[1] Yû yit-ngit, Yî-li-sâ só tai-liâng ke yit-khiùn siên-tî tui kì fat yen-ngièn kóng: “Khon nâ, ngài-têu lâu ngì só he̍t ke thi-fông thet-ha̍p lé!
[2] Chhiáng chún ngài-têu to Yok-tan-hò sùn-thèu, tak-sà chhí yit-kî su-liau chón-lòi, nang-ngoi hí yit-kiên vuk-è.” Yî-li-sâ kóng: “Hó, ngì-têu hi!”
[3] Kì-têu tông-chûng yû yit-sà chhiáng Yî-li-sâ lâu kì-têu khiung-ha hi, Yî-li-sâ chhiu tap-yin kì.
[4] Só-yî kì-têu khiung-ha hi, to Yok-tan-hò, thai-kâ chhiu khôi-sṳ́ chám su-é.
[5] Yû yit-sà chám su-é ke sṳ̀, pú-thèu lut-thet, tiet-lo̍k súi-tú. Kì hiong Yî-li-sâ hêm-kóng: “Chhám lé! Sîn-sâng, ngióng-pân hó nè? Ke pú-thèu he lâu ngìn chia ke!”
[6] Sṳ̀n-ngìn Yî-li-sâ mun kì: “Pú-thèu tiet-lo̍k nai-vi?” Ke-ngìn chhiu chṳ́ pûn kì khon. Yî-li-sâ chám yit-kî su-é, te̍p-lo̍k súi-tú, pú-thèu chhiu phò hí-lòi.
[7] Yî-li-sâ kóng: “Nâ hí-lòi â!” Ke-ngìn chhiu chhûn-sú chiông pú-thèu nâ hí-lòi.
[8] Si-li-â-vòng lâu Yî-set-lie̍t-ngìn siông-chhṳ̀. Kì lâu kôn-yèn chhâm-siòng, sién mêu yit-ke thi-fông ôn-yàng.
[9] Sṳ̀n-ngìn Yî-li-sâ phai-ngìn hi lâu Yî-set-lie̍t-vòng kín-ko kóng: “Ngì oi se-ngi, m̀-hó tui ke-vi ko, yîn-vi Si-li-â-ngìn mài-fu̍k chhai ke-vi.”
[10] Só-yî Yî-set-lie̍t-vòng chhiu phai-ngìn to sṳ̀n-ngìn kín-ko kì-têu ke thi-fông hi, kâ-khiòng fòng-phi. Khiung-yong ke sṳ fat-sên hó tô-pái.
[11] Si-li-â-vòng vi liá-sṳ pot-at; kì chhiu seu-si̍p kôn-yèn, mun kì-têu: “Ngì-têu tông-chûng yû má-ngìn hiong Yî-set-lie̍t-vòng chéu-leu sêu-sit?”
[12] Khì-chûng yit-ke kóng: “Koet-vòng, m̀-he ngài-têu. He Yî-set-lie̍t ke siên-tî Yî-li-sâ kóng ke; kì chiông ngì chhai kiên-tú kóng ke fa chhiòn-phu lâu Yî-set-lie̍t-vòng kóng.”
[13] Vòng ha-lin kóng: “Hi-chhà kì chhai nai-vi; ngài oi phai-ngìn hi-chok kì!” Yû-ngìn lâu vòng kóng Yî-li-sâ chhai Tô-thân.
[14] Vòng chhiu phai thai kiûn-chhui, chan-mâ lâu chan-chhâ hi ke-vi; kì-têu pan-ya hi-to, ngiàm-sṳ̀ chhiu chiông ke-sàng pâu-vì hí-lòi.
[15] Thi-ngi ngit tá-chó, Yî-li-sâ ke phu̍k-ngìn hong-hí-lòi to vuk-ngoi hi, khon-tó Si-li-â-ngìn ke kiûn-chhui pin kì-têu ke chan-mâ lâu chan-chhâ chiông sàng vì-khun. Kì chhiu hêm: “Fái lé! Sîn-sâng, ngài-têu chhám lé. Oi ngióng-pân hó nè?”
[16] Yî-li-sâ kóng: “M̀-sṳ́ kiâng! Lâu ngài-têu khiung-ha ke pí lâu kì-têu khiung-ha ke hàn-kha tô.”
[17] Yèn-heu kì khì-tó kóng: “Song-chú â, khiù Ngì khôi kì ke muk-chû, sṳ́ kì khon tet-tó!” Song-chú thâng Yî-li-sâ ke khì-khiù. Yî-li-sâ ke phu̍k-ngìn chhiu khon-tó mân-sân yû fó-mâ lâu fó chan-chhâ vì-tén Yî-li-sâ.
[18] Si-li-â-ngìn tá ko-lòi ke sṳ̀, Yî-li-sâ khì-tó kóng: “Song-chú â, khiù Ngì sṳ́ ke-têu ngìn ke muk-chû khon m̀-tó!” Song-chú thâng Yî-li-sâ ke khì-tó, sṳ́ kì-têu muk-chû khon m̀-tó.
[19] Yèn-heu Yî-li-sâ to kì-têu ke-vi kóng: “Ngì-têu hàng m̀-chho̍k lu lé; liá m̀-he ngì-têu oi chhìm ke sàng. Thèn ngài lòi, ngài tai ngì-têu to ngì-têu oi chhìm ke ngìn ke-vi hi.” Yî-li-sâ chhiu chiông kì-têu tai-to Sat-mâ-li-â.
[20] Kì-têu yit ngi̍p-sàng, Yî-li-sâ chhiu khì-tó kóng: “Song-chú â, khiù Ngì khôi kì-têu ke muk-chû, sṳ́ kì-têu khon tet-tó.” Song-chú thâng Yî-li-sâ ke khì-khiù, khôi kì-têu ke muk-chû, kì-têu chhiu khon-tó chhṳ-kâ chhai Sat-mâ-li-â sàng-nui.
[21] Yî-set-lie̍t-vòng khon-tó Si-li-â-ngìn, chhiu mun Yî-li-sâ: “Â-pâ â, ngài cho-tet chiông kì-têu chhṳ̀-thet mò? Ngài cho-tet chiông kì-têu chhṳ̀-thet mò?”
[22] Yî-li-sâ kóng: “Cho-m̀-tet! Chhiu-he ngì chhai chan-chhòng song chok-tó ke pîn-é ya cho-m̀-tet chhṳ̀. Pûn kì-têu tûng-sî sṳ̍t, pûn kì-têu súi lîm; piong kì-têu chón kì-têu ke vòng ke-vi hi.”
[23] Só-yî, Yî-set-lie̍t-vòng vi kì-têu chún-phi tông phông-phai ke chok-si̍t, tén kì-têu sṳ̍t-páu lîm-chiuk, chhiu pûn kì-têu chón-to Si-li-â-vòng ke-vi. Tui liá yî-heu, Si-li-â ke kiûn-chhui mò-chai chhîm-fam Yî-set-lie̍t ke thú-thi.
[24] Kîn-ko yit-thon sṳ̀-kiên, Si-li-â-vòng Phien-Ha̍p-tha̍t seu-si̍p chhiòn-kiûn kûng-tá Yî-set-lie̍t, vì-khun Sat-mâ-li-â-sàng.
[25] Kiet-kó, sàng-nui liòng-sṳ̍t khiet-fa̍t, lièn lì-è ke thèu-nà ya yit-chak ta̍t pat-sṳ̍p chak ngiùn-pi, yâ-sâng ke chhûng-é lióng-pak kûng-khiet ta̍t ńg-chak ngiùn-pi.
[26] Yit-ngit, Yî-set-lie̍t-vòng tui sàng-chhiòng táng kîn-ko; yû yit-ke fu-ngìn-kâ hêm-kóng: “Koet-vòng â, chhiáng pông-chhu ngài!”
[27] Vòng kóng: “Na-he Song-chú m̀ pông-chhu ngì, ngài nèn pông-chhu ngì má-ke? Ngài kám hàn-yû ma̍k-é ya-he chiú he-mò?
[28] Ngì ke khun-nàn he má-ke?” Ke fu-ngìn-kâ en-kóng: “Liá fu-ngìn-kâ tui ngài kóng: ‘Kîm-pû-ngit siên chiông ngiâ lai-é nâ-lòi sṳ̍t, thiên-kông-ngit chang sṳ̍t ngâ lai-é.’
[29] Só-yî ngài-têu chiông ngâ lai-é chú-lòi sṳ̍t. Thi-ngi ngit, ngài tui kì kóng: ‘Lùn-to sṳ̍t ngiâ lai-é.’ Kì sa chiông kiâ lai-é khong hí-lòi!”
[30] Vòng thâng-tó liá-sṳ, chhiu chhá-lie̍t sâm; kì ki-siu̍k chhai sàng-chhiòng táng hàng-tén ko ke sṳ̀, ngìn-mìn khon-tó kì tî-poi chok ke he chhû mà-sâm.
[31] Vòng kóng: “Ngài kîm-pû-ngit m̀ chiông Sâ-fap ke lai-é Yî-li-sâ ke thèu-nà to̍k-thet, ngien Song-ti ngiàm-ngiàm chit-fa̍t ngài!”
[32] Vòng chhiu phai-ngìn hi-chok Yî-li-sâ. Liá-sṳ̀, Yî-li-sâ tú-hó lâu lòi-kien kì ke chóng-ló chhô khiung-ha. Vòng phai-lòi ke ngìn hàn-màng to yî-chhièn, Yî-li-sâ tui ke-têu chóng-ló kóng: “Ngì-têu khon, ke-chak hiûng-sú phai-ngìn oi lòi chám ngài ke thèu-nà lé! Kì to liá-vi ke sṳ̀, ngì-têu oi koân-mùn, m̀-hó pûn kì ngi̍p-lòi. Chhai kì heu-poi kám m̀-he yû vòng ke kiok-phu sâng mâ?”
[33] Yî-li-sâ fa hàn-màng kóng-so̍t, vòng chhiu to lé. Kì kóng: “Liá châi-fo he Song-chú kong-pûn ngài-têu ke; ngài cho-má-ke hàn-oi tén Song-chú ke pông-chhu nè?”