[1] Yî-set-lie̍t-vòng Yâ-fu chhai-vi ke thi-chhit ngièn, Yok-â-sṳ̂ cho Yù-thai-vòng. Kì chhai Yâ-lu-sat-lâng thúng-chhṳ si-sṳ̍p ngièn. Kiâ-mê Sî-pí-â he Phe̍t-sṳ-pâ-sàng ke ngìn.
[2] Yok-â-sṳ̂ yit-sên hàng Song-chú khon-cho chho̍k ke sṳ, yîn-vi yû chi-sṳ̂ Yâ-hò-yâ-thai kâu kì.
[3] Chúng-he, kì mò chhù-thet sân-kông táng ke sṳ̀n-meu, ngìn-mìn hàn-he chhai ke-vi hien-chi sêu-hiông.
[4] Yok-â-sṳ̂ ham ke-têu chi-sṳ̂ lòi, fûn-fu kì-têu hó-hó pó-kón ke-têu vi-tó hien-chi fu-pûn sṳn-thien ke chhièn, mò-lun he ke-ngìn yin-tông hien ke chhièn ya-he chhṳ-ngien fung-hien ke chhièn,
[5] tak-ke chi-sṳ̂ oi fu-chit pó-kón kì só fu̍k-vu ke ngìn só-hien ke chhièn, liá-têu chhièn oi cho cháng sṳn-thien ke yung-thù.
[6] Chúng-he, to Yok-â-sṳ̂-vòng chhai-vi thi ngi-sṳ̍p sâm-ngièn, ke-têu chi-sṳ̂ hàn-màng cháng sṳn-thien.
[7] Só-yî Yok-â-sṳ̂-vòng seu-kien chi-sṳ̂ Yâ-hò-yâ-thai lâu khì-thâ ke chi-sṳ̂, mun kì-têu: “Ngì-têu cho-má-ke hàn-màng cháng sṳn-thien nè? Tui liá-ha khôi-sṳ́, ngì-têu m̀-sṳ́ chai fu-chit pó-kón sû-tó ke chhièn, oi chiông chhièn kâu chhut-lòi, hó khôi-sṳ́ cháng sṳn-thien ke kûng-chok.”
[8] Ke-têu chi-sṳ̂ thùng-yi m̀-sṳ́ chai fu-chit sû-chhièn, ya m̀-sṳ́ fu-chit cháng sṳn-thien.
[9] Só-yî, chi-sṳ̂ Yâ-hò-yâ-thai nâ-lòi yit-chak siông-é, siông-koi táng-kô chon yit-chak khûng-é, piong chhai chi-thàn fu-khiun, chhai sṳn-thien ngi̍p-mùn héu ke yu-phién. Chhai ngi̍p-mùn héu tông-pân ke chi-sṳ̂ chiông ke-têu lòi kin-pai ke ngìn só-hien ke chhièn chhiòn-phu piong-ngi̍p siông-tú.
[10] Siông-tú ke chhièn mân lé, vòng-sṳt sû-ki lâu thai-chi-sṳ̂ chhiu lòi, chiông chhièn son-hó, pâu hí-lòi.
[11] Kì-têu tên-ki khok-sṳ̍t ke su-liong yî-heu, chhiu chiông chhièn kâu-pûn kam-tuk cháng sṳn-thien ke ngìn. Liá-têu ngìn chhiu fu kûng-chhièn pûn muk-siong, kien-chuk kûng-ngìn,
[12] nài-súi sṳ̂-fu, lâu tá-sa̍k sṳ̂-fu, yu mâi muk-chhòi lâu sa̍k-chhòi lòi cháng sṳn-thien, hàn-yû chṳ̂-chhut só-yû khì-thâ cháng sṳn-thien ke fi-yung.
[13] Chúng-he liá-têu chhièn mò nâ-lòi chṳ-chho ngiùn-pî, vón, la̍p-pá, tên-sîm-chién, ya-he khì-thâ kîm-ngiùn yung-phín ke yung-thù,
[14] chhiòn-phu kâu-pûn ke-têu kam-tuk ke ngìn nâ-hi cháng sṳn-thien.
[15] Kì-têu chiông chhièn kâu-pûn cho-kûng ke ngìn. Kam-tuk ke ngìn cho-ngìn sṳ̀n-sṳ̍t, m̀-sṳ́ ngìn lâu kì-têu son-sṳ.
[16] Ke-têu su̍k-ko-sṳt-chi lâu su̍k-chhui-chi ke chhièn chhiu m̀-sṳ́ piong ngi̍p-hi cho sṳn-thien ke yung-thù; liá-têu chhièn he kûi-pûn chi-sṳ̂ ke.
[17] Ke-sṳ̀, Si-li-â-vòng Ha̍p-siet sông-hi kûng-tá Kâ-thi̍t-sàng, cham-liâng heu, chhiu kiet-thin chin-kûng Yâ-lu-sat-lâng.
[18] Yù-thai-vòng Yok-â-sṳ̂ chiông kiâ chú-siên Yok-sâ-fap, Yok-hò-làn, lâu Â-ha̍p-chhia liá-têu Yù-thai-vòng hien-pûn Song-chú ke lî-vu̍t, kâ-song chhṳ-kâ hien ke lî-vu̍t, pin sṳn-thien lâu vòng-kiûng pó-khu tú só-yû ke kîm-é, chhiòn-phu nâ-lòi cho lî-vu̍t sung-pûn Si-li-â-vòng Ha̍p-siet, só-yî Ha̍p-siet chhiu tai kì ke kiûn-chhui lì-khôi Yâ-lu-sat-lâng.
[19] Yok-â-sṳ̂ khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[20] Yok-â-sṳ̂ ke kôn-yèn yîm-mèu chho-fán; khì-chûng lióng-sà, yit-ke he Sṳ-mí-ap ke lai-é Yok-sat-kap, nang-ngoi yit-ke he Sok-me̍t ke lai-é Yok-sat-pha̍t. Kì-têu chhai oi hâ-hi Sit-lâ lu-hong ke Mí-lò-kiûng chiông Yok-â-sṳ̂ chhṳ̀-thet. Yok-â-sṳ̂ chong chhai Thai-ví-sàng ke vòng-sṳt fùn-mu tú; kì ke lai-é Â-mâ-chhia sṳ̀n-chiap kì cho vòng.