[1] Yù-thai-vòng Yok-sâ-fap chhai-vi ke thi sṳ̍p-pat ngièn, Â-ha̍p ke lai-é Yok-làn cho Yî-set-lie̍t-vòng. Kì chhai Sat-mâ-li-â thúng-chhṳ sṳ̍p-ngi ngièn.
[2] Kì hàng Song-chú khon-cho sià-ok ke sṳ, chúng-he mò-chhiong kiâ-pâ lâu kiâ-mê án-fái. Kì chhù-thet kiâ-pâ pai Pâ-li̍t só tun ke chhû-siong.
[3] Chúng-he, chhiu-chhiong yî-chhièn Nì-pat ke lai-é Yâ-lò-pô-ôn-vòng khiung-yong, kì ya hoi Yî-set-lie̍t-ngìn ham chhai chhui-ok tông-chûng, m̀-sṳt thìn-ko.
[4] Mô-ap-vòng Mí-sâ hiuk tông-tô yòng; kì tak-ngièn hiong Yî-set-lie̍t-vòng chin-kung sṳ̍p-van chak se-yòng lâu sṳ̍p-van chak mièn-yòng-kú ke mô.
[5] Yî-set-lie̍t-vòng Â-ha̍p sí-thet yî-heu, Mô-ap-vòng chhiu chho-fán.
[6] Yok-làn-vòng ngiàm-sṳ̀ lì-khôi Sat-mâ-li-â, seu-si̍p kì só-yû ke kiûn-chhui,
[7] phai-ngìn hi tui Yù-thai-vòng Yok-sâ-fap kóng: “Mô-ap-vòng chho-fán lé; ngì hén lâu ngài khiung-ha hi kûng-tá kì mò?” Yok-sâ-fap-vòng en-kóng: “Hó â! Ngài lâu ngì khiung-ha hi. Ngì ke sṳ chhiu-he ngài ke sṳ! Ngài ke phu-ha chhiu-he ngì ke phu-ha, ngài ke chan-mâ ya he ngì ke chan-mâ.
[8] Ngài-têu yin-kôi tui nai-thiàu lu hi kûng-tá?” Yok-làn-vòng kóng: “Ngài-têu oi tui Yî-tûng khóng-yâ ke-thiàu lu hi.”
[9] Só-yî Yî-set-lie̍t-vòng, Yù-thai-vòng lâu Yî-tûng-vòng khiung-ha chhut-fat. Kì-têu tui ke-thiàu kha-yén ke lu tîn chhit-ngit, súi yung chhiang-chhiang, kiûn-chhui lâu thèu-sâng chhiòn-phu mò-súi hó lîm.
[10] Yî-set-lie̍t-vòng thai-sâng kóng: “Liá chhiu chhám lé! Song-chú seu-si̍p ngài-têu sâm-ke vòng, ngièn-lòi he oi chiông ngài-têu kâu chhai Mô-ap-vòng sú-chûng!”
[11] Yok-sâ-fap-vòng mun: “Liá-vi kám m̀-he yû Song-chú ke siên-tî? Ngài-têu cho-tet thûng-ko kì khiù-mun Song-chú.” Yî-set-lie̍t-vòng ke yit-ke kôn-yèn en-kóng: “Liá-vi yû Sâ-fap ke lai-é Yî-li-sâ; kì yî-chhièn he Yî-li-â ke chhu-sú.”
[12] Yok-sâ-fap-vòng kóng: “Song-chú yit-thin voi lâu kì kóng-fa.” Só-yî sâm-ke vòng khiung-ha hi kien Yî-li-sâ.
[13] Yî-li-sâ tui Yî-set-lie̍t-vòng kóng: “Ngài ngióng-oi pông-chhu ngì? Hi mun ngiâ-pâ lâu ngiâ-mê ke siên-tî â!” Yî-set-lie̍t-vòng kóng: “Chhiáng m̀-hó án-ngiòng kóng, yîn-vi he Song-chú seu-si̍p ngài-têu sâm-ke vòng, oi chiông ngài-têu kâu chhai Mô-ap-vòng sú-chûng.”
[14] Yî-li-sâ kóng: “Ngài chṳ́-tén ngài só sṳ-fung ke yún-sên Song-chú — Van-kiûn ke Ngièn-soi fat-sṳ, na m̀-he khon Yù-thai-vòng Yok-sâ-fap ke mien-chṳ́, ngài chhiu m̀-voi kien ngì, m̀-oi tap ngì.
[15] Liá-ha, hi lâu ngài chhìm yit-ke khìm-sṳ̂ lòi.” Thàn-khìm ke lòi-thàn ke sṳ̀, Song-chú ke thai-nèn chhiu kong chhai Yî-li-sâ sṳ̂n-song.
[16] Yî-li-sâ kóng: “Song-chú án-ngiòng kóng: ‘Ngì-têu oi chhai liá-thiàu hâng-lak tú tak só-chhai yet kiêu-é.
[17] Sûi-yèn ngì-têu mò khon-tó hí-fûng, ya mò khon-tó lo̍k-yí, chúng-he hâng-lak tú voi yû mân-mân ke súi. Ngì-têu lâu ngì-têu ke thèu-sâng lûng-chúng voi yû súi hó lîm.’ ”
[18] Yî-li-sâ ki-siu̍k kóng: “Liá-sṳ tui Song-chú lòi-kóng he séu sṳ-chhìn â; Kì hàn-oi chiông Mô-ap-ngìn kâu chhai ngì-têu sú-chûng.
[19] Ngì-têu yit-thin voi cham-liâng kì-têu só-yû kiên-ku ke sàng-pó lâu fàn-yùng ke sàng-sṳ, chám-thet kì-têu só-yû ke hó su, set-thet kì-têu só-yû ke súi-ngièn, yu tôi-mân sa̍k-thèu pho-fái kì-têu só-yû chhin-phì ke thièn-thi.”
[20] Thi-ngi chêu-sṳ̀n, thai-yok he hien chó-chi ke sṳ̀, chṳn-kîn tui Yî-tûng fông-mien yû súi liù-tén lòi, mân-phien he súi.
[21] Chhiòn Mô-ap-ngìn thâng-kóng sâm-ke vòng lièn-ha̍p hí-lòi kûng-tá kì-têu, chhiu seu-si̍p só-yû voi siông-chhṳ̀ ke ngìn, tui-ló to-yu, chhiòn-phu chhai piên-kie fòng-sú.
[22] Thi-ngi chêu-sṳ̀n, kì-têu hong-hí-lòi ke sṳ̀, ngit-thèu cheu chhai súi-mien song, kì-têu khon-tó tui-mien ke súi fùng-to chhiong hiet.
[23] Kì-têu thai-sâng hêm: “Ke he hiet â! Yit-thin he sâm-chhui thi̍t-kiûn fu-siông chhàn-sat! Mô-ap-ngìn nâ, ngài-têu hi chhióng kì-têu ke chhòi-vu̍t â!”
[24] Mô-ap-ngìn to Yî-set-lie̍t yàng-thi ke sṳ̀, Yî-set-lie̍t-ngìn kûng-kit kì-têu, chiông kì-têu kiuk chón-hi. Yî-set-lie̍t-ngìn yit-chhṳ̍t tûi-sat Mô-ap-ngìn,
[25] chhak-thet kì-têu ke sàng-sṳ. Tak-pái kîn-ko hó-thièn, Yî-set-lie̍t-ngìn chhiu te̍p sa̍k-thèu lo̍k-hi, chhṳ̍t-to só-yû ke thièn sa̍k-thèu thùn mân-mân. Kì-têu ya chiông só-yû ke súi-ngièn set-thet, chám-thôn só-yû ke hó su. Chui-heu, chṳ́-yû chhûn sú-tû Kit-ngí-Ha̍p-lie̍t-sat, te̍p sa̍k-thèu ke pîn-é chhiu vì-kûng ke-sàng.
[26] Mô-ap-vòng khon-tó chhìn-khóng ngiàm-chhung, chhiu tai-tén chhit-pak ke tai-kiam ke pîn-é, sióng chhung-chhut pâu-vì, chéu-to Si-li-â-vòng ke-vi, chúng-he mò sṳ̀n-kûng.
[27] Só-yî kì chiông ke oi sṳ̀n-chiap vòng-vi ke chóng-chṳ́ tông-cho sên-ngì, chhai sàng-chhiòng táng hien-chi pûn Mô-ap ke sṳ̀n-mìn. Yî-set-lie̍t-ngìn sa chho̍k-kiâng, só-yî sâm-ke vòng chhiu chha̍t-thui, chón chhṳ-kâ ke koet-kâ hi.