[1] Song-chú yung liùng-kién-fûng chiap Yî-li-â sṳ̂n-thiên ke sṳ̀-chiet to lé. Yî-li-â lâu Yî-li-sâ tui Kit-kap chhut-fat;
[2] chhai lu-song, Yî-li-â tui Yî-li-sâ kóng: “Ngì liù chhai liá-vi; Song-chú fûn-fu ngài to Pak-thi̍t-li hi.” Yî-li-sâ en-kóng: “Ngài chṳ́-tén yún-sên ke Song-chú lâu ngì fat-sṳ, ngài chhie̍t-tui m̀ lì-khôi ngì.” Só-yî kì lióng-sà khiung-ha to Pak-thi̍t-li hi.
[3] Yû yit-khiùn he̍t chhai Pak-thi̍t-li ke siên-tî chhut-lòi kien Yî-li-sâ, mun kì: “Ngì tî kîm-pû-ngit Song-chú oi chiông ngì ke sîn-sâng chiap-chéu mò?” Yî-li-sâ kóng: “Ngài tî; chúng-he ngì-têu mo̍k-kóng liá-sṳ!”
[4] Yî-li-â tui Yî-li-sâ kóng: “Ngì liù chhai liá-vi; Song-chú fûn-fu ngài to Yâ-li-kô hi.” Yî-li-sâ en-kóng: “Ngài chṳ́-tén yún-sên ke Song-chú lâu ngì fat-sṳ, ngài chhie̍t-tui m̀ lì-khôi ngì.” Só-yî kì lióng-sà khiung-ha to Yâ-li-kô hi.
[5] Yû yit-khiùn he̍t chhai Yâ-li-kô ke siên-tî lòi kien Yî-li-sâ, mun kì: “Ngì tî kîm-pû-ngit Song-chú oi chiông ngì ke sîn-sâng chiap-chéu mò?” Yî-li-sâ kóng: “Ngài tî; chúng-he ngì-têu mo̍k-kóng liá-sṳ!”
[6] Yî-li-â tui Yî-li-sâ kóng: “Ngì liù chhai liá-vi; Song-chú fûn-fu ngài to Yok-tan-hò hi.” Yî-li-sâ en-kóng: “Ngài chṳ́-tén yún-sên ke Song-chú lâu ngì fat-sṳ, ngài chhie̍t-tui m̀ lì-khôi ngì.” Só-yî kì lióng-sà khiung-ha hàng.
[7] Yû ńg-sṳ̍p ke siên-tî thèn kì lióng-sà to Yok-tan-hò hi. Yî-li-â lâu Yî-li-sâ thìn chhai hò-pa sùn; ńg-sṳ̍p ke siên-tî khî chhai lì kì-têu mò kí-yén ke thi-fông.
[8] Yî-li-â thot-hâ kì ke ngoi-sâm, chiông kì kién hí-lòi ma̍k súi, súi chhiu fûn-cho lióng-phién. Kì lâu Yî-li-sâ chhiu tui châu-thi song hàng ko-hi, to hò-pa ke-phién.
[9] Kì-têu ko-hò yî-heu, Yî-li-â mun Yî-li-sâ: “Ngài màng pûn Song-chú chiap-hi lì-khôi ngì yî-chhièn, ngì oi ngài vi ngì cho má-ke?” Yî-li-sâ kóng: “Ngien kám-thung ngì ke lìn kâ-phi chhòn-pûn ngài, sṳ́ ngài sàng-cho ngì ke ki-sṳ̀n-ngìn.”
[10] Yî-li-â kóng: “Ngì só yêu-khiù ke chhin nàn-tet. M̀-ko, ngì na-he yû khon-tó ngài pûn Song-chú chiap-hi, ngì chhiu voi tet-tó; na-mò, ngì chhiu tet m̀-tó.”
[11] Kì-têu kín-hàng kín-kóng. Fut-yèn-kiên, yû kí-thiàu fó-mâ lâi-tén yit-liòng fó chan-chhâ lòi-to kì-têu chûng-kiên, chiông kì lióng-sà kak-khôi, Yî-li-â chhai yit-chhṳn liùng-kién-fûng tông-chûng pûn Song-chú chiap sông-thiên hi.
[12] Yî-li-sâ khon-tó chhiu thai-sâng hêm: “Â-pâ â, â-pâ â! Yî-set-lie̍t ke chan-chhâ lâu khì-pîn â!” Yî-li-sâ chhiu mò-chai khon-tó Yî-li-â. Yî-li-sâ tông pî-sông, chhiu chiông chhṳ-kâ ke sâm chhá-cho lióng-sak,
[13] yèn-heu ngiâm-hí Yî-li-â tiet hâ-lòi ke ngoi-sâm, chón-to Yok-tan hò-sùn khî-tén.
[14] Kì yung Yî-li-â ke ngoi-sâm ma̍k súi, kóng: “Song-chú — Yî-li-â ke Song-ti chhai nai-vi?” Yèn-heu, Yî-li-sâ yu ma̍k súi, súi chhiu fûn-cho lióng-phién, pûn kì hàng-to hò-pa ke-phién hi.
[15] Yâ-li-kô lòi ke ńg-sṳ̍p ke siên-tî yén-yén khon-tó, chhiu kóng: “Kám-thung Yî-li-â ke lìn yí-kîn lìm chhai Yî-li-sâ sṳ̂n-song.” Kì-têu chhiu hi ngiàng-chiap kì, phu̍k chhai kì mien-chhièn,
[16] kóng: “Ngài-têu liá-vi yû ńg-sṳ̍p ke ngìn, chhiòn-phu tông-chap; chhiáng pûn ngài-têu hi chhìm ngì ke sîn-sâng. Khó-nèn Song-chú ke Lìn tai-chéu kì, chiông kì piong chhai m̀-tî nai-chak sân-táng ya-he sân-lak.” Yî-li-sâ en-kóng: “M̀-sṳ́ phai-ngìn hi.”
[17] Chúng-he, kì-têu khiòng-khiòng oi hi, Yî-li-sâ chhiu yù-chhai kì-têu hi. Ke ńg-sṳ̍p ke ngìn chhìm sâm-ngit ya mò chhìm-tó.
[18] Só-yî kì-têu chón-to Yî-li-sâ ke-vi. Yî-li-sâ chhai Yâ-li-kô tén kì-têu; kì tui kì-têu kóng: “Ngài kám m̀-he lâu ngì-têu kóng-ko m̀-sṳ́ hi?”
[19] Yû-ngìn tui Yâ-li-kô-sàng lòi kien Yî-li-sâ, kóng: “Sîn-sâng, ngì tî liá-sàng ke thi-tiám tông-hó; chúng-he liá-vi ke súi m̀-hó, thú-thi m̀-phì m̀-voi chhut-sán.”
[20] Yî-li-sâ kóng: “Nâ yit-chak sîn-vón chông-têu yàm lòi.” Kì-têu chhiu nâ-lòi pûn kì.
[21] Yî-li-sâ hàng-to súi-ngièn-thèu, chiông yàm tó chhai súi-tú, kóng: “Song-chú án-ngiòng kóng: ‘Ngài sṳ́ liá-súi pien-hó, m̀-voi chai yû sí-mòng, ya m̀-voi chai yáng-hióng chhut-sán.’ ”
[22] Só-yî ke-súi pien-hó chhṳ̍t-to kîm-pû-ngit, chhiu-chhiong Yî-li-sâ só-kóng ke.
[23] Yî-li-sâ tui Yâ-li-kô sông Pak-thi̍t-li hi; chhai lu-hong, kì tù-tó yit-khiùn se-ngìn-è tui sàng-tú chhut-lòi. Kì-têu sâu-nat kì, hêm-kóng: “Kông-thèu-è, hó hi lé! Kông-thèu-è, hó hi lé!”
[24] Yî-li-sâ chón-sṳ̂n ko-lòi, hìm kì-têu, fung Song-chú ke miàng chu-chú kì-têu. Chhiu yû lióng-chak yùng-mà tui su-nà tú chhut-lòi, chhá-lan kì-têu tông-chûng ke si-sṳ̍p ngi-sà.
[25] Yî-li-sâ tui Pak-thi̍t-li to Kâ-me̍t-sân hi, yèn-heu yu chón-to Sat-mâ-li-â.