[1] Yî-set-lie̍t lâu Si-li-â lióng-ngièn làng mò chan-chên,
[2] chúng-he chhai thi-sâm ngièn chûng, Yù-thai-vòng Yok-sâ-fap hi kien Yî-set-lie̍t-vòng Â-ha̍p.
[3] Yî-set-lie̍t-vòng tui kì ke kôn-yèn kóng: “Ngài-têu cho-má-ke m̀ chhut-sú tui Si-li-â-vòng ke-vi chiông Kî-lie̍t ke Lâ-ma̍t chhióng chón-lòi nè? Ke pún-lòi he ngài-têu ke â!”
[4] Â-ha̍p mun Yok-sâ-fap: “Ngì hén lâu ngài khiung-ha hi kûng-tá Kî-lie̍t ke Lâ-ma̍t mò?” Yok-sâ-fap tui Yî-set-lie̍t-vòng kóng: “Ngì ke sṳ chhiu-he ngài ke sṳ! Ngài ke phu-ha chhiu-he ngì ke phu-ha, ngài ke chan-mâ ya he ngì ke chan-mâ.”
[5] Yok-sâ-fap yu kóng: “Chúng-he, ngì oi siên khiù-mun Song-chú!”
[6] Só-yî, Yî-set-lie̍t-vòng seu-si̍p thai-yok si-pak miàng siên-tî lòi, mun kì-têu: “Ngài cho-tet hi kûng-tá Kî-lie̍t ke Lâ-ma̍t mò?” Kì-têu kóng: “Cho-ngì hi! Chú voi sṳ́ vòng tet-sṳn.”
[7] Chúng-he Yok-sâ-fap kóng: “Liá-vi kám m̀-he hàn-yû Song-chú ke siên-tî? Ngài-têu cho-tet chhiáng kì khiù-mun Song-chú.”
[8] Yî-set-lie̍t-vòng tui Yok-sâ-fap kóng: “Hàn-yû yit-ke, he Yîm-lâ ke lai-é Mí-kâi-ngâ, ngài-têu cho-tet thûng-ko kì khiù-mun Song-chú. M̀-ko ngài tông nâu kì, yîn-vi kì chhiùng-lòi m̀-sṳt tui ngài yi-ngièn kóng yit-ki hó-fa, chúng-he yi-ngièn kóng châi-fo ke fa.” Yok-sâ-fap kóng: “Vòng m̀-hó án-ngiòng kóng!”
[9] Só-yî, Yî-set-lie̍t-vòng ham yit-ke kiûng-thìn kôn-yèn lòi, min-lin kì ngiàm-sṳ̀ hi chiông Yîm-lâ ke lai-é Mí-kâi-ngâ chhìm-lòi.
[10] Yî-set-lie̍t-vòng Â-ha̍p lâu Yù-thai-vòng Yok-sâ-fap chok-tén vòng-phàu, chhai Sat-mâ-li-â sàng-mùn ngoi tá-ma̍k-chhòng ke-vi, chhô chhai chhṳ-kâ ke pó-chho táng; só-yû ke siên-tî chhai kì-têu mien-chhièn su-kám ngi̍p-sṳ̀n kóng yi-ngièn.
[11] Khì-chûng yû yit-ke siên-tî he Kî-nâ-nâ ke lai-é Sî-tí-kâ; kì tá-têu thiet-kok, tui Â-ha̍p kóng: “Song-chú án-ngiòng kóng: ‘Ngì oi yung liá-têu thiet-kok tá Si-li-â-ngìn, chha̍t-tái sêu-me̍t kì-têu.’ ”
[12] Khì-thâ ke siên-tî ya chhiòn-phu án-ngiòng yi-ngièn kóng: “Cho ngì hi kûng-tá Kî-lie̍t ke Lâ-ma̍t, ngì yit-thin voi yàng; Song-chú voi chiông ke-sàng kâu chhai vòng ke sú-chûng.”
[13] Liá-sṳ̀, ke hi-ham Mí-kâi-ngâ lòi ke kôn-yèn tui Mí-kâi-ngâ kóng: “Só-yû ke siên-tî chhiòn-phu kóng vòng voi sṳ̀n-kûng, ngì chui-hó ya án-ngiòng kóng.”
[14] Chúng-he Mí-kâi-ngâ kóng: “Ngài chṳ́-tén yún-sên ke Song-chú fat-sṳ, Song-chú tui ngài kóng má-ke, ngài chhiu kóng má-ke.”
[15] Mí-kâi-ngâ to Â-ha̍p-vòng mien-chhièn ke sṳ̀, vòng mun kì: “Mí-kâi-ngâ, ngài-têu cho-tet hi kûng-tá Kî-lie̍t ke Lâ-ma̍t mò?” Mí-kâi-ngâ en-kóng: “Cho ngì hi tá â! Ngì yit-thin voi tá-yàng; Song-chú voi chiông ke-sàng kâu chhai vòng ke sú-chûng!”
[16] Chúng-he vòng tui kì kóng: “Ngì oi fung Song-chú ke miàng cheu-sṳ̍t tui ngài kóng! Liá-ki fa ngài oi lâu ngì kóng kí-tô pái nè?”
[17] Mí-kâi-ngâ kóng: “Ngài khon-tó Yî-set-lie̍t ke kiûn-chhui san chhai sân-kông táng, chhiu-chhiong mò mu̍k-ngìn ke yòng-khiùn. Song-chú kóng: ‘Liá-têu ngìn mò liâng-chhiu, ham kì-têu phìn-phìn ôn-ôn chón vuk-hâ hi!’ ”
[18] Yî-set-lie̍t-vòng tui Yok-sâ-fap kóng: “Ngài kám m̀-he kóng-ko, kì chhiùng-lòi m̀-sṳt tui ngài yi-ngièn kóng yit-ki hó-fa? Chúng-he yi-ngièn kóng châi-fo ke fa!”
[19] Mí-kâi-ngâ ki-siu̍k kóng: “Hó! Ngì oi thâng Song-chú ke fa! Ngài khon-tó Song-chú chhô chhai thiên-thìn ke pó-chho, só-yû ke thiên-sṳ́ khî chhai Kì ke sùn-thèu.
[20] Song-chú mun: ‘Má-ngìn hi phien Â-ha̍p, pûn kì to Kî-lie̍t ke Lâ-ma̍t hi sung-sí nè?’ Ke-têu thiên-sṳ́ yit-sà kóng yit-yong.
[21] Heu-lòi, yû yit-ke lìn to Song-chú thèu-chhièn lòi kóng: ‘Ngài hi phien kì.’ Song-chú mun: ‘Ngì oi ngióng-pân phien nè?’
[22] Ke-lìn kóng: ‘Ngài voi sṳ́ Â-ha̍p só-yû ke siên-tî kóng fâ-liâu.’ Song-chú kóng: ‘Hó! Ngì hi phien kì! Ngì yit-thin voi sṳ̀n-kûng.’ ”
[23] Chui-heu Mí-kâi-ngâ kóng: “Liá chhiu-he sṳ-chhìn ke kîn-ko. Song-chú sṳ́ ngì ke siên-tî tui ngì kóng fâ-liâu. Song-chú yí-kîn min-thin ngì tù-tó châi-fo!”
[24] Kî-nâ-nâ ke lai-é Sî-tí-kâ siên-tî hàng-to Mí-kâi-ngâ mien-chhièn, tá kì ke choi-kok, chit-mun kì: “Song-chú ke Lìn má-ke sṳ̀-chiet lì-khôi ngài, lâu ngì kóng-fa nè?”
[25] Mí-kâi-ngâ en-kóng: “Tén-to ngì chéu-hi chui tî-poi ke se fòng-kiên khong hí-lòi, ke-ngit ngì chhiu voi tî lé.”
[26] Yèn-heu, Yî-set-lie̍t-vòng min-lin yit-ke kôn-yèn: “Chiông Mí-kâi-ngâ chok hí-lòi, sung-to sṳ-chóng Â-mùn lâu vòng-chṳ́ Yok-â-sṳ̂ ke-vi,
[27] fûn-fu kì-têu chiông Mí-kâi-ngâ koân chhai kâm-ngiu̍k tú, tak-ngit tân-chhiang pûn kì vì-chhṳ̀ sâng-miang ke piáng lâu súi, tén-to ngài phìn-ôn chón-lòi.”
[28] Mí-kâi-ngâ kóng: “Na-he ngì hàn phìn-ôn chón-lòi, liá chhiu chṳn-mìn Song-chú mò thûng-ko ngài kóng-fa!” Kì yu kóng: “Kok-vi, oi ki-tet ngài thèu-ha só-kóng ke fa!”
[29] Yî-set-lie̍t-vòng Â-ha̍p lâu Yù-thai-vòng Yok-sâ-fap hi Kî-lie̍t kûng-tá Lâ-ma̍t-sàng.
[30] Yî-set-lie̍t-vòng tui Yok-sâ-fap kóng: “Ngài-têu sông chan-chhòng ke sṳ̀, ngài lòi kói-chông, ngì hàn-he chok-tén vòng-phàu.” Só-yî Yî-set-lie̍t-vòng kói-chông hi siông-chhṳ̀.
[31] Si-li-â-vòng min-lin sâm-sṳ̍p ngi-ke chan-chhâ chṳ́-fî-kôn, oi chôn-mùn tá Yî-set-lie̍t-vòng yit-sà.
[32] Só-yî tông kì-têu khon-tó Yok-sâ-fap ke sṳ̀, láu-tó kì chhiu-he Yî-set-lie̍t-vòng, chhiu chhiòn-phu hi kûng-tá kì. Yok-sâ-fap thai-sâng hêm,
[33] kì-têu ngin-chhut kì m̀-he Yî-set-lie̍t-vòng, chhiu mò ki-siu̍k hi kiuk kì.
[34] Chúng-he, yû yit-ke Si-li-â sṳ-pîn sùi-phien sa yit-chien, tú-hó sa-tó Yî-set-lie̍t-vòng Â-ha̍p chan-kap ke chiap-phung. Â-ha̍p tui sṳ́-chhâ ke hêm-kóng: “Ngài chho̍k chhûng-sông lé, to-chón hi, thui-chhut chan-chhòng!”
[35] Ke-sṳ̀, chan-chên ye̍t-lòi ye̍t li-hoi, yû-ngìn fù-tén Â-ha̍p-vòng khî chhai chan-chhâ tú, mien-tui Si-li-â-ngìn, hiet tui sông-héu liù-chhut, liù-to mân-chhâ. Lìm-am-é ke sṳ̀, kì chhiu sí-thet.
[36] Ngit-thèu lo̍k-sân ke sṳ̀, yû yit-ke min-lin chhòn-phien Yî-set-lie̍t kiûn-yàng: “Chhiòn-phu chón chhṳ-kâ ke vuk-hâ, chón chhṳ-kâ ke ku-hiông!”
[37] Â-ha̍p-vòng chhiu án-ngiòng sí-thet. Yû-ngìn chiông kì ke sṳ̂-thí pân-to Sat-mâ-li-â, chong chhai ke-vi;
[38] kì-têu chhai Sat-mâ-li-â ke pî-thòng, kî-ńg sé-sṳ̂n ke só-chhai, chiông kì ke chan-chhâ sé-chhiang. Chhiu-chhiong Song-chú sṳt kóng-ko ke, kiéu-è lòi-sê kì ke hiet.
[39] Â-ha̍p khì-thâ ke sṳ, pâu-hàm kì chho siong-ngà vòng-kiûng lâu hí chhin-tô sàng-sṳ ke kîn-ko, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[40] Â-ha̍p sí-heu, kiâ lai-é Â-ha̍p-chhia sṳ̀n-chiap kì cho vòng.
[41] Yî-set-lie̍t-vòng Â-ha̍p chhai-vi ke thi-si ngièn, Â-sat ke lai-é Yok-sâ-fap cho Yù-thai-vòng.
[42] Yok-sâ-fap cho vòng ke sṳ̀ sâm-sṳ̍p ńg-se. Kì chhai Yâ-lu-sat-lâng thúng-chhṳ ngi-sṳ̍p ńg-ngièn. Kiâ-mê he Sṳ-li-hî ke moi-é Â-sû-pâ.
[43] Yok-sâ-fap chhiong kiâ-pâ Â-sat khiung-yong, hàng chṳn-chhṳ̍t ke sṳ, hàng Song-chú khon-cho chho̍k ke sṳ. Chúng-he, kì mò fi-thet sân-kông táng ke sṳ̀n-meu; ngìn-mìn hàn-he chhai ke-vi hien-chi sêu-hiông.
[44] Yok-sâ-fap ya lâu Yî-set-lie̍t-vòng fò-phìn siông-chhu.
[45] Yok-sâ-fap khì-thâ ke sṳ, kì ke yúng-kám lâu kì ngióng-pân chok-chan, chhiòn-phu ki chhai Yù-thai Lie̍t-vòng Sṳ́ tî-poi.
[46] Kì chhù-thet kiâ-pâ Â-sat sṳ̀-thoi liù hâ-lòi só-yû chhai sṳ̀n-meu fa̍t-thung ke nàm-chhông.
[47] Ke-sṳ̀ Yî-tûng thi-fông mò vòng, Yù-thai-vòng chṳ́-phai yit-ke chúng-tuk chhai ke-vi chhṳ-lî.
[48] Yok-sâ-fap cho yit-chhui ke thai-sòn, oi hi Ngò-fî chai kîm-é; chúng-he mò hi, yîn-vi sòn chhai Yî-sùn-Kâ-phe̍t chhiòn-phu fái-thet.
[49] Heu-lòi Â-ha̍p ke lai-é Â-ha̍p-chhia thì-ngi, pûn kì ke phu̍k-ngìn lâu Yok-sâ-fap ke phu̍k-ngìn khiung-ha chhô-sòn hi; chúng-he Yok-sâ-fap m̀-hén.
[50] Yok-sâ-fap sí-heu, chong chhai Thai-ví-sàng ke vòng-sṳt fùn-mu tú. Kiâ lai-é Yok-hò-làn sṳ̀n-chiap kì cho vòng.
[51] Yù-thai-vòng Yok-sâ-fap chhai-vi ke thi sṳ̍p-chhit ngièn, Â-ha̍p ke lai-é Â-ha̍p-chhia cho Yî-set-lie̍t-vòng. Kì chhai Sat-mâ-li-â thúng-chhṳ lióng-ngièn.
[52] Kì hàng Song-chú khon-cho sià-ok ke sṳ, ho̍k kiâ-pâ Â-ha̍p, kiâ-mê Yâ-sé-pit, lâu Nì-pat ke lai-é Yâ-lò-pô-ôn ke fái mù-yong, hoi Yî-set-lie̍t-ngìn ham chhai chhui-chûng.
[53] Kì chhiong kiâ-pâ khiung-yong, fu̍k-sṳ, kin-pai Pâ-li̍t, ngiâ Song-chú — Yî-set-lie̍t ke Song-ti fat-khién.