[1] Yû yit-ke koá-fu, kiâ ló-kûng he siên-tî khiùn ke yit-sà; kì hi kien Yî-li-sâ, khiù kì kóng: “Sîn-sâng, ngiâ phu̍k-ngìn — ngâ ló-kûng yí-kîn ko-sṳ̂n! Ngì tî kì he kin-vi Song-chú ke ngìn. Liá-ha yû yit-ke chai-chú lòi, oi chiông ngài lióng-ke lai-é tai-hi cho nù-chhòi.”
[2] Yî-li-sâ mun: “Ngài cho-tet vi ngì cho-má-ke nè? Lâu ngài kóng, ngiâ vuk-hâ hàn yû má-ke tûng-sî?” Koá-fu kóng: “Sṳ́-ńg chṳ́-yû yit se-âng kám-lám-yù, yî-ngoi má-ke tû mò.”
[3] Yî-li-sâ lâu kì kóng: “Ngì hi hiong lìn-sa chia-têu khûng ke kon-é, âng-é, ye̍t-tô ye̍t-hó.
[4] Yèn-heu, ngì lâu ngì lióng-ke lai-é ngi̍p-hi vuk-tú, koân-hó mùn, chiông yù tó-ngi̍p kon-é, âng-é, chông-mân chhiu piong chhai yit-phién.”
[5] Án-ngiòng, ke koá-fu chhiu lì-khôi Yî-li-sâ, lâu lióng-ke lai-é ngi̍p-hi vuk-tú, koân-hó mùn, kiâ lai-é nâ-tén kon-é, âng-é, kì chhiu tó-yù.
[6] Kì-têu tó-mân só-yû ke kon-é, âng-é yî-heu, koá-fu mun hàn yû kon-é, âng-é mò? Yû yit-ke lai-é en-kóng: “Mò lé!” Án-ngiòng, kám-lám-yù chhiu thìn-thet lé.
[7] Koá-fu chón-to sṳ̀n-ngìn Yî-li-sâ ke-vi, Yî-li-sâ tui kì kóng: “Chiông kám-lám-yù nâ-hi mai lòi vàn-chai! Chhûn-tó ke chhièn la-pái ngì-têu chṳ́-ôi sên-fa̍t lé!”
[8] Yû yit-ngit, Yî-li-sâ to Sû-ngiam hi. Ke-vi yû yit-ke yû-chhièn ke fu-ngìn-kâ; kì khiòng-liù Yî-li-sâ sṳ̍t-fan. Tui ke-pái yî-heu, Yî-li-sâ tak-pái to Sû-ngiam hi, chhiu voi to kiâ vuk-hâ sṳ̍t-fan.
[9] Fu-ngìn-kâ tui kiâ ló-kûng kóng: “Ngài khon-chhut ke sòng-sòng to ngài-têu liá-vi lòi ke, he yit-ke sṳn-kiet ke sṳ̀n-ngìn.
[10] Ngài-têu chhai vuk-táng lòi hí yit-chak se kiên-fòng, tî-poi piong yit-chông mìn-chhòng, chok-è, ten-é lâu tên-thòi. Kì lòi ên vuk-hâ ke sṳ̀, chhiu cho-tet chhai ke-vi hiet.”
[11] Yû yit-ngit, Yî-li-sâ lòi-to Sû-ngiam, chhiu sông-to ke-chak kiên-fòng hiet-khun.
[12] Yî-li-sâ fûn-fu phu̍k-ngìn Kî-ha̍p-sî: “Ngì ham Sû-ngiam ke fu-ngìn-kâ lòi!” Kì chhiu ham ke fu-ngìn-kâ lòi-to Yî-li-sâ ke-vi.
[13] Yî-li-sâ tui Kî-ha̍p-sî kóng: “Ngì mun kì, ngài cho-tet vi kì cho-má-ke. Kì vi-tó kiûng-kip ên ke sî-yeu sòng-sòng chhâu-sîm, ngài oi po-tap kì. Khó-nèn kì oi ngài to vòng ke-vi ya-he ngièn-soi ke-vi vi kì kóng kí-ki hó-fa.” Fu-ngìn-kâ kóng: “Ngài he̍t chhai chhṳ-kâ ngìn ke tông-chûng, má-ke tû mò-khiam.”
[14] Yî-li-sâ mun Kî-ha̍p-sî: “Án-ngiòng, ngài cho-tet vi kì cho-má-ke nè?” Kî-ha̍p-sî kóng: “Kì mò lai-é, ló-kûng yu án-ló lé.”
[15] Yî-li-sâ kóng: “Ham kì ko-lòi!” Ke fu-ngìn-kâ chhiu ko-lòi, khî chhai mùn-héu.
[16] Yî-li-sâ tui kì kóng: “Màng-ngièn liá sṳ̀-chiet, ngì voi nám-tén yit-ke lai-é.” Ke fu-ngìn-kâ en-kóng: “Sîn-sâng, ngì he sṳ̀n-ngìn, cho-m̀-tet phien ngài ô!”
[17] Ke fu-ngìn-kâ chṳn-kîn chhiu yû sṳ̂n-hong, thi-ngi ngièn chhûn-thiên kiung yit-ke lai-é, chhiu-chhiong Yî-li-sâ só-kóng ke.
[18] Se-ngìn-è kín-lòi kín-thai, yû yit-ngit, kì to sû-kot ke kûng-ngìn ke-vi hi chhìm kiâ-pâ.
[19] Se-ngìn-è fut-yèn tui kiâ-pâ kóng: “Ngài thèu-nà thung! Ngài thèu-nà thung!” Kiâ-pâ tui yit-ke phu̍k-ngìn kóng: “Chiông se-ngìn-è nám-chón kiâ-mê ke-vi hi!”
[20] Phu̍k-ngìn chhiu chiông se-ngìn-è nám-chón kiâ-mê ke-vi. Se-ngìn-è chhô chhai kiâ-mê ke chhit-thèu táng, to tông-chu sa sí-thet.
[21] Â-mê chiông se-ngìn-è nám-to sṳ̀n-ngìn Yî-li-sâ ke kiên-fòng, piong chhai mìn-chhòng táng, koân-hó mùn, chhiu chéu.
[22] Fu-ngìn-kâ hêm kiâ ló-kûng lòi, tui kì kóng: “Ngì phai yit-ke phu̍k-ngìn khiên yit-chak lì-è to liá-vi lòi; ngài oi kiak-kiak to sṳ̀n-ngìn ke-vi hi, ngiàm-sṳ̀ chón-lòi.”
[23] Kiâ ló-kûng kóng: “Cho-má-ke ngì kîm-pû-ngit yit-thin oi hi kien kì? Kîm-pû-ngit m̀-he ôn-sit-ngit, ya m̀-he chhû-yit â!” Fu-ngìn-kâ kóng: “Mò má-ke sṳ-chhìn!”
[24] Yèn-heu, kì yi-phi lì-è, yu fûn-fu phu̍k-ngìn kóng: “Kiak-kiak lòi kiuk lì-è! Ngài mò fûn-fu ngì, ngì chhiu m̀-hó man hâ-lòi.”
[25] Án-ngiòng, fu-ngìn-kâ chhiu kón-kín hi-to sṳ̀n-ngìn ke só-chhai Kâ-me̍t-sân. Sṳ̀n-ngìn yén-yén chhiu khon-tó ke fu-ngìn-kâ to-lòi, tui phu̍k-ngìn Kî-ha̍p-sî kóng: “Ngì khon! Sû-ngiam ke fu-ngìn-kâ lòi lé!
[26] Ngì kiak-kiak chéu-hi ngiàng-chiap kì, mun kì yit-chhiet phìn-ôn mò? Kiâ ló-kûng phìn-ôn mò? Kiâ lai-é phìn-ôn mò?” Fu-ngìn-kâ kóng: “Phìn-ôn!”
[27] Tông kì sông-sân, hàng-to sṳ̀n-ngìn Yî-li-sâ mien-chhièn, chhiu nám-tén kì ke kiok. Kî-ha̍p-sî hàng ko-lòi oi chiông kì súng-khôi, chúng-he sṳ̀n-ngìn kóng: “Yù-chhai kì â! Ngì mò khon-tó kì án thung-khú mâ? Song-chú chiông sṳ-chhìn khong-tén, mò lâu ngài kóng.”
[28] Fu-ngìn-kâ kóng: “Sîn-sâng, ngài sṳt lâu ngì khiù-ko lai-é mò? Ngài m̀-he lâu ngì kóng-ko, m̀-hó phien ngài mâ?”
[29] Yî-li-sâ tui Kî-ha̍p-sî kóng: “Kiak-kiak! Thak-hó ngì ke yêu-tai, nâ ngài ke chhóng-è hi! Chhai lu-hong tù-tó ngìn, m̀-hó lâu kì kóng-fa. Na-he yû-ngìn lâu ngì mun-ôn, m̀-hó en kì. To ke-vi, oi chiông ngài ke chhóng-è piong chhai se-ngìn-è ke mien-hong.”
[30] Se-ngìn-è ke â-mê tui Yî-li-sâ kóng: “Ngài chṳ́-tén yún-sên ke Song-chú lâu ngì fat-sṳ, ngài chhie̍t-tui m̀ lì-khôi ngì!” Só-yî Yî-li-sâ chhiu hí-sṳ̂n thèn kì hi.
[31] Kî-ha̍p-sî siên hi, chiông Yî-li-sâ ke chhóng-è piong chhai se-ngìn-è ke mien-hong, chúng-he mò théu-hi sâng, me mò thîn-thûng. Só-yî kì chón-thèu hi kien Yî-li-sâ, kóng: “Se-ngìn-è mò siáng ko-lòi!”
[32] Yî-li-sâ hàng-ngi̍p kiên-fòng, khon-tó se-ngìn-è sí-thet, piong chhai chhṳ-kâ ke mìn-chhòng táng.
[33] Kì chiông mùn koân-hó, chṳ́-yû kì lióng-sà chhai tî-poi; kì chhiu hiong Song-chú khì-tó.
[34] Yèn-heu kì sông mìn-chhòng, phu̍k chhai se-ngìn-è ke sṳ̂n-song, choi tui choi, muk-chû tui muk-chû, sú tui sú. Yîn-vi kì phu̍k chhai se-ngìn-è ke sṳ̂n-song, se-ngìn-è ke sṳ̂n-thí chhiu sêu-nôn hí-lòi.
[35] Yî-li-sâ chhiu hâ-lòi, chhai kiên-fòng tú hàng-lòi hàng-hi, yèn-heu yu sông mìn-chhòng, phu̍k chhai se-ngìn-è sṳ̂n-song. Se-ngìn-è lièn tá chhit-pái ha̍p-chhiú, muk-chû chhiu pak khôi-lòi lé.
[36] Yî-li-sâ ham Kî-ha̍p-sî kóng: “Hi ham ke Sû-ngiam ke fu-ngìn-kâ lòi!” Fu-ngìn-kâ lòi-to, Yî-li-sâ tui kì kóng: “Chiông ngiâ lai-é nám hí-lòi.”
[37] Fu-ngìn-kâ chhiu ngi̍p-lòi, phu̍k chhai Yî-li-sâ kiok-chhièn hàng-lî, yèn-heu nám-tén lai-é chhut-hi.
[38] Yû yit-pái, Yî-li-sâ chón-to Kit-kap, ke thi-fông yû kî-fông. Kì chhai ke-vi kâu yit-khiùn siên-tî ke sṳ̀, kì fûn-fu phu̍k-ngìn chiông thai vo̍k-thèu piong chhai fó táng-kô, chú-têu thông pûn kì-têu sṳ̍t.
[39] Yû-ngìn to thièn-tú chak yâ-chhoi, khon-tó yit-thèu yâ-sâng ke koâ-thèn, chhiu chak chhin-tô yâ-koâ chón-lòi. Kì chiông yâ-koâ chhiet-sui piong-ngi̍p vo̍k-thèu, sûi-yèn kì-têu m̀-tî ke he má-ke koâ.
[40] Chú-hó chhiu tó chhut-lòi sṳ̍t. Chúng-he kì-têu yit sṳ̍t-tó ke-thông chhiu thai-sâng hêm: “Sṳ̀n-ngìn nâ, vo̍k-tú ke tûng-sî voi sṳ̍t-sí ngìn ô!” Thai-kâ chhiòn-phu m̀-kám sṳ̍t.
[41] Yî-li-sâ fûn-fu nâ-têu mien-fún lòi, chhiu ve-ngi̍p vo̍k-thèu tú, kóng: “Tó chhut-lòi pûn thai-kâ sṳ̍t!” Vo̍k-thèu tú ke thông chhiu mò-thu̍k lé.
[42] Nang-ngoi yû yit-pái, yû yit-ke ngìn tui Pâ-li̍t-Sâ-li-sâ lòi, tai ngi-sṳ̍p chak piáng pûn sṳ̀n-ngìn Yî-li-sâ, he chhû-siuk ke thai-ma̍k cho ke. Kì ya tai yit-thoi sîn-chhut ke ma̍k-é. Yî-li-sâ fûn-fu phu̍k-ngìn chiông sṳ̍t-vu̍t pûn-pûn ke-têu siên-tî sṳ̍t.
[43] Chúng-he phu̍k-ngìn mun: “Liá-têu la yit-pak sà sṳ̍t mò?” Yî-li-sâ en-kóng: “Cho ngì nâ-pûn kì-têu sṳ̍t! Yîn-vi Song-chú kóng, kì-têu thin-chho̍k voi sṳ̍t-páu, hàn-voi yû-chhûn.”
[44] Só-yî phu̍k-ngìn chiông sṳ̍t-vu̍t pài chhai kì-têu mien-chhièn, kì-têu chhiu sṳ̍t. Chhiu-chhiong Song-chú só-kóng ke, thai-kâ chhiòn-phu sṳ̍t-páu, hàn-yû hó-chhûn.