[1] Yî-set-lie̍t-vòng Yâ-lò-pô-ôn ngi-sṳ chhai-vi thi ngi-sṳ̍p chhit-ngièn, Â-mâ-chhia ke lai-é Vû-sî-ngâ cho Yù-thai-vòng.
[2] Ke-sṳ̀ Vû-sî-ngâ sṳ̍p-liuk se; kì chhai Yâ-lu-sat-lâng thúng-chhṳ ńg-sṳ̍p ngi-ngièn. Kiâ-mê ôn-to Yâ-khó-li-ngâ, he Yâ-lu-sat-lâng-ngìn.
[3] Vû-sî-ngâ ho̍k kiâ-pâ Â-mâ-chhia ke mù-yong, hàng Song-chú khon-cho chho̍k ke sṳ;
[4] chúng-he kì mò chhù-thet sân-kông táng ke sṳ̀n-meu, ngìn-mìn hàn-he chhai ke-vi hien-chi sêu-hiông.
[5] Song-chú kong châi-nan pûn Vû-sî-ngâ-vòng, sṳ́ kì pot thái-kô, chhṳ̍t-to kì ko-sṳ̂n. Kì chhiu he̍t chhai kak-lì ke vòng-kiûng tú, kiâ lai-é Yok-thán chóng-kón koet-kâ, chhṳ-lî ngìn-mìn.
[6] Vû-sî-ngâ khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[7] Vû-sî-ngâ sí-thet, chong chhai Thai-ví-sàng ke vòng-sṳt fùn-mu tú; kì ke lai-é Yok-thán sṳ̀n-chiap kì cho vòng.
[8] Yù-thai-vòng Vû-sî-ngâ chhai-vi thi sâm-sṳ̍p pat-ngièn, Yâ-lò-pô-ôn ngi-sṳ ke lai-é Sat-kâ-li-ngâ cho Yî-set-lie̍t-vòng; kì chhai Sat-mâ-li-â thúng-chhṳ liuk-ke ngie̍t.
[9] Kì lâu kiâ chú-siên khiung-yong hàng Song-chú khon-cho sià-ok ke sṳ, ho̍k Nì-pat ke lai-é Yâ-lò-pô-ôn-vòng ke fái mù-yong, hoi Yî-set-lie̍t-ngìn fam-chhui.
[10] Ngâ-pí ke lai-é Sâ-liùng chho-fán, chhai Yî-pak-lièn chiông Sat-kâ-li-ngâ chhṳ̀-sí, chhióng kì ke vòng-vi.
[11] Sat-kâ-li-ngâ khì-thâ ke sṳ chhiòn-phu ki chhai Yî-set-lie̍t Lie̍t-vòng Sṳ́ tî-poi.
[12] Song-chú sṳt hiong Yâ-fu-vòng kóng: “Ngì ke heu-thoi yit-thin voi sṳ̀n-chiap ngì cho Yî-set-lie̍t ke vòng, to thi-si thoi.” Án-ngiòng, liá yin-hí yí-kîn sṳ̍t-hien lé.
[13] Yù-thai-vòng Vû-sî-ngâ chhai-vi thi sâm-sṳ̍p kiú-ngièn, Ngâ-pí ke lai-é Sâ-liùng cho Yî-set-lie̍t-vòng; kì chhai Sat-mâ-li-â thúng-chhṳ yit-ke ngie̍t.
[14] Kâ-tí ke lai-é Mí-nâ-hien tui Tet-sat hi Sat-mâ-li-â, chiông Sâ-liùng chhṳ̀-sí, chhióng kì ke vòng-vi.
[15] Sâ-liùng khì-thâ ke sṳ, pâu-hàm kì chho-fán ke ku-sṳ, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[16] Mí-nâ-hien tui Tet-sat lòi ke sṳ̀, kûng-tá Thì-fî-sat lâu si chû-vì ke thi-khî, chhṳ̀-thet chhiòn-sàng ke ngìn-mìn, yîn-vi kì-têu mò khôi sàng-mùn thèu-hòng. Kì ya chiông chhiòn-phu yû sṳ̂n-hong fu-ngìn-kâ ke tú-sṳ́ pho khôi-lòi.
[17] Yù-thai-vòng Vû-sî-ngâ chhai-vi thi sâm-sṳ̍p kiú-ngièn, Kâ-tí ke lai-é Mí-nâ-hien cho Yî-set-lie̍t-vòng; kì chhai Sat-mâ-li-â thúng-chhṳ sṳ̍p-ngièn.
[18] Kì hàng Song-chú khon-cho sià-ok ke sṳ, ho̍k Nì-pat ke lai-é Yâ-lò-pô-ôn-vòng ke fái mù-yong, yit-sên-ngìn hoi Yî-set-lie̍t-ngìn fam-chhui.
[19] Â-sut fòng-ti Thì-kiet-lâ-Pí-lie̍t-set chhîm-lio̍k Yî-set-lie̍t; Mí-nâ-hien chhiu pûn kì sâm-pak van chak ngiùn-pi, yîn-vi oi tet-tó kì ke chṳ̂-chhṳ̀, lòi kiên-ku chhṳ-kâ ke vòng-vi.
[20] Mí-nâ-hien liá-têu chhièn he tui Yî-set-lie̍t ke yû-chhièn ngìn ke-vi khiòng thó-lòi ke; kì khiòng-pet tak-sà nâ-chhut ńg-sṳ̍p chak ngiùn-pi. Â-sut fòng-ti tet-tó liá-têu chhièn yî-heu, chhiu chón chhṳ-kâ koet-kâ hi lé.
[21] Mí-nâ-hien khì-thâ ke sṳ chhiòn-phu ki chhai Yî-set-lie̍t Lie̍t-vòng Sṳ́ tî-poi.
[22] Mí-nâ-hien sí-thet; kì ke lai-é Pí-kâ-hot sṳ̀n-chiap kì cho vòng.
[23] Yù-thai-vòng Vû-sî-ngâ chhai-vi thi ńg-sṳ̍p ngièn, Mí-nâ-hien ke lai-é Pí-kâ-hot cho Yî-set-lie̍t-vòng; kì chhai Sat-mâ-li-â thúng-chhṳ lióng-ngièn.
[24] Kì hàng Song-chú khon-cho sià-ok ke sṳ, ho̍k Nì-pat ke lai-é Yâ-lò-pô-ôn-vòng ke fái mù-yong, hoi Yî-set-lie̍t-ngìn fam-chhui.
[25] Pí-kâ-hot ke yit-ke chiông-kiûn, Li-mâ-li ke lai-é Pí-kâ, tai-tén Â-ngí-kô-pak, Â-li-yâ, lâu tui Kî-lie̍t lòi ke ńg-sṳ̍p sà chho-fán, chhai Sat-mâ-li-â vòng-kiûng nui-yen chhṳ̀-sí Pí-kâ-hot, chhióng kì ke vòng-vi.
[26] Pí-kâ-hot khì-thâ ke sṳ chhiòn-phu ki chhai Yî-set-lie̍t Lie̍t-vòng Sṳ́ tî-poi.
[27] Yù-thai-vòng Vû-sî-ngâ chhai-vi thi ńg-sṳ̍p ngi-ngièn, Li-mâ-li ke lai-é Pí-kâ cho Yî-set-lie̍t-vòng; kì chhai Sat-mâ-li-â thúng-chhṳ ngi-sṳ̍p ngièn.
[28] Kì hàng Song-chú khon-cho sià-ok ke sṳ, ho̍k Nì-pat ke lai-é Yâ-lò-pô-ôn-vòng ke fái mù-yong, hoi Yî-set-lie̍t-ngìn fam-chhui.
[29] Pí-kâ cho Yî-set-lie̍t-vòng ke khì-kiên, Â-sut fòng-ti Thì-kiet-lâ-Pí-lie̍t-set lòi cham-liâng Yî-yùn, Â-pak-Pak-Mâ-kâ, Â-nò, Kî-tâi-sṳ̂ lâu Ha-só liá-têu sàng, hàn-yû Kî-lie̍t, Kâ-li-li lâu Nâ-fut-thâ-li liá-têu thi-khî, yu chiông ngìn-mìn chok-to Â-sut hi.
[30] Yù-thai-vòng Vû-sî-ngâ ke lai-é Yok-thán chhai-vi ke thi ngi-sṳ̍p ngièn, Yî-lâ ke lai-é Hò-se-â fán Li-mâ-li ke lai-é Pí-kâ, chhṳ̀-sí kì, chhióng kì ke vòng-vi.
[31] Pí-kâ khì-thâ ke sṳ chhiòn-phu ki chhai Yî-set-lie̍t Lie̍t-vòng Sṳ́ tî-poi.
[32] Li-mâ-li ke lai-é Pí-kâ cho Yî-set-lie̍t-vòng thi-ngi ngièn, Vû-sî-ngâ ke lai-é Yok-thán cho Yù-thai-vòng.
[33] Ke-sṳ̀ Yok-thán ngi-sṳ̍p ńg-se; kì chhai Yâ-lu-sat-lâng thúng-chhṳ sṳ̍p-liuk ngièn. Kiâ-mê ôn-to Yâ-lu-sâ, he Sat-tuk ke moi-é.
[34] Yok-thán ho̍k kiâ-pâ Vû-sî-ngâ ke mù-yong, hàng Song-chú khon-cho chho̍k ke sṳ.
[35] Chúng-he kì mò chhù-thet sân-kông táng ke sṳ̀n-meu, ngìn-mìn hàn-he chhai ke-vi hien-chi sêu-hiông. Yok-thán yu hí Song-chú ke sṳn-thien pet-phién ke mùn.
[36] Yok-thán khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[37] Kì cho vòng ke khì-kiên, Song-chú phai Si-li-â-vòng Li-sun lâu Yî-set-lie̍t-vòng Pí-kâ kûng-tá Yù-thai.
[38] Yok-thán sí-thet, chong chhai kiâ chú-siên Thai-ví-sàng ke vòng-sṳt fùn-mu tú; kì ke lai-é Â-ha̍p-sṳ̂ sṳ̀n-chiap kì cho vòng.