[1] সাফ্তার ফইল্যা দিনর বেইন্যা ফজরত য়েই মাইয়্যাফোয়াঅক্যলে য়েই হ্যোশ্বু মসল্যা নিয়েনে হব্যরর হাছে গেল্।
[2] য়িতারা দেকিল্ হব্যরর মুকর ত্যুন ফাত্যোরগান সরাই রাকা অইয়্যে,
[3] কিন্তু হব্যরর ভিতরে যাইয়েনে য়িতারা হযরত ইসার লাশ দেকিত্ নঅ ফাইল্।
[4] যহন য়িতারা তাইজ্যব অইয়েনে য়েই বিষয়ে ভাইব্তো আছিল্ তহন বিজ্লির ঝলকর মতন হঅর ফিঁদা দুইজন মানুষ য়িতারার ফাশদি আইয়েনে থিয়াইল্।
[5] ইয়ানত মাইয়্যাফোয়াঅক্যলে ডরাইয়েনে মাথা নিচু গরিল্। মানুষ দুয়া য়িতারারে হইল্, “যিবা জিন্দা য়িবারে মরাঅক্যলর মাঝে তালাইশ গইত্যা লাইগ্যো কিঅর লাই?
[6] তেঁই এডে নাই; তেঁই জিন্দা অই উইট্যে। তেঁই যহন গালিলত আছিল্ তহন তেঁই তোঁয়ারার হাছে যেগিন হইয়্যেল্ য়েগিন মনত গরি চঅ।
[7] তেঁই হইয়্যেল্, ইব্নে আদমরে গুনাহ্গার মানুষঅক্যলর আতত ধরাই দেয়া অইবো। তার বাদে তেঁইরে কুরুশর উঅরদি মারি ফেলা অইবো আর তিতিয় দিনত তেঁইর ত্যুন আবার জিন্দা অই উঢন ফরিবো।”
[8] তহন য়িতারার ত্যুন য়েই হতা মনত ফরিল্।
[9] য়িতারা হব্যরর ত্যুন ফিরি যাইয়েনে য়েই এগারজন উম্যত আর অইন্য বেক্যিনরে এই হতাগিন জানাইল্।
[10] য়েই মাইয়্যাফোয়াঅক্যলর মইধ্যে আছিল্ মগ্দলিনি মরিয়াম, যোহানা আর ইয়াকুবর মা মরিয়াম। য়িতারার লগে আর অইন্য যে মাইয়্যাফোয়াঅক্যল আছিল্ য়িতারাঅ এই হতাগিন সাআবিঅক্যলর হাছে হইল্।
[11] কিন্তু য়েই হতাগিন য়িতারার হাছে বাজো হতার মতনই মনে অইল্। য়িয়ানর লাই য়েই মাইয়্যাফোয়াঅক্যলর হতা য়িতারা বিশ্যাস নঅ গরিল্।
[12] ফিতর কিন্তু উঢিয়েনে দুঁরি হব্যরর হাছে গেল্ আর নিচু অইয়েনে হালি হঅরগিনই দেকিত্ ফাইল্। যেগিন ঘইট্যে য়েগিনত আচ্যাইয্য অইয়েনে তেঁই ফিরি আইল্।
[13] য়েই দিনই দুইজন উম্যত ইম্যায়ু নামর উগ্যুয়া গেরামত যাইতো আছিল্। গেরামগান জেরুজালেমর ত্যুন অনুমান সাত মাইল দুরে আছিল্।
[14] যেগিন ঘইট্যে য়েগিন নিয়েনে য়িতারা আলাফ-আলোচানা গইত্যো আছিল্।
[15] য়েই সমত ইসা নিজেই য়েডে আজির অইয়েনে য়িতারার লগে আঁইট্যো শুরু গরিল্।
[16] য়িতারার চোগ যেন্ বন্ধ অই গেইয়্যেল্, য়িয়ানর লাই য়িতারা ইসারে চিনিত্ নঅ ফারিল্।
[17] তহন ইসা য়িতারারে হইল্, “অনরা কি হতা হইতে হইতে যাইতা লাইগ্যোন?” য়েই দুইজন উম্যত মুক হালা গরিয়েনে থিয়াই রইল্।
[18] তহন ক্লিয়ফা নামর য়িতারার মইধ্যে একজন ইসারে ফুছার গরিল্, “অনেই কি জেরুজালেমর একমাত্র মানুষ যিবা নঅ জানে এই হঅদিনত য়েডে কি কি ঘইট্যে?”
[19] ইসা য়িতারারে হইল্, “কি কি ঘইট্যে?” য়িতারা হইল্, “নাসরত গেরামর ইসারে নিয়েনে যেগিন যেগিন ঘইট্যে। তেঁই নবি আছিল্। তেঁই হামে আর হতায় আল্লাহ্ আর বেক মানুষর চোগত শক্তিশালি আছিল্।
[20] আঁরার মেইন ইমামঅক্যলে আর ধর্মনেতাঅক্যলে তেঁইরে রোমিয়অক্যলর আতত ধরাই দিয়্যেল্ যেন্ য়িতারা তেঁইর বিচার গরিয়েনে তেঁইরে মরনর শাস্তি দেএ। ফরদি য়েই ইহুদি নেতাঅক্যলে তেঁইরে কুরুশত দিয়্যেল্।
[21] আঁরা আশা গজ্যিলাম তেঁইই ইসরাইল জাতিরে মুক্ত গরিবো। হ্যালি য়েইল্যাই নঅ, আইজ তিন দিন অইল্ এই ঘটনাগিন ঘইট্যে।
[22] আবার আঁরার দলর হয়েকজন মাইয়্যাফোয়া আঁরারে অবাক গইজ্যে। য়িতারা বেইন্যা ফজরত ইসার হব্যরত গেইয়্যেল্,
[23] কিন্তু য়েডে তেঁইর লাশ দেকিত্ নঅঅ ফাআ। য়িতারা ফিরি আইয়েনে হইল্, য়িতারা ফেরেস্তাঅক্যলর দেহ্যা ফাইয়্যে আর য়েই ফেরেস্তাঅক্যলে য়িতারারে হইয়্যে দে, ইসা বাঁচি আছে।
[24] তহন আঁরার লগে যারা আছিল্ য়িতারার মইধ্যে হয়েকজন হব্যরত যাইয়েনে মাইয়্যাফোয়াঅক্যলে যেন্ হইয়্যেল্ ঠিগ য়েন্ দেকিত্ ফাইল্, কিন্তু ইসারে দেকিত্ নঅ ফাইল্।”
[25] তহন ইসা য়িতারারে হইল্, “অনরা কিছুই নঅ বুঝন। অনরার মন এন্ অসার দে, নবিঅক্যলে যেগিন হইয়্যে য়েগিন অনরা বিশ্যাস নঅ গরন।
[26] এই হষ্টভোগগিন গরিয়েনে কি মসিহ্র মইমা লাভ গরিবার হতা নঅ আছিল্ না?”
[27] ইয়ার ফরদি তেঁই মুসার আর বেক নবিঅক্যলর কিতাবর ত্যুন শুরু গরিয়েনে গোডা ফাক কিতাবর মইধ্যে তেঁইর নিজর বিষয়ে যেগিন যেগিন লেহ্যা আছে য়েগিন বেক্যিনই য়িতারারে বুঝাই হইল্।
[28] য়িতারা যে গেরামত যাইতো আছিল্ য়েই গেরামর হাছাহাছি আইলে ফর ইসা আরো দুরে যাইবার ভাব দেহ্যাইল্।
[29] তহন য়িতারা বউত আদা আদি গরিয়েনে তেঁইরে হইল্, “এহন বেইল্ গেইয়্যে, আঁজুইন্যা অইয়্যে। অনে আঁরার লগে থাকন।” ইয়ানত তেঁই য়িতারার লগে থাকিবার লাই ঘরত ঢুকিল্।
[30] যহন তেঁই য়িতারার লগে হ্যাইতো বোইল্ তহন রুটি নিয়েনে আল্লাহ্রে শুকরিয়া জানাইল্ আর য়েগিন টুঁরা গরিয়েনে য়িতারারে দিল্।
[31] তহন য়িতারার চোগ খুলি গেল্; য়িতারা ইসারে চিনিত ফারিল্, কিন্তু য়িয়ানর লগে লগেই তেঁইরে আর দেহ্যা নঅ গেল্।
[32] তহন য়িতারা একজন অইন্যজনরে হইল্, “রাস্তাত যহন তেঁই আঁরার লগে হতা হইতো আছিল্ আর ফাক কিতাব বুঝাই দিতো আছিল্ তহন আঁরার দিল্ কি জলি জলি উইট্যো নঅ আছিল্ না?”
[33] তহনই য়েই দুইজন উঢিয়েনে জেরুজালেমত গেল্ আর য়েই এগারজন উম্যত ও য়িতারার লগে অইন্যতারারেঅ এক জাগাত দেকিত্ ফাইল্।
[34] হযরত ইসা দে আঁসাই জিন্দা অই উইট্যে আর শিমোনরে দেহ্যা দিয়্যে য়িয়ান নিয়েনে তহন য়িতারা আলোচানা গইত্যো আছিল্।
[35] য়েই দুইজন উম্যত রাস্তাত যেগিন অইয়্যেল্ য়েগিন য়িতারারে জানাইল্, য়িতারা আরো জানাইল্, তেঁই যহন রুটি টুঁরা টুঁরা গইত্যো আছিল্ তহন কেন্ গরিয়েনে য়িতারা তেঁইরে চিনিত্ ফাইজ্যেল্।
[36] য়েই উম্যতঅক্যলে যহন এই হতা হইতো আছিল্ তহন ইসা নিজে য়িতারার মইধ্যে আই থিয়াইয়েনে য়িতারা বেক্যিনরে হইল্, “আস্সালামু আলাইকুম।”
[37] য়িতারা ভুত দেকের ভাবিয়েনে বউত ডরাইল্।
[38] ইসা য়িতারারে হইল্, “তোঁয়ারা অস্তির অইতা লাইগ্যো কিঅর লাই আর কিঅর লাইই বা তোঁয়ারার মনত সন্দঅ জাগের?
[39] আঁর আত আর ঠেং চঅ। চঅ, ইবা আঁই। আঁরে ধরি চঅ, হারন ভুতর তঅ আঁর মতন আড্যি-গোস্ত নাই।”
[40] এই হতা হইয়েনে ইসা তেঁইর আত আর ঠেং য়িতারারে দেহ্যাইল্।
[41] কিন্তু য়িতারা এত আচ্যাইয্য আর খুশি অইয়্যেল্ দে, বিশ্যাস গরিত্ নঅ ফাইত্যো আছিল্। তহন ইসা য়িতারারে হইল্, “তোঁয়ারার এডে কি হনঅ হ্যানা আছে না?”
[42] য়িতারা তেঁইরে এক টুঁরা ভাজি মাছ দিল্।
[43] তেঁই য়িয়ান নিয়েনে য়িতারার সাম্নদিই হ্যাইল্।
[44] তার ফর তেঁই য়িতারারে হইল্, “আঁই যহন তোঁয়ারার লগে আছিলাম তহন হইয়্যিলাম, মুসার তোরাত শরিফত, নবিঅক্যলর কিতাবত আর জবুর শরিফর মইধ্যে আঁর বিষয়ে যে যে হতা লেহ্যা আছে য়েগিনর বেক ফুরন অঅনই ফরিবো।”
[45] ফাক কিতাব বুঝিবার লাই তেঁই উম্যতঅক্যলর বুদ্যি খুলি দিল্ আর য়িতারারে হইল্, “লেহ্যা আছে মসিহ্র ত্যুন হষ্ট ভোগ গরন ফরিবো আর তিন দিনর দিন মরনর ত্যুন জিন্দা অই উঢন ফরিবো।
[47] আরো লেহ্যা আছে, জেরুজালেমর ত্যুন শুরু গরিয়েনে বেক জাতির হাছে মসিহ্র নামে এই হ্যবর তবলিগ গরা অইবো দে, তঅবা গইল্যে গুনাহ্র মাফ ফাআ যাআ।
[48] তোঁয়ারাই এই বেক বিষয়র সাক্যি।
[49] চঅ, আঁর বাবা যেগিন দিবার ওয়াদা গইজ্যে য়েগিন আঁই তোঁয়ারার হাছে ফাটাই দিয়োম। বেহেস্তর ত্যুন শক্তি নঅ ফঅন ফইয্যন্ত তোঁয়ারা এই শঅরতই থাইক্যো।”
[50] ফরদি ইসা তেঁইর উম্যতঅক্যলরে নিয়েনে বেথানিয়া ফইয্যন্ত গেল্। য়েডে তেঁই আত তুলিয়েনে য়িতারারে দোয়া গরিল্।
[51] দোয়া গইত্যে গইত্যেই তেঁই য়িতারারে ছারি গেল্ আর তেঁইরে বেহেস্তত তুলি নিয়া অইল্।
[52] তহন য়িতারা উইত অইয়েনে তেঁইরে সইদা গরিল্ আর বউত খুশির লগে জেরুজালেমত ফিরি গেল্।
[53] য়িতারা অক্যল সমত বায়তুল মোকাদ্যসত আজির থাকিয়েনে আল্লাহ্র ফশংসা গইত্যো লাগিল্।