[1] سَلَ بُرُودِ یِسْ بَوُووَیٜ تِیَ سَلَ لَیَ ࢽجْکَّیِرَمْبٜࢽْ بُواْجَیْدْ کَرْࢽْجْࢽَ؞
[2] کُورُو وُرَوَ رِمَࢽَّیٜیَ مَلْمْبَ أَتَّوْرَیٜیَ جَوَلْ عِیسَىٰ ࢽجٜجُویٜ مَجَیْ، أَمَّ جَمَدَ رِجَࢽَ؞
[3] دَجِ إِوُلِیسْ یَحُسَ کَمْ تِرُو إِسْکَرِیُوتْ ثَࢽِ مٜوُࢽْ یِࢽْدِࢽْدْیٜ ࢻَلْࢽْجَرُو کْرْغَوُو؞
[4] یَحُسَ لٜجٜ وُرَوَ رِمَࢽَّیٜیَ وُرَوَ ࢻَدُو اللَّهیٜ غُرٜدُوُیٜیَ رُوکُّو جَࢽْدٜ کْلَ جَوَلْ عِیسَىٰ مُکُّوࢽْجَرُو سْرْتُّوُیٜࢽْ کٜدُو؞
[5] کَرْوُࢽْجَ جَوْرُو کْجِجٜ تِرُو وُرِ ثَدِ یٜرَࢽِّیَ،
[6] یَحُسَ کَسَثّٜ دَمَ عِیسَىٰ تَیِرُو جَمَ ࢽُوجَࢽِّلَࢽْ سْرْتُّوُیٜ مَدَ بَدِیٜࢽُو؞
[7] سَلَ بُرُودِ یِسْ بَوُووَیٜࢽْ، یِمْ دُوُوࢽْ ࢽغْلَرُو لَیَ ࢽجْکَّیِرَمْبٜدَ دُوَجَیْدْ کِدْࢽِّیَ،
[8] عِیسَى بِتُرُسَّ یَحْیـَأٓ ثُࢽُودٜ تَیِرُو: «لٜࢽُواْ، مَسْࢽَ لَیَیٜدَ أَࢽْدِرُو دَبَّرْسَغَࢽُواْ، بُیْیُو!» یٜࢽُو؞
[9] تِرُو: «ࢽدَرَࢽْ تِیَ دَبَّرْࢽِیٜیَ، رَامْ؟» ثَࢽٜ تِیَ کٜوُورُو؞
[10] عِیسَیٜ تَیِرُو: «أَکُّو بْرْࢽِدْرُو ࢽغَوُوِیَ، کَمْ لَا بُلٜ إِࢽْغِیَ ࢽغُوجْࢽَا کْلَ کْلُّوِ؞ ࢻَدُو ࢽغَیِدْرُو تِیَ غَیْوُو ࢽغَوُواْ،
[11] کْمَ ࢻَدُویٜدْرُو وُلْغْࢽُواْ: ‹سَیِࢽَّیٜ کُسُوتُّورَمْ ࢽَ ࢻُوُرَوَࢽْجُوَ رُوکُّو مَسْࢽَ لَیَیٜدَ ثَدِدْ ࢽدَرَࢽْ؟›
[12] ࢽَیِرُو سُورُو سَمٜىٰ ࢽغِمْ کُرَ ثُرُوࢽْ کَرٜیَ ࢻْلٜࢽْجَغَیْ؞ ࢽَدْࢽْ مَسْࢽَدَ دَبَّرْࢽُواْ!» یٜࢽُو؞
[13] دَجِ ࢻُوُرَوَدْ لٜجَࢽٜ جِرِ عِیسَى تَیِرُو وُلْجْغْࢽَدْ غَیْ أَوِسُو کٜوَࢽْدُو؞ أَدْغَیْمَ مَسْࢽَ لَیَیٜدَ دَبَّرْیٜرَ؞
[14] سَ کِدْࢽِّیَ، عِیسَى کْࢽْغَیَمْبَࢽْجُوَ رُوکُّو مَسْࢽَرُو ࢽَࢻْکٜرَ؞
[15] عِیسَیٜ تَیِرُو: «ثَمَࢽْ مَسْࢽَ لَیَ ࢽجْکَّیِرَمْبٜ أَدَ کَوُ بُوࢽٜ یَکِّدْرُو ࢽَیِیَ رُوکُّو بُیْیٜیَ، جَوْمَرُو رَاکّْࢽَ؞
[16] ࢽَیِرُو وُلْࢽْجَغَکِّ، ࢽَ أَدْࢽْ ࢻُوُࢽْ تِیَ بُکِّوَوُو، سَیْ جِرٜمَرُو ࢽُودُو بَرْغَا اللَّهیٜلَࢽْ مَاࢽَࢽْجُ وَکَّجِیَ دُوُوࢽْ،» یٜࢽُو؞
[17] کْࢽْجَرَمْ ثُرُوࢽْ دِبٜࢽَّ ࢽغُوجٜ اللَّهرُو أَرْدِیٜࢽِّیَ، تَیِرُو: «کْࢽْجَرَمْ أَدَ تَیْوُو، وُࢽْدُࢽْدُو یَیٜ ثَ!
[18] ࢽَیِرُو وُلْࢽْجَغَکِّ، ࢽَ أَدْࢽْ ࢻُوُࢽْ إِࢽْغِ إِࢽَبّٜ یَکِّوَوُو، حَرْ ࢽُودُو بَرْغَا اللَّهیٜ ࢽَࢻْثِرُو،» یٜࢽُو؞
[19] دَجِ بُرُودِ ࢽغُوجٜ اللَّهرُو أَرْدِیٜࢽِّیَ، ࢻْسَکْثٜ تَیِرُو ثٜ: «أَدْ تِیࢽِ ࢽَیِ ࢽَࢽْغَرُو تِࢽَدْ؞ وُوَ تَکْتُرُو أَدَ دٜوُو!» یٜࢽُو؞
[20] أَدْغَیْ کُورُو ࢽغَوُو مَسْࢽَیٜࢽْ کْࢽْجَرَمْ ࢽغُوجٜ تَیِرُو ثٜ: «کْࢽْجَرَمْ أَدْ أَمَࢽْ بْرِࢽْ بُࢽِلَࢽْ ࢽدْࢻْکَدَ، بُ دُوُوࢽْ ࢽَیِ ࢽَࢽْغَرُو ࢻِدْࢽَدْ؞
[21] کَمْ دُوُوࢽْ وُوَ سْرْࢽْسِیدْ، أَکُّوࢽْجُ وُوَ رُوکُّو مَسْࢽَ دِیٜ؞
[22] تَدَ کَمْبٜدْ سَࢻْتِدْمَ، جِرِ اللَّه کَدَرْجْࢽَدْ غَیْ، أَمَّ کَمْ دُوُوࢽْ تِیَ سْرْثِّیدْ، کُتُّࢽْجُ!»
[23] دَجِ کَتّٜࢽْجَࢽْ کْلَ وُࢽْدُࢽْجَ أَوُو أَدَ دِیُومَ وُویٜࢽْ کُورُو بَدِیٜرَ؞
[24] دَجِ ࢻُوُرَوَدْ کَتّٜࢽْجَࢽْ کَمْبِوُ کْلَ وُࢽْدُࢽْجَ کُرَ وُویٜࢽْ ثَدِ دُوُوࢽْ،
[25] عِیسَیٜ تَیِرُو: «مَیْیَ دُࢽِیَ أَدْیٜ تَلَاوَࢽْجَا رَثَّغَیْ، کُورُو أَمْ تَیِرُو سٜرْمَ ثَࢽِدْ یٜ کْࢽْدُوُوࢽْجَ ࢻْلٜجَیْ؞
[26] أَمَّ ࢽَیِدْ، ࢽغَیْ غْࢽِ؞ کُرَمَࢽْدُودْ تْࢽْغْرِ غَیْرُو وَلْجُو، کُورُو کَمْ ࢽَیِیَ ࢽجَࢽُودِمَدْ وُولُودِ غَیْرُو وَلْجُو!
[27] وُࢽْدُ غْلٜ کُرَ وُو؟ کَمْ مَسْࢽَرُو ࢽَࢻْثْࢽَمَدْ رَ وُولُودِࢽْجُدْ؟ کَمْ مَسْࢽَرُو ࢽَࢻْثْࢽَمَدْ، مَرٜ؟ أَمَّ وُدْ ثُرُوࢽْدُوࢽْ وُولُودِࢽْدُو غَیْ؞
[28] «ثُرُو جَرَࢻْتَࢽِ سَمَّیٜࢽْ ࢽَیِمَ غْرٜࢽِࢽْ ࢽَمُّوْ؞
[29] جِرِ بَوَࢽِ وُرُو کْرْمَیْ سِࢽَدْ غَیْ، وُ یٜ ࢽَیِرُو ࢽجَدْکّٜ
[30] ثُرُو کْرْمَیْࢽِیٜࢽْ وُوَ رُوکُّو بُوٜ یَوٜ، کُورُو کُرِسْ کْرْمَیْیٜࢽْ ࢽَمُّوٜ جِرِ مٜوُࢽْ یِࢽْدِࢽْ إِسْرَاءِیلَوُیٜرُو شَرَ یِدُّوِ؞
[31] «سِمَࢽْ، سِمَࢽْ، ࢻَࢽّٜ! إِوُلِیسْ جِرِ أَمْ أَرْغْمْ لَلَجَیْدْ غَیْرُو ࢽَیِیَ لَلَدُرُو اللَّهَ ثُوُورْࢽَ،
[32] أَمَّ بَرٜ کَمْبْرْسٜࢽْمْ کُولّْمِّرُو اللَّهَ ࢽغِکُّورْکُّو؞ ࢽِ یٜ وَلْدْمِیَ، کْرَمِیَࢽْمْدَ إِسَدُࢽُووَغْࢽٜ!»
[33] بِتُرُسّٜ تِرُو: «کْمَ، کُوسُو بِ کَرْمُورُو دَبَّرْدْکّْࢽَ، ࢽِیَ رُوکُّو لٜࢽِیُو!» یٜࢽِّیَ،
[34] تِیٜ: «بِتُرُسْ، ࢽِرُو وُلْࢽْجْغْکِّ، غُدُواْمْ کُ کُوکُّورٜ ثَکِّوَوُو، سَیْ یَکُّرُو وُوَ أَࢽْغْرْسْمِیَ،» یٜࢽُو؞
[35] کُورُو عِیسَى وَلْدٜ تَیِرُو: «سَ ࢽَیِیَ وُرِ بَوُووَ، ࢽغْرْوُ بَوُووَ، سُࢽُو غَدٜ یٜ بَوُووَ ࢽجَࢽُودْکّْࢽَدْࢽْ، أَوُو لَا مَوْࢽْجَࢽَ وَ؟» ثْࢽٜ تَیِیَ کِوُورْࢽِّیَ، «مَوْسَࢽِّ،» یٜرَ؞
[36] دَجِ تَیِرُو: «تُو، أَمَّ کْرْمَ کَمْ وُرِࢽْجُوَدْ ࢽغُوجُو، کَمْ ࢽغْرْوُࢽْجُوَدْ یٜ ࢽغَیْ، کُورُو کَمْ کَشَغَرْࢽْجُ بَوُووَدْ یٜ کَلْوُࢽْجُ غَرِ ثْلَدُو ࢻَلْ ثِوُو؞
[37] ࢽَیِرُو وُلْࢽْجَغَکِّ، سَیْ أَوُو کِتَوُلَࢽْ رُوُوَدَ أَدْ وُلَࢽْ وَکَّجِیَ: ‹أَمْسُو تِیَ بِوُمَرُو ࢽغُویٜرَ؞› آه، أَوُو کْلَࢽِࢽْ رُوُوَدَدْ وَکَّجِ،» یٜࢽُو؞
[38] تِرُو: «کْمَ، أَکُّو کَشَغَرْ یِࢽْدِ،» یٜرَࢽِّیَ، تَیِرُو: «کُولُّواْ، ثْدْࢽَ،» یٜࢽُو؞
[39] عِیسَى بْرْࢽِلَࢽْ ثُلُوٜ ثَیٜدْ غَیْرُو کَوْ جَیْتُࢽّٜرُو لٜىٰࢽُو، ࢻُوُرَوَࢽْجُ یٜ تِیَ غٜیَ؞
[40] ࢽَدْرُو کَدِࢽِّیَ، تَیِرُو: «بَرٜ جَرَࢻْتُوِّرُو مُودُوَ دٜوُو!» یٜࢽُو؞
[41] دَجِ تَیِیَ کُولْجٜ غَࢽَ لَا کُرُوُجٜ تُࢽْغُرُمْجٜ مُودُوَ دِیُو بَدِیٜࢽُو؞
[42] تِیٜ: «بَوَ، کَسَدّْمَّا، کْࢽْجَرَمْ أَدَ وُلَࢽْ ࢽغُوࢽٜ! أَدْ یَیٜ رَوُوࢽِدْ غْࢽِ، کَاࢽْمْدْمَ تِ وُو!» یٜࢽُو؞
[43] [دَجِ مَلَیْیَ لَا سَمٜلَࢽْ إِسٜ تِرُو ࢻْلٜدِیٜ کَرْوُࢽْجُ کِبَّیٜىٰࢽُو؞
[44] عِیسَى جْکْتُ دَمَ بَوُورُو ࢻَࢽْجِ دُوُوࢽْ، ثَیٜیَ کُوجْࢽَرُو تَیْ دَجٜ مُودُوَ کِدُو، حَرْ کْمُوُࢽْجُ بُ ثِدِرُو ࢻِدِیے غَیْرُو تُوکْ تُوکْ ࢻِیَدَࢽْ؞]
[45] ࢽغَیْ مُودُوَ کِدْࢽِّیَ، ثِجٜ ࢽَ ࢻُوُرَوَࢽْجُیٜرُو وَلْدٜ إِسٜ تَیِیَ کَرْوُکُتَّرُو ثَسَمْبَرْࢽَ کْࢽْمْ ثَدِ ࢽَجِیٜ
[46] تَیِرُو: «أَوِرُو کْࢽْمْ دِوِدْ؟ ثِࢽُواْ، بَرٜ جَرَࢻْتُوِّرُو مُودُوَ دٜوُو!» یٜࢽُو؞
[47] عِیسَى مَࢽَ ثْدِ ࢽغَیْ دُوُوࢽْ، جَمَ کَدَ کَمْ تِرُو یَحُسَ ثَࢽِ مٜوُࢽْ یِࢽْدِࢽْدْیٜ ࢻَلْࢽْجَ ࢻُوُ غْرْجِیَرُو کَدِرَ؞ یَحُسَدْ عِیسَرُو لٜوَ کْرَوُویٜ ࢽجْدُّورُو تِیَ کَرْࢽْغٜࢽِّیَ،
[48] عِیسَیٜ تِرُو: «یَحُسَ، لٜوَ کْرَوُویٜلَࢽْ وَ تَدَ کَمْبٜدَ سْرْتْکْمِ؟» یٜࢽُو؞
[49] أَمْ ࢽَࢽْجُیٜدْ أَوُو وَکَّجِدَ کٜرُࢽِّیَ، تِرُو: «کْمَ، کَشَغَرْلَࢽْ تَیِیَ ثَثَلِّیٜیَ، ࢽدَ!» ثَࢽٜ
[50] ࢻَلْࢽْجَ وُولُودِ رِمَࢽْ کُرَیٜیَ بَکْثٜ سْمُوࢽْجُ کْمْبُورَمْدَ تْࢽْ کَمْغٜࢽُو؞
[51] أَمَّ عِیسَیٜ تَیِرُو: «دَࢽُواْ! ثْدْࢽَ!» یٜࢽِّیَ، سْمُوࢽْجُ لٜجٜ إِسَࢽْغَیٜىٰࢽُو؞
[52] دَجِ عِیسَیٜ وُرَوَ رِمَࢽَّیٜیَ وُرَوَ ࢻَدُو اللَّهیٜ غُرٜدُوُیٜیَ أَمْوُرَوَ جَمَیٜیَ تِیَ تَرُو إِسَࢽَدْرُو: «أَ! ࢽَیِ کَشَغَرْ سُو، کَ سُو مُکُّوࢽَّ وُوَ غْࢽْدٜمَ غَیْ تَرُو کَدِوْ؟
[53] یِمْ ࢽغُسُوࢽْ ࢽَیِیَ رُوکُّو ࢻَدُو اللَّهیٜࢽْ دْغَیْیٜ دُوُوࢽْ، وُوَ سْدَوِّ؞ أَمَّ أَدْمَ سَࢽْدُو وُو، سَ دُوُوࢽْ دُوُ کْرْمَیْࢽْجُ ثُࢽُودِدْ؞»
[54] دَجِ عِیسَىٰ ثَدَࢽٜ بَلْبَلَّ ࢻَدُو رِمَࢽْ کُرَیٜدْرُو کٜسَدُو؞ بِتُرُسْ یٜ کَتّٜ کَسْکَدَارُو تَیِیَ غِیَ؞
[55] دَوُ بَلْبَلَّیٜࢽْ کَࢽُّ ࢻُجَࢽٜ ࢽَࢻْکٜرَࢽِّیَ، بِتُرُسْ یٜ دَوُࢽْجَࢽْ ࢽَࢻْکٜࢽُو؞
[56] دَجِ کِرْ لَا بِتُرُسَّ ࢽُرْ کَࢽُّیٜدْࢽْ ࢽَࢻْکَدَ کِرُࢽِّیَ، تِیَ ࢽغْلَرُو ࢽِࢽِجٜ: «کَمْ أَدْ یٜ عِیسَىٰ رُوکُّو،» یٜࢽُو؞
[57] أَمَّ بِتُرُسْ أَࢽْغْرْجٜ: «ࢻٜرُومَ، وُ تِیَ ࢽُوکّْࢽِ!» یٜࢽُو؞
[58] غَࢽَ سَمْ کِدْࢽِّیَ، کَمْ لَا یٜ تِیَ ثُرٜ: «ࢽِ یٜ ࢻَلْࢽْجَ!» یٜࢽُو؞ بِتُرُسّٜ: «کَیْ! وُ غْࢽِ!» یٜࢽُو؞
[59] أَلَمَ سَ ࢻَلْ غَیْ ثْدٜ کَمْ لَا غَدٜ: «ࢻَغَتُّو کَمْ أَدْ یٜ عِیسَىٰ رُوکُّو، تِ یٜ کَمْ ثِدِ غَلِلٜىٰ ࢽَࢽْغَرُو!» یٜࢽِّیَ،
[60] بِتُرُسّٜ تِرُو: «کَمْ، أَوُو وُلّْمِدَ ࢽُوکّْࢽِ!» یٜࢽُو؞ سَدْمَࢽْ مَࢽَجِ ࢽغَیْ دُوُوࢽْ، غُدُواْمْ کُوکُّورٜ کٜکُّو؞
[61] دَجِ کْمَدْ سُوُورْدٜ بِتُرُسَّ ࢽِࢽِیٜࢽُو؞ بِتُرُسْ یٜ أَوُو کْمَ تِرُو وُلْجْغْࢽَدَ تَکّٜࢽُو؞ کْمَیٜ: «کُ کَوُ غُدُواْمْ کُوکُّورٜ ثَکِّدْرُو، وُوَ یَکُّرُو أَࢽْغْرْسْمِ،» ثْࢽَّ؞
[62] تَکّٜࢽِّیَ، دٜیَرُو ثُلُوٜ تَیْ دَجٜ سُو ࢽغُویٜࢽُو؞
[63] أَدْغَیْ دُوُوࢽْ أَمْ عِیسَىٰ غُرٜجَیْدْ تِیَ رُرُجَࢽٜ بَبَکْتُ بَدِیٜرَ؞
[64] سِمْࢽْجُ جَکْثَࢽٜ تِرُو: «ࢽَوِࢽَوِ دٜ! وُࢽْدُ ࢽِیَ بَࢽّجُو؟» یٜرَ؞
[65] کُورُو رَدُ کَدَ تِرُو کٜدُّو؞
[66] دُࢽِیَ وَیٜࢽِّیَ، أَمْوُرَوَ جَمَیٜیَ وُرَوَ رِمَࢽَّیٜیَ مَلْمْبَ أَتَّوْرَیٜیَ مَجِلِسْلَࢽْ ثَࢻْتَࢽٜ ثَسَکّٜ عِیسَىٰ ࢻُوُࢽْجَرُو کٜوُدُو؞
[67] تِرُو: «ࢽِمَ وَ أَلْمَسِیوُدْ وُو؟ أَࢽْدِرُو وُلْسَغَࢽٜ!» ثَࢽٜ تِیَ کٜوُورُو؞ أَمَّ عِیسَیٜ تَیِرُو: «وُلْࢽْجَغَکِّیَ، کَسَدُّوَّوُو؞
[68] کُورُو ࢽجَدّْکِّیَ، جَاوُ سِوَّوُو؞
[69] أَمَّ کُوَ أَدْࢽْ ࢻُوُࢽْ تَدَ کَمْبٜدْ مُکُّو کْمْبُورَمْ اللَّه کْࢽْدُوُومَیٜࢽْ ࢽَࢻْکَدَ دْغَیْ،» یٜࢽُو؞
[70] دَجِ تَیِ سَمَّیٜ تِرُو: «ࢽِمَ غْلٜ تَدَ اللَّهیٜدْ وُو؟» یٜرَࢽِّیَ، تَیِرُو: «ࢽَیِمَ وُلُّوْ، وُمَ!» یٜࢽُو؞
[71] دَجِ تَیِیٜ: «أَ! شٜدَ جِرِ ࢻِ غْلٜ غَدٜ مَࢽِیٜ؟ أَࢽْدِ کْلَࢽْدٜ مَࢽَ ثِࢽْجُلَࢽْ ثُلُوُࢽَ أَدَ ࢻَࢽِّیٜࢽَ،» یٜرَ؞