[1] Li-mâ-li ke lai-é Pí-kâ cho Yî-set-lie̍t-vòng thi sṳ̍p-chhit ngièn, Yok-thán ke lai-é Â-ha̍p-sṳ̂ cho Yù-thai-vòng.
[2] Ke-sṳ̀ Â-ha̍p-sṳ̂ ngi-sṳ̍p se; kì chhai Yâ-lu-sat-lâng thúng-chhṳ sṳ̍p-liuk ngièn. Kì mò ho̍k kiâ chú-siên Thai-ví-vòng hàng Song-chú — kì ke Song-ti khon-cho chho̍k ke sṳ;
[3] kì fán-chón ho̍k Yî-set-lie̍t lie̍t-vòng ke fái mù-yong, sṳm-chṳ chiông chhṳ-kâ ke lai-é yung fó sêu lòi hien-pûn ngiéu-siong, ho̍k ngièn-lòi ngoi-chhu̍k ngìn ke sià-ok hàng-vì; ke-têu ngìn-mìn chhiu-he Yî-set-lie̍t-ngìn ngi̍p-hi liá-thi ke-sṳ̀ Song-chú kiuk chhut-hi ke ngìn.
[4] Â-ha̍p-sṳ̂ chhai sṳ̀n-meu nui, sân-kông táng lâu tak-thèu thai-su hâ hien-chi sêu-hiông.
[5] Si-li-â-vòng Li-sun lâu Yî-set-lie̍t-vòng Li-mâ-li ke lai-é Pí-kâ kûng-tá Yâ-lu-sat-lâng, vì-khun Â-ha̍p-sṳ̂, chúng-he mò fap-thu tá-yàng kì.
[6] (Liá-sṳ̀, Si-li-â-vòng Li-sun sû-fu̍k Yî-lâ-thâ-sàng, chiông he̍t chhai ke-vi ke Yù-thai-ngìn kiuk chhut-hi. Yî-tûng-ngìn lòi thin-kî chhai Yî-lâ-thâ, yit-chhṳ̍t he̍t chhai ke-vi.)
[7] Â-ha̍p-sṳ̂ phai sṳ́-chá hi kien Â-sut fòng-ti Thì-kiet-lâ-Pí-lie̍t-set, kóng: “Ngài he ngì ke phu̍k-ngìn, he kûi-su̍k ngì ke; Si-li-â-vòng lâu Yî-set-lie̍t-vòng tông chhai liá-vi kûng-tá ngài, khiù ngì lòi kiu ngài!”
[8] Â-ha̍p-sṳ̂ chiông Song-chú ke sṳn-thien lâu vòng-kiûng pó-khu tú só-yû ke kîm-ngiùn cho lî-vu̍t, sung-pûn Â-sut fòng-ti.
[9] Â-sut fòng-ti tap-yin Â-ha̍p-sṳ̂ ke chhiáng-khiù, chhiu tai-liâng kiûn-chhui hi kûng-tá Thai-mâ-sṳ-kiet, cham-liâng ke-sàng, chiông Li-sun-vòng chhṳ̀-thet, yu chiông ngìn-mìn chok-to Kit-ngí.
[10] Â-ha̍p-sṳ̂-vòng to Thai-mâ-sṳ-kiet ngiàng-chiap Â-sut fòng-ti Thì-kiet-lâ-Pí-lie̍t-set ke sṳ̀, khon-tó ke-vi ke chi-thàn, chhiu chiông siòng-se ke hí-fap lâu thù-yong sung-to chi-sṳ̂ Vû-li-â ke-vi.
[11] Só-yî Vû-li-â cheu ke thù-yong hí yit-chho chi-thàn, chhai Â-ha̍p-sṳ̂-vòng hàn-màng chón-lòi yî-chhièn chhiu vàn-kûng lé.
[12] Vòng tui Thai-mâ-sṳ-kiet chón-lòi, khon-tó chi-thàn, chhiu hàng-chhièn hi,
[13] chhai ke táng-kô hien sêu-fa-chi lâu su-chi, yu chi-chiú yu hia phìn-ôn-chi ke hiet.
[14] Hien-chi pûn Song-chú ke thùng chi-thàn pún-lòi chhai sîn-thàn lâu sṳn-thien chûng-kiên, Â-ha̍p-sṳ̂-vòng chiông kì sái-to sîn-thàn ke pet-phién,
[15] yèn-heu min-lin chi-sṳ̂ Vû-li-â kóng: “Yung ngài liá-chho thai chi-thàn hien chêu-sṳ̀n ke sêu-fa-chi lâu lìm-am-é ke su-chi, vòng ke sêu-fa-chi lâu su-chi, ngìn-mìn ke sêu-fa-chi, su-chi lâu chi-chiú, pin chiông só-yû sên-ngì ke hiet hia chhai táng-kô. Chúng-he ngài oi liù thùng chi-thàn lòi puk-koa.”
[16] Chi-sṳ̂ Vû-li-â chhiu cheu Â-ha̍p-sṳ̂-vòng ke min-lin hi-cho.
[17] Â-ha̍p-sṳ̂-vòng chhak-thet thùng-phùn-chho si chû-vì ke khiông-ka, chiông táng-kô ke thùng-phùn nâ hâ-lòi, yu chiông sṳ̍p-ngi chak thùng-ngiù poi-táng ke thùng-hói pân-to sa̍k-thèu cho ke kî-chho táng.
[18] Â-ha̍p-sṳ̂ vi-tó oi pâ-kiet Â-sut fòng-ti, chhiu chiông piong vòng chho-vi ke thòi-è sái-chhut sṳn-thien, yu chiông vòng tui ngoi-poi oi ngi̍p sṳn-thien ke chéu-lòng chhak-thet.
[19] Â-ha̍p-sṳ̂ khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[20] Â-ha̍p-sṳ̂ sí-thet, chong chhai Thai-ví-sàng ke vòng-sṳt fùn-mu tú; kì ke lai-é Hî-sî-kâ sṳ̀n-chiap kì cho vòng.