[1] Yù-thai-vòng Â-ha̍p-sṳ̂ chhai-vi thi sṳ̍p-ngi ngièn, Yî-lâ ke lai-é Hò-se-â cho Yî-set-lie̍t-vòng; kì chhai Sat-mâ-li-â thúng-chhṳ kiú-ngièn.
[2] Kì hàng Song-chú khon-cho sià-ok ke sṳ, chúng-he mò chhiong kì yî-chhièn ke-têu Yî-set-lie̍t-vòng án-fái.
[3] Â-sut fòng-ti Sat-man-yî-set lòi kûng-tá kì; Hò-se-â chhiu thèu-hòng, tak-ngièn hiong Sat-man-yî-set chin-kung.
[4] Yû yit-ngièn, Hò-se-â phai-ngìn hi kien Âi-khi̍p-vòng Sô, sióng-oi fán Â-sut, mò-chai ki-siu̍k tak-ngièn hiong Â-sut fòng-ti chin-kung. Â-sut fòng-ti tî liá-khien sṳ, chhiu chiông Hò-se-â chok hí-lòi, koân chhai kâm-ngiu̍k tú.
[5] Heu-lòi, Â-sut fòng-ti kûng-tá Yî-set-lie̍t, pâu-vì Sat-mâ-li-â. Vì-sàng ke thi-sâm ngièn,
[6] ya chhiu-he Hò-se-â chhai-vi thi-kiú ngièn, Â-sut fòng-ti kûng-hâ Sat-mâ-li-â, chiông Yî-set-lie̍t-ngìn chok-to Â-sut hi, chiông kì-têu piong chhai Ha̍p-la̍p-sàng, Kô-san-khî ke Ha̍p-pok-hò fu-khiun, lâu Mí-tí-â-ngìn ke sàng-sṳ.
[7] Sat-mâ-li-â ham-lo̍k he yîn-vi Yî-set-lie̍t-ngìn tet-chhui Song-chú — kì-têu ke Song-ti. Song-chú sṳt kiu kì-têu lì-khôi Âi-khi̍p-vòng ke kón-hot, thu kì-têu chhut Âi-khi̍p, kì-têu fán-chón hi pai phe̍t ke sṳ̀n-mìn,
[8] ho̍k ke thi-fông ngìn-mìn ke fûng-siu̍k, chhiu-he Song-chú chhai Kì chṳ́-mìn mien-chhièn kiuk-chéu ke-têu ngoi-chhu̍k ngìn, yu chiap-su ke-têu Yî-set-lie̍t-vòng só-sat ke kûi-kí.
[9] Yî-set-lie̍t-ngìn am-chûng hàng Song-chú — kì-têu Song-ti khon-cho sià-ok ke sṳ. Kì-têu chhai só-yû ke sàng-chṳ́n, tui sú-mong-thòi to fòng-ví-sàng hí sân-kông táng ke sṳ̀n-meu,
[10] yu chhai só-yû ke sân-kông táng lâu thai-su hâ, tun sa̍k-chhû lâu Â-sa-lâ ńg-sṳ̀n ke chhû-siong.
[11] Kì-têu ho̍k Song-chú só kiuk-chéu ke-têu ngièn-lòi ke ngoi-chhu̍k ngìn, chhai tak-ke sṳ̀n-meu tú sêu-hiông. Kì-têu sià-ok ke hàng-vì ngiâ Song-chú fat-khién;
[12] kì-têu pai ngiéu-siong, chhiu-he Song-chú put-chún kì-têu cho ke.
[13] Song-chú sṳt phai Kì ke siên-tî lâu siên-kien hi kín-ko Yî-set-lie̍t lâu Yù-thai kóng: “Oi lì-khôi ngì-têu ke fái hàng-vì, chûn-sú Ngài ke kie-min, chhiu-he Ngài pûn ngì-têu chú-siên ke fap-li̍t lâu Ngài thûng-ko Ngài phu̍k-ngìn — ke-têu siên-tî chhòn-pûn ngì-têu ke fap-li̍t.”
[14] Chúng-he kì-têu m̀-hén thâng; kì-têu chhiong kì-têu ke chú-siên án ngang-kiáng, m̀ sin-kho Song-chú — kì-têu ke Song-ti.
[15] Kì-têu khî-chhie̍t Song-chú ke kau-hiun, m̀ sú Kì lâu kì-têu chú-siên só-li̍p ke yok, m̀-tap Kì ke khien-kie. Kì-têu hi pai hî-ká ke ngiéu-siong, chhṳ-kâ ya pien-cho hî-ká. Kì-têu ho̍k si chû-vì ngoi-chhu̍k ngìn ke fûng-siu̍k, m̀ thâng-chhiùng Song-chú ke min-lin.
[16] Kì-têu lì-khôi Song-chú — kì-têu ke Song-ti só-yû ke fap-li̍t, chu-chho lióng-chak kîm-ngiù lòi-pai, yu chho Â-sa-lâ ńg-sṳ̀n ke chhû-siong; kì-têu pai ngit-ngie̍t sên-sṳ̀n, sṳ-fung Pâ-li̍t.
[17] Kì-têu chiông chhṳ-kâ ke chṳ́-ńg yung fó sêu lòi hien-pûn ngièn-lòi ngoi-chhu̍k ngìn ke sṳ̀n-mìn, yu hàng sià-su̍t lâu puk-koa. Kì-têu chhut-mai chhṳ-kâ, hàng Song-chú khon-cho sià-ok ke sṳ, ngiâ Kì fat-khién.
[18] Só-yî Song-chú hiong Yî-set-lie̍t-ngìn thai fat-khién, tui chhṳ-kâ mien-chhièn chiông kì-têu kiuk-chéu, chṳ́-chhûn to Yù-thai-koet.
[19] Chúng-he, Yù-thai ngìn-mìn ya m̀ chûn-sú Song-chú — kì-têu Song-ti ke kie-min; kì-têu thèn Yî-set-lie̍t-ngìn hàng tui ngoi-chhu̍k ngìn ho̍k-lòi ke fûng-siu̍k.
[20] Só-yî Song-chú vok-thet só-yû ke Yî-set-lie̍t-ngìn, sṳ́ kì-têu su-khú, chiông kì-têu kâu chhai chhióng-kiap kì-têu ke sù-thi̍t sú-chûng, chui-heu tui chhṳ-kâ mien-chhièn chiông kì-têu kiuk chhut-hi.
[21] Song-chú sṳ́ Yî-set-lie̍t tui Thai-ví kâ-chhu̍k fûn-lie̍t chhut-lòi yî-heu, Yî-set-lie̍t-ngìn sat-li̍p Nì-pat ke lai-é Yâ-lò-pô-ôn cho kì-têu ke vòng. Yâ-lò-pô-ôn yín-yu kì-têu phoi-ngia̍k Song-chú, hoi kì-têu ham-lo̍k chhai thai chhui-chûng.
[22] Yî-set-lie̍t-ngìn yit-chhṳ̍t mò lì-khôi Yâ-lò-pô-ôn só-fam ke chhui,
[23] chhṳ̍t-to Song-chú tui chhṳ-kâ mien-chhièn kiuk-chhut kì-têu, chhiu-chhiong Kì siên-chhièn thûng-ko Kiâ phu̍k-ngìn — ke-têu siên-tî só kín-ko ke. Án-ngiòng, Yî-set-lie̍t-ngìn tui pún-thi pûn-ngìn chok-to Â-sut hi, yit-chhṳ̍t he̍t chhai ke-vi.
[24] Â-sut fòng-ti tui Pâ-pí-lùn, Kú-thâ, Â-ngá, Ha̍p-mâ, lâu Sî-fap-ngá-yîm chiông ngìn-mìn sái-to Sat-mâ-li-â tak sàng-sṳ, lòi thoi pûn-ngìn chok-chéu ke Yî-set-lie̍t-ngìn. Â-sut-ngìn chhiu cham-liâng Sat-mâ-li-â, he̍t chhai tông-chûng liá-têu sàng-sṳ.
[25] Chang pân-lòi he̍t ke sṳ̀, kì-têu m̀ kin-pai Song-chú, Song-chú chhiu phai sṳ̂-é ngâu-sí kì-têu tông-chûng ke yit-têu ngìn.
[26] Yû-ngìn lâu Â-sut fòng-ti kóng, ke-têu sái-to Sat-mâ-li-â ke Â-sut-ngìn m̀-tî ke-thi sṳ̀n-mìn ke kûi-kí, só-yî sṳ̀n-mìn phai sṳ̂-é ngâu-sí kì-têu.
[27] Â-sut fòng-ti chhiu ha-lin kóng: “Tui chok-lòi ke chi-sṳ̂ tông-chûng phai yit-ke chón-hi, oi kì he̍t chhai ke-vi, kâu ngìn-mìn ho̍k ke thi-fông sṳ̀n-mìn ke kûi-kí.”
[28] Só-yî yû yit-ke tui Sat-mâ-li-â pûn-ngìn chok-hi ke chi-sṳ̂ chón-hi, he̍t chhai Pak-thi̍t-li, kâu ngìn-mìn ngióng-pân kin-pai Song-chú.
[29] Chúng-he sái-to Sat-mâ-li-â ke kok-chhu̍k ngìn chhai só-he̍t ke sàng-tú ki-siu̍k chṳ-chho chhṳ-kâ ke ngiéu-siong, chiông ngiéu-siong piong chhai Sat-mâ-li-â-ngìn hí ke sṳ̀n-meu tú.
[30] Pâ-pí-lùn-ngìn chṳ-chho Sû-kot-Pí-nap ke sṳ̀n-siong; Kú-thâ-ngìn chṳ-chho Ni̍t-kap ke sṳ̀n-siong; Ha̍p-mâ-ngìn chṳ-chho Â-sṳ-mâ ke sṳ̀n-siong;
[31] Â-ngá-ngìn chṳ-chho Ni̍t-ha̍p lâu Thâ-ngí-thâ ke sṳ̀n-siong; Sî-fap-ngá-yîm-ngìn chiông kì-têu ke chṳ́-ńg yung fó sêu lòi hien-pûn kì-têu ke sṳ̀n-mìn Â-tet-mí-le̍t lâu Â-nâ-mí-le̍t.
[32] Liá-têu ngìn thùng-sṳ̀ ya kin-vi Song-chú, kok-chúng ngìn sién-chhut chhṳ-kâ ke ngìn lòi-cho chi-sṳ̂, chhai sân-kông táng ke sṳ̀n-meu thoi kì-têu hien-chi.
[33] Kì-têu kin-vi Song-chú, chúng-he ya cheu kì-têu ngièn-lòi koet-kâ ke fûng-siu̍k pai chhṳ-kâ ke sṳ̀n-mìn.
[34] Kì-têu to kîm-pû-ngit hàn-he pó-chhṳ̀ khiu ke fûng-siu̍k; kì-têu m̀-he chṳn-kîn kin-vi Song-chú, ya-mò chûn-sú Song-chú pûn Ngâ-kok heu-thoi ke fap-li̍t kie-min. (Song-chú sṳt chiông Ngâ-kok yu ôn-miàng cho Yî-set-lie̍t.)
[35] Song-chú sṳt lâu kì-têu li̍p-ko yok, fûn-fu kì-têu kóng: “Cho-m̀-tet pai phe̍t ke sṳ̀n-mìn, cho-m̀-tet khúi-pai kì-têu, cho-m̀-tet sṳ-fung kì-têu, ya cho-m̀-tet hien-chi pûn kì-têu.
[36] Ngì-têu oi kin-vi Ngài — Song-chú; Ngài sṳt yung thai-nèn thai-li̍t tai ngì-têu chhut Âi-khi̍p. Ngì-têu oi khúi-pai Ngài, hien-chi pûn Ngài.
[37] Ngì-têu oi yún-yén chûn-chhiùng Ngài siá pûn ngì-têu ke fap-li̍t kie-min. Ngì-têu cho-m̀-tet kin-pai phe̍t ke sṳ̀n-mìn.
[38] Ngài lâu ngì-têu só li̍p ke yok, ngì-têu cho-m̀-tet m̀ ki-tet. Ngì-têu cho-m̀-tet kin-pai phe̍t ke sṳ̀n-mìn.
[39] Ngì-têu oi tân-tân kin-vi Ngài — Song-chú, ngì-têu ke Song-ti, Ngài chhiu kiu ngì-têu lì-khôi sù-thi̍t ke sú.”
[40] Chúng-he ke-têu ngìn m̀-hén thâng, ki-siu̍k cheu kì-têu chhṳ-kâ ke khiu fûng-siu̍k hàng.
[41] Ke-têu ngìn-mìn kin-pai Song-chú, yu fu̍k-sṳ kì-têu ke ngiéu-siong; chhṳ̍t-to kîm-pû-ngit, kì-têu ke heu-thoi hàn-he ho̍k kì-têu ke chú-siên án-ngiòng hàng.