[1] Yî-set-lie̍t-vòng Yok-ha̍p-sṳ̂ ke lai-é Yok-fà-sṳ̂ chhai-vi thi-ngi ngièn, Yok-â-sṳ̂ ke lai-é Â-mâ-chhia cho Yù-thai-vòng.
[2] Kì ngi-sṳ̍p ńg-se ke sṳ̀ cho vòng, chhai Yâ-lu-sat-lâng thúng-chhṳ ngi-sṳ̍p kiú-ngièn. Kì ke â-mê Yok-yâ-tan he Yâ-lu-sat-lâng-ngìn.
[3] Â-mâ-chhia hàng Song-chú khon-cho chho̍k ke sṳ, chúng-he kì pin-mò cho-to chhiong kiâ chú-siên Thai-ví-vòng án-hó; kì ho̍k kiâ-pâ Yok-â-sṳ̂ só-cho ke thin-thin,
[4] mò chhak-thet sân-kông táng ke sṳ̀n-meu, ngìn-mìn hàn-he chhai ke-vi hien-chi sêu-hiông.
[5] Â-mâ-chhia yit kiên-ku chṳn-khièn, chhiu chhṳ̀-thet ke-têu am-sat kiâ-pâ ke kôn-yèn,
[6] chúng-he kì pin-mò chhṳ̀ kì-têu ke chṳ́-ńg. Kì cheu Song-chú chhai Mô-sî Fap-li̍t-sû chûng ke min-lin lòi-cho; Song-chú kóng: “Yà-ôi mò yin-kôi yîn-vi chṳ́-ńg só-fam ke chhui lòi chhú-sí; chṳ́-ńg ya mò yin-kôi yîn-vi yà-ôi só-fam ke chhui lòi chhú-sí. Tak-sà yin-tông tâm-tông chhṳ-kâ só-fam ke chhui.”
[7] Â-mâ-chhia chhai Sí-hói nàm-phién ke Yàm-kuk chhṳ̀-thet yit-van Yî-tûng-ngìn, yu cham-liâng Sî-lâ-sàng, chiông kì ke miàng kói-cho Yok-thiap, chhṳ̍t-to kîm-pû-ngit.
[8] Â-mâ-chhia phai sṳ́-chá hi kien Yâ-fu ke sûn-é, Yok-ha̍p-sṳ̂ ke lai-é Yî-set-lie̍t-vòng Yok-fà-sṳ̂, kit kì kóng: “Ngài-têu lòi-hi chan-chhòng piang sû-yàng!”
[9] Chúng-he Yî-set-lie̍t-vòng Yok-fà-sṳ̂ phai sṳ́-chá hi kien Yù-thai-vòng Â-mâ-chhia, en kì kóng: “Yû yit-pái, Lì-pâ-nun sân-táng ke yit-thèu net-è tui yit-thèu hiông-pak-su kóng: ‘Chiông ngì ke moi-é ka-pûn ngài ke lai-é â!’ Mò sióng-tó, yû yit-chak yâ-chhu tui ke-vi ko, ke-thèu net-è sa pûn kì chhio-thet.
[10] Â-mâ-chhia â, tá-yàng Yî-tûng-ngìn ngì ke sîm chhiu án kiêu-ngau ô! Chhai vuk-hâ hióng-su ngì ke kông-yùng chhiu hó lé; hò má sí-khú ngiâ liá-ke châi-fo, hoi ngì lâu Yù-thai ngìn-mìn khiung-ha me̍t-mòng?”
[11] Â-mâ-chhia m̀-thâng. Só-yî Yî-set-lie̍t-vòng Yok-fà-sṳ̂ tai-liâng kiûn-chhui, chhai Yù-thai ke Pak-Sṳ-ma̍k lâu Yù-thai-vòng Â-mâ-chhia siông-chhṳ̀.
[12] Yù-thai kiûn-chhui tá-sû, só-yû sṳ-pîn chhiòn-phu chéu-chón vuk-hâ hi.
[13] Yî-set-lie̍t-vòng Yok-fà-sṳ̂ chhai Pak-Sṳ-ma̍k chok-tó Â-ha̍p-chhia ke sûn-é, Yok-â-sṳ̂ ke lai-é Yù-thai-vòng Â-mâ-chhia, yèn-heu chin-kûng Yâ-lu-sat-lâng, chiông Yî-fap-lièn-mùn to Kok-mùn thai-yok lióng-pak kûng-chhak chhòng ke yit-thon sàng-chhiòng chhiòn-phu chhak-thet.
[14] Yok-fà-sṳ̂ yu chiông Song-chú ke sṳn-thien tú só-yû ke kîm-ngiùn, yung-phín, lâu vòng-kiûng ke chhòi-pó chhiòn-phu tai-chón Sat-mâ-li-â, ya tai-têu ngìn cho ngìn-chṳt.
[15] Yok-fà-sṳ̂ khì-thâ ke sṳ, pâu-hàm kì lâu Yù-thai-vòng Â-mâ-chhia siông-chhṳ̀ liá-têu yîn-yúng ke sṳ, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[16] Yok-fà-sṳ̂ sí-thet, chong chhai Sat-mâ-li-â, Yî-set-lie̍t ke vòng-sṳt fùn-mu tú; kì ke lai-é Yâ-lò-pô-ôn ngi-sṳ sṳ̀n-chiap kì cho vòng.
[17] Yî-set-lie̍t-vòng Yok-ha̍p-sṳ̂ ke lai-é Yok-fà-sṳ̂ sí-heu, Yù-thai-vòng Yok-â-sṳ̂ ke lai-é Â-mâ-chhia hàn sṳ̍t-kâ sṳ̍p-ńg ngièn.
[18] Â-mâ-chhia khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[19] Chhai Yâ-lu-sat-lâng, yû-ngìn chho-fán oi mèu-sat Â-mâ-chhia, só-yî kì thò-to Lâ-kit-sàng; chúng-he chho-fán ke phai-ngìn kiuk-to ke-vi, chiông kì chhṳ̀-thet.
[20] Yû-ngìn chiông kì ke sṳ̂-thí yung mâ-é chai-chón Yâ-lu-sat-lâng, chong chhai Thai-ví-sàng ke vòng-sṳt fùn-mu tú.
[21] Só-yû ke Yù-thai ngìn-mìn sat-li̍p kiâ sṳ̍p-liuk se ke lai-é Vû-sî-ngâ sṳ̀n-chiap kì cho vòng.
[22] Â-mâ-chhia-vòng sí-thet yî-heu, Vû-sî-ngâ chiông Yî-lâ-thâ sû chón-lòi kûi-su̍k Yù-thai, chhùng-sîn siû-kien.
[23] Yù-thai-vòng Yok-â-sṳ̂ ke lai-é Â-mâ-chhia chhai-vi thi sṳ̍p-ńg ngièn, Yok-fà-sṳ̂ ke lai-é Yâ-lò-pô-ôn ngi-sṳ cho Yî-set-lie̍t-vòng; kì chhai Sat-mâ-li-â thúng-chhṳ si-sṳ̍p yit-ngièn.
[24] Kì hàng Song-chú khon-cho sià-ok ke sṳ, ho̍k kiâ chú-siên Nì-pat ke lai-é Yâ-lò-pô-ôn ke fái mù-yong, hoi Yî-set-lie̍t-ngìn fam-chhui.
[25] Kì chiông só-yû su̍k Yî-set-lie̍t ke thú-thi sû chón-lòi, tui pet-fông ke Ha̍p-mâ ai-héu chhṳ̍t-to nàm-fông ke Sí-hói. Liá he Song-chú — Yî-set-lie̍t ke Song-ti thûng-ko Kì ke phu̍k-ngìn Kâ-thi̍t-Hî-fut-ngìn Â-mí-thai ke lai-é, siên-tî Yok-nâ só yi-ngièn ke.
[26] Song-chú khon-tó só-yû ke Yî-set-lie̍t-ngìn, mò-lun chhṳ-yù ya-he mò chhṳ-yù ke, su-tó tông-thai ke khú-nan, mò-ngìn pông-chhu kì-têu.
[27] Song-chú m̀ phan-tet Yî-set-lie̍t-ngìn me̍t-thet hi, só-yî Kì thûng-ko Yok-fà-sṳ̂ ke lai-é Yâ-lò-pô-ôn ngi-sṳ chṳ́n-kiu kì-têu.
[28] Yâ-lò-pô-ôn ngi-sṳ khì-thâ ke sṳ, kì chhai chan-chhòng ke yúng-kám lâu kì ngióng-pân chiông Thai-mâ-sṳ-kiet lâu Ha̍p-mâ sû chón-lòi kûi-su̍k Yî-set-lie̍t, chhiòn-phu ki chhai Yî-set-lie̍t Lie̍t-vòng Sṳ́ tî-poi.
[29] Yâ-lò-pô-ôn ngi-sṳ sí-thet, chong chhai Yî-set-lie̍t ke vòng-sṳt fùn-mu tú; kì ke lai-é Sat-kâ-li-ngâ sṳ̀n-chiap kì cho vòng.