[1] Ke-sṳ̀, Hî-sî-kâ-vòng phiang-to voi-sí. Â-mô-sṳ̂ ke lai-é siên-tî Yî-soi-â hi kien vòng, tui kì kóng: “Song-chú án-ngiòng kóng: ‘Ngì oi liù vùi-ngièn, kâu-tai heu-sṳ, yîn-vi ngì ke phiang m̀-voi hó, yit-thin voi sí.’ ”
[2] Hî-sî-kâ fân-sṳ̂n mien-hiong piak, khì-tó kóng:
[3] “Song-chú â, khiù Ngì ki-ngiam ngài sṳt sṳ̀n-sîm sṳ̀n-yi sṳ-fung Ngì, cho Ngì khon-cho chho̍k ke sṳ.” Hî-sî-kâ ngiûn-m̀-he̍t chhiu khôi-sâng thai-kieu.
[4] Yî-soi-â chhut-lòi, hàn-màng hàng-ko vòng-kiûng tûng-ông ke thìn-yen, Song-chú lâu kì kóng:
[5] “Ngì chón-to Ngâ chṳ́-mìn ke liâng-chhiu Hî-sî-kâ ke-vi, tui kì kóng: ‘Song-chú — ngiâ chú-siên Thai-ví ke Song-ti án-ngiòng kóng: Ngài yí-kîn thâng-tó ngì ke khì-tó, ya khon-tó ngì ke muk-chṳp. Ngài oi yî-hó ngì; to thi-sâm ngit, ngì chhiu voi sông sṳn-thien hi.
[6] Ngài oi pûn ngì sṳ̍t-kâ sṳ̍p-ńg ngièn. Ngài ya oi chṳ́n-kiu ngì lâu Yâ-lu-sat-lâng thot-lì Â-sut fòng-ti ke sú; vi-tó Ngài chhṳ-kâ ke yèn-ku, ya vi-tó Ngâ phu̍k-ngìn Thai-ví ke yèn-ku, Ngài oi chhîn-chhṳ pó-fu liá-sàng.’ ”
[7] Yî-soi-â tui vòng ke phu̍k-ngìn kóng: “Nâ yit-te vù-fâ-kó kâu-yo̍k lòi! Tap chhai lia̍p-é táng, vòng chhiu voi hó.”
[8] Hî-sî-kâ mun Yî-soi-â kóng: “Yû má-ke seu-thèu chṳn-mìn Song-chú oi yî-chhṳ ngài, to thi-sâm ngit ngài chhiu voi sông sṳn-thien hi nè?”
[9] Yî-soi-â en-kóng: “Liá he Song-chú pûn ngì ke seu-thèu, lòi chṳn-mìn Kì yit-thin voi sṳ̀n-chhiu Kì só-kóng ke: Ngì oi ngit-thèu yáng hiong-chhièn sṳ̍p-phu, ya-he to-thui sṳ̍p-phu nè?”
[10] Hî-sî-kâ kóng: “Ngit-thèu yáng hiong-chhièn sṳ̍p-phu yùng-yi, ngài oi kì to-thui sṳ̍p-phu!”
[11] Siên-tî Yî-soi-â hiong Song-chú khì-tó, Song-chú chhiu sṳ́ Â-ha̍p-sṳ̂-vòng ngit-kûi ke ngit-thèu yáng to-thui sṳ̍p-phu.
[12] Liá-sṳ̀, Pâ-lâ-tan ke lai-é Pâ-pí-lùn-vòng Mí-lò-tha̍t-Pâ-lâ-tan thâng-tó Hî-sî-kâ-vòng pot-phiang, thi̍t-phe̍t sung-lòi mun-ôn sin lâu lî-vu̍t.
[13] Hî-sî-kâ fôn-ngiàng sṳ́-chá, yu hiong kì-têu tién kì só-yû ke chhòi-fu — kîm, ngiùn, hiông-liau, hiông-súi, lâu vú-hi chhông-khu; kì chiông chhiòn-koet tak só-chhai ke pó-khu lâu kì vòng-kiûng tú só-yû ke chhiòn-phu pûn kì-têu khon.
[14] Sṳ-heu, siên-tî Yî-soi-â hi kien Hî-sî-kâ-vòng, mun kì: “Liá-têu ngìn tui nai-vi lòi? Kì-têu lâu ngì kóng má-ke?” Hî-sî-kâ en-kóng: “Kì-têu he tui yit-ke tông-yén ke koet-kâ Pâ-pí-lùn lòi ke.”
[15] Yî-soi-â mun: “Kì-têu chhai vòng-kiûng tú khon-tó má-ke?” Hî-sî-kâ en-kóng: “Ngài só-yû ke, kì-têu chhiòn-phu khon-tó; ngài chiông pó-khu ke kok-yong tûng-sî chhiòn-phu pûn kì-têu khon.”
[16] Só-yî, Yî-soi-â tui Hî-sî-kâ kóng: “Ngì oi thâng Song-chú ke fa:
[17] ‘Sṳ̀-kiên yit-thin voi to, ngì vòng-kiûng tú só-yû ke tûng-sî, lâu ngiâ chú-siên liù-hâ lòi ke tak-hong tûng-sî, chhiòn-phu voi pûn-ngìn pân-to Pâ-pí-lùn hi, mò liù pan-hong.’ Liá he Song-chú kóng ke.
[18] ‘Lièn ngì ke heu-thoi yû-têu ya voi pûn-ngìn chok-hi, chhai Pâ-pí-lùn vòng-kiûng tú cho thai-kam.’ ”
[19] Hî-sî-kâ sióng, liá yi-ngièn he kóng-tó chhai kì hàn-sâng ke ngit-è, kì hàn cho-tet hióng-su fò-phìn lâu ôn-chhiòn, só-yî kì en Yî-soi-â kóng: “Ngì só-chhòn Song-chú ke fa tông-hó!”
[20] Hî-sî-kâ khì-thâ ke sṳ, kì yîn-yúng ke hàng-vì lâu kì ngióng-pân chok pî-thòng, yet chun-kiêu, pûn súi theu-to sàng-tú ke sṳ, chhiòn-phu ki chhai Yù-thai Lie̍t-vòng Sṳ́ tî-poi.
[21] Hî-sî-kâ sí-thet; kiâ lai-é Mâ-nâ-sî sṳ̀n-chiap kì cho vòng.