[1] یِمْ لَا أَکِّ مُواْمَسُووَ بِوُمَ غَدٜسُووَ عِیسَىٰ کْرْࢽْدُرُو ࢽَࢽْجُرُو إِسَیْ دُوُوࢽْ،
[2] ࢻَرِسَوَا مَلْمْبَ أَتَّوْرَیٜیَ أَدَ کُتُّرُو ثَرُࢽٜ کَتّٜࢽْجَࢽْ: «کَمْ أَدْ بِوُمَسُووَ کَسَثّٜ، حَرْ تَیِیَ رُوکُّو مَسْࢽَ ثَدِ،» یٜرَ؞
[3] دَجِ عِیسَى تَیِرُو مِسَلْ أَدَ ثْدّٜ:
[4] «کَمْࢽْدُو لَا دِمِࢽْجُ مِیَا دُوُوࢽْ، ࢻَلْ ࢻَتْکٜىٰࢽُووَ، ࢻِلْغَرْ لْغَرِدَ کَرَالَࢽْ کُولْجٜ لٜجٜ ࢻَلْ ࢻَثّْغْࢽَدَ مَجٜ، حَرْ ثُوَࢽْدِ، مَرٜ؟
[5] ثُوَࢽْدِیَ، کَرْوُ کْجِیَرُو ࢽغَوَࢽَࢽْ ࢽغُوجٜ
[6] ࢻَࢽّجُرُو وَلْدِ؞ دَجِ سَوَوَࢽْجُوَ کْمَسْکِیَࢽْجُوَا بُواْجٜ تَیِرُو: ‹وُوَ ࢽَیِیَ کَرْوُکْجِࢽْدٜ کَلُّو ࢻْلٜࢽِیُو، دِمِࢽِ ࢻَثّْغْࢽَدَ ࢻَࢽْدْکّْࢽَ ࢽَࢽْغَرُو،› ثْࢽِ؞
[7] ࢽَیِرُو وُلْࢽْجَغَکِّ، أَدْغَیْمَ سَمٜلَࢽْ کَرْوُکْجِ دُوُوࢽْ کْلَ بِوُمَ ࢻَلْ تُوَ ثْدْࢽَیٜࢽْ تْدِدْ، کْلَ جِرٜوُ ࢻِلْغَرْ لْغَرِ جَوَلَّࢽْ ثَلُوُࢽِّدْمَیٜࢽْ کُوجْࢽَرُو تْدِ؞
[8] «کُورُو کَمُ لَا ثُࢽْغُوࢽْجُ مٜوُوَ دُوُوࢽْ، ࢻَلْ ࢻَتْکٜىٰࢽُووَ، ࢻَتْلَ وَسّٜ ࢻَدُودَ ࢻْرَجٜ حَࢽْغَلَّیٜࢽْ کُلَسّٜ، حَرْ ثُوَࢽْدِ، مَرٜ؟
[9] ثُوَࢽْدِیَ، کُویْیَࢽْجُوَ کْمَسْکِیَࢽْجُوَا بُواْجٜ تَیِرُو: ‹وُوَ ࢽَیِیَ کَرْوُکْجِࢽْدٜ کَلُّو ࢻْلٜࢽِیُو، ثُࢽْغُوࢽِ ࢻَثّْغْࢽَدَ ࢻَࢽْدْکّْࢽَ ࢽَࢽْغَرُو،› ثْࢽِ؞
[10] ࢽَیِرُو وُلْࢽْجَغَکِّ، أَدْغَیْمَ بِوُمَ ࢻَلْ تُوَ ثْدِیَ، مَلَیْیَوَ اللَّهیٜ یٜ کْجِ ࢻَࢽْجَیْ؞»
[11] کُورُو عِیسَى وَلْدٜ: «کَمْ لَا تَدَ یِࢽْدِیَ دُوُوࢽْ،
[12] تْࢽْغْرِمَدْیٜ تِرُو: ‹بَوَ، ࢽُوَࢽِ وَرَسَیٜ سٜ!› یٜࢽِّیَ، بَوَدْ تَیِرُو کْࢽْدَࢽْجُ دَغَرْیٜىٰࢽُو؞
[13] ࢽغَوُو کَوُ غَࢽَیٜࢽْ تْࢽْغْرِمَدْ أَوُوࢽْجُ سَمَّا ثَࢻْثٜ لَرْدُ کُرُوُ لَارُو لٜجٜ ࢽَدْࢽْ ࢽَࢽْجَیْرُو ثْدٜ کْࢽْدَࢽْجُ بَسَرْیٜࢽُو؞
[14] وُرِࢽْجُ سَمَّا ثٜجٜ ثُوتْ کٜرْࢽِّیَ، کْࢽَ جَوْ لَرْدُدْرُو ࢽغَیٜ لَمْبِمَرُو وَلْیٜࢽُو؞
[15] دَجِ ثِجٜ کَمْ لَرْدُیٜ لَارُو ࢽَࢻْثِیٜ أَلَدٜیَ ࢽٜوُورُو کُلُووَࢽْجُرُو تِیَ کِࢽُودُو؞
[16] تَدَ کْسْکَیٜ أَلَدٜیَ جَوُیْدْࢽْ ثُرُوࢽْجُࢽْ ࢽجْمْبْرُورُو جَوْرُو مَࢽْغَرْجْࢽَ، أَمَّ وُࢽْدُمَ تِرُو ثِࢽِّ؞
[17] «دَجِ کْلَ ࢽَࢻْتُࢽْجُ أَدْیٜࢽْ تُوُورٜ کَرْوُࢽْجُࢽْ: ‹کَیْ! کِدَمَ بَوَࢽِیٜ ࢻِ یَیٜ کْمْبُو جُوٜ، حَرْ کُلْجِ، أَمَّ أَکُّو وُوَ ࢽَ أَدْࢽْ کْࢽَیٜ سٜسِ؞
[18] کُولّٜ ثِکّٜ بَوَࢽِیٜرُو لٜکّٜ تِرُو: بَوَ، مَیْ سَمٜمَ یٜرُو بِوُ یِدّْکّْࢽَ، ࢽِ یٜرُو بِوُ ࢽجْدّْکّْࢽَ؞
[19] کُوَ وُوَ تَدَࢽْمْلَࢽْ بُواْدُرُو یِتّْکّْࢽِ؞ مَرْࢽٜ، کَسَدّٜ کِدَوُࢽْمْبٜ ࢻَلْࢽْجَ غَیْرُو وَلّْکُّو! ࢽْکِّ؞›
[20] دَجِ ثِجٜ ࢽَ بَوَࢽْجُیٜرُو لٜىٰࢽُو؞ أَمَّ بَوَࢽْجُدْ کُرُوُࢽْ تِیَ کِرُࢽِّیَ، جَوْرُو ࢽجُࢽُوجٜ ثْغَسٜ دَوْࢽْجُرُو کَمْدِیٜ لٜوَ کْرَوُویٜ تِرُو کِدُّو؞
[21] دَجِ تَدَدْیٜ تِرُو: ‹بَوَ، مَیْ سَمٜمَ یٜرُو بِوُ یِدّْکّْࢽَ، ࢽِ یٜرُو بِوُ ࢽجْدّْکّْࢽَ؞ کُوَ وُوَ تَدَࢽْمْلَࢽْ بُواْدُرُو یِتّْکّْࢽِ،› یٜࢽُو؞
[22] أَمَّ بَوَدْیٜ وُولُودِیَࢽْجُرُو: ‹دُوَࢽْ لٜࢽُواْ، کَلْوُ غَرِ ࢽغَلْوُودَ کُدُواْ تِرُو لُوُࢽُواْ؞ ࢽغُلُوࢽْدُوࢽْجُرُو کُلُمْ یَکُّواْ، سِࢽْجُ یٜرُو سُࢽُو یَکُّواْ؞
[23] کُورُو کْࢽَّ کَیْسُوَدَ کُدُواْ دُوَࢽُواْ؞ بْرِ ࢽغْمْرِیٜ بُیْیُو، بِکّٜ دِیُو،
[24] دَلِلْࢽْجُدْ تَدَࢽِ أَدْ ࢽُࢽَ دُوُوࢽْ رُووَرُو وَلْیٜࢽُو، ࢻَثّْغْࢽَ دُوُوࢽْ تِیَ کِوَࢽْدْکُّو ࢽَࢽْغَرُو،› یٜࢽُو؞ دَجِ کَرْوُࢽْجَ جَوْرُو کْجِجٜ ࢽغْمْرِ بَدِیٜرَ؞
[25] «سَ أَدْࢽْ تَدَ کُرَمَدْ کُلُوࢽْ؞ ࢻَدُو کَرْࢽْغٜࢽِّیَ، غَࢽْغَا أَلْغَیْتَا ࢽُکْثَیْ ࢻَࢽْغٜࢽُو؞
[26] وُولُودِ لَآ بُواْجٜ أَوُو وَکَّجْࢽَدَ کِوُورُو؞
[27] تِیٜ: ‹کَࢽَّࢽْمْ دِیٜ وَلْدٜ إِسُو؞ بَوَࢽْمْ تِیَ کْلٜوَ سَلَیْ ثُوَࢽْدْࢽَ ࢽَࢽْغَرُو، کْࢽَّ کَیْسُوَدَ دُوَجْࢽَ،› یٜࢽُو؞
[28] دَجِ تَدَ کُرَمَدْ غْرْغَجٜ ࢻَدُودْرُو ࢽغَوُو وَیٜࢽُو؞ بَوَࢽْجُ ثِجٜ ثُلُوٜ تِیَ لُواْدُ ࢽغْسْکٜࢽُو؞
[29] أَمَّ تِیٜ بَوَࢽْجُرُو: ‹أَکُّو کْرْوُ کَدَرُو کَرٜیَ غَیْرُو ࢽغْࢽْࢻْتْکّٜ ࢽِرُو کِدَ ࢽجْدّْکِّ، کُورُو سَوِسُو مَࢽَࢽْمْ ࢽغُوکِّ یَیٜ، ࢽغَلْتٜمَ وُرُو کَࢽِ تْࢽْغْرِمَ سِمٜ سَوَوَࢽِیَ ࢽغْمْرِ دِیٜࢽْدٜ؞
[30] أَمَّ تَدَࢽْمْ أَدْ، أَرْسِیࢽْمْ سَمَّا جَوَرَّرُو رْمْسْ ثِکّٜجٜ بَسَرْجٜ وَلْدٜ کَدِࢽِّیَمَ، تِرُو کْࢽَّ کَیْسُوَدَ دُوَیٜىٰمْ!›
[31] دَجِ بَوَدْیٜ تِرُو: ‹تَدَࢽِ، ࢽِ سَوِسُو ࢽَࢽِࢽْ کْرْغَمْ، کُورُو أَوُو کَکّٜ سَمَّ کَاࢽْمْ؞
[32] ࢽغْمْرِ دِیُووَ کْجِ ࢻَࢽْدَا أَࢽِ أَࢽْدِرُو وَجِمْسَاࢽَ دِیٜ، دَلِلْࢽْجُدْ کَࢽَّࢽْمْ أَدْ ࢽُࢽَ دُوُوࢽْ رُووَرُو وَلْیٜࢽُو، ࢻَثّْغْࢽَ دُوُوࢽْ تِیَ کِوَࢽْدِیٜ ࢽَࢽْغَرُو،› یٜࢽُو؞»