[1] Yok-ngâ-kin chhai-vi ngièn-kiên, Pâ-pí-lùn-vòng Nì-pu-kap-nì-sat chhîm-fam Yù-thai. Yok-ngâ-kin chhiu thèu-hòng fu̍k-sṳ kì sâm-ngièn, heu-lòi chho-fán.
[2] Song-chú sṳ́ Pâ-pí-lùn, Si-li-â, Mô-ap, lâu Â-mùn ke kiûn-chhui lòi kûng-tá Yok-ngâ-kin, sêu-me̍t Yù-thai, chhiu-chhiong Song-chú thûng-ko Kiâ phu̍k-ngìn chung siên-tî só-kóng ke.
[3] Liá-sṳ voi fat-sên, he yîn-vi Song-chú ke min-lin, vi-tó oi kiuk-chéu Yù-thai ke ngìn-mìn. Liá he yîn-vi Mâ-nâ-sî-vòng só-fam yit-chhiet ke chhui;
[4] kì yu chhṳ̀-thet chhin-tô vù-kû ke ngìn-mìn, sṳ́ Yâ-lu-sat-lâng mân-phien he hiet; Song-chú m̀-hén sa-miên Mâ-nâ-sî.
[5] Yok-ngâ-kin khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[6] Yok-ngâ-kin sí-thet heu, kiâ lai-é Yok-ngâ-kîn sṳ̀n-chiap kì cho vòng.
[7] Âi-khi̍p-vòng mò-chai chhut-pîn to kiâ koet-kâ yî-ngoi ke thi-fông; yîn-vi tui Âi-khi̍p pet-phu ke se hò-pa to Yu-fat-lâ-tí-hò liá-phién thú-thi yî-chhièn he su̍k Âi-khi̍p ke, liá-ha chhiòn-phu pûn Pâ-pí-lùn-vòng chhióng-hi lé.
[8] Yok-ngâ-kîn sṳ̍p-pat se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ sâm-ke ngie̍t. Kiâ-mê ôn-to Nì-fu-sṳ̂-thâ, he Yâ-lu-sat-lâng-ngìn Yî-li-nâ-tân ke moi-é.
[9] Yok-ngâ-kîn ho̍k kiâ-pâ ke fái mù-yong, hàng Song-chú khon-cho sià-ok ke sṳ.
[10] Chhai ke khì-kiên, Pâ-pí-lùn-vòng Nì-pu-kap-nì-sat ke thai-chiong tai-liâng kiûn-chhui kûng-tá Yâ-lu-sat-lâng, pâu-vì chhiòn-sàng.
[11] Chhai kì ke kiûn-chhui vì-sàng khì-kiên, Pâ-pí-lùn-vòng Nì-pu-kap-nì-sat chhîn-sṳ̂n lòi-to.
[12] Yù-thai-vòng Yok-ngâ-kîn lâu kiâ-mê, thai-sṳ̀n, chiông-kiûn, vòng-kiûng ke kôn-yèn chhiòn-phu chhut-lòi hiong Pâ-pí-lùn-vòng thèu-hòng. Nì-pu-kap-nì-sat chhai-vi thi-pat ngièn, kì chok-tó Yok-ngâ-kîn,
[13] chiông Song-chú ke sṳn-thien lâu vòng-kiûng tú só-yû ke chhòi-pó tai-to Pâ-pí-lùn hi. Kì chiông Yî-set-lie̍t-vòng Só-lò-mùn vi sṳn-thien tú só-chho yit-chhiet ke kîm-hi khau-thet, chhiu-chhiong Song-chú só siên-ko ke.
[14] Yâ-lu-sat-lâng ngìn-mìn lâu só-yû thai-kôn, yúng-sṳ, chúng-khiung yû yit-van ngìn pûn Nì-pu-kap-nì-sat chok-chéu. Lièn yû sú-ngi ke sṳ̂-fu lâu tá-thiet sṳ̂-fu ya chhiòn-phu pûn kì chok-chéu, chṳ́ liù-hâ chui khiùng-khú ke ngìn.
[15] Nì-pu-kap-nì-sat chiông Yok-ngâ-kîn tai-to Pâ-pí-lùn, ya chiông kiâ-mê, vòng-heu, vòng-fî, thai-kam, lâu Yù-thai ke liâng-chhiu chhiòn-phu tui Yâ-lu-sat-lâng tai-chéu.
[16] Nì-pu-kap-nì-sat ya chiông só-yû ke kiûn-ngìn chhit-chhiên ke, hàn-yû yit-chhiên ke yû sú-ngi ke sṳ̂-fu lâu tá-thiet sṳ̂-fu, tai-to Pâ-pí-lùn hi; kì-têu chhiòn-phu he yúng-kám ke chan-sṳ.
[17] Pâ-pí-lùn-vòng sat-li̍p Yok-ngâ-kîn ke â-suk Mâ-tham-ngâ cho Yù-thai-vòng, yu lâu kì ke miàng kói-cho Sî-tí-kâ.
[18] Sî-tí-kâ ngi-sṳ̍p yit-se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ sṳ̍p-yit ngièn. Kiâ-mê ôn-to Ha̍p-mu-thâ, he Li̍p-nâ-sàng Ya̍p-li-mí ke moi-é.
[19] Sî-tí-kâ hàng Song-chú khon-cho sià-ok ke sṳ, chhiong Yok-ngâ-kin só-cho ke khiung-yong.
[20] Song-chú tui Yâ-lu-sat-lâng lâu Yù-thai ke ngìn-mìn fat-khién, tui chhṳ-kâ mien-chhièn chiông kì-têu kiuk chhut-hi.