[1] Yî-li-sâ sṳt lâu he̍t chhai Sû-ngiam ke fu-ngìn-kâ kóng (liá fu-ngìn-kâ ke lai-é sṳt pûn Yî-li-sâ kiu-sâng hí-lòi): “Song-chú oi sṳ́ liá thi-fông su-tó chhit-ngièn ke kî-fông, ngì yin-kôi lâu vuk-hâ ngìn lì-khôi liá-vi, to phe̍t ke thi-fông hi-he̍t.”
[2] Fu-ngìn-kâ thâng-chhiùng sṳ̀n-ngìn ke fa, lâu vuk-hâ ngìn khiung-ha to Fî-li-sṳ hi, chhai ke-vi he̍t chhit-ngièn.
[3] Chhit-ngièn ko-hi, ke fu-ngìn-kâ tui Fî-li-sṳ chón-lòi; kì hi kien vòng, chhiáng-khiù sû-chón kì ke vuk-è lâu thièn-thi.
[4] Ke-sṳ̀ vòng hiong sṳ̀n-ngìn ke phu̍k-ngìn Kî-ha̍p-sî tá-tham yû-koân Yî-li-sâ hàng sṳ̀n-chiak ke sṳ.
[5] Kî-ha̍p-sî lâu vòng kóng Yî-li-sâ ngióng-pân sṳ́ sí-thet ke ngìn fu̍k-fa̍t ke sṳ̀, ke fu-ngìn-kâ tú-tú to vòng ke mien-chhièn, oi vi kì ke vuk-è lâu thièn-thi khiù-chhìn. Kî-ha̍p-sî tui vòng kóng: “Ngài ke chú, ngài ke vòng â, liá chhiu-he ke fu-ngìn-kâ, liá me-he kiâ lai-é, chhiu-he Yî-li-sâ kiu-sâng hí-lòi ke.”
[6] Vòng mun ke fu-ngìn-kâ, kì chhiu chiông sṳ-chhìn kóng pûn vòng thâng. Só-yî vòng phai yit-ke kôn-yèn, fûn-fu kì chiông ke fu-ngìn-kâ ke tûng-sî chhiòn-phu vàn-pûn kì, pâu-hàm kì lì-khôi ke chhit-ngièn kiên só-yû ke chhut-sán.
[7] Yî-li-sâ to Thai-mâ-sṳ-kiet hi ke sṳ̀, Si-li-â-vòng Phien-Ha̍p-tha̍t tú-hó pot phiang-é. Yû-ngìn lâu vòng kóng, sṳ̀n-ngìn Yî-li-sâ chhai Thai-mâ-sṳ-kiet.
[8] Vòng tui kì ke thai-sṳ̀n Ha̍p-siet kóng: “Ngì tai lî-vu̍t hi kien sṳ̀n-ngìn, pai-thok kì mun Song-chú, khon ngài ke phiang voi hó mò?”
[9] Só-yî Ha̍p-siet yung si-sṳ̍p chak lo̍k-thò chai-tén Thai-mâ-sṳ-kiet só-yû chui-hó ke tûng-sî, tai-tén hi cho lî-vu̍t oi sung-pûn Yî-li-sâ. Ha̍p-siet khon-tó Yî-li-sâ, kóng: “Ngì ke phu̍k-ngìn Si-li-â-vòng Phien-Ha̍p-tha̍t phai ngài lòi chhiáng-mun ngì, kì ke phiang voi hó mò?”
[10] Yî-li-sâ kóng: “Song-chú chṳ́-sṳ ngài, kì yit-thin voi sí; chúng-he ngì chón-hi oi lâu kì kóng, kì yit-thin voi hó.”
[11] Chiap-tén, Yî-li-sâ hìm-tén khon Ha̍p-siet, hoi kì kám-kok tông-mò chhṳ-chhai. Fut-yèn-kiên, sṳ̀n-ngìn sa kieu chhut-lòi.
[12] Ha̍p-siet mun: “Sîn-sâng, ngì cho-má-ke kieu?” Yî-li-sâ kóng: “Yîn-vi ngài tî ngì voi cho chhin chhàn-ngiûn ke sṳ sông-hoi Yî-set-lie̍t ngìn-mìn. Ngì voi yung fó sêu-thet kì-têu ke sàng-pó, chhṳ̀-thet kì-têu ke chhiâng-ngièn, te̍p-sí kì-têu ke se-ngìn-è, yu voi pho-khôi kì-têu yû sṳ̂n-hong ke fu-ńg.”
[13] Ha̍p-siet kóng: “Ngiâ phu̍k-ngìn son má-ke, chhiong yit-thiàu kiéu yong, nai-yû khó-nèn cho án-thai ke sṳ nè?” Yî-li-sâ kóng: “Song-chú chṳ́-sṳ ngài, ngì voi cho Si-li-â ke vòng.”
[14] Ha̍p-siet lì-khôi Yî-li-sâ, chón-to kiâ chú-ngìn ke-vi. Phien-Ha̍p-tha̍t mun kì: “Yî-li-sâ kóng má-ke?” Ha̍p-siet kóng: “Kì kóng ngì yit-thin voi hó.”
[15] Thi-ngi ngit, Ha̍p-siet nâ yit-thiàu chim-ko súi ke thán-è êm vòng ke mien, chiông vòng hip-sí. Chhiu án-ngiòng, Ha̍p-siet chhon vòng-vi cho Si-li-â-vòng.
[16] Yî-set-lie̍t-vòng Â-ha̍p ke lai-é Yok-làn chhai-vi ke thi-ńg ngièn, Yù-thai-vòng Yok-sâ-fap hàn chhai-vi ke sṳ̀, Yok-sâ-fap ke lai-é Yok-hò-làn cho Yù-thai-vòng;
[17] ke-sṳ̀ kì sâm-sṳ̍p ngi-se. Kì chhai Yâ-lu-sat-lâng thúng-chhṳ pat-ngièn.
[18] Kì thó Â-ha̍p ke moi-é cho pû-ngiòng, só-yî kì chhiu chhiong Â-ha̍p vuk-hâ ke ngìn khiung-yong, cho Yî-set-lie̍t ke-têu vòng só-cho, Song-chú khon-cho sià-ok ke sṳ.
[19] Chúng-he Song-chú yîn-vi Kiâ phu̍k-ngìn Thai-ví ke yèn-ku, yit-chhṳ̍t m̀-hén me̍t Yù-thai; cheu Kì só yin-hí Thai-ví ke fa, oi sṳ́ Thai-ví ke heu-thoi yún-yén yû-ngìn cho vòng.
[20] Yok-hò-làn chhai-vi khì-kiên, Yî-tûng chho-fán, tui Yù-thai thu̍k-li̍p chhut-hi, chhṳ-kâ sat-li̍p vòng.
[21] Só-yî Yok-hò-làn tai-liâng só-yû ke chan-chhâ to Sat-yit hi, Yî-tûng-ngìn chhiu chhai ke-vi chiông kì-têu pâu-vì. Am-pû-sṳ̀, Yok-hò-làn lâu kì ke chan-chhâ chṳ́-fî-kôn tui pâu-vì tông-chûng thò-chéu; kì ke kiûn-chhui ya chhiòn-phu chéu-chón chhṳ-kâ ke vuk-hâ.
[22] Tui ke-ngit yî-heu, Yî-tûng chhiu tui Yù-thai thu̍k-li̍p chhut-hi. Chhai liá khì-kiên, Li̍p-nâ-sàng ya chho-fán.
[23] Yok-hò-làn khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[24] Yok-hò-làn sí-heu, chong chhai Thai-ví-sàng ke vòng-sṳt fùn-mu tú. Kiâ lai-é Â-ha̍p-chhia sṳ̀n-chiap kì cho vòng.
[25] Yî-set-lie̍t-vòng Â-ha̍p ke lai-é Yok-làn chhai-vi thi sṳ̍p-ngi ngièn, Yok-hò-làn ke lai-é Â-ha̍p-chhia cho Yù-thai-vòng.
[26] Â-ha̍p-chhia ngi-sṳ̍p ngi-se ke sṳ̀ cho vòng, chhai Yâ-lu-sat-lâng thúng-chhṳ yit-ngièn. Kiâ-mê ôn-to Â-thâ-li-ngâ, he Yî-set-lie̍t-vòng Am-li ke sûn-ńg.
[27] Â-ha̍p-chhia yîn-vi fûn-yîn ke koân-he, sàng-cho Â-ha̍p ke chhîn-chhit; kì chhiong Â-ha̍p kâ-chhu̍k ke ngìn khiung-yong, hàng Song-chú khon-cho sià-ok ke sṳ.
[28] Â-ha̍p-chhia-vòng lâu Yî-set-lie̍t ke Yok-làn-vòng lièn-ha̍p hí-lòi, hi kûng-tá Si-li-â-vòng Ha̍p-siet. Sûng-fông kiûn-chhui chhai Kî-lie̍t ke Lâ-ma̍t siông-chhṳ̀. Yok-làn chho̍k-sông,
[29] chhiu chón-to Yâ-sṳ̂-lie̍t-sàng liàu-sông; Â-ha̍p-chhia chhiu hi ke-vi khon kì.