[1] Mâ-nâ-sî sṳ̍p-ngi se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ ńg-sṳ̍p ńg-ngièn. Kiâ-mê ôn-to Hia̍p-sî-pâ.
[2] Mâ-nâ-sî hàng Song-chú khon-cho sià-ok ke sṳ, chhiu-chhiong Song-chú chhai Kì ke chṳ́-mìn mien-chhièn kiuk-chéu ke ngièn-lòi ngoi-chhu̍k ngìn só-cho chit-ok ke sṳ.
[3] Kì chhùng-sîn hí kiâ-pâ Hî-sî-kâ só chhak-thet sân-kông táng ke sṳ̀n-meu, yu hí chi-thàn pai Pâ-li̍t, tá-chho Â-sa-lâ ńg-sṳ̀n ke chhû-siong, chhiong Yî-set-lie̍t-vòng Â-ha̍p só-cho ke, hàn hi kin-pai sṳ-fung thiên-siong.
[4] Kì chhai Yâ-lu-sat-lâng, chhiu chhai Song-chú fûn-fu oi kin-pai Song-chú ke sṳn-thien tî-poi hí yi-kau ke chi-thàn,
[5] yu chhai sṳn-thien ke lióng-chak thìn-yen hí pai thiên-siong ke chi-thàn.
[6] Kì chiông chhṳ-kâ ke lai-é piong-fó sêu-hien pûn sṳ̀n-mìn, yu hi puk-koa, hàng sià-su̍t, khiù-mun kâu-kúi ke lâu son-miang ke. Kì hàng tông-tô Song-chú khon-cho sià-ok ke sṳ, ngiâ Kì fat-khién.
[7] Kì chiông ke Â-sa-lâ ńg-sṳ̀n ke chhû-siong piong chhai sṳn-thien tî-poi. Lun-tó sṳn-thien, Song-chú sṳt tui Thai-ví lâu kiâ lai-é Só-lò-mùn kóng: “Yâ-lu-sat-lâng ke sṳn-thien chhiu-he Ngài tui Yî-set-lie̍t sṳ̍p-ngi kî-chhu̍k ke thú-thi chûng sién chhut-lòi, oi yún-yén cho kin-pai Ngài ke thi-fông.
[8] Na-he Yî-set-lie̍t ngìn-mìn ngin-chṳ̂n thâng-chhiùng Ngài só-yû ke kie-min, chûn-sú Ngài phu̍k-ngìn Mô-sî fûn-fu kì-têu só-yû ke fap-li̍t, Ngài yit-thin m̀-voi pûn kì-têu tui Ngài su-pûn kì-têu chú-siên ke liá-te thú-thi song pûn-ngìn kiuk-chéu.”
[9] Chúng-he Yù-thai ngìn-mìn m̀ thâng-chhiùng Song-chú ke min-lin. Mâ-nâ-sî tai kì-têu fam-chhui, pí Song-chú tui Kì ke chṳ́-mìn mien-chhièn kiuk-chéu ke ngièn-lòi ngoi-chhu̍k ngìn só-fam ke chhui hàn-kha ngiàm-chhung.
[10] Song-chú thûng-ko Kì ke phu̍k-ngìn — chung siên-tî kóng:
[11] “Yù-thai-vòng Mâ-nâ-sî cho liá-têu sià-ok ke sṳ, pí siên-chhièn Â-mô-li-ngìn só-cho ke hàn-kha fái; kì yung ngiéu-siong yín-yu Yù-thai ngìn-mìn fam-chhui.
[12] Só-yî, Ngài — Song-chú, Yî-set-lie̍t ke Song-ti kiet-thin oi kong châi-fo pûn Yâ-lu-sat-lâng lâu Yù-thai, sṳ́ só-yû thâng-tó liá-sṳ ke ngìn chhiòn-phu chho̍k-kiâng, ngí-kûng hiu-hiu-kún.
[13] Ngài oi yung khiung-yong ke phêu-chún chit-fa̍t Yâ-lu-sat-lâng, chhiong Ngài chit-fa̍t Sat-mâ-li-â án-ngiòng, yu chhiong Ngài chit-fa̍t Yî-set-lie̍t-vòng Â-ha̍p lâu kì ke heu-thoi yit-yong. Ngài oi chhù-thet Yâ-lu-sat-lâng ke ngìn-mìn, chhiong ngìn chhu̍t-chhiang phàn-è, chiông Yâ-lu-sat-lâng pién-chón lòi.
[14] Ngài oi fit-thet ke-têu chhûn-tó ke ngìn-mìn, chiông kì-têu kâu-pûn sù-thi̍t; ke-têu sù-thi̍t oi chhióng kì-têu, chiông kì-têu chok-chéu.
[15] Ngài oi án-ngiòng tui-thai Ngài ke chṳ́-mìn, yîn-vi kì-têu tet-chhui Ngài, ngiâ Ngài fat-khién, tui kì-têu ke chú-siên chhut Âi-khi̍p chhṳ̍t-to liá-ha.”
[16] Mâ-nâ-sî m̀ tân-chhiang tai Yù-thai ngìn-mìn fam-chhui, hoi kì-têu hàng Song-chú khon-cho sià-ok ke sṳ, kì yu chhṳ̀-thet chhin-tô vù-kû ke ngìn-mìn, sṳ́ Yâ-lu-sat-lâng mân-phien he hiet.
[17] Mâ-nâ-sî khì-thâ ke sṳ, lièn kì só-fam ke chhui, chhiòn-phu ki chhai Yù-thai Lie̍t-vòng Sṳ́ tî-poi.
[18] Mâ-nâ-sî sí-thet, chong chhai chhṳ-kâ vòng-kiûng nui Vû-sat ke mu-yèn tú; kì ke lai-é Â-mùn sṳ̀n-chiap kì cho vòng.
[19] Â-mùn ngi-sṳ̍p ngi-se ke sṳ̀ cho Yù-thai-vòng; kì chhai Yâ-lu-sat-lâng thúng-chhṳ lióng-ngièn. Kiâ-mê ôn-to Mí-sû-li-me̍t, he Yok-thì-pâ-sàng Ha̍p-lû-sṳ̂ ke moi-é.
[20] Â-mùn lâu kiâ-pâ Mâ-nâ-sî khiung-yong hàng Song-chú khon-cho sià-ok ke sṳ.
[21] Kì ho̍k kiâ-pâ só-yû ke hàng-vì, pai kiâ-pâ só-pai ke ngiéu-siong.
[22] Kì lì-khôi Song-chú — kiâ chú-siên ke Song-ti, m̀ chûn-hàng Song-chú ke tho-lu.
[23] Â-mùn-vòng ke kôn-yèn chho-fán, chhai vòng-kiûng chiông kì chhṳ̀-thet.
[24] Chúng-he Yù-thai ngìn-mìn chiông ke-têu mèu-sat Â-mùn-vòng ke ngìn chhṳ̀-thet, sat-li̍p Â-mùn ke lai-é Yok-sî-â sṳ̀n-chiap kì cho vòng.
[25] Â-mùn khì-thâ ke sṳ chhiòn-phu ki chhai Yù-thai Lie̍t-vòng Sṳ́ tî-poi.
[26] Â-mùn chong chhai Vû-sat ke mu-yèn nui, chhṳ-kâ ke fùn-mu tú; kiâ lai-é Yok-sî-â sṳ̀n-chiap kì cho vòng.