[1] Sî-tí-kâ fán Pâ-pí-lùn-vòng Nì-pu-kap-nì-sat, só-yî Nì-pu-kap-nì-sat tai-liâng chhiòn-kiûn lòi kûng-tá Yâ-lu-sat-lâng; ke-sṳ̀ he Sî-tí-kâ chhai-vi thi-kiú ngièn sṳ̍p-ngie̍t chhû-sṳ̍p. Kì-têu ôn-yàng chhai sàng-ngoi, chhai sàng-chhiòng si chû-vì hí thú-tôi lòi kûng-sàng,
[2] yit-chhṳ̍t pâu-vì to Sî-tí-kâ-vòng chhai-vi thi sṳ̍p-yit ngièn.
[3] Ke-ngièn si-ngie̍t chhû-kiú, yîn-vi sàng-nui kî-fông fî-sòng ngiàm-chhung, ngìn-mìn yí-kîn mò tûng-sî hó-sṳ̍t,
[4] chui-mî, sàng-chhiòng pûn-ngìn kûng-pho. Sûi-yèn Pâ-pí-lùn kiûn-chhui hàn pâu-vì sàng, ke am-pû vòng lâu fòng-sú ke kiûn-chhui ya chhiòn-phu thò-chéu. Kì-têu tui vòng-kiûng fâ-yèn mò kí-yén ke-thiàu lu, chhôn-ko lióng-chho sàng-chhiòng chûng-kiên ke mùn, hiong Yok-tan sân-lak fông-hiong thò-chéu.
[5] Chúng-he Pâ-pí-lùn kiûn-chhui kiuk Sî-tí-kâ-vòng, chhai Yâ-li-kô fu-khiun ke phìn-ngièn kiuk-tó kì. Ke-sṳ̀ kì ke kiûn-chhui chhiòn-phu lì-khôi kì, san-thet hi lé.
[6] Kì-têu chok-tó kì, chiông kì tai-to Nì-pu-kap-nì-sat-vòng ke-vi hi. Ke-sṳ̀ Nì-pu-kap-nì-sat-vòng chhai Li-pí-lâ-sàng, kì chhiu chhai ke-vi sṳ́m-phan Sî-tí-kâ.
[7] Kì-têu chhai Sî-tí-kâ ngién-chhièn chhṳ̀-thet kì ke-têu lai-é, yèn-heu chiông kì ke lióng-chak muk-chû yet chhut-lòi, yu yung thùng lien-é thak-tén kì, chiông kì tai-to Pâ-pí-lùn hi.
[8] Pâ-pí-lùn-vòng Nì-pu-kap-nì-sat ke sṳ̍p-kiú ngièn ńg-ngie̍t chhû-chhit, vòng ke ku-mun kiâm sṳ-ví-chóng Nì-pu-sat-lâ-tan lòi-to Yâ-lu-sat-lâng.
[9] Kì piong-fó chiông Song-chú ke sṳn-thien, vòng-kiûng lâu Yâ-lu-sat-lâng só-yû ke vuk-sa sêu-thet, lièn ke-têu thai-kôn ke vuk ya sêu chhiang-chhiang.
[10] Thèn sṳ-ví-chóng lòi ke phu-chhui chiông Yâ-lu-sat-lâng si chû-vì ke sàng-chhiòng chhiòn-phu chhak-thet.
[11] Yèn-heu, sṳ-ví-chóng Nì-pu-sat-lâ-tan chiông liù chhai sàng-tú ke ngìn — ke-têu chhûn-tó yû sú-ngi ke ngìn lâu thèu-hòng Pâ-pí-lùn ke ngìn chhiòn-phu chok-to Pâ-pí-lùn hi.
[12] Chúng-he kì chiông chui khiùng-khú ke ngìn liù chhai Yù-thai, ham kì-têu chhai phù-thò-yèn lâu thièn-tú kûng-chok.
[13] Pâ-pí-lùn-ngìn khau-sui Song-chú sṳn-thien tú ke thùng-chhû, thùng-phùn-chho lâu thùng-hói, chiông só-yû ke thùng tai-to Pâ-pí-lùn hi.
[14] Kì-têu ya chiông chhîn-kiet chi-thàn yung ke chhán-è lâu chông-fôi ke vo̍k-é, chuk-fâ chién-tô, chông sên-ngì ke hiet yung ke thai-vón, lâu lî-pai yung ke kok-chúng thùng-hi chhiòn-phu tai-chéu.
[15] Sṳ-ví-chóng chiông só-yû yung kîm-é, ngiùn-è cho ke kok-chúng yung-phín, pâu-hàm chông fó-than ke lù-è, se phùn-è ya chhiòn-phu tai-chéu.
[16] Khì-chûng yû Só-lò-mùn-vòng vi sṳn-thien chu-chho ke thùng-hi — lióng-kî thùng-chhû, yit-chak thùng-hói lâu sṳ̍p-chak thùng-phùn-chho — liá-têu thùng-hi tô-to mò fap-thu lòi-chhṳn.
[17] Lióng-kî thùng-chhû he vàn-chhiòn khiung-yong ke; tak-kî kô pat kûng-chhak, yû yit kûng-chhak sâm kûng-chhun kô ke thùng ke chhû-thèu, chû-vì chông-sṳt thùng-chṳ ke mióng-è lâu thùng sa̍k-liù.
[18] Nì-pu-sat-lâ-tan sṳ-ví-chóng ya chok-chéu chi-sṳ̂-chóng Sî-lòi-ngâ, fu chi-sṳ̂-chóng Sî-fân-â, lâu sâm-ke chóng-mùn ke.
[19] Kì yu chhai sàng-tú chok-chéu yit-ke chṳ́-fî-kôn, ńg-ke liù chhai sàng-tú ke vòng-sṳt ku-mun, yit-ke chôn kón kiûn-chhui vùn-khien ke sû-ki-kôn, lâu liuk-sṳ̍p ke thi-fông song chhung-yeu ke ngìn-vu̍t.
[20] Nì-pu-sat-lâ-tan sṳ-ví-chóng chiông kì-têu tai-to Pâ-pí-lùn-vòng mien-chhièn; ke-sṳ̀, vòng chhai Ha̍p-mâ thi-khî ke Li-pí-lâ.
[21] Vòng chhiu chhai ke-vi tá kì-têu, chiông kì-têu chhṳ̀-sí. Án-ngiòng, Yù-thai ngìn-mìn pûn-ngìn chok-chéu, lì-khôi pún-koet.
[22] Pâ-pí-lùn-vòng Nì-pu-kap-nì-sat sat-li̍p Â-hî-kâm ke lai-é, Sâ-fân ke sûn-é Kî-thai-li cho Yù-thai chúng-tuk, oi kì kón-lî mò pûn-ngìn chok-hi Pâ-pí-lùn ke ngìn.
[23] Ke-têu mò thèu-hòng ke Yù-thai kôn-yèn lâu sṳ-pîn thâng-tó liá sêu-sit, chhiu lòi-to Mí-sṳ̂-pâ kien Kî-thai-li. Liá-têu kôn-yèn yû Nì-tham-ngâ ke lai-é Yî-sṳ̍t-mâ-li, Kâ-li-â ke lai-é Yok-ha̍p-nàn, Nì-thò-fap-ngìn Tân-fu-me̍t ke lai-é Sî-lòi-ngâ, Mâ-kâ-ngìn Ngâ-sat-nì-â.
[24] Kî-thai-li tui kì-têu lâu kì-têu ke sṳ-pîn fat-sṳ kóng: “Ngì-têu m̀-sṳ́ kiâng Pâ-pí-lùn ke kôn-yèn. Cho ngì-têu he̍t chhai liá-thi, fu̍k-sṳ Pâ-pí-lùn-vòng, yit-chhiet chhiu voi phìn-ôn sun-li.”
[25] Chúng-he, chhai ke-ngièn chhit-ngie̍t, vòng-sṳt kâ-chhu̍k ke Nì-tham-ngâ ke lai-é, Yî-li-sâ-mâ ke sûn-é Yî-sṳ̍t-mâ-li tai-tén sṳ̍p-ke ngìn lòi-to Mí-sṳ̂-pâ, chhṳ̀-thet Kî-thai-li, ya chhṳ̀-thet lâu kì khiung-ha ke Yù-thai-ngìn lâu Pâ-pí-lùn-ngìn.
[26] Só-yî, só-yû ke ngìn-mìn, mò-lun thai-se, lièn-thùng ke-têu kiûn-kôn khiung-ha lì-khôi, thò-nan to Âi-khi̍p hi, yîn-vi kì-têu kiâng Pâ-pí-lùn-ngìn.
[27] Yî-vi-Mí-lò-tha̍t cho Pâ-pí-lùn-vòng ke-ngièn, kì piong Yù-thai-vòng Yok-ngâ-kîn chhut kâm-ngiu̍k. Liá-sṳ fat-sên chhai Yok-ngâ-kîn pûn-ngìn chok-chéu yî-heu ke thi sâm-sṳ̍p chhit-ngièn sṳ̍p-ngi ngie̍t ngi-sṳ̍p chhit-ngit.
[28] Yî-vi-Mí-lò-tha̍t ya ên-thai Yok-ngâ-kîn, pûn kì ke sṳ̂n-fun kô-ko ke-têu pûn-ngìn chok-to Pâ-pí-lùn hi ke khì-thâ koet-vòng.
[29] Yok-ngâ-kîn thot-thet fam-ngìn ke sâm, yit-sên-ngìn lâu Pâ-pí-lùn-vòng khiung-chok sṳ̍t-fan.
[30] Kì hàn-sâng ke ngièn-ngit, vòng su-pûn kì tak-ngit ke sên-fa̍t fi-yung.