[1] Â-ha̍p-chhia-vòng ke â-mê Â-thâ-li-ngâ yit thâng-kóng kiâ lai-é pûn-ngìn chhṳ̀-sí, chhiu ha-lin chiông Yù-thai-vòng ke chhiòn kâ-chhu̍k chhṳ̀-sí.
[2] Â-ha̍p-chhia ke lai-é Yok-â-sṳ̂ hiám-hiám lâu phe̍t-ke vòng-chṳ́ khiung-yong ya pûn thai-heu chhṳ̀-sí, chúng-he kiâ-kû Yok-sṳ-pâ chiông kì thêu-kiu chhut-lòi; Yok-sṳ-pâ he Yok-hò-làn-vòng ke moi-é, Â-ha̍p-chhia khiung-yà mò khiung-ôi ke ló-moi. Kì chiông Yok-â-sṳ̂ lâu kì ke nen-ôi khong chhai sṳn-thien tú ke kiên-fòng, sám-phit Â-thâ-li-ngâ, só-yî Yok-â-sṳ̂ mò pûn thai-heu chhṳ̀-sí.
[3] Â-thâ-li-ngâ thai-heu thúng-chhṳ Yù-thai ke khì-kiên, Yok-â-sṳ̂ lâu nen-ôi chhai Song-chú ke sṳn-thien tú khong liuk-ngièn.
[4] To thi-chhit ngièn, chi-sṳ̂ Yâ-hò-yâ-thai chhai Song-chú ke sṳn-thien seu-kien fu-chit vòng-sṳt kín-ví lâu pó-fu vòng-kiûng ke-têu kiûn-kôn, lâu kì-têu li̍p-yok; kì ham kì-têu chhai Song-chú ke sṳn-thien fat-sṳ, thùng-yi kì ke kie-va̍k. Yèn-heu kì chhiu chiông vòng-chṳ́ Yok-â-sṳ̂ tai-to kì-têu mien-chhièn,
[5] pin min-lin kì-têu kóng: “Ôn-sit-ngit, ngì-têu tông-pân ke, sâm-fûn chṳ̂-yit ke ngìn oi khon-sú vòng-kiûng,
[6] sâm-fûn chṳ̂-yit ke ngìn oi khon-sú Sû-ngí-mùn, sâm-fûn chṳ̂-yit ke ngìn oi khon-sú ví-pîn-yàng ke heu-mùn, thai-kâ oi cheu lùn-pân khon-sú vòng-kiûng.
[7] Chhai ôn-sit-ngit mò tông-pân ke lióng-chhui ngìn oi chhai Song-chú ke sṳn-thien khon-sú, pó-fu vòng.
[8] Ngì-têu tak-sà oi nâ-tén vú-hi vì-tén lòi pó-fu Yok-â-sṳ̂-vòng; kì hàng-to nai-vi, ngì-têu chhiu thèn-to nai-vi; na-he yû-ngìn ngang-chhong ngi̍p-lòi, chhiu oi chiông kì chhṳ̀-thet.”
[9] Ke-têu kiûn-kôn cheu chi-sṳ̂ Yâ-hò-yâ-thai ke chṳ́-sṳ chiông kì-têu ke kiûn-chhui, mò-lun chhai ôn-sit-ngit tông-pân ya-he mò tông-pân ke, chhiòn-phu tai-lòi kien chi-sṳ̂ Yâ-hò-yâ-thai.
[10] Yâ-hò-yâ-thai chiông yî-chhièn piong chhai sṳn-thien tú Thai-ví-vòng ke-têu chhiông lâu tún-phài kâu-pûn kiûn-kôn.
[11] Ví-pîn nâ-tén vú-hi khî chhai sṳn-thien thèu-chhièn, tui nàm-phién to pet-phién, chhai chi-thàn lâu sṳn-thien ke-vi, oi chhai vòng-chṳ́ si chû-vì pó-fu kì.
[12] Yèn-heu, Yâ-hò-yâ-thai tai vòng-chṳ́ Yok-â-sṳ̂ chhut-lòi, chiông vòng-kon tai chhai kì thèu-nà táng, chiông yit-pún yû-koân vòng-khièn thiàu-khoán ke Fap-li̍t-sû kâu-pûn kì, kò-yù sat-li̍p kì cho vòng. Mìn-chung phok-sú thai-sâng hêm: “Ngien vòng van-soi!”
[13] Â-thâ-li-ngâ thâng-tó sú-ví lâu mìn-chung fôn-hí chhin-sê ke sâng, kiak-kiak to khiùn-chung chhi-si̍p ke sṳn-thien hi.
[14] Kì khon-tó sîn-vòng cheu ngì-sṳt khî chhai sṳn-thien ngi̍p-héu ke chhû-é sùn-thèu, ke-têu kiûn-kôn lâu la̍p-pá sú vì-tén kì, mìn-chung chhiòn-phu fôn-hí to thai-sâng hêm, chhin-phùn la̍p-pá. Â-thâ-li-ngâ chhá-lan sâm, hêm-kóng: “Chho-fán lé! Chho-fán lé!”
[15] Chi-sṳ̂ Yâ-hò-yâ-thai mò-oi Â-thâ-li-ngâ chhai Song-chú ke sṳn-thien ke-vi pûn-ngìn chhṳ̀-sí, fûn-fu ke-têu kiûn-kôn kóng: “Chiông kì tui sú-ví tông-chûng tai chhut-hi; kám kiu kì ke, khiung-yong oi pûn kì sí.”
[16] Só-yî kì-têu chok-tén Â-thâ-li-ngâ, chiông kì tai-to vòng-kiûng, chhai Mâ-mùn ke só-chhai chiông kì chhṳ̀-thet.
[17] Chi-sṳ̂ Yâ-hò-yâ-thai sat-fap pûn Yok-â-sṳ̂-vòng, ngìn-mìn lâu Song-chú li̍p-yok, oi cho Song-chú ke chṳ́-mìn. Kì ya ham vòng lâu ngìn-mìn li̍p-yok.
[18] Só-yî, chhiòn-koet ngìn-mìn to Pâ-li̍t-meu hi, chhak-thet meu, khau-thet chi-thàn lâu ngiéu-siong, yu chhai chi-thàn thèu-chhièn chhṳ̀-thet Pâ-li̍t ke chi-sṳ̂ Mâ-thán. Yâ-hò-yâ-thai phai-ngìn khon-sú Song-chú ke sṳn-thien,
[19] yèn-heu, kì lâu kiûn-kôn, vòng-sṳt sṳ-ví, vòng-kiûng sú-ví, fu-sung vòng tui sṳn-thien to vòng-kiûng; mìn-chung chhiòn-phu thèn chhai heu-poi. Yok-â-sṳ̂ tui ví-pîn-yàng ke mùn ngi̍p-hi, chhô chhai pó-chho táng-kô.
[20] Chhiòn-koet ngìn-mìn fôn-hí khoai-lo̍k, sàng-tú ya tông phìn-chhin, yîn-vi ke-sṳ̀ Â-thâ-li-ngâ yí-kîn chhai vòng-kiûng pûn-ngìn chhṳ̀-sí.
[21] Yok-â-sṳ̂ cho Yù-thai-vòng ke sṳ̀ chang chhit-se.