[1] Yok-sî-â-vòng phai-ngìn seu-si̍p Yù-thai lâu Yâ-lu-sat-lâng só-yû ke liâng-chhiu.
[2] Vòng lâu Yù-thai chung-ngìn, he̍t chhai Yâ-lu-sat-lâng ke ngìn, hàn-yû chi-sṳ̂, siên-tî, lâu só-yû ke ngìn-mìn, mò-lun phìn-fu, ya chhiòn-phu khiung-ha to Song-chú ke sṳn-thien hi. Vòng chhiu chiông ke chhai sṳn-thien tú fat-hien ke yok-sû chhiòn-phu thu̍k pûn kì-têu thâng.
[3] Vòng khî chhai thai-chhû sùn-thèu, hiong Song-chú li̍p-yok, oi thâng-chhiùng Song-chú, yit-sîm yit-yi chûn-sú Kì ke fap-li̍t kie-min, pin sṳ̍t-hàng yok-sû song só kûi-thin ke min-lin. Só-yû ke ngìn-mìn ya chhiòn-phu tap-yin chûn-sú liá-yok.
[4] Só-yî, Yok-sî-â-vòng fûn-fu thai-chi-sṳ̂ Hî-le̍t-kâ, kì ke chhu-lî chi-sṳ̂, hàn-yû chhai sṳn-thien mùn-héu chhṳ̍t-pân ke kín-ví, chiông Song-chú sṳn-thien tú só-yû yung lòi-pai Pâ-li̍t, Â-sa-lâ ńg-sṳ̀n lâu thiên-siong ke yung-phín chhiòn-phu pân chhut-hi. Vòng chhai Yâ-lu-sat-lâng sàng-ngoi Khi̍p-lùn hâi-sùn chiông liá-têu yung-phín chhiòn-phu sêu-thet, yèn-heu ham ngìn chiông fôi tai-to Pak-thi̍t-li.
[5] Yî-chhièn Yù-thai lie̍t-vòng só sat-li̍p pai ngiéu-siong ke chi-sṳ̂, kì-têu chhai Yù-thai lâu Yâ-lu-sat-lâng fu-khiun sàng-chṳ́n ke sṳ̀n-meu sêu-hiông, vòng liá-ha chiông kì-têu fi-thet; kì yu fi-thet só-yû hiong Pâ-li̍t, ngit-thèu, ngie̍t-kông, sên-chho, lâu thiên-song van-siong sêu-hiông ke chi-sṳ̂.
[6] Kì yu tui Song-chú sṳn-thien tú chiông Â-sa-lâ ńg-sṳ̀n siong pân-chéu, tai-to Yâ-lu-sat-lâng sàng-ngoi Khi̍p-lùn hâi-sùn sêu-thet, chhùi-to pien-fún, ve chhai kûng-khiung ke chhúng-pû.
[7] Kì chhak-thet sṳ̀n-meu ke nàm-chhông chhai Song-chú sṳn-thien pa-cham ke siuk-sa, chhiu-he ke-têu fu-ńg vi Â-sa-lâ chhiak pu-phùng ke thi-fông.
[8] Kì chiông Yù-thai tak-sàng ke chung chi-sṳ̂ tai-to Yâ-lu-sat-lâng lòi, pho-fái kì-têu sêu-ko hiông ke sṳ̀n-meu, tui Kâ-pâ to Phe̍t-sṳ-pâ. Kì yu chhak-thet sàng-mùn sùn hien-pûn sân-yòng-sṳ̀n ke sṳ̀n-meu; liá sṳ̀n-meu chhai sṳ-chóng Yok-sû-â ke mùn-chhièn, chhai ngi̍p-sàng thai-mùn ke chó-phién.
[9] Ke-têu sṳ̀n-meu ke chi-sṳ̂ cho-m̀-tet chhai Song-chú ke sṳn-thien sṳ-fung, chúng-he cho-tet sṳ̍t kiûng-kip khì-thâ chi-sṳ̂ ke vù-kau-piáng.
[10] Yok-sî-â-vòng yu pho-fái Hiûn-nun-chṳ́ sân-lak ke Thò-fî-thi̍t, put-chún ngìn-mìn chhai ke-vi chiông chhṳ-kâ ke chṳ́-ńg yung fó sêu lòi hien-pûn Mô-lo̍k-sṳ̀n.
[11] Kì ya sái-chéu yî-chhièn Yù-thai lie̍t-vòng pai ngit-thèu só-hien ke mâ-é, sêu-thet pai ngit-thèu yung ke chan-chhâ. (Liá-têu tûng-sî pún-lòi piong chhai Song-chú sṳn-thien thìn-yen tú ke thien-mùn sùn-thèu, lì Nâ-tân-Mí-le̍t thai-sṳ̀n ke vuk-hâ mò kí-yén).
[12] Yî-chhièn Yù-thai lie̍t-vòng chhai Â-ha̍p-sṳ̂ vòng-kiûng vuk-táng hí ke chi-thàn, lâu Mâ-nâ-sî-vòng chhai sṳn-thien lióng-yen chûng hí ke chi-thàn, ya chhiòn-phu pûn Yok-sî-â-vòng chhak chhiang-chhiang. Kì chiông chi-thàn khau-sui, fit chhai Khi̍p-lùn sân-lak tî-poi.
[13] Yok-sî-â pho-fái Só-lò-mùn-vòng hí chhai sân-kông táng ke sṳ̀n-meu, chhiu-he ke-têu chhai Yâ-lu-sat-lâng tûng-phién, Kám-lám-sân nàm-phién, vi-tó pai Sî-tun ńg-sṳ̀n Â-sṳ̂-thâ-liu̍k, Mô-ap-sṳ̀n Kî-mat, Â-mùn-sṳ̀n Mô-lo̍k liá-têu sià-ok ke ngiéu-siong só-hí ke sṳ̀n-meu.
[14] Yok-sî-â khau-sui sa̍k-chhû, chám-vang Â-sa-lâ ńg-sṳ̀n siong, chhai ngièn-lòi tun chhû-é ke thi-fông mân-phien piong sí-ngìn kut-thèu.
[15] Yok-sî-â ya chhak-thet chhai Pak-thi̍t-li ke chi-thàn, lâu hoi Yî-set-lie̍t-ngìn fam-chhui ke Nì-pat ke lai-é Yâ-lò-pô-ôn-vòng hí ke sṳ̀n-meu. Yok-sî-â chhak-thet sṳ̀n-meu, chiông kì sêu-thet, chhùi-to pien-fún, yu chiông Â-sa-lâ ńg-sṳ̀n siong sêu-thet.
[16] Yok-sî-â chón-sṳ̂n khon-tó sân-táng yû-têu fùn-mu, chhiu phai-ngìn tui fùn-mu tî-poi chiông kut-thèu yet chhut-lòi, piong chhai chi-thàn táng sêu-thet. Kì yung liá-chúng fông-fap siû-yu̍k chi-thàn, chhiu-chhiong yî-chhièn sṳ̀n-ngìn só yi-ngièn Song-chú ke fa, chhiu-he tông Yâ-lò-pô-ôn chhai chiet-khì chûng khî chhai chi-thàn sùn ke sṳ̀ kóng ke. Yok-sî-â yu khon-tó kóng liá yi-ngièn sṳ̀n-ngìn ke fùn-mu.
[17] Kì mun: “Ke he má-ngìn ke fùn-mu?” Pak-thi̍t-li-ngìn en-kóng: “He ke-vi tui Yù-thai lòi ke sṳ̀n-ngìn ke fùn-mu. Ngì thèu-siên chhai Pak-thi̍t-li chi-thàn táng só-cho ke, kì chó chhiu yi-ngièn lé.”
[18] Yok-sî-â min-lin kóng: “Pó-liù ke fùn-mu; m̀-hó sái kì ke kut-hài.” Só-yî, ke sṳ̀n-ngìn ke kut-hài mò pûn-ngìn sái thîn-thûng; ke tui Sat-mâ-li-â lòi ke siên-tî ke kut-hài ya mò pûn-ngìn sái thîn-thûng.
[19] Yok-sî-â chhai Sat-mâ-li-â tak-sàng chiông yî-chhièn Yî-set-lie̍t lie̍t-vòng hí ke, ngiâ Song-chú fat-khién ke sṳ̀n-meu chhiòn-phu chhak-thet. Chhiong kì chhai Pak-thi̍t-li só-cho ke, kì fi-thet só-yû ke sṳ̀n-meu.
[20] Kì chiông só-yû sṳ̀n-meu ke chi-sṳ̂ chhai chi-thàn táng chhṳ̀-thet, ya chhai chi-thàn táng-kô sêu sí-ngìn ke kut-thèu, heu-lòi chhiu chón Yâ-lu-sat-lâng hi.
[21] Yok-sî-â-vòng min-lin ngìn-mìn chûn-cheu yok-sû tî-poi ke ki-chai sú Phàn-ko-chiet, ki-ngiam Song-chú — kì-têu ke Song-ti.
[22] Chhṳ-chhiùng ke-têu sṳ-sṳ̂ chhṳ-lî Yî-set-lie̍t yî-lòi, pâu-hàm Yî-set-lie̍t lie̍t-vòng lâu Yù-thai lie̍t-vòng ke sṳ̀, m̀-sṳt án sṳn-thai sú Phàn-ko-chiet;
[23] chṳ́-yû Yok-sî-â-vòng chhai-vi ke thi sṳ̍p-pat ngièn, vòng lâu ngìn-mìn chhai Yâ-lu-sat-lâng khin-chuk Phàn-ko-chiet.
[24] Yok-sî-â chiông Yâ-lu-sat-lâng lâu Yù-thai thi-khî só-yû kâu-kúi ke, son-miang ke, só-yû vuk-hâ ke sṳ̀n-mìn, ngiéu-siong, lâu yit-chhiet pai sià-sṳ̀n ke tûng-sî chhiòn-phu chhù-thet, lòi sṳ̍t-hàng thai-chi-sṳ̂ Hî-le̍t-kâ chhai Song-chú sṳn-thien tú só fat-hien ke-pún Fap-li̍t-sû só-siá ke fa.
[25] Chhai Yok-sî-â yî-chhièn, mò yit-ke vòng chhiong kì án-ngiòng chhiòn-sîm, chhiòn-yi, chhiòn-li̍t kûi-hiong Song-chú, chûn-hàng Mô-sî só pân-pu ke fap-li̍t; chhai kì yî-heu, ya mò yit-ke vòng chhiong kì án-ngiòng.
[26] Chúng-he, Song-chú yîn-vi Mâ-nâ-sî-vòng só-cho ke sṳ hiong Yù-thai thai fat-khién, to liá-ha hàn-màng ko.
[27] Song-chú kóng: “Ngài oi tui-fu Yù-thai chhiong Ngài tui-fu Yî-set-lie̍t khiung-yong. Ngài oi tui Ngài mien-chhièn kiuk-chhut Yù-thai ngìn-mìn; Ngài oi vok-thet Ngài só-sién ke sàng — Yâ-lu-sat-lâng lâu Ngài kóng-ko oi cho kin-pai Ngài ke sṳn-thien.”
[28] Yok-sî-â khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[29] Kì chhai-vi ke sṳ̀, Âi-khi̍p-vòng Nì-kô tai-liâng kiûn-chhui to Yu-fat-lâ-tí-hò pông-chhu Â-sut fòng-ti. Yok-sî-â-vòng chhiu hi Mí-kit-tô tí-khong Âi-khi̍p-vòng, sa sí chhai kì ke sú-chûng.
[30] Kì ke phu-ha chiông kì ke sṳ̂-thí piong chhai chan-chhâ tú, yun-chón Yâ-lu-sat-lâng, chong chhai vòng-sṳt ke fùn-mu tú. Yù-thai ngìn-mìn sién Yok-sî-â ke lai-é Yok-ha̍p-sṳ̂, kò-yù sat-li̍p kì, sṳ̀n-chiap kiâ-pâ cho vòng.
[31] Yok-ha̍p-sṳ̂ ngi-sṳ̍p sâm-se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ sâm-ke ngie̍t. Kiâ-mê ôn-to Ha̍p-mu-thâ, he Li̍p-nâ-sàng Ya̍p-li-mí ke moi-é.
[32] Yok-ha̍p-sṳ̂ ho̍k kiâ chú-siên ke fái mù-yong, hàng Song-chú khon-cho sià-ok ke sṳ.
[33] Âi-khi̍p-vòng Nì-kô chiông Yok-ha̍p-sṳ̂ chok-hi koân chhai Ha̍p-mâ-thi ke Li-pí-lâ, m̀-pûn kì chhṳ-lî Yâ-lu-sat-lâng, yu fa̍t Yù-thai-koet phòi-sóng sâm-chhiên si-pak kûng-kîn ngiùn-è lâu sâm-sṳ̍p si kûng-kîn kîm-é.
[34] Nì-kô-vòng li̍p Yok-sî-â ke lai-é Yî-li-â-kin chiap Yok-sî-â cho Yù-thai-vòng, chiông kì ke miàng kói-cho Yok-ngâ-kin. Nì-kô-vòng chiông Yok-ha̍p-sṳ̂ tai-to Âi-khi̍p; Yok-ha̍p-sṳ̂ sí chhai ke-vi.
[35] Vi-tó oi kiéu-na̍p Âi-khi̍p-vòng yêu-khiù ke phòi-sóng, Yok-ngâ-kin-vòng chhiu cheu ngìn-mìn ke kîn-chi khiòng-sû soi-kîm.
[36] Yok-ngâ-kin ngi-sṳ̍p ńg-se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ sṳ̍p-yit ngièn. Kiâ-mê ôn-to Sî-pu-thai, he Lû-mâ-sàng Pí-thai-ngâ ke moi-é.
[37] Yok-ngâ-kin ho̍k kiâ chú-siên ke fái mù-yong, hàng Song-chú khon-cho sià-ok ke sṳ.