[1] Ke-sṳ̀, siên-tî Yî-li-sâ ham yit-ke heu-sâng siên-tî lòi, fûn-fu kì: “Kiak-kiak kiê-hó yêu-tai, tai liá-âng kám-lám-yù to Kî-lie̍t ke Lâ-ma̍t hi.
[2] To ke-vi, ngì chhiu chhìm Yok-sâ-fap ke lai-é Yâ-fu, chhiu-he Nèn-sṳ ke sûn-é, tai kì lì-khôi kì ke thùng-phân, to yit-kiên mò-ngìn ke kiên-fòng hi,
[3] chiông liá kám-lám-yù tó chhai kì ke thèu-nà táng, kóng: ‘Song-chú siên-pu kóng: Ngài kò-yù sat-li̍p ngì cho Yî-set-lie̍t ke vòng.’ Yèn-heu ngì chhiu khôi-mùn, kiak-kiak chéu, m̀-hó thìn-thò.”
[4] Só-yî, ke heu-sâng siên-tî chhiu to Kî-lie̍t ke Lâ-ma̍t hi.
[5] Kì chhai ke-vi khon-tó yû-têu kiûn-kôn tú-hó chhô khiung-ha, chhiu kóng: “Chiông-kiûn, ngài yû fa oi tui ngì kóng.” Yâ-fu mun: “Ngài-têu tông-chûng ngì oi lâu nai-vi kóng-fa nè?” Kì kóng: “Chiông-kiûn, chhiu-he ngì.”
[6] Só-yî kì lióng-sà chin-ngi̍p yit-kiên vuk-tú; ke heu-sâng siên-tî chiông kám-lám-yù tó chhai Yâ-fu thèu-nà táng, tui kì kóng: “Song-chú — Yî-set-lie̍t ke Song-ti án-ngiòng siên-pu: ‘Ngài kò-yù sat-li̍p ngì cho Ngài ke chṳ́-mìn Yî-set-lie̍t ke vòng.
[7] Ngì oi chhṳ̀-sí ngiâ chú-ngìn Â-ha̍p ke chhiòn-kâ. Ngài án-ngiòng cho, he oi vi Ngài ke-têu siên-tî lâu khì-thâ phu̍k-ngìn pûn Yâ-sé-pit chhṳ̀-sí lòi po yên-sù.
[8] Só-yû Â-ha̍p vuk-hâ ke ngìn lâu heu-thoi chhiòn-phu oi me̍t-mòng; Ngài oi tui Yî-set-lie̍t tông-chûng chhù-thet Â-ha̍p kâ-chhu̍k só-yû ke nàm-ngìn, mò-lun cho nù-chhòi ya-he chhṳ-yù sṳ̂n ke chhiòn-phu oi chhù-thet.
[9] Ngài oi chhiong tui-thai Nì-pat ke lai-é Yâ-lò-pô-ôn-vòng lâu Â-hî-ngâ ke lai-é Pâ-sâ-vòng án-ngiòng lòi tui-thai Â-ha̍p ke kâ-chhu̍k.
[10] Kóng-tó Yâ-sé-pit, mò-ngìn voi hi mài-chong kì; kì ke sṳ̂-thí voi chhai Yâ-sṳ̂-lie̍t thi-fông pûn kiéu-è sṳ̍t-thet.’ ” Ke heu-sâng siên-tî yit kóng-so̍t chhiu khôi-mùn chhin-miang chéu.
[11] Yâ-fu chón-to thùng-sṳ ke-vi; kì-têu mun kì: “Yû má-ke sṳ? Ke tiên-é lòi khon ngì cho-má-ke?” Yâ-fu en-kóng: “Ngì-têu sṳt kì, ya tî kì voi kóng má-ke.”
[12] Kì-têu kóng: “Lon-kóng, mò kóng ngài-têu ngióng-voi tî!” Yâ-fu kóng: “Kì lâu ngài kóng, Song-chú án-ngiòng siên-pu: ‘Ngài kò-yù sat-li̍p ngì cho Yî-set-lie̍t ke vòng.’ ”
[13] Yâ-fu ke-têu thùng-sṳ kiak-kiak chiông kì-têu ke ngoi-sâm phû chhai ton-é táng-kô, ham Yâ-fu khî sông-hi, yèn-heu phùn yòng-kok, thai-sâng hêm-kóng: “Yâ-fu cho vòng lé!”
[14] Án-ngiòng, Nèn-sṳ ke sûn-é, Yok-sâ-fap ke lai-é Yâ-fu chhiu kie-va̍k oi fán Yok-làn. (Siên-chhièn Yok-làn lâu Yî-set-lie̍t chung-ngìn yîn-vi Si-li-â-vòng Ha̍p-siet ke yèn-ku, khon-sú Kî-lie̍t ke Lâ-ma̍t.
[15] Ke-sṳ̀ Yok-làn-vòng chhai Yâ-sṳ̂-lie̍t liàu-sông, yîn-vi kì chhai Lâ-ma̍t chan-chhòng lâu Si-li-â-vòng Ha̍p-siet siông-chhṳ̀ ke sṳ̀ chho̍k-sông.) Yâ-fu tui kì ke-têu thùng-sṳ kóng: “Ngì-têu na yúng-fu ngài, chhiu m̀-hó pûn ngìn thò-chhut Lâ-ma̍t to Yâ-sṳ̂-lie̍t hi po sêu-sit, yit-ke ya cho-m̀-tet.”
[16] Só-yî Yâ-fu chhô-sông kì ke chan-chhâ, hi Yâ-sṳ̂-lie̍t. Yok-làn ke sông hàn-màng hó; Yù-thai-vòng Â-ha̍p-chhia yí-kîn to ke-vi hi khon kì.
[17] Chhai Yâ-sṳ̂-lie̍t sú-mong thòi-táng khî ke sú-ví khon-tó Yâ-fu tai-tén yit-khiùn ngìn lòi, chhiu hêm: “Ngài khon-tó yit-khiùn ngìn hiong liá-phién lòi!” Yok-làn kóng: “Phai yit-ke khì-pîn hi ngiàng-chiap kì-têu, mun kì-têu he tai-lòi phìn-ôn mò.”
[18] Khì-pîn chhiu hi ngiàng-chiap Yâ-fu, tui kì kóng: “Vòng mun, ngì-têu he tai-lòi phìn-ôn mò.” Yâ-fu kóng: “He m̀-he phìn-ôn kôn ngì má-ke sṳ? Ngì thèn chhai ngài heu-poi!” Sú-mong ke ngìn po-ko kóng: “Sṳ́-chá to kì-têu ke-vi, sa mò chón-lòi.”
[19] Vòng yu phai nang-ngoi yit-ke khì-pîn hi. Liá-ngìn to kì-têu ke-vi, kóng: “Vòng mun, ngì-têu he tai-lòi phìn-ôn mò.” Yâ-fu yu en-kóng: “Phìn-ôn mò phìn-ôn kôn ngì má-ke sṳ? Ngì thèn chhai ngài heu-poi!”
[20] Sú-mong ke ngìn yu po-ko kóng: “Sṳ́-chá to kì-têu ke-vi, ya mò chón-lòi.” Kì yu kóng: “Sṳ́ chan-chhâ ke ngìn tông-khòng, chhiong he Nèn-sṳ ke sûn-é Yâ-fu!”
[21] Yok-làn ha-lin kóng: “Yi-phi ngài ke chan-chhâ!” Chan-chhâ yi-phi hó, Yî-set-lie̍t-vòng Yok-làn lâu Yù-thai-vòng Â-ha̍p-chhia chhiu chhṳ-kâ chhô chhṳ-kâ ke chan-chhâ chhut-hi ngiàng-chiap Yâ-fu. Kì-têu chhai Yâ-sṳ̂-lie̍t-ngìn Nâ-pak ke thièn-tú tù-tó kì.
[22] Yok-làn mun kì: “Yâ-fu, ngì he tai-lòi phìn-ôn mò?” Yâ-fu en-kóng: “Ngài-têu koet-nui hàn-yû án-tô ngiâ-mê Yâ-sé-pit só-hàng ke yìm-lon lâu sià-su̍t, ngióng-voi yû phìn-ôn?”
[23] Yok-làn vat-chón chan-chhâ thò-chéu, hêm-kóng: “Â-ha̍p-chhia â, Yâ-fu chho-fán lé!”
[24] Yâ-fu chhin-miang lâi-kiûng, sa-tó Yok-làn ke poi-nòng, yit-chien chhôn-sîm; Yok-làn vang chhai chan-chhâ táng sí-thet.
[25] Yâ-fu tui kì ke chhu-sú Pit-kap kóng: “Chiông kì ke sṳ̂-thí fit chhai Yâ-sṳ̂-lie̍t-ngìn Nâ-pak ke thièn-tú! Ki-tet ngì lâu ngài sṳt khiung-ha thèn Yok-làn ke â-pâ Â-ha̍p heu-poi sṳ́-chhâ mò; Song-chú sṳt tui Â-ha̍p kóng-ko án-ngiòng ke yi-ngièn:
[26] ‘Ngài chhô-pû-ngit khon-tó Nâ-pak lâu kì ke-têu lai-é pûn-ngìn mèu-sat; Ngài yit-thin oi chhai liá-te thièn-tú chit-fa̍t ngì!’ Liá chhiu-he Song-chú kóng ke. Só-yî, ngì oi chiông Yok-làn ke sṳ̂-thí fit chhai Nâ-pak ke thièn-tú, sṳ̍t-hien Song-chú ke fa.”
[27] Yù-thai-vòng Â-ha̍p-chhia yit khon-tó só fat-sên ke sṳ, chhiu chhô chan-chhâ hiong Pak-Ha̍p-kôn-sàng thò-chéu. Yâ-fu chhai heu-poi tûi; kì min-lin phu-ha: “Chiông kì ya chhṳ̀-thet!” Só-yî, chhai Â-ha̍p-chhia ke chan-chhâ sṳ́-hiong Kû-ngí ke lu-song, khiun Yî-pak-lièn ke thi-fông, Yâ-fu ke phu-ha chiông kì sa-to chho̍k-sông. Chúng-he Â-ha̍p-chhia hàn-he hiong-chhièn chéu, chhṳ̍t-to Mí-kit-tô-sàng chang sí chhai ke-vi.
[28] Kì ke phu-ha yung chan-chhâ chai kì ke sṳ̂-thí chón Yâ-lu-sat-lâng, chong chhai Thai-ví-sàng ke vòng-sṳt fùn-mu tú.
[29] Â-ha̍p-chhia cho Yù-thai-vòng ke sṳ̀ he Yî-set-lie̍t-vòng Â-ha̍p ke lai-é Yok-làn chhai-vi ke thi sṳ̍p-yit ngièn.
[30] Yâ-fu to Yâ-sṳ̂-lie̍t. Yâ-sé-pit thâng-tó só fat-sên ke sṳ, chhiu sṳ̂-thèu tá-pan, tui vòng-kiûng ke yit-ke chhûng-mùn hiong-ngoi khon.
[31] Yâ-fu tui sàng-mùn ngi̍p-lòi ke sṳ̀, Yâ-sé-pit hêm-kóng: “Ngì liá-chak chhiong Sîm-li mèu-sat vòng ke hiûng-sú, ngì voi tai-lòi phìn-ôn mò?”
[32] Yâ-fu ngo-thèu khon chhûng-é, hêm-kóng: “Má-ngìn yúng-fu ngài? Má-ngìn?” Yû lióng-sâm ke thai-kam chhiu tui chhûng-mùn tâm-thèu khon-tén kì.
[33] Yâ-fu tui kì-têu kóng: “Chiông kì fit hâ-lòi!” Kì-têu chhiu chiông Yâ-sé-pit fit hâ-lòi. Kì ke hiet phun-to chhiòng-táng lâu mâ-é. Yâ-fu sṳ́ chan-chhâ chan-ko kì ke sṳ̂-thí.
[34] Yâ-fu ngi̍p-hi vòng-kiûng, yu-sṳ̍t yu-lîm, yèn-heu kóng: “Chiông liá-ke su chu-chú ke fu-ngìn-kâ kông-hi mài-thet; yîn-vi kì he vòng ke moi-é.”
[35] Chúng-he ke-têu hi mài kì ke ngìn chṳ́-yû chhìm-tó kì ke thèu-nà-hok lâu sú-kiok ke kut-thèu.
[36] Kì-têu chón-hi po-ko Yâ-fu ke sṳ̀, kì kóng: “Liá chhiu-he Song-chú thûng-ko Kì phu̍k-ngìn Thì-sṳ̂-pí-ngìn Yî-li-â só-kóng oi fat-sên ke sṳ. Kì kóng: ‘Kiéu-è oi chhai Yâ-sṳ̂-lie̍t ke thi-fông sṳ̍t Yâ-sé-pit ke sṳ̂-thí;
[37] chhûn-tó ke sṳ̂-thí oi chhiong thièn-tú ke pun-tôi, mò-ngìn ngin tet-chhut ke he Yâ-sé-pit.’ ”