[1] Yî-set-lie̍t-vòng Â-ha̍p sí-thet yî-heu, Mô-ap-koet chhiu fán Yî-set-lie̍t.
[2] Yî-set-lie̍t-vòng Â-ha̍p-chhia tui Sat-mâ-li-â vòng-kiûng ke yòng-thòi tiet hâ-lòi, chho̍k-sông chhin ngiàm-chhung. Kì phai-ngìn hi khiù-mun Fî-li-sṳ thi-khî Yî-kiet-lùn-sàng ke sṳ̀n — Pâ-li̍t-Sî-puk, oi tî kì ke phiang voi hó mò?
[3] Chúng-he Song-chú ke thiên-sṳ́ fûn-fu Thì-sṳ̂-pí-ngìn siên-tî Yî-li-â hi kien Â-ha̍p-chhia-vòng ke sṳ́-chá, mun kì-têu: “Ngì-têu cho-má-ke hi khiù-mun Yî-kiet-lùn ke sṳ̀n Pâ-li̍t-Sî-puk? Kám-kóng Yî-set-lie̍t tông-chûng mò Song-ti he-mò?
[4] Ngì-têu hi lâu vòng kóng, Song-chú án-ngiòng kóng: ‘Ngì mò fap-thu tui phiang-chhòng hâ-lòi; ngì yit-thin voi sí!’ ” Yî-li-â chhiu cheu Song-chú ke min-lin hi-cho.
[5] Sṳ́-chá chón-to vòng ke-vi; vòng mun kì-têu: “Ngì-têu cho-má-ke chón-lòi?”
[6] Kì-têu kóng: “Ngài-têu tù-tó yit-ke ngìn; kì ham ngài-têu chón-lòi lâu vòng kóng, Song-chú tui ngì án-ngiòng kóng: ‘Ngì cho-má-ke phai-ngìn hi khiù-mun Yî-kiet-lùn ke sṳ̀n Pâ-li̍t-Sî-puk? Kám-kóng Yî-set-lie̍t tông-chûng mò Song-ti he-mò? Só-yî ngì mò fap-thu tui phiang-chhòng hâ-lòi; ngì yit-thin voi sí!’ ”
[7] Vòng mun: “Ngì-têu tù-tó ke ngìn sâng-to má-ke yong-é?”
[8] Kì-têu kóng: “Kì chok phì-mô ke sâm, yu kiê-tén phì-tai.” Vòng thai-sâng kóng: “Kì he Thì-sṳ̂-pí-ngìn Yî-li-â!”
[9] Só-yî, vòng phai yit-ke kiûn-kôn tai ńg-sṳ̍p ke phu-ha hi Yî-li-â ke-vi, khon-tó kì chhô chhai sân-kông táng, chhiu tui kì kóng: “Sṳ̀n-ngìn nâ, vòng min-lin ngì hâ-lòi!”
[10] Yî-li-â en-kóng: “Ngài na-he sṳ̀n-ngìn, ngien fó tui thiên-táng kong hâ-lòi sêu-sí ngì lâu ngì ńg-sṳ̍p ke phu-ha!” Ngiàm-sṳ̀ yû fó tui thiên-táng kong hâ-lòi, sêu-sí ke kiûn-kôn lâu kì ńg-sṳ̍p ke phu-ha.
[11] Vòng yu phai nang-ngoi yit-ke kiûn-kôn tai ńg-sṳ̍p ke phu-ha hi; kì tui Yî-li-â kóng: “Sṳ̀n-ngìn nâ, vòng min-lin ngì kiak-kiak hâ-lòi!”
[12] Yî-li-â en-kóng: “Ngài na-he sṳ̀n-ngìn, ngien fó tui thiên-táng kong hâ-lòi sêu-sí ngì lâu ngì ńg-sṳ̍p ke phu-ha!” Ngiàm-sṳ̀ Song-ti ke fó tui thiên-táng kong hâ-lòi, sêu-sí ke kiûn-kôn lâu kì ńg-sṳ̍p ke phu-ha.
[13] Vòng thi-sâm pái yu phai yit-ke kiûn-kôn tai ńg-sṳ̍p ke phu-ha hi. Ke kiûn-kôn hi-to ke-vi, khúi chhai Yî-li-â mien-chhièn, khiù kì kóng: “Sṳ̀n-ngìn nâ, chhiáng lìn-mén ngài lâu ngì liá ńg-sṳ̍p ke phu̍k-ngìn; kiu ngài-têu ke sin-miang!
[14] Yí-kîn yû lióng-ke kiûn-kôn lâu kì-têu ke phu-ha chhiòn-phu pûn thiên-táng lòi ke fó sêu-sí lô; chúng-he liá-ha khiù ngì khó-lièn ngài!”
[15] Song-chú ke thiên-sṳ́ tui Yî-li-â kóng: “Ngì lâu kì khiung-ha hi, m̀-sṳ́ kiâng kì!” Yî-li-â chhiu lâu ke kiûn-kôn to vòng ke-vi hi,
[16] tui vòng kóng: “Song-chú án-ngiòng kóng: ‘Yîn-vi ngì phai-ngìn hi khiù-mun Yî-kiet-lùn ke sṳ̀n Pâ-li̍t-Sî-puk, kám-kóng Yî-set-lie̍t tông-chûng mò Song-ti he-mò? Só-yî ngì mò fap-thu tui phiang-chhòng hâ-lòi; ngì yit-thin voi sí!’ ”
[17] Cheu Song-chú thûng-ko Yî-li-â só-kóng ke, Â-ha̍p-chhia-vòng chṳn-kîn sí-thet. Â-ha̍p-chhia mò lai-é, só-yî kì ke ló-thâi Yok-làn sṳ̀n-chiap kì cho vòng; ke-ngièn he Yù-thai-vòng Yok-sâ-fap ke lai-é Yok-hò-làn chhai-vi ke thi-ngi ngièn.
[18] Â-ha̍p-chhia khì-thâ ke sṳ chhiòn-phu ki chhai Yî-set-lie̍t Lie̍t-vòng Sṳ́ tî-poi.