[1] Yok-sî-â pat-se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ sâm-sṳ̍p yit-ngièn. Kiâ-mê ôn-to Yâ-tí-thai, he Pô-sṳ̂-kâ-sàng Â-thai-ngâ ke moi-é.
[2] Yok-sî-â hàng Song-chú khon-cho chho̍k ke sṳ, hàng kiâ chú-siên Thai-ví-vòng ke lu, mò phiên-chó, mò phiên-yu.
[3] Yok-sî-â-vòng chhai-vi thi sṳ̍p-pat ngièn, kì phai Mí-sû-làn ke sûn-é, Â-sat-li-ngâ ke lai-é — vòng-sṳt sû-ki Sâ-fân to Song-chú ke sṳn-thien hi, fûn-fu kì kóng:
[4] “Ngì to thai-chi-sṳ̂ Hî-le̍t-kâ ke-vi hi, ham kì chiông sṳn-thien chóng-mùn ke tui ngìn-mìn sû-si̍p ke chhièn-ngiùn son-hó.
[5] Oi chiông ke-têu chhièn kâu-pûn cháng Song-chú sṳn-thien ke ke kí-ke kam-kûng; kì-têu hó fu kûng-chhièn pûn cháng sṳn-thien ke kûng-ngìn,
[6] chhiu-he muk-siong, kien-chuk kûng-ngìn, nài-súi sṳ̂-fu, hàn-oi mâi cháng sṳn-thien yung ke su-liau lâu sa̍k-chhòi.
[7] Yîn-vi ke kí-ke kam-kûng chhiòn-phu sṳ̀n-sṳ̍t khó-kho, só-yî m̀-sṳ́ lâu kì-têu son-sṳ.”
[8] Ke-sṳ̀, thai-chi-sṳ̂ Hî-le̍t-kâ lâu sû-ki Sâ-fân kóng: “Ngài chhai Song-chú ke sṳn-thien tú fat-hien Fap-li̍t-sû.” Hî-le̍t-kâ chiông sû kâu-pûn Sâ-fân, Sâ-fân chhiu thu̍k lé.
[9] Yèn-heu sû-ki Sâ-fân to vòng ke-vi po-ko kóng: “Ngì ke kôn-yèn yí-kîn chiông sṳn-thien sû-tó ke chhièn, kâu-pûn cháng sṳn-thien ke ke kí-ke kam-kûng.”
[10] Sû-ki Sâ-fân yu tui vòng kóng: “Chi-sṳ̂ Hî-le̍t-kâ nâ yit-kién sû pûn ngài.” Sâ-fân chhiu thu̍k pûn vòng thâng.
[11] Vòng thâng-tó Fap-li̍t-sû ke fa chhiu chhá-lan sâm,
[12] fûn-fu chi-sṳ̂ Hî-le̍t-kâ, Sâ-fân ke lai-é Â-hî-kâm, Mí-kâi-â ke lai-é Â-kiet-pô, vòng-sṳt sû-ki Sâ-fân, lâu vòng ke phu̍k-ngìn Â-sat-ngâ, kóng:
[13] “Ngì-têu hi vi ngài lâu chhiòn Yù-thai ngìn-mìn khiù-mun Song-chú, to-tái liá-kién sû ke kau-hiun he má-ke. Song-chú hiong ngài-têu thai fat-khién he yîn-vi ngài-têu ke chú-siên mò thâng-chhiùng liá-sû ke fa, mò cheu liá-sû só ki-chai ke hi-cho.”
[14] Hî-le̍t-kâ chi-sṳ̂, Â-hî-kâm, Â-kiet-pô, Sâ-fân, lâu Â-sat-ngâ hi khiù-mun yit-ke miàng-ham Fu-le̍t-thai ke ńg siên-tî. Ńg siên-tî he̍t chhai Yâ-lu-sat-lâng ke thi-ngi khî. (Kiâ ló-kûng Sâ-liùng he Thi̍t-ngá ke lai-é, Ha̍p-ngí-ha̍p-sṳ̂ ke sûn-é, tâm-ngim chú-kón sṳn-thien lî-fu̍k ke chṳt-vu.) Kì-têu hiong kì kóng-hí só fat-sên ke sṳ.
[15] Kì ham kì-têu chón-hi tui vòng kóng: “Song-chú — Yî-set-lie̍t ke Song-ti án-ngiòng kóng:
[16] ‘Ngài oi cheu Yù-thai-vòng só thâng-tó ke-pún sû só-siá ke yit-chhiet fa, kong châi-fo pûn Yâ-lu-sat-lâng lâu liá-vi só-yû ke ngìn-mìn.
[17] Kì-têu lì-khôi Ngài, hiong phe̍t ke sṳ̀n-mìn sêu-hiông, yung kì-têu ke sú só-chho ke ngiéu-siong ngiâ Ngài su-hi, só-yî Ngài oi hiong Yâ-lu-sat-lâng thai fat-khién mò so̍t.’
[18] Yû-koân Yù-thai-vòng pún-ngìn, ngì-têu oi án-ngiòng lâu kì kóng: ‘Song-chú — Yî-set-lie̍t ke Song-ti án-ngiòng kóng: Ngì yit thâng-tó ke-pún sû só-siá ke,
[19] chhiu chhai Ngài mien-chhièn khiâm-pî fí-kói. Ngì yit thâng-tó Ngài oi chit-fa̍t Yâ-lu-sat-lâng lâu kì ke ngìn-mìn, sṳ́ kì sàng-cho fông-liòng, su chu-chú ke thi-fông, ngì chhá-lan sâm, chhai Ngài mien-chhièn liù muk-chṳp fí-kói, Ngài chhiu thâng ngì ke khì-tó.
[20] Yîn-vi án-ngiòng, Ngài yit-thin voi sṳ́ ngì phìn-phìn ôn-ôn sṳ̍t-to ló, chong chhai ngì lie̍t-chú ke fùn-mu ke-vi; ngì hàn chhai sṳ-kiên ke sṳ̀, m̀-voi khon-tó Ngài kong châi-nan pûn liá thi-fông.’ ” Kì-têu chhiu chiông liá sêu-sit tai chón-hi lâu vòng kóng.