[1] ࢽُودُو کَیْسَرْ تِبٜرِیَسّٜ سَا کْࢽْمٜوُ وُرِیَ بُࢽْتُسْ بِلَتُسْ غُومْࢽَ ثِدِ یَحُدِیَیٜ، حِرُدُسْ یٜ مَیْ غَلِلٜىٰ، أَوَࢽْجُغْࢽَ ࢻِلِبُسْ یٜ مَیْ ثِدِ إِتُرِیَیٜیَ تَرَکُࢽِتِسّٜیَیٜ، لِسَࢽِیَسْ یٜ مَیْ أَبِلٜࢽٜىٰ،
[2] کُورُو أَࢽَّسَّ کَیْࢻَسَّ یٜ وُرَوَ رِمَࢽَّیٜ؞ جَمَࢽْ أَدْࢽْ مَࢽَ اللَّهیٜ کَرَاࢽْ ࢽَوِ یَحْیـَى تَدَ جَکَرِیَّیٜرُو جْࢻْکٜىٰࢽُو؞
[3] دَجِ یَحْیـَى ثِدِ بْرْمْ جُورْدَࢽِیٜ سَمَّا جْغَࢽٜ جَمَرُو کَوُرِ ثْدّٜ کَسَلَ تُوَیٜ بِوُوَ غَوُرْدُیٜ مَوُوجِ کْرْغَ؞
[4] أَدْغَیْمَ أَوُو ࢽَوِ إِشَیَ ثُرُو کِتَوُࢽْجُیٜࢽْ رُوُجْࢽَدْ وَکَّیٜࢽُو؞ تِیٜ: «کَرَاࢽْ کَمْ لَا کُواْ سَࢻْثٜ: ‹کْمَࢽْدٜرُو جَوَلْ دَبَّرْغْࢽُواْ، کُودُرَمْࢽْجُ ثْکُّو دٜوُو!
[5] ࢽغُورْسُو رْࢻْکَدَرُو وَلْجَ، کْرِیَ کَوْوَسُو یٜ سَࢽَادَرُو وَلْجَ؞ جَوَلْ کْرِیَدَسُو ثْکُّو وَلْجَ، بَتِّ یٜ تَسَّ؞
[6] ࢽغَیْࢽِࢽْ أَدَمْغْࢽَ سَمَّ ࢽجْکَّوُو اللَّهیٜدَ ثَرُیْ،› ثْࢽٜ مَوُوجِ؞»
[7] جَمَ کَدَ ࢽَ یَحْیـَیٜرُو تَیِرُو کَسَلَ تُوَیٜ ثْدُّورُو إِسَیْ دُوُوࢽْ، یَحْیـَیٜ تَیِرُو: «ࢽَیِ کَدُوُ ࢻُسِیَیٜسُو، وُࢽْدُ ࢽَیِیَ أَجَوُ إِسِدْرُو کَسُواْرُو غَلَࢽْجَ؟
[8] أَوُو تُوَ جِرٜىٰ ࢻْلٜجِسُووَ دٜوُو! بَرٜ کَرْوُࢽْدُوࢽْ: ‹أَࢽْدِ کَدُوُ ࢽَوِ إِبْرَاهِیمْبٜ،› وُلُّوِّ؞ ࢽَیِرُو وُلْࢽْجَغَکِّ، اللَّهیٜ کْࢽْدُوُوࢽْجُ دُوࢽْغُرْ کَوْیٜ أَࢽِلَࢽْ ࢽَوِ إِبْرَاهِیمْبُو کَدُوُ أَلَکْتُوُیٜ مبٜجِ؞
[9] أَکُّو کْرْمَمَرُو بٜوُودْ ࢻْرْدُ کْسْکَیٜࢽْ غْࢽَادَ؞ کْسْکَ ࢻِ دُوُوࢽْ تَدَ ࢽغْلَ ثَکِّوَوُودَ ثَلْجَࢽٜ کَࢽُّرُو ࢻِجَغَیْ،» یٜࢽُو؞
[10] دَجِ جَمَ ثَࢻْتَࢽَدْیٜ تِرُو: «أَوِ غْلٜ دِیٜ؟» ثَࢽٜ تِیَ کٜوُورُو؞
[11] یَحْیـَیٜ تَیِرُو: «کَمْ ࢽَࢽْجُࢽْ غْمَجٜ یِࢽْدِیَدْ کَمْ ثْدَࢽِّرُو ࢻَلْ ثُو، کُورُو کَمْ ࢽَࢽْجُࢽْ کْمْبُووَدْ یٜ ࢽغَیْ ثْدُو!» یٜࢽُو؞
[12] أَکِّ مُواْمَسُو یٜ تَیِرُو کَسَلَ تُوَیٜ ثْدُّورُو ࢽَࢽْجُرُو إِسَࢽٜ تِرُو: «سَیِࢽَّ، أَوِ غْلٜ دِیٜ؟» ثَࢽٜ تِیَ کٜوُورُو؞
[13] تَیِرُو: «بَرٜ أَوُو وُواْمْ وُلْࢽْجَاࢽَدَ کُوجْࢽَرُو مُووُوِّ!» یٜࢽُو؞
[14] کُورُو سُوجِیَ یٜ تِرُو: «أَࢽْدِ ࢽدَ، أَوِ غْلٜ دِیٜ؟» ثَࢽٜ تِیَ کٜوُورْࢽِّیَ، تَیِرُو: «بَرٜ دُࢽُوࢽْ بِ جِرٜࢽَمْبُࢽْ وُرِ کَمْبٜ مُووُوِّ، أَمَّ کْلَ بِیَࢽْدُویٜࢽْ دَࢽُواْ!» یٜࢽُو؞
[15] جَمَدْ تْمَࢽْجَا کَرْوُࢽْجَࢽْ یَحْیـَمَ وَ أَلْمَسِیوُدْ وُورُو ثَوُورِ دُوُوࢽْ،
[16] یَحْیـَیٜ تَیِ سَمَّرُو: «وُ إِࢽْغِلَࢽْ ࢽَیِرُو کَسَلَ ࢽغٜدّْکُّو، أَمَّ کَمْ لَا وُوَ کْࢽْدُوُوࢽْ کُوسْࢽَ جٜ سُࢽُوࢽْجُیٜ وُیْدُمَ تِکّْࢽِ إِسِ؞ تِدْ رُحُ اللَّهیٜیَ کَࢽُّوَلَࢽْ ࢽَیِرُو کَسَلَ ࢽجَدِّ؞
[17] أَکُّو مُکُّوࢽْجُࢽْ کْمُو لَلَدُرَمْبَ ࢽَ وَسْتُرَمْࢽْجُیٜرُو إِسٜ أَلْغَمَا کَلَرِیَ ࢻِرْجِ؞ أَلْغَمَࢽْجُدَ ثُلُورٜ بْرَلَࢽْ غْࢽَجِ، أَمَّ کَلَرِدَ کَࢽُّ تْمَّرُو ࢽُیْوَوُولَࢽْ وَرْجِ،» یٜࢽُو؞
[18] أَدْغَیْمَ مَࢽَ کَدَࢽْ یَحْیـَى جَمَدَ غَلَجٜ تَیِرُو کَوُرِ کْجِ اللَّهیٜدَ وُلْیٜىٰࢽُو؞
[19] ثَلَࢽْ یَحْیـَى مَیْ حِرُدُسُّو کَمُ یَࢽْجُغْࢽَیٜ یَ حِرُدِیَا کَمُرُو ثْمُواْࢽَا أَوُو دِوِ کَدَ ثْدْࢽَدَ ࢽَࢽْغَرُو جْکَّدْࢽَ؞
[20] دَجِ مَیْ حِرُدُسْ بِوُࢽْجُرُو بِوُ غَدٜ ثْرْغَࢽٜ یَحْیـَىٰ کُوسُورُو کٜکُّو؞
[21] جَمَࢽْ ࢽَوِ یَحْیـَى جَمَ سَمَّرُو کَسَلَ تُوَیٜ ثْدِّدْࢽْ، عِیسَى یٜرُو کَسَلَ کِدُّو؞ دَجِ عِیسَى مُودُوَ ثْدِ دُوُوࢽْ، سَمٜ ࢻَرَکُّو ࢻْرْمْدٜ
[22] رُحُ اللَّهیٜ أَلَمَ بُلَّمْ غَیْ تِرُو جْࢻْثِیٜ سَمٜلَࢽْ کُواْ ࢽُکْثٜ: «ࢽِمَ تَدَࢽِ وُو، ࢽجْرَاکّْࢽَ؞ ࢽِرَمْࢽِࢽْ جَوْرُو کَرْوُࢽِ کْجِجْࢽَ!» یٜࢽُو؞
[23] عِیسَى کْرْوُࢽْجُ ࢻِیَکُّ غَیْ دُوُوࢽْ، کِدَࢽْجُ بَدِیٜࢽُو؞ جَمَدْ تِیَ تَدَ یُوسُࢻُیٜرُو ࢽغُویٜرَ؞ یُوسُࢻُدْ تَدَ إٜلِیٜ،
[24] إٜلِ یٜ تَدَ مَتَّیٜ، مَتَّ یٜ تَدَ لٜوِیٜ، لٜوِ یٜ تَدَ مَلْکِیٜ، مَلْکِ یٜ تَدَ جَࢽَّیٜ، جَࢽَّ یٜ تَدَ یُوسُࢻُیٜ،
[25] یُوسُࢻُ یٜ تَدَ مَتَّتِیَیٜ، مَتَّتِیَ یٜ تَدَ أَمُوسّٜ، أَمُوسْ یٜ تَدَ ࢽَحُمْبٜ، ࢽَحُمْ یٜ تَدَ إٜسْلِیٜ، إٜسْلِ یٜ تَدَ ࢽَغَّیْیٜ،
[26] ࢽَغَّیْ یٜ تَدَ مَاتّٜ، مَاتْ یٜ تَدَ مَتَّتِیَیٜ، مَتَّتِیَ یٜ تَدَ سٜمٜیِࢽّٜ، سٜمٜیِࢽْ یٜ تَدَ یُوسَکّٜ، یُوسَکْ یٜ تَدَ یُودَیٜ،
[27] یُودَ یٜ تَدَ یُوحَࢽَیٜ، یُوحَࢽَ یٜ تَدَ رٜسَیٜ، رٜسَ یٜ تَدَ جٜرُبَبٜلّٜ، جٜرُبَبٜلْ یٜ تَدَ شٜیَلْتِیٜلّٜ، شٜیَلْتِیٜلْ یٜ تَدَ ࢽٜرِیٜ،
[28] ࢽٜرِ یٜ تَدَ مَلْکِیٜ، مَلْکِ یٜ تَدَ أَدِّیٜ، أَدِّ یٜ تَدَ کُوسَمْبٜ، کُوسَمْ یٜ تَدَ أَلْمَدَمَیٜ، أَلْمَدَمَ یٜ تَدَ یٜرِیٜ،
[29] یٜرِ یٜ تَدَ یُوشُوَیٜ، یُوشُوَ یٜ تَدَ أَلِیٜجٜرّٜ، أَلِیٜجٜرْ یٜ تَدَ یٜرِمَیٜ، یٜرِمَ یٜ تَدَ مَتَّیٜ، مَتَّ یٜ تَدَ لٜوِیٜ،
[30] لٜوِ یٜ تَدَ سِمِیُوࢽّٜ، سِمِیُوࢽْ یٜ تَدَ یَحُدَیٜ، یَحُدَ یٜ تَدَ یُوسُࢻُیٜ، یُوسُࢻُ یٜ تَدَ جُوࢽَمِیٜ، جُوࢽَمِ یٜ تَدَ أَلِیَکِمْبٜ،
[31] أَلِیَکِمْ یٜ تَدَ مَلَیَیٜ، مَلَیَ یٜ تَدَ مَࢽَّیٜ، مَࢽَّ یٜ تَدَ مَتَّتَیٜ، مَتَّتَ یٜ تَدَ ࢽَتَࢽّٜ، ࢽَتَࢽْ یٜ تَدَ مَیْ دَاوُدَیٜ،
[32] مَیْ دَاوُدَ یٜ تَدَ یِسَیْیٜ، یِسَیْ یٜ تَدَ أَبِدَیٜ، أَبِدَ یٜ تَدَ بُواْسّٜ، بُواْسْ یٜ تَدَ سَلْمُوࢽّٜ، سَلْمُوࢽْ یٜ تَدَ ࢽَشُوࢽّٜ،
[33] ࢽَشُوࢽْ یٜ تَدَ أَمِࢽَدَبّٜ، أَمِࢽَدَبْ یٜ تَدَ أَدَمِࢽّٜ، أَدَمِࢽْ یٜ تَدَ أَرَمْبٜ، أَرَمْ یٜ تَدَ حٜسْرُوࢽّٜ، حٜسْرُوࢽْ یٜ تَدَ ࢻٜرٜسّٜ، ࢻٜرٜسْ یٜ تَدَ یَحُدَیٜ،
[34] یَحُدَ یٜ تَدَ یَعْࢼُوبَیٜ، یَعْࢼُوبَ یٜ تَدَ إِسْحَٰࢼُیٜ، إِسْحَٰࢼُ یٜ تَدَ ࢽَوِ إِبْرَاهِیمْبٜ، ࢽَوِ إِبْرَاهِیمْ یٜ تَدَ تَرَحُیٜ، تَرَحُ یٜ تَدَ ࢽَحُورّٜ،
[35] ࢽَحُورْ یٜ تَدَ سٜرُکّٜ، سٜرُکْ یٜ تَدَ رٜوُیٜ، رٜوُ یٜ تَدَ ࢻٜلٜکّٜ، ࢻٜلٜکْ یٜ تَدَ أَبِرُیٜ، أَبِرُ یٜ تَدَ شٜلَیٜ،
[36] شٜلَ یٜ تَدَ کٜࢽَࢽّٜ، کٜࢽَࢽْ یٜ تَدَ أَرْࢻَجَدّٜ، أَرْࢻَجَدْ یٜ تَدَ سَمُیٜ، سَمُ یٜ تَدَ ࢽَوِ نُوحُیٜ، ࢽَوِ نُوحُ یٜ تَدَ لَمٜکّٜ،
[37] لَمٜکْ یٜ تَدَ مَتُسَلٜمْبٜ، مَتُسَلٜمْ یٜ تَدَ إِدْرِسَیٜ، إِدْرِسَ یٜ تَدَ جَرٜدّٜ، جَرٜدْ یٜ تَدَ مَحَلَلٜلّٜ، مَحَلَلٜلْ یٜ تَدَ کٜࢽَࢽّٜ،
[38] کٜࢽَࢽْ یٜ تَدَ یٜࢽُوسّٜ، یٜࢽُوسْ یٜ تَدَ شِتُیٜ، شِتُ یٜ تَدَ ࢽَوِ آدَمْبٜ، ࢽَوِ آدَمْ یٜ اللَّهیٜ؞