[1] Si-li-â kiûn-chhui ke ngièn-soi Nâi-man pûn kiâ koet-vòng tông khon-chhûng, yîn-vi Song-chú sṳt thûng-ko kì sṳ́ Si-li-â kiûn-chhui tet-tó sṳn-li. Nâi-man he yit-ke thai-nèn ke yúng-sṳ, chúng-he sa pot-tó thái-kô-phiang.
[2] Yû yit-pái, Si-li-â-ngìn kûi-chhṳn chhut-hi chhióng Yî-set-lie̍t-ngìn, chok-tó yit-ke Yî-set-lie̍t-ngìn ke se-moi-é; liá se-moi-é heu-lòi cho Nâi-man pû-ngiòng ke sṳ́-ńg.
[3] Kì lâu ńg chú-ngìn kóng: “Phan-mong chú-ngìn hi kien he̍t chhai Sat-mâ-li-â ke siên-tî! Kì yit-thin voi yî-hó chú-ngìn ke thái-kô-phiang.”
[4] Nâi-man chhiu hi kien vòng, chiông ke tui Yî-set-lie̍t lòi ke se-moi-é kóng ke fa siòng-se lâu vòng kóng.
[5] Si-li-â-vòng kóng: “Hó, cho ngì hi! Ngài ya voi siá sin-é pûn Yî-set-lie̍t-vòng.” Só-yî Nâi-man chhiu chhut-fat, tai-tén sâm-van chak ngiùn-pi, liuk-chhiên chak kîm-pi, lâu sṳ̍p-tho sâm-fu.
[6] Kì tai-pûn Yî-set-lie̍t-vòng ke sin-é án-ngiòng kóng: “Liá-fûng sin kie-seu ngài ke thai-sṳ̀n Nâi-man, ngì oi yî-hó kì ke thái-kô-phiang.”
[7] Yî-set-lie̍t-vòng thu̍k-tó liá-fûng sin, chhiu chhá-lie̍t chhṳ-kâ ke sâm, kóng: “Ngài yu m̀-he Song-ti, nai-yû phan-fap ham-ngìn sâng, ham-ngìn sí? Ke-sà ngióng-pân cho-tet ham ngài yî-hó liá-ke ngìn ke thái-kô-phiang nè? Ngì-têu khon! Kì thin-chho̍k he sióng-oi chhìm pá-piang lòi kûng-kit ngài!”
[8] Sṳ̀n-ngìn Yî-li-sâ thâng-tó Yî-set-lie̍t-vòng chhá-lie̍t sâm ke sṳ, chhiu ham-ngìn hi tui vòng kóng: “Cho-má-ke chhá-lie̍t sâm nè? Ham kì lòi chhìm ngài, kì chhiu voi tî Yî-set-lie̍t yû yit-ke siên-tî!”
[9] Só-yî, Nâi-man tai-tén mâ lâu chan-chhâ lòi-to Yî-li-sâ vuk-hâ ke mùn-héu.
[10] Yî-li-sâ ham yit-ke phu̍k-ngìn chhut-hi lâu Nâi-man kóng: “Ngì hi Yok-tan-hò sé chhit-pái sṳ̂n, án-ngiòng, ngì ke phì-ngiuk chhiu voi fu̍k-ngièn, pien-cho chhiang-li.”
[11] Nâi-man chhiu at-to hi pu̍t-pu̍t, chón-sṳ̂n chhiu chéu. Kì kóng: “Ngài láu-tó kì yit-thin voi chhut-lòi khon ngài, khî-tén hiong Song-chú — kì ke Song-ti khì-tó, chhai ngài pot-phiang ke só-chhai ya̍k yit-ha sú, yî-hó ngài ke thái-kô-phiang!
[12] Chai-kóng, Thai-mâ-sṳ-kiet ke Â-pa-nâ-hò lâu Fap-ngí-hò, kám mò pí Yî-set-lie̍t só-yû ke hò-pa hàn-kha hó mâ? Ngài chhai ke-vi sé-sṳ̂n kám m̀-voi tet-tó chhiang-li?” Só-yî kì tông fat-khién chhiu lì-khôi.
[13] Nâi-man ke phu̍k-ngìn hàng chhièn-lòi tui kì kóng: “Sîn-sâng, chhiu-son siên-tî ham ngì cho yit-khien khun-nàn ke sṳ, ngì kám m̀-voi hi-cho mâ? Hò-khóng kì liá-ha chṳ́-yû ham ngì hi sé-sṳ̂n chhiu voi tet-tó chhiang-li nè?”
[14] Só-yî Nâi-man chhiu to Yok-tan-hò hi, cheu sṳ̀n-ngìn ke fûn-fu chhai hò-pa tú chim chhit-pái. Kì chhiu pien-cho chhiang-li. Kì ke phì-ngiuk fu̍k-ngièn to chhiong se-ngìn-è ke khiung-yong.
[15] Nâi-man tai-tén só-yû thèn-tén lòi ke ngìn chón-to sṳ̀n-ngìn ke-vi, khî chhai kì mien-chhièn kóng: “Liá-ha ngài tî, chhù-liáu chhai Yî-set-lie̍t yî-ngoi, chhiòn sṳ-kie mò phe̍t ke chṳ̂n-sṳ̀n Song-ti. Chhiáng ngì chhiu sû-hâ phu̍k-ngìn ke lî-vu̍t â!”
[16] Yî-li-sâ kóng: “Ngài chṳ́-tén ngài só sṳ-fung ke yún-sên Song-chú fat-sṳ, ngài má-ke tû m̀ chiap-su.” Nâi-man kiên-chhṳ̀ oi kì sû, kì hàn-he m̀-hén sû.
[17] Só-yî Nâi-man kóng: “Na-he ngì m̀ chiap-su phu̍k-ngìn ke lî-vu̍t, án-ngiòng, chhiáng pûn ngài chông yit-tui lò-è chai tet-yàng ke nài chón vuk-hâ hi; yîn-vi tui liá-ha hí, chhù-liáu Song-chú yî-ngoi, ngài m̀ hiong phe̍t ke sṳ̀n-mìn hien sêu-fa-chi ya-he khì-thâ ke chi.
[18] Vì-thu̍k yit-hong sṳ, oi khiù Song-chú sa-miên phu̍k-ngìn! Ngài ke chú-ngìn ngi̍p Lìm-mùn-meu pai sṳ̀n-mìn ke sṳ̀-chiet, ngài oi yung sú fù kì ngi̍p-meu, ya oi hàng-lî. Ngài chhai Lìm-mùn-meu hàng-lî ke sṳ, ngien Song-chú sa-miên ngài.”
[19] Yî-li-sâ kóng: “Cho ngì phìn-ôn chón-hi!” Nâi-man chhiu lì-khôi ke-vi. Nâi-man chang hàng mò-kí yén,
[20] sṳ̀n-ngìn Yî-li-sâ ke phu̍k-ngìn Kî-ha̍p-sî sîm-tú sióng: “Ngâ chú-ngìn m̀-sû Nâi-man pan-yong lî-vu̍t chhiu ngiong kì chéu! Kì yin-kôi sû ke Si-li-â-ngìn ke lî-vu̍t chang-chho̍k. Ngài tui yún-sên Song-chú fat-sṳ, ngài oi tûi-tó kì, hiong kì thó-têu tûng-sî.”
[21] Só-yî, Kî-ha̍p-sî hí-sṳ̂n hi-tûi Nâi-man. Nâi-man khon-tó yû-ngìn tûi-lòi, chhiu tui chan-chhâ táng hâ-lòi kien kì, kóng: “Yû má-ke sṳ?”
[22] Kî-ha̍p-sî kóng: “Mò má-ke sṳ! Ngài chú-ngìn phai ngài lòi lâu ngì kóng, thèu-ha yû lióng-ke heu-sâng ke siên-tî tui Yî-fap-lièn sân-khî lòi, kì hî-mong ngì pûn kì-têu sâm-chhiên chak ngiùn-pi lâu lióng-sṳ̂n sâm-fu.”
[23] Nâi-man kóng: “Chhiáng ngì nâ liuk-chhiên chak ngiùn-pi hi!” Kì miên-kióng kì sû, yèn-heu chiông ngiùn-pi chông chhai lióng-chak thoi-é tú, lièn-thùng lióng-sṳ̂n sâm-fu, kâu-pûn chhṳ-kâ ke phu̍k-ngìn, ham kì-têu chhai Kî-ha̍p-sî thèu-chhièn kông-tén hàng.
[24] Kì-têu to Yî-li-sâ he̍t ke sân-kông, Kî-ha̍p-sî chiông ke lióng-thoi tûng-sî pân-ngi̍p vuk-tú, yèn-heu chhiáng Nâi-man ke phu̍k-ngìn chón-hi.
[25] Kî-ha̍p-sî ngi̍p-hi chú-ngìn ke vuk-tú; Yî-li-sâ mun kì: “Kî-ha̍p-sî, ngì hi nai-vi?” Kì en-kóng: “Phu̍k-ngìn mò hi nai-vi.”
[26] Chúng-he Yî-li-sâ kóng: “Ke-ngìn tui chan-chhâ hâ-lòi ngiàng-chiap ngì ke sṳ̀, ngài ke sîm kám m̀-he ya lâu ngì khiung-ha chhai ke-vi? Liá-ha m̀-he chiap-su ngìn ke ngiùn-pi, sâm-fu, kám-lám-yèn, phù-thò-yèn, ngiù-yòng, nù-phu̍k lâu nù-pî ke sṳ̀-chiet!
[27] Yîn-vi án-ngiòng, Nâi-man ke thái-kô-phiang voi chhe-tó ngì sṳ̂n-song lâu ngì ke heu-thoi sṳ̂n-song, chhṳ̍t-to yún-yén.” Kî-ha̍p-sî lì-khôi ke sṳ̀, chhiu chhe-tó thái-kô-phiang, phì-fû chhiong siet án-pha̍k.