[1] دَجِ عِیسَیٜ ࢻُوُرَوَࢽْجُرُو: «أَوُووَ ثَسَکّٜ أَمْ تَلْجَࢽٜ بِوُ ثَدِدْ کَدُ بَوُورُو إِسَیْ، أَمَّ کُتُّࢽْجُ کَمْ تِیٜࢽْ إِسَیْدْ!
[2] کَمْدْیٜ دَوْࢽْجُرُو کَوْ ࢽٜدُرَمْ مَࢻْࢽْدِ لُجَغَࢽٜ بْرْمْبُو غْࢻْثَاࢽَمَ تِرُو ࢽغَلْوُو، تَدَوَ سَࢽَࢽَ أَࢽِیٜ ࢻَلْࢽْجَا ثَکّٜ تَلْجٜ بِوُ ثْدِدْرُو؞
[3] حَࢽْغَلْ غْࢽَࢽُواْ! کْرَمِࢽْمْ بِوُ ࢽِرُو ࢽجْدِّیَ، تِرُو وُلْغْࢽٜ؞ تْمْجِیَ، تِیَ غَوُرْࢽٜ؞
[4] ثُرُو کَوُ ࢻَلّٜࢽْ تُلُرُّو بِوُ ࢽغِدُّو یَیٜ، تُلُرُّو وَلْدٜ إِسٜ ࢽِرُو: ‹تْمّْکّْࢽَ،› ثْࢽِیَ، تِیَ غَوُرْࢽٜ؞»
[5] دَجِ کْࢽْغَیَمْبَدْیٜ کْمَدْرُو: «کَمْبْرْسٜࢽْدٜدَ یِرْغَیْ!» یٜرَࢽِّیَ،
[6] کْمَیٜ تَیِرُو: «ثَ کَمْبْرْسٜࢽْدُو مبٜجِیَ، کَسُࢽِ مُتَرّٜ غَیْ تْࢽْغْرِمَ یَیٜ، رَࢽْغُوٜ کْسْکَ کُرَ أَدْرُو: ‹مْکْتْࢽٜ، ثُرُو بْرْمْبٜࢽْ کُوکْتْࢽٜ!› وُلْغْوِیَ، مَࢽَࢽْدُو جْغَیْ؞
[7] «کَمْࢽْدُو لَا کَرٜیَࢽْجُ کُلُو بَرٜدُ بِ لْمَࢽْ ࢽٜوُورُو لٜجٜ کَرَاࢽْ وَلْدٜ إِسِیَ، تِرُو: ‹دُوَࢽْ أَرٜ ࢽَمّٜ بْرِ بُیْ!› ثْࢽِ وَ؟ أَعَ!
[8] تِرُو: ‹بْرِ دٜسْغْࢽٜ، کَجْمُࢽْمْ کَدَوُ بَوُووَ یَکّْمِیَ، أَرٜ کْمْبُوࢽِ کُدٜ ࢻِسْغْࢽٜ؞ بُکّٜ یَکِّیَ دُوُوࢽْ، ࢽِ یٜ بُیْ یَیْ،› ثْࢽِ؞
[9] کُورُو کَرٜیَࢽْجُ أَوُو تِرُو وُلْجْغْࢽَدَ ثْدْࢽَ ࢽَࢽْغَرُو، تِیَ وُسٜجِ وَ؟ أَعَ!
[10] تُو، ࢽَیِ یٜ أَوُو اللَّه وُلْࢽْجَاࢽَ سَمَّا دِوٜ ثٜرِیَ، أَدْغَیْ وُلُّواْ: ‹أَࢽْدِ کَرٜیَوَ ࢻَیْدَ بَوُووَ، أَوُو وَجِمْسَاࢽَ بَسْ کِدِیٜ!›»
[11] عِیسَى بْرْࢽِ جٜرُجَلٜمْبٜرُو لٜدُ ثْدِ دُوُوࢽْ، کَرَࢽْغِ کَتّٜ ثِدِ سَمَرِیَیٜیَ غَلِلٜىٰیَا غِیَ؞
[12] بْلَدٜیَ لَا کَرْࢽْغٜࢽِّیَ، کُوࢽغوَ بَرَسُوَ مٜوُ تِیَ کَࢻْکٜىٰرَ؞ کُرُوُࢽْ دَجَࢽٜ
[13] کُواْ سَࢻْثَࢽٜ تِرُو: «سَیِࢽَّ عِیسَى، مَرْࢽٜ أَࢽْدِیَ ࢽجُࢽُوسَࢽٜ!» یٜرَ؞
[14] عِیسَى تَیِیَ کِرُࢽِّیَ، تَیِرُو: «لٜࢽُواْ، رِمَࢽَّدْرُو ࢻْلٜدْغْࢽُواْ!» یٜࢽُو؞ لٜجَیْ ࢽغَیْ دُوُوࢽْ، ࢽغَجَࢽٜ تَیِرُّو وَلْیٜرَ؞
[15] ࢻَلْࢽْجَ ࢽغَجْࢽَرُو أَسُیٜࢽِّیَ، کُواْ سَࢻْثٜ اللَّهَ ثُࢽْغُورِیَرُو وَلْدٜ
[16] ࢻُوُ عِیسَیٜࢽْ تُࢽْغُرُمْجٜ ࢽغُمْࢽْجُ ثِدِࢽْ غْࢽَجٜ تِیَ وُسٜىٰࢽُو؞ تِدْ کَمْ سَمَرِیَیٜ؞
[17] دَجِ عِیسَیٜ: «تَیِ مٜوُ سَمَّ ࢽغَجَࢽَ، مَرٜ؟ تُو، ࢽدَ تَیِ لْغَرْدْ؟
[18] کُسُوتُّو أَدْرُو کَجِیَ، وُࢽْدُࢽْجَمَ وَلْدٜ اللَّهَ وُسٜجِ بَوُو وَ؟»
[19] دَجِ کَمْدْرُو: «ثِࢽٜ لٜࢽٜ! کَمْبْرْسٜࢽْمْ ࢽَࢽْغَرُو ࢽجْکَّوُو ࢻَࢽْدْمَّ،» یٜࢽُو؞
[20] یِمْ لَا ࢻَرِسَوَسُو عِیسَرُو کْلَ یِمْبِ ࢽُودُو بَرْغَا اللَّهیٜ دُࢽِیَرُو إِسِیٜࢽْ کٜوُورْࢽِّیَ، تَیِرُو: «ࢽُودُو بَرْغَا اللَّهیٜ أَسُدُرَمْسُولَࢽْ غْࢽِ إِسِ،
[21] کُورُو وُࢽْدُمَیٜ: ‹أَکُّو تِ!› بِ ‹تُواْ تِ!› وُلْجِوَوُو؞ ࢽُوࢽُواْ، ࢽُودُو بَرْغَا اللَّهیٜدْ دَوُࢽْدُومَࢽْ کْرْغَ،» یٜࢽُو؞
[22] دَجِ عِیسَیٜ ࢻُوُرَوَدْرُو: «سَ إِسٜ کَوُ ࢻَلْ یَیٜرُو تَدَ کَمْبٜدَ کُرُورُو جَوْرُو رَاوَّ، أَمَّ تِیَ رُوَّوُو؞
[23] أَمْسُویٜ ࢽَیِرُو: ‹أَکُّوࢽْجُ!› بِ ‹تُواْࢽْجُ!› ثَࢽِیَ، بَرٜ لٜࢽُوٜ تَیِیَ غَوِّ؞
[24] جِرِ سَمٜ ثِ ࢻَلَّࢽْ حَرْ تُودْرُو ثُوَلْدٜ وَسِّدْ غَیْ، یِمْ کْࢽْدٜࢽْجُیٜدْࢽْ تَدَ کَمْبٜدْ یٜ ࢽغَیْ؞
[25] أَمَّ اللَّه کَدَرْجْࢽَ، سَیْ جَوْرُو بُوࢽٜ ثَࢽٜ أَمْ جَمَࢽْ أَدْیٜدْ تِیَ وَجَیْیَ دُوُوࢽْ؞
[26] «جَمَࢽْ تَدَ کَمْبٜدْیٜ أَلَمَࢽْجُ جَمَࢽْ ࢽَوِ نُوحُیٜ غَیْ؞
[27] سَدْࢽْ أَمْسُو جَوُیْ یٜ، ثَسَیْ یٜ، لَرُسَ سُو، ࢽِیَ سُو ثَدِ یٜ ࢽغَیْ دُوُوࢽْ، حَرْ یِمْ ࢽَوِ نُوحُ مَارَدْرُو ࢽغَیٜ إِࢽْغِ تُࢻَࢽَیٜ إِسٜ تَیِ سَمَّا سِیٜىٰࢽُو؞
[28] کُورُو أَلَمَࢽْجُدْ جَمَࢽْ ࢽَوِ لُتُیٜ غَیْ؞ أَمْسُو جَوُیْ یٜ، ثَسَیْ یٜ، کَسُوُࢽْ لُوَ سُو، لَدُو سُو ثَدِ یٜ، کُلُو بَرٜجَیْ، ࢻَدُو ثَدَࢽْدِ یٜ کَسَرْغَ؞
[29] دَجِ یِمْ ࢽَوِ لُتُ بْرْࢽِ سُودُومْبٜࢽْ ثُلُوُࢽَدْࢽْ، دْلَوُ کَࢽُّیٜیَ کَوْوَ کَࢽُّوَیٜیَ سَمٜࢽْ ثُدُرٜ تَیِ سَمَّا سِیٜىٰࢽُو؞
[30] یِمْ دُوُوࢽْ تَدَ کَمْبٜدْ ࢻْلٜدِیدْࢽْ أَدْغَیْمَ وَکَّجِ؞
[31] «یِمْ أَدْࢽْ کَمْ دُوُوࢽْ کْلَ سُورُوࢽْجُیٜࢽْ کَرٜࢽْجُ یٜ ثُرُو سُورُویٜࢽْ دْغَࢽَدْ بَرٜ جْࢻْثٜ کَرٜ ࢽغُوجٜ لٜجِ ثْࢽٜ ثُرُو سُورُودْیٜرُو ࢽغَاࢽِّ! کُورُو کَمْ کُلُولَࢽْ دْغَࢽَدْ یٜ بَرٜ ࢻَدُورُو وَلْدْࢽِّ!
[32] تَࢽْغُواْ کَمُ لُتُیٜیَ!
[33] وُࢽْدُ دُوُوࢽْ رُوࢽْجُ رِوُو ثْرَاࢽَمَدْ رُوࢽْجُدَ ثُوَتْکِ، أَمَّ وُࢽْدُ دُوُوࢽْ رُوࢽْجُ ثُوَتْکْࢽَمَدْ رُوࢽْجُدَ ثْرِوِ؞
[34] ࢽَیِرُو وُلْࢽْجَغَکِّ، یِمْ أَدْࢽْ بُࢽٜ أَمْ یِࢽْدِ دْغْلْ تِلُوࢽْ بُووَدَ دُوُوࢽْ، ࢻَلْ ࢽغُوجَࢽٜ ࢻَلْ کُولْجَیْ؞
[35] کُورُو کَمُ یِࢽْدِ یٜ کَلُّو ࢽٜدُ ثَدِ دُوُوࢽْ، ࢻَلْ ࢽغُوجَࢽٜ ࢻَلْ کُولْجَیْ؞
[36] [کُوࢽغوَ یِࢽْدِ یٜ کُلُوࢽْ دُوُوࢽْ، ࢻَلْ ࢽغُوجَࢽٜ ࢻَلْ کُولْجَیْ؞]»
[37] دَجِ ࢻُوُرَوَࢽْجُیٜ تِرُو: «کْمَ، ࢽدَرَࢽْ أَوُو أَدْ وَکَّجِ؟» ثَࢽٜ تِیَ کٜوُورْࢽِّیَ، تَیِرُو: «ࢽَ رِوَ دْغَࢽَلَࢽْ کُووُوَسُو یٜ ثَࢻْتَیْ،» یٜࢽُو؞