[1] Yî-set-lie̍t-vòng Yî-lâ ke lai-é Hò-se-â chhai-vi thi-sâm ngièn, Â-ha̍p-sṳ̂ ke lai-é Hî-sî-kâ cho Yù-thai-vòng.
[2] Ke-sṳ̀ Hî-sî-kâ ngi-sṳ̍p ńg-se; kì chhai Yâ-lu-sat-lâng thúng-chhṳ ngi-sṳ̍p kiú-ngièn. Kiâ-mê ôn-to Â-pí-ngâ, he Sat-kâ-li-ngâ ke moi-é.
[3] Hî-sî-kâ ho̍k kiâ chú-siên Thai-ví-vòng ke mù-yong, hàng Song-chú khon-cho chho̍k ke sṳ.
[4] Kì chhù-thet sân-kông táng ke sṳ̀n-meu, chhak-thet sa̍k-chhû, chám-thet Â-sa-lâ ńg-sṳ̀n ke chhû-siong, yu tá-sui Mô-sî só-chho ke thùng-sà — Nì-fut-sṳ-tan, yîn-vi Yî-set-lie̍t ngìn-mìn chhṳ̍t-to ke-sṳ̀ hàn hiong kì sêu-hiông.
[5] Hî-sî-kâ sin-kho Song-chú — Yî-set-lie̍t ke Song-ti; chhai kì chhièn-heu ke Yù-thai lie̍t-vòng, mò yit-ke lâu kì pí é-tet.
[6] Kì tui Song-chú chûng-sîm, m̀-sṳt vì-poi Song-chú; kì kiún-sṳ́m chûn-sú Song-chú pûn Mô-sî só-yû ke kie-min.
[7] Só-yî Song-chú lâu kì khiung-ha; kì só-cho ke chhiòn-phu sun-li. Kì fán Â-sut fòng-ti, m̀-hén fu̍k-sṳ kì.
[8] Kì tá-yàng Fî-li-sṳ-ngìn, chiông kì-têu ke thú-thi, pâu-hàm Kâ-sat lâu si chû-vì ke thi-khî, tui sú-mong-thòi to fòng-ví-sàng, chhiòn-phu cham-liâng lé.
[9] Hî-sî-kâ-vòng chhai-vi thi-si ngièn, ya chhiu-he Yî-lâ ke lai-é Hò-se-â-vòng thúng-chhṳ Yî-set-lie̍t thi-chhit ngièn, Â-sut fòng-ti Sat-man-yî-set chhîm-lio̍k Yî-set-lie̍t, vì-kûng Sat-mâ-li-â.
[10] Pâu-vì sâm-ngièn heu, chhiu cham-liâng Sat-mâ-li-â; liá he Hî-sî-kâ chhai-vi thi-liuk ngièn, Yî-set-lie̍t-vòng Hò-se-â chhai-vi ke thi-kiú ngièn fat-sên ke.
[11] Â-sut fòng-ti chiông Yî-set-lie̍t-ngìn chok-to Â-sut, chiông kì-têu fûn-san to Ha̍p-la̍p-sàng, Kô-san-khî ke Ha̍p-pok-hò fu-khiun, lâu Mí-tí-â-ngìn ke sàng-sṳ hi he̍t.
[12] Sat-mâ-li-â pûn-ngìn cham-liâng he yîn-vi Yî-set-lie̍t-ngìn m̀ thâng-chhiùng Song-chú — kì-têu ke Song-ti, vì-poi Song-chú lâu kì-têu só-li̍p ke yok, chhiu-he Song-chú ke phu̍k-ngìn Mô-sî só fûn-fu yit-chhiet ke fap-li̍t; kì-têu m̀ thâng-chhiùng, ya m̀ chûn-sú.
[13] Hî-sî-kâ-vòng chhai-vi thi sṳ̍p-si ngièn, Â-sut fòng-ti Sî-nâ-kî-li̍p kûng-tá Yù-thai só-yû ke fòng-ví-sàng, chiông kì-têu cham-liâng.
[14] Yù-thai-vòng Hî-sî-kâ phai-ngìn to Lâ-kit hi kien Â-sut fòng-ti, kóng: “Ngài tet-chhui ngì; chhiáng ngì thui-pîn! Ngài tap-yin ngì só-yû ke yêu-khiù.” Â-sut fòng-ti fa̍t Yù-thai-vòng Hî-sî-kâ yit-van kûng-kîn ke ngiùn-è lâu yit-chhiên kûng-kîn ke kîm-é.
[15] Hî-sî-kâ chiông Song-chú ke sṳn-thien lâu vòng-kiûng pó-khu tú ke ngiùn-è chhiòn-phu sung ko-hi,
[16] yu chiông sṳn-thien mùn-táng ke kîm-é lâu pâu thien-mùn chhû-é ke kîm-é chhiòn-phu pok hâ-lòi, chhiòn-phu sung-pûn Â-sut fòng-ti.
[17] Â-sut fòng-ti tui Lâ-kit phai thai-kiûn to Yâ-lu-sat-lâng kûng-tá Hî-sî-kâ-vòng; kì ke ngièn-soi, sṳ-ví-chóng lâu thai-chiong tai-liâng kiûn-chhui. Kì-têu yit-to Yâ-lu-sat-lâng, chhiu pài-chhṳn chhai song-chhṳ̀ ke súi-kiêu sùn, chhai thûng-to ngiam-pu kûng-chhòng ke thai-lu hong.
[18] Kì-têu fû-ham vòng ke sṳ̀, Hî-sî-kâ ke sâm-ke thai-sṳ̀n chhut-lòi kien kì-têu; liá sâm-ke thai-sṳ̀n he: Hî-le̍t-kâ ke lai-é vòng-kiûng chúng-kón Yî-li-â-kin, vòng-sṳt sû-ki Sa-pak-nâ, Â-sat ke lai-é li̍t-sṳ́-kôn Yok-â.
[19] Â-sut ke thai-chiong tui kì-têu kóng: “Ngì-têu hi lâu Hî-sî-kâ kóng, Â-sut thai fòng-ti án-ngiòng kóng: ‘Ngì phìn má-ke án yû pá-ak?
[20] Ngì láu-tó mai choi-fâ chhiu yû siông-chhṳ̀ ke kie-mèu lâu nèn-li̍t he-mò? Ngì kho má-ngìn sióng-oi fán ngài?
[21] Ngì m̀-sṳ́ sióng Âi-khi̍p voi lòi pông-chhu ngì, ke chhiu-chhiong khú-tén yit-kî pit-thet ke lù-chuk chún-cho koái-kun-é hàng-lu; kì voi chhiuk-chhôn ngìn ke sú. Âi-khi̍p-vòng tui-fu só-yû thèu-kho kì ke ngìn chhiu-he án-ngiòng.
[22] Khó-nèn ngì-têu voi tui ngài kóng: Ngài-têu yí-kho Song-chú — ngài-têu ke Song-ti. Chúng-he, Hî-sî-kâ kám m̀-he fi-thet Kì sân-táng ke meu lâu chi-thàn? Kì kám m̀-he fûn-fu Yù-thai lâu Yâ-lu-sat-lâng ke ngìn-mìn, tân-chhiang cho-tet chhai Yâ-lu-sat-lâng ke chi-thàn kin-pai Song-chú mâ?’
[23] Liá-ha ngài yung ngâ chú Â-sut fòng-ti ke miàng-ngi lâu ngì tú: Na-he ngì nèn chhìm-chhut lióng-chhiên khì-pîn, ngài chhiu sung ngì lióng-chhiên chak chan-mâ!
[24] Khì-sṳ̍t, ngì lièn Â-sut kiûn-chhui chûng chui-se ke kiûn-kôn ya tá m̀-yàng, ngì hàn nong-sióng oi kho Âi-khi̍p ke chan-chhâ khì-pîn!
[25] Liá-ha ngài lòi kûng-tá fí-me̍t liá thi-fông, kám m̀-he Song-chú ke yi-sṳ? Song-chú chhîn-chhṳ fûn-fu ngài lòi kûng-tá fí-me̍t liá-ke koet-kâ.”
[26] Yèn-heu, Yî-li-â-kin, Sa-pak-nâ, lâu Yok-â tui ke thai-chiong kóng: “Sîn-sâng, chhiáng yung Â-làn-fa lâu phu̍k-ngìn kóng-fa; ngài-têu thâng tet-sṳt. M̀-hó yung Hî-pak-lòi-fa kóng, yîn-vi sàng-lèu táng ke ngìn-mìn chhiòn-phu chhai ke-vi thâng.”
[27] Thai-chiong kóng: “Ngì-têu láu-tó fòng-ti ham ngài tân-tân tui ngì-têu lâu vòng kóng liá-têu fa mò? Ngài ya kám m̀-he tui ke-têu chhô chhai sàng-lèu táng ke ngìn-mìn kóng, kì-têu lâu ngì-têu khiung-yong, chhiòn-phu voi sṳ̍t chhṳ-kâ ke sṳ́, lîm chhṳ-kâ ke ngiau?”
[28] Só-yî, thai-chiong khî chhut-lòi, yung Hî-pak-lòi-fa thai-sâng hêm-kóng: “Ngì-têu oi thâng Â-sut thai fòng-ti ke fa!
[29] Fòng-ti kín-ko ngì-têu: M̀-hó pûn Hî-sî-kâ khî-phien; Hî-sî-kâ mò phan-fap kiu ngì-têu.
[30] Hî-sî-kâ sûi-yèn yit-chhṳ̍t kóng: ‘Song-chú yit-thin voi chṳ́n-kiu ngài-têu, liá-ke sàng m̀-voi kâu chhai Â-sut fòng-ti ke sú-chûng’, chúng-he ngì-têu m̀-hó pûn kì phien-hi yí-kho Song-chú.
[31] M̀-hó thâng Hî-sî-kâ ke fa! Â-sut fòng-ti min-lin ngì-têu chhut-lòi kóng-fò thèu-hòng. Án-ngiòng, ngì-têu hàn-he cho-tet sṳ̍t chhṳ-kâ ke phù-thò, chhṳ-kâ ke vù-fâ-kó, lîm chhṳ-kâ chiáng-tú ke súi.
[32] Chhṳ̍t-to fòng-ti chiông ngì-têu sái-to nang-ngoi yit-ke thi-fông, lâu ngì-têu liá thi-fông khiung-yong, yû ńg-kuk, phù-thò, yû-piáng, mî-chiú. Ke he chhut-sán kám-lám lâu phûng-thòng ke thi-fông. Ngì-têu cheu fòng-ti ke min-lin hàng, chang voi yû-miang, m̀-sṳ́ sí. M̀-hó pûn Hî-sî-kâ phien-hi, láu-tó Song-chú voi lòi chṳ́n-kiu ngì-têu.
[33] Ngì-têu khon-ko yû nai-chak koet-kâ ke sṳ̀n-mìn chṳ́n-kiu chhṳ-kâ ke koet-kâ thot-lì Â-sut fòng-ti ke sú?
[34] Ha̍p-mâ lâu Â-ngí-pha̍t ke sṳ̀n-mìn liá-ha chhai nai-vi? Sî-fap-ngá-yîm, Hî-nâ, Yî-ngá ke sṳ̀n-mìn yu chhai nai-vi? Kì-têu kám yû lòi kiu Sat-mâ-li-â thot-lì ngài ke sú?
[35] Yû nai-têu sṳ̀n-mìn sṳt tui ngài ke sú chṳ́n-kiu kì-têu ke koet-kâ? Song-chú kám voi kiu Yâ-lu-sat-lâng thot-lì ngài ke sú?”
[36] Ngìn-mìn chhiòn-phu tiâm-tiâm, mò en pan ki-fa; yîn-vi Hî-sî-kâ-vòng sṳt ha-lin, kóng: “M̀-hó en kì!”
[37] Ke-sṳ̀, Hî-le̍t-kâ ke lai-é vòng-kiûng chúng-kón Yî-li-â-kin, vòng-sṳt sû-ki Sa-pak-nâ, lâu Â-sat ke lai-é li̍t-sṳ́-kôn Yok-â pî-sông to chhá-lan sâm, chón-hi chiông Â-sut thai-chiong ke fa hiong Hî-sî-kâ-vòng po-ko.