[1] Yî-li-sâ kóng: “Ngì-têu oi thâng Song-chú só-kóng ke fa! Song-chú kóng liá hó sêu-sit: Thiên-kông-ngit liá-ke sṳ̀, chhai Sat-mâ-li-â sàng-mùn héu, séu-ma̍k sâm kûng-kîn chṳ́-yû mai yit-chak ngiùn-pi, thai-ma̍k liuk kûng-kîn chṳ́-yû mai yit-chak ngiùn-pi.”
[2] Fù-tén vòng ke kiûn-chóng tui sṳ̀n-ngìn kóng: “Ke he mò khó-nèn ke sṳ. Chhiu-he Song-chú ngiàm-sṳ̀ tá-khôi thiên-chhûng, me-mò khó-nèn!” Yî-li-sâ en kì kóng: “Ngì yit-thin voi chhîn-ngién khon-tó liá-sṳ fat-sên; chúng-he ngì má-ke me sṳ̍t m̀-tó.”
[3] Chhai Sat-mâ-li-â sàng-mùn ngoi, yû si-ke pot thái-kô ke ngìn; kì-têu thai-kâ kâu-thàm kóng: “Ngài-têu cho-má-ke chhô chhai liá-vi tén-sí nè?
[4] Ngài-têu to sàng-tú hi, sàng-tú yû kî-fông, ngài-têu voi chhai ke-vi ngo-sí; ngài-têu chhô chhai liá-vi, ya he tén-sí. Ngài-têu lòi-hi hiong Si-li-â kiûn-chhui thèu-hòng, mò yit-thin kì-têu voi pûn ngài-têu yit-thiàu sâng-lu; kì-têu na-he oi chhṳ̀ ngài-têu, chhiu pûn kì-têu chhṳ̀ hó lé.”
[5] Só-yî kì-têu chhai lìm-am-é ke sṳ̀ hi Si-li-â pîn-yàng. Kì-têu hàng-to yàng-sùn, chúng-he mò khon-tó pan-ke ngìn.
[6] Ngièn-lòi Chú yí-kîn sṳ́ Si-li-â kiûn-chhui thâng-tó thai-chhui pîn-mâ lâu chan-chhâ ke sâng-yîm; kì-têu chhòn-kóng: “Yî-set-lie̍t-vòng mâi-thûng Het-ngìn lâu Âi-khi̍p-ngìn ke-têu vòng lòi kûng-tá ngài-têu!”
[7] Só-yî ke-ngit lìm-am-é, Si-li-â-ngìn chhiòn-phu thò-miang chéu chhiang-chhiang, kì-têu ke chong-phùng, mâ, lì chhiòn-phu mò tai-chéu; kì-têu ke pîn-yàng hàn-he liù chhai ngièn-vi.
[8] Ke si-ke pot thái-kô ke hàng-to yàng-thi, ngi̍p-hi chong-phùng, chhai ke-vi yu-sṳ̍t yu-lîm; kì-têu khon-tó kîm-é, ngiùn-è, lâu sâm-fu chhiu nâ-hi khong hí-lòi, yèn-heu yu ngi̍p-hi nang-ngoi yit-chho chong-phùng, chai-cho khiung-yong ke sṳ.
[9] Heu-lòi kì-têu pí-chhṳ́ kóng: “Ngài-têu mò yin-kôi án-ngiòng cho; ngài-têu yû-hó sêu-sit, cho-m̀-tet m̀ lâu ngìn kóng. Na-he ngài-têu tén-to thiên-kông chêu-sṳ̀n chang kóng, ngài-têu yit-thin voi su-tó hìn-fa̍t. Ngài-têu liá-ha chhiu hi lâu vòng ke kôn-yèn kóng!”
[10] Só-yî kì-têu chón-to Sat-mâ-li-â, hiong chóng sàng-mùn ke ngìn hêm-kóng: “Ngài-têu hi-ko Si-li-â pîn-yàng, mò khon-tó pan-ke ngìn, ya thâng m̀-tó ngìn-sâng. Mâ lâu lì chhiòn-phu hàn thò-tén, chong-phùng ya hàn liù chhai ngièn-vi.”
[11] Chóng-mùn ke hêm hí-lòi, yu chiông sêu-sit chhòn-to vòng-kiûng.
[12] Chúng-he vòng chhai pan-ya hong-hí-lòi, chhiu tui kì ke kôn-yèn kóng: “Ngài lâu ngì-têu kóng, liá he Si-li-â-ngìn ke yîm-mèu! Kì-têu tî ngài-têu liá-vi cho kî-fông, voi ngo-sí, só-yî thiâu-thiâu lì-khôi pîn-yàng, mài-fu̍k chhai thièn-yâ; oi tén ngài-têu chhut-sàng chhìm sṳ̍t-vu̍t, ke-sṳ̀ chhiu cho-tet chiông ngài-têu sâng-sâng chok hí-lòi, hó cham-liâng liá-sàng.”
[13] Vòng ke yit-ke kôn-yèn en-kóng: “Chhiu-chhiong ke-têu sí-thet ke ngìn khiung-yong, sàng-tú só-chhûn ke ngìn-mìn chó-man voi ngo-sí chhiang-chhiang. Só-yî, ngióng m̀ ham kí-ke ngìn, khì ńg-chak chhûn-tó ke mâ, hi chhà-khon to-tái he má-ke sṳ-chhìn.”
[14] Só-yî, kì-têu sién-chhut kí-ke ngìn lòi. Vòng phai liá-têu ngìn chhô lióng-liòng chan-chhâ lâu mâ, chṳ́-sṳ kì-têu hi-tham Si-li-â kiûn-chhui ke sṳ̍t-chi chhìn-hìn.
[15] Liá-têu ngìn yit-chhṳ̍t tûi-to Yok-tan-hò, theu-lu khon-tó Si-li-â-ngìn thò-chéu sṳ̀ fit-thet ke sâm lâu vú-hi, kì-têu chhiu chón-hi po-ko vòng.
[16] Sat-mâ-li-â ke ngìn-mìn kiak-kiak chhut-sàng hi, chhióng Si-li-â-ngìn ke pîn-yàng. Liá-sṳ̀, chhiu-chhiong Song-chú kóng-ko ke: Séu-ma̍k sâm kûng-kîn chṳ́-yû mai yit-chak ngiùn-pi, thai-ma̍k liuk kûng-kîn chṳ́-yû mai yit-chak ngiùn-pi.
[17] Chhai liá yî-chhièn, Yî-set-lie̍t-vòng yû phai fù-tén kì ke kiûn-chóng to sàng mùn-héu chṳ́-fî, liá kiûn-chóng fán-chón pûn ngìn-khiùn tha̍p-sí chhai ke-vi, chhiu-chhiong sṳ̀n-ngìn Yî-li-sâ chhai vòng hi-khon kì ke-sṳ̀ só yi-ngièn ke.
[18] Sṳ̀n-ngìn sṳt tui vòng kóng: “Thiên-kông-ngit liá-ke sṳ̀, chhai Sat-mâ-li-â sàng-mùn héu, séu-ma̍k sâm kûng-kîn chṳ́-yû mai yit-chak ngiùn-pi, thai-ma̍k liuk kûng-kîn chṳ́-yû mai yit-chak ngiùn-pi.”
[19] Fù-tén vòng ke kiûn-chóng tông-sṳ̀ yû tui sṳ̀n-ngìn kóng: “Ke he mò khó-nèn ke sṳ. Chhiu-he Song-chú ngiàm-sṳ̀ tá-khôi thiên-chhûng, me-mò khó-nèn!” Yî-li-sâ en kì kóng: “Ngì yit-thin voi chhîn-ngién khon-tó liá-sṳ fat-sên, chúng-he ngì má-ke me sṳ̍t m̀-tó.”
[20] Liá-fa kó-yèn yin-ngiam, yîn-vi kì pûn sàng mùn-héu ke ngìn-khiùn tha̍p sí-thet.