[1] Â-ha̍p-vòng yû chhit-sṳ̍p ke chṳ́-sûn he̍t chhai Sat-mâ-li-â. Yâ-fu siá sin-é pûn sàng-tú ke liâng-chhiu, chóng-ló, lâu Â-ha̍p chṳ́-sûn ke kam-fu ngìn, án-ngiòng kóng:
[2] “Ngì-têu he kam-fu vòng heu-thoi ke ngìn; ngì-têu yû chhṳ-kâ ke chan-chhâ, mâ-é, vú-hi, lâu kiên-ku ke sàng.
[3] Só-yî, ngì-têu chiap-tó liá sin-é yî-heu, chhiu oi chhai vòng ke heu-thoi chûng sién-chhut yit-ke nèn-li̍t chui-khiòng ke ngìn lòi, sat-li̍p kì cho vòng, hó vi ngì-têu chú-ngìn ke kâ siông-chhṳ̀.”
[4] Sat-mâ-li-â ke-têu liâng-chhiu chhiòn-phu hak-to voi sí; kì-têu kóng: “Lièn Yok-làn-vòng lâu Â-ha̍p-chhia-vòng ya mò fap-thu tui-khong Yâ-fu! Ngài-têu ngióng cho-tet tui-khong kì nè?”
[5] Só-yî vòng-kiûng ke chúng-kón lâu sṳ-chóng, lièn chóng-ló lâu ke-têu kam-fu ngìn, khiung-ha siá sin-é sung-pûn Yâ-fu kóng: “Ngài-têu he ngì ke phu̍k-ngìn, ngì fûn-fu ngài-têu cho ke sṳ, ngài-têu chhiòn-phu voi cheu-cho; chúng-he ngài-têu mò-oi sat-li̍p má-ngìn cho vòng. Chhiáng ngì fûn-fu ngài-têu oi ngióng-pân cho!”
[6] Yâ-fu yu siá yit-fûng sin-é pûn kì-têu, kóng: “Na-he ngì-têu kûi-sun ngài, ngien-yi thâng ngài ke min-lin, thiên-kông-ngit liá-sṳ̀, oi chiông Â-ha̍p-vòng ke-têu chṳ́-sûn ke thèu-nà chhiòn-phu tai-to Yâ-sṳ̂-lie̍t pûn ngài.” Â-ha̍p chhit-sṳ̍p ke chṳ́-sûn he pûn Sat-mâ-li-â chûn-kui ke ngìn yông-yuk.
[7] Tông Yâ-fu ke sin to ke sṳ̀, liá-têu chûn-kui ke ngìn chiông Â-ha̍p chhit-sṳ̍p ke chṳ́-sûn chhiòn-phu chhṳ̀-thet, yu chiông kì-têu ke thèu-nà chông chhai làm-tú, sung-to Yâ-sṳ̂-lie̍t pûn Yâ-fu.
[8] Yû sṳ́-chá lâu Yâ-fu kóng, Â-ha̍p-vòng ke-têu chṳ́-sûn ke thèu-nà yí-kîn tai-lòi lé. Kì chhiu min-lin ngìn chiông ke-têu ngìn ke thèu-nà tôi chhai sàng-mùn héu, tôi-cho lióng-tôi, liù-to thi-ngi ngit.
[9] Thi-ngi ngit tá-chó, Yâ-fu to sàng-mùn héu hi, tui ke-vi ke mìn-chung kóng: “He ngài fán Yok-làn-vòng, chiông kì chhṳ̀-thet; chúng-he liá-têu ngìn he má-ngìn chhṳ̀ ke nè?
[10] Liá chṳn-mìn Song-chú só-kóng yû-koân Â-ha̍p heu-thoi ke tak-ki fa chhiòn-phu oi sṳ̀n-chhiu. Song-chú yí-kîn sṳ̍t-hien Kì thûng-ko Kì ke phu̍k-ngìn siên-tî Yî-li-â só-kóng ke yi-ngièn.”
[11] Só-yî Yâ-fu chiông Â-ha̍p ke-têu he̍t chhai Yâ-sṳ̂-lie̍t ke chhîn-su̍k, kôn-yèn, chhîn-me̍t ke phèn-yû, lâu chi-sṳ̂, chhiòn-phu chhṳ̀ chhiang-chhiang, yit-ke ya mò-liù.
[12] Yâ-fu lì-khôi Yâ-sṳ̂-lie̍t to Sat-mâ-li-â hi. Chhai lu-song yit-ke mu̍k-ngìn chién yòng-mô ke thi-fông,
[13] kì tù-tó Yù-thai-vòng Â-ha̍p-chhia ke kí-ke chhîn-chhu̍k, chhiu mun kì-têu: “Ngì-têu he má-ngìn?” Kì-têu kóng: “Ngài-têu he Â-ha̍p-chhia ke chhîn-chhu̍k, oi to Yâ-sṳ̂-lie̍t hi, hiong Yâ-sé-pit thai-heu ke-têu vòng-chṳ́ lâu vòng khì-thâ ke chhîn-chhu̍k mun-ôn.”
[14] Yâ-fu fûn-fu: “Chiông kì-têu sâng-sâng chok hí-lòi!” Kì ke phu-ha chhiu chiông kì-têu chok hí-lòi, chhai chién-yòng-mô-chhòng ke chiáng-sùn chiông kì-têu chhṳ̀-thet, yit-khiung si-sṳ̍p-ngi sà, yit-ke ya mò-liù.
[15] Yâ-fu tui ke-vi hiong-chhièn hàng, chhai lu-song tù-tó Li-kap ke lai-é Yok-nâ-tha̍t lòi ngiàng-chiap kì, chhiu hiong kì mun-ôn kóng: “Ngì tui ngài ke sṳ̀n-yi lâu ngài tui ngì ke sṳ̀n-yi khiung-yong mò?” Yok-nâ-tha̍t kóng: “Khiung-yong!” Yâ-fu en-kóng: “Án-ngiòng, sú chhûn chhut-lòi.” Yèn-heu Yâ-fu lâi kì sông chan-chhâ,
[16] kóng: “Thèn ngài lòi, khon ngài ngióng-pân ngie̍t-sîm vi Song-chú phan-sṳ.” Kì-têu khiung-ha chhô-chhâ to Sat-mâ-li-â.
[17] To ke-vi, Yâ-fu chiông Â-ha̍p khì-thâ ke chhîn-chhu̍k chhiòn-phu chhṳ̀-thet, yit-ke ya mò-liù, chhiong Song-chú thûng-ko Yî-li-â só-kóng ke yi-ngièn.
[18] Yâ-fu seu-si̍p só-yû ke ngìn-mìn, tui kì-têu kóng: “Â-ha̍p tui Pâ-li̍t sṳ̀n-mìn ke sṳ-fung hàn m̀-la, ngài — Yâ-fu oi hàn-kha ngie̍t-sîm lòi sṳ-fung kì.
[19] Ngì-têu hi seu-si̍p Pâ-li̍t só-yû ke siên-tî, só-yû pai Pâ-li̍t ke ngìn, lâu chi-sṳ̂ lòi, m̀-hó leu-thet yit-ke. Ngài oi hiong Pâ-li̍t hien thai-chi, mò-lòi ke tit-khok voi mò-miang, chhiu oi chhú-sí.” Liá he Yâ-fu ke kie-mèu; yîn-vi kì oi chhṳ̀-thet só-yû pai Pâ-li̍t ke ngìn.
[20] Só-yî Yâ-fu ha-lin kóng: “Oi siên-pu seu-khôi thai-fi lòi pai Pâ-li̍t!” Chhiu fat-chhut thûng-ko.
[21] Yâ-fu phai-ngìn chhòn-fa to Yî-set-lie̍t tak só-chhai. Só-yû pai Pâ-li̍t ke ngìn chhiòn-phu lòi lé, yit-ke ya mò-séu. Kì-têu ngi̍p-hi Pâ-li̍t ke meu, tui thèu-chhièn to heu-poi chhiòn-phu chiâm-to cha̍t-cha̍t.
[22] Yâ-fu fûn-fu kón lî-fu̍k ke chi-sṳ̂ chiông lî-fu̍k tai chhut-lòi pûn só-yû pai Pâ-li̍t ke ngìn chok, kì chhiu cheu min-lin hi-cho.
[23] Yèn-heu, Yâ-fu lâu Li-kap ke lai-é Yok-nâ-tha̍t ya ngi̍p Pâ-li̍t ke meu-tú hi, tui ke-vi ke mìn-chung kóng: “Ngì-têu oi khok-sṳ̍t thiàu-chhà chhîn-chhú, pai Pâ-li̍t ke ngìn chang cho-tet chhai-chhòng; kin-pai Song-chú ke ngìn cho-m̀-tet ngi̍p-lòi.”
[24] Só-yî Yâ-fu lâu Yok-nâ-tha̍t ngi̍p-hi hien sên-chi lâu sêu-fa-chi. Yâ-fu yí-kîn phai pat-sṳ̍p ke ngìn chóng chhai meu ke ngoi-poi, fûn-fu kì-têu: “Ngì-têu oi chiông liá-têu ngìn chhiòn-phu chhṳ̀ chhiang-chhiang; na-he pûn yit-sà chéu-thet, yit-thin oi nâ chhṳ-kâ ke miang lòi-phòi!”
[25] Yâ-fu hien-chi so̍t, tui ke-têu sú-ví lâu kôn-chóng kóng: “To tî-poi hi, chiông kì-têu chhiòn-phu chhṳ̀-thet! Put-chún yit-ke thò-chéu!” Kì-têu chhiu ngi̍p-hi, yung tô-é chhṳ̀-thet só-yû ke ngìn, chiông sṳ̂-thí thô chhut-hi. Yèn-heu, kì-têu to Pâ-li̍t meu-tú ke nui-thien,
[26] chiông Pâ-li̍t meu-tú ke chhû-siong pân chhut-lòi sêu-thet;
[27] kì-têu pho-fái Pâ-li̍t ke chhû-siong, chhak-thet Pâ-li̍t ke meu, chiông meu nâ-lòi cho phien-só, chhṳ̍t-to kîm-pû-ngit.
[28] Án-ngiòng, Yâ-fu tui Yî-set-lie̍t tông-chûng chhù-thet pai Pâ-li̍t ke sṳ.
[29] Chúng-he Yâ-fu mò lì-khôi Nì-pat ke lai-é Yâ-lò-pô-ôn só-fam ke chhui, chhiu-he hoi Yî-set-lie̍t-ngìn chhai Pak-thi̍t-li lâu Tan pai kîm-ngiù.
[30] Song-chú tui Yâ-fu kóng: “Yîn-vi ngì tui Â-ha̍p ke chṳ́-sûn só-cho ke sṳ chhin-chho̍k, ha̍p Ngài sîm-yi, só-yî ngì ke heu-thoi voi sṳ̀n-chiap ngì cho Yî-set-lie̍t ke vòng, to thi-si thoi.”
[31] Chúng-he Yâ-fu mò chhiòn-sîm chûn-sú Song-chú — Yî-set-lie̍t Song-ti ke fap-li̍t. Kì hàn-he m̀ lì-khôi Yâ-lò-pô-ôn ke chhui, ki-siu̍k hoi Yî-set-lie̍t-ngìn fam-chhui.
[32] Ke-sṳ̀, Song-chú suk-se Yî-set-lie̍t ke thú-thi. Si-li-â-vòng Ha̍p-siet kûng-kit Yî-set-lie̍t chhiòn-thi,
[33] cham-liâng Yok-tan-hò tûng-phién só-yû ke thú-thi, nàm-phién chhṳ̍t-to Â-nun hò-sùn ke Â-lò-ngí-sàng, pâu-hàm Kî-lie̍t lâu Pâ-sân ke thú-thi, chhiu-he Kâ-tet, Lî-phien, tûng Mâ-nâ-sî kî-chhu̍k só-he̍t ke thi-fông.
[34] Yâ-fu khì-thâ ke sṳ, lâu kì yîn-yúng ke só-cho, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[35] Yâ-fu sí-heu chong chhai Sat-mâ-li-â; kì ke lai-é Yok-ha̍p-sṳ̂ sṳ̀n-chiap kì cho vòng.
[36] Yâ-fu chhai Sat-mâ-li-â cho Yî-set-lie̍t-vòng ngi-sṳ̍p pat-ngièn.