِ دِکّٜ رُو سَوِسُویٜ ࢻَࢽْدْکِّ؟»، یٜࢽِّیَ،
[26] عِیسَیٜ تِرُو: «أَوِ ثُرُو أَتَّوْرَیٜࢽْ رُوُوَدَدْ؟ ࢽدَیِرُو تِیَ کْرَیٜمْ؟» یٜࢽُو؞
[27] تِیٜ: «‹اللَّه کْمَࢽْدٜیَ کَرْوُࢽْمْ ࢽغَࢽْ، رُوࢽْمْ ࢽغَࢽْ، دُࢽُوࢽْمْ ࢽغَࢽْ، حَࢽْغَلْࢽْمْ ࢽغَࢽْ رَیٜ! کُورُو کْمَسْکِࢽْمْ یٜیَ کْلَࢽْمْ غَیْرُو رَیٜ!›» یٜࢽُو؞
[28] عِیسَیٜ: «کَلْکَلُّو وُلْیٜمْ؞ أَدَ دٜ، رُو ࢻَࢽْدْمِ،» یٜࢽُو؞
[29] أَمَّ مَلْمْ أَتَّوْرَیٜدْ تِ جِرٜمَرُو ࢻْلٜدُوُرُو مَجٜ عِیسَرُو: «تُو، وُࢽْدُ غْلٜ کْمَسْکِࢽِ وُو؟» یٜࢽُو؞
[30] دَجِ عِیسَیٜ تِرُو: «کَمْ لَا جٜرُجَلٜمْࢽِࢽْ ثِجْࢽَ بْلَ جٜرِکُویٜرُو لٜجِ دُوُوࢽْ، جَوَلْکُورْجِمَسُو تِیَ کَࢻْثَغَࢽٜ رِࢽْجَࢽٜ بَبَکْثَࢽٜ تِیَ ࢽُࢽَ غَیْ کُولْجَࢽٜ لٜىٰرَ؞
[31] أَدْغَیْ دُوُوࢽْ، رِمَࢽْ لَا جَوَلْدْیٜࢽْ إِسٜ کَمْدَ کِرُࢽِّیَ، سْغْرِجٜ کُوجٜ لٜىٰࢽُو؞
[32] لٜوِ لَا یٜ ࢽَدْرُو إِسٜ تِیَ کِرُࢽِّیَ، سْغْرِجٜ کُوجٜ لٜىٰࢽُو؞
[33] کَمْ ثِدِ سَمَرِیَیٜ لَا یٜ بْلَوُرُو ثْدِ دُوُوࢽْ، ࢽَدْرُو کَدِیُو؞ تِیَ کِرُࢽِّیَ، جَوْرُو ࢽجُࢽُوجٜ
[34] إِسٜ تُࢽُووَࢽْجُرُو کْࢽْدَوُوَ دِبٜࢽَّ کَرْوُࢽُّو ࢻِجِیٜ کْلٜکْلٜىٰࢽُو؞ دَجِ تِیَ کُورُوࢽْجُرُو دَمْ غْࢽَجِیٜ کُسُوتُّورَمْبُو ثُوُدٜ تِرُو کِسْکٜىٰࢽُو؞
[35] وَجْࢽَࢽْجُوَ دِࢽَرِیُسْ یِࢽْدِ ثُتُّلُوٜ کْمَ کُسُوتُّورَمْبٜرُو ثٜ تِرُو: ‹کَمْ أَدْرُو کِسْکْࢽٜ؞ وَلْدْکِّیَ، وُرِ کُوجْࢽَرُو یٜجْمَّ سَمَّا ࢽِرُو کَلَࢽّجْغْکِّ،› یٜࢽُو؞
[36] «تُو، مَلْمْ، ࢽِیٜࢽْ وَ ثُرُو أَمْ یَکُّ أَࢽِیٜࢽْ وُࢽْدُࢽْجَ کْمَسْکِ کَمْ جَوَلْکُورْجِمَسُو کَࢻْثَاࢽَدْیٜ وُو؟» ثْࢽٜ تِیَ کِوُورُو؞
[37] مَلْمْ أَتَّوْرَیٜ: «کَمْ تِیَ ࢽجُࢽُوجْࢽَدْمَ،» یٜࢽِّیَ، عِیسَیٜ تِرُو: «ࢽِ یٜ لٜࢽٜ، تِ غَیْ دٜ!» یٜࢽُو؞
[38] عِیسَىٰ ࢻُوُرَوَࢽْجُوَ لٜجَیْ دُوُوࢽْ، بْلَ لَارُو کَدِرَࢽِّیَ، کَمُ لَا ثُࢽْجُ مَرْتَ تِیَ ࢻَࢽّجُࢽْ کِسَوُو؞
[39] یَࢽْجُغْࢽَ ثُࢽْجُ مَرْیَمْ ࢻُوُ کْمَدْیٜࢽْ ࢽَࢻْکَدَ مَࢽَࢽْجُ کْرْࢽْدُ ثْدِ دُوُوࢽْ،
[40] مَرْتَرُو کِدَ سُوسَیٜ ࢽغْوُجِیٜ حَࢽْغَلْࢽْجُ جَوْرُو جَادَ؞ دَجِ مَرْتَ ࢽَ عِیسَیٜرُو إِسٜ تِرُو: «کْمَ، یَࢽِغْࢽَ وُوَ کُولْسْࢽَ رُࢽِ کِدَ دِکِّدْ، ࢽِ لَمْبُوࢽْمْ غْࢽِ وَ؟ تِرُو وُلْغْࢽٜ وُوَ بَࢽَسُوُو!» یٜࢽُو؞
[41] کْمَدْیٜ تِرُو: «مَرْتَ، مَرْتَ، أَوُو ࢽغْوُرُو حَࢽْغَلْࢽْمْ جَدِ،
[42] أَمَّ أَوُو ࢻَیْدَادْ ࢻَلْمَ، دِیٜ! مَرْیَمْ أَوُو ࢽغَلْوُودَ کْرٜجُو، کُورُو وُࢽْدُمَ ࢽَࢽْجُࢽْ ثْمُویِوَوُو؞»