[1] Yù-thai-vòng Â-ha̍p-chhia ke lai-é Yok-â-sṳ̂ chhai-vi thi ngi-sṳ̍p sâm-ngièn, Yâ-fu ke lai-é Yok-ha̍p-sṳ̂ cho Yî-set-lie̍t-vòng; kì chhai Sat-mâ-li-â thúng-chhṳ sṳ̍p-chhit ngièn.
[2] Kì hàng Song-chú khon-cho sià-ok ke sṳ, chhiong Nì-pat ke lai-é Yâ-lò-pô-ôn-vòng án-ngiòng hoi Yî-set-lie̍t-ngìn fam-chhui; kì yit-chhṳ̍t mò kói-pien.
[3] Só-yî, Song-chú hiong Yî-set-lie̍t fat-khién, sṳ́ Si-li-â-vòng Ha̍p-siet lâu kì ke lai-é Phien-Ha̍p-tha̍t sòng-sòng tá-yàng Yî-set-lie̍t.
[4] Heu-lòi, Yok-ha̍p-sṳ̂ khì-khiù Song-chú, Song-chú chhiu thâng kì ke khì-tó, yîn-vi Kì khon-tó Si-li-â-vòng ngióng-pân ap-pet Yî-set-lie̍t-ngìn.
[5] Song-chú su-pûn Yî-set-lie̍t yit-ke kié-kiu chá; liá kié-kiu chá sṳ́ Yî-set-lie̍t-ngìn thot-lì Si-li-â-ngìn ke ap-pet. Só-yî, Yî-set-lie̍t-ngìn yu chhiong yî-chhièn khiung-yong ôn-kî lo̍k-ngia̍p.
[6] Chúng-he kì-têu hàn-he fam Yâ-lò-pô-ôn kâ-chhu̍k hoi Yî-set-lie̍t-ngìn fam ke chhui, mò lì-khôi ngiéu-siong, chhai Sat-mâ-li-â hàn liù-tén Â-sa-lâ ńg-sṳ̀n ke siong.
[7] Si-li-â-vòng hiám-hiám sêu-me̍t Yok-ha̍p-sṳ̂ ke kiûn-chhui, chiông kì-têu tông-cho vò-thàng ke fôi-chhṳ̀n án-ngiòng chhio-tha̍p, kì-têu chṳ́-yû chhûn ńg-sṳ̍p ke khì-pîn, sṳ̍p-liòng chan-chhâ, lâu yit-van ke phu-pîn.
[8] Yok-ha̍p-sṳ̂ khì-thâ ke sṳ, lâu kì yîn-yúng ke só-cho, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[9] Yok-ha̍p-sṳ̂ sí-thet, chong chhai Sat-mâ-li-â; kì ke lai-é Yok-fà-sṳ̂ sṳ̀n-chiap kì cho vòng.
[10] Yù-thai-vòng Yok-â-sṳ̂ chhai-vi thi sâm-sṳ̍p chhit-ngièn, Yok-ha̍p-sṳ̂ ke lai-é Yok-fà-sṳ̂ cho Yî-set-lie̍t-vòng; kì chhai Sat-mâ-li-â thúng-chhṳ sṳ̍p-liuk ngièn.
[11] Kì hàng Song-chú khon-cho sià-ok ke sṳ, ho̍k Nì-pat ke lai-é Yâ-lò-pô-ôn-vòng ke fái mù-yong, hoi Yî-set-lie̍t-ngìn fam-chhui; kì yit-chhṳ̍t mò kói-pien.
[12] Yok-fà-sṳ̂ khì-thâ ke sṳ, pâu-hàm kì chhai chan-chhòng tui-khong Yù-thai-vòng Â-mâ-chhia yîn-yúng ke só-cho, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[13] Yok-fà-sṳ̂ sí-thet, chong chhai Sat-mâ-li-â, Yî-set-lie̍t ke vòng-sṳt fùn-mu tú; kì ke lai-é Yâ-lò-pô-ôn ngi-sṳ sṳ̀n-chiap kì cho vòng.
[14] Siên-tî Yî-li-sâ pot-tó chhie̍t-chṳn; kì voi sí ke sṳ̀, Yî-set-lie̍t-vòng Yok-fà-sṳ̂ hi khon kì, phu̍k-tén kín-kieu kín-hêm: “Â-pâ â, â-pâ â! Yî-set-lie̍t ke chan-chhâ lâu khì-pîn â!”
[15] Yî-li-sâ fûn-fu vòng: “Ngì hi-nâ kiûng lâu chien lòi!” Yok-fà-sṳ̂ chhiu nâ-lòi lé.
[16] Yî-li-sâ ham Yî-set-lie̍t-vòng chún-phi lâi-kiûng, vòng chhiu yung-sú lâi-kiûng. Yî-li-sâ chiông sú piong chhai vòng ke sú-hong,
[17] vòng chhiu cheu siên-tî ke chṳ́-sṳ tá-khôi hiong tûng-phién ke chhûng-mùn. Yî-li-sâ kóng: “Sa-chien!” Vòng ke chien yit sa-chhut, siên-tî chhiu hêm: “Song-chú sṳn-li ke chien, chhiu-he yàng-ko Si-li-â ke chien. Ngì oi chhai Â-fut kûng-tá Si-li-â-ngìn, chhṳ̍t-to chiông kì-têu sêu-me̍t chhiang-chhiang.”
[18] Chiap-tén, Yî-li-sâ ham Yî-set-lie̍t-vòng nâ-têu chien lòi, kì chhiu nâ-lòi. Yî-li-sâ kóng: “Tá thi-nài!” Vòng tá sâm-pái chhiu thìn hâ-lòi.
[19] Sṳ̀n-ngìn Yî-li-sâ fat-khién, tui vòng kóng: “Ngì yin-kôi tá ńg, liuk pái, án-ngiòng, ngì chang-nèn chha̍t-tái yàng-ko Si-li-â-ngìn; chúng-he liá-ha ngì tân-chhiang cho-tet yàng kì-têu sâm-pái.”
[20] Yî-li-sâ sí-thet; kì-têu chhiu mài-chong kì. Tak-ngièn chhûn-thiên, Mô-ap-ngìn yê-kông tá-chhṳn lòi chhîm-fam Yî-set-lie̍t.
[21] Yit-pái, yû-ngìn tú-hó chhai mài-chong sí-ngìn, fut-yèn khon-tó ke-khiùn ngìn lòi, chhiu chiông sṳ̂-thí fit-ngi̍p Yî-li-sâ ke fùn-mu, chón-sṳ̂n chhiu chéu. Sṳ̂-thí yit pen-tó Yî-li-sâ ke kut-hài, sí-ngìn chhiu fán-sâng, khî hí-lòi.
[22] Yok-ha̍p-sṳ̂ chhai-vi khì-kiên, Si-li-â-vòng Ha̍p-siet yit-chhṳ̍t ap-pet Yî-set-lie̍t-ngìn.
[23] Chúng-he Song-chú yîn-vi Kì lâu Â-pak-lâ-hón, Yî-sat, Ngâ-kok yû li̍p-yok, chhiu ên-thai Yî-set-lie̍t-ngìn, lìn-mén kì-têu, khon-ku kì-têu, hàn-he m̀-hén sêu-me̍t kì-têu, ya m̀ phan-tet kiuk kì-têu lì-khôi Kì ke mien-chhièn.
[24] Si-li-â-vòng Ha̍p-siet sí-thet; kì ke lai-é Phien-Ha̍p-tha̍t sṳ̀n-chiap kì cho vòng.
[25] Yî-set-lie̍t-vòng Yok-fà-sṳ̂ sâm-pái tá-yàng Phien-Ha̍p-tha̍t, chiông yî-chhièn kiâ-pâ Yok-ha̍p-sṳ̂ sṳ̀-thoi pûn Ha̍p-siet chhióng-hi ke Yî-set-lie̍t sàng-sṳ sû chón-lòi.