[1] য়েই সমত বাদশা অগাস্টাস সিজার তেঁইর রাইজ্যর বেক মানুষঅক্যলরে নাম লেহ্যাইবার উকুম দিল্।
[2] সিরিয়ার শাসনহত্যা কুরিনিয়র সমত এই ফইল্যাবার আদমশুমারির লাই নাম লেহ্যাআ অঅ।
[3] নাম লেহ্যাইবার লাই ফত্যিকে নিজর নিজর গেরামত যাইতো লাগিল্।
[4] ইউসুফ আছিল্ বাদশা দাউদর বংশর মানুষ। বাদশা দাউদর জন্মএস্তান আছিল্ এহুদিয়া ফদেশর বেথেলহেম গেরামত। য়িয়ানর লাই ইউসুফ নাম লেহ্যাইবার লাই গালিল ফদেশর নাসরত গেরামর ত্যুন বেথেলহেম গেরামত গেল্। মরিয়ামঅ তেঁইর লগে য়েডে গেল্। ইবারই লগে ইউসুফর বিয়া ঠিগ অইয়্যেল্ য়েই সমত মরিয়াম গর্ভিতা আছিল্ আর বেথেলহেমত থাইক্তেই তেঁইর ফোয়া অইবার সময় আই গেল্।
[7] য়েডে তেঁইর ফইল্যা ফোয়ার জন্ম অইল্, আর তেঁই ফোয়াউয়ারে হঅরত ফেঁচাইয়েনে জোঁয়াত রাকিল্, হারন অঅটলত য়িতারার লাই হনঅ জাগা নঅ আছিল্।
[8] বেথেলহেমর হাছে মাঢর মইধ্যে রাতিয়া ভেরাচরাইন্যাঅক্যলে য়িতারার ভেরার ঝাঁক ফাআরা দিতো আছিল্।
[9] এন্ সমত মাবুদর একজন ফেরেস্তা আতিক্যা য়িতারার সাম্নদি আজির অইল্। তহন মাবুদর মইমা য়িতারার চাইরো মিক্যাদি উজ্যল অইয়েনে দেহ্যা দিল্। ইয়ানত ভেরাচরাইন্যাঅক্যলে বউত ডরাইল্।
[10] ফেরেস্তা য়িতারারে হইল্, “নঅ ডরাইয়্যো, হারন আঁই তোঁয়ারার হাছে বঅর আনন্দর হ্যবর আন্যি। এই আনন্দ বেক মানুষরই লাই।
[11] আজিয়া দাউদর গেরামত তোঁয়ারার নাজাতদাতার জন্ম অইয়্যে। তেঁইই মসিহ্, তেঁইই ফভু।
[12] এই হতা দে আঁসা তোঁয়ারার হাছে য়িয়ানর চিন্য অইল্ এই – তোঁয়ারা হঅরত ফেঁচাইন্যা আর জোঁয়াত শোয়াইন্যা উগ্যুয়া লেদাফোয়ারে দেকিত্ ফাইবা।”
[13] এই সমত য়েই ফেরেস্তার লগে আতিক্যা য়েডে আরো বউত ফেরেস্তারে দেহ্যা গেল্। য়িতারা আল্লাহ্র ফশংসা গরিয়েনে হইতো লাগিল্,
[14] “বেহেস্তত আল্লাহ্র ফশংসা অক, দুনিয়াত যারার উঅর তেঁই খুশি য়িতারার শান্তি অক।”
[15] ফেরেস্তাঅক্যলে য়িতারার হাছর ত্যুন বেহেস্তত যাইবা গইর ফর ভেরাচরাইন্যাঅক্যলে একজন অইন্যজনরে হইল্, “চল, আঁরা বেথেলহেমত যাই আর যে ঘটনার হতা মাবুদ আঁরারে জানাইল্ য়িয়ান যাইয়েনে চাই।”
[16] য়িতারা তরাতরি যাইয়েনে মরিয়াম, ইউসুফ আর জোঁয়াত শোয়াইন্যা য়েই লেদাফোয়াউয়ারে তালাইশ গরিয়েনে বাইর গরিল্।
[17] য়িতারার হাছে য়েই লেদাফোয়াউয়ার বিষয়ে যেগিন জানাআ অইয়্যেল্, লেদাফোয়াউয়ারে দেকিবার ফরদি য়িতারা য়েগিন হইল্।
[18] ভেরাচরাইন্যাঅক্যলর হতা উনিয়েনে বেক্যিনে তাইজ্যব অইল্;
[19] কিন্তু মরিয়াম বেক কিছু মনত গাঁতি রাকিল্, কেউঅরে নঅ হইল্; তেঁই য়েই বিষয়ে চিন্তা গইত্যো থাকিল্।
[20] ফেরেস্তাঅক্যলে ভেরাচরাইন্যাঅক্যলর হাছে যেগিন হইয়্যেল্ বেক কিছু য়েই মতন দেকি আর উনিয়েনে য়িতারা আল্লাহ্র ফশংসা আর গোরব গইত্যে গইত্যে ফিরি গেল্।
[21] জন্মর আষ্ট দিনর দিন ইহুদিঅক্যলর নিয়ম মতন যহন লেদাফোয়াউয়ার সুন্যত গরাইবার সময় অইল্ তহন য়িবার নাম রাকা অইল্ ইসা। মার গর্ভত আইবার আগদি ফেরেস্তা তেঁইর এই নামই দিয়্যেল্।
[22] ফরদি মুসার শরিয়ত মতন য়িতারার ফাক-সাফ অইবার সময় অইল্। তহন ইউসুফ আর মরিয়াম ইসারে মাবুদর সাম্নদি আজির গরিবার লাই তেঁইরে জেরুজালেম শঅরত লই গেল্,
[23] হারন মাবুদর শরিয়তত লেহ্যা আছে, “ফইল্যা জন্ম অইয়্যে এন্ ফত্যিউয়া মরতফোয়ারে মাবুদর বুলি ধরা অইবো।”
[24] এগিন বাদেঅ “একজোরা হঅঅল বা দুয়া হইতোরর বাইচ্যা” হোরবানি দিবার হতা যেইল্যা মাবুদর শরিয়তত লেহ্যা আছে য়েনগরিয়েনে য়িতারা য়েগিন হোরবানি দিতো গেল্।
[25] তহন জেরুজালেমত শামাউন নামর একজন ধার্মিক আর আল্লাহ্ভক্ত মানুষ আছিল্। আল্লাহ্ হঁত্যে বনি-ইসরাইলঅক্যলর দুক্য দুর গরিবো য়েই সময়র লাই তেঁই অফেক্যা গইত্যো আছিল্। ফাক-রুহ্ তেঁইর উঅর আছিল্ আর তেঁইর হাছে জানাইয়্যেল্ দে, মরি যাইবার আগদি তেঁই মাবুদর য়েই মসিহ্রে দেকিত্ ফাইবো।
[27] ফাক-রুহ্ দিয়েনে চালিত অই শামাউন য়েই দিন বায়তুল মোকাদ্যসত আইল্। মুসার শরিয়ত মতন যেগিন গরন দরহার য়েগিন গরিবার লাই ইসার মা-বাবা লেদা ইসারে লইয়েনে য়েডে আইল্।
[28] তহন শামাউন তেঁইরে হোলত লইল্ আর আল্লাহ্র ফশংসা গরিয়েনে হইল্,
[29] “মাবুদ, তুঁই তোঁয়ার হতা মতন তোঁয়ার গোলামরে এহন শান্তিত্ বিদায় দিতা লাইগ্যো,
[30] হারন মানুষরে নাজাত গরিবার লাই বেক মানুষর চোগর সাম্নদি তুঁই যে বেবস্তা গইজ্যো, আঁই য়েগিন দেকিত্ ফাইয়্যি।
[32] অইন্য জাতির হাছে ইয়ান ফথ দেহ্যাইবার নুর, আর তোঁয়ার ইসরাইল জাতির হাছে ইয়ান গোরবর বিষয়।”
[33] শামাউন লেদাফোয়াউয়ার বিষয়ে যেগিন হইল্, য়িয়ানত ফোয়াউয়ার মা-বাবা তাইজ্যব অইল্।
[34] ইয়ার ফরদি শামাউন য়িতারারে দোয়া গরিল্ আর ইসার মা মরিয়ামরে হইল্, “আল্লাহ্ ইয়ানই ইস্তির গইজ্যে দে, এই লেদাফোয়াউয়ার লাই বনি-ইসরাইলঅক্যলর মইধ্যে বউত কেউঅরই ফতন অইবো, আবার বউত কেউই উদ্যার ফাইবো। ইবা এন্ এক্যান চিন্য অইবো যিবার বিরুদ্যে বউত কেউই হতা হইবো,
[35] আর য়িয়ানত য়িতারার মনর চিন্তা ফকাশ অই ফরিবো। এগিন বাদে ছুরির আঘাতর মতন দুক্য তোঁয়ার দিলরে গাঁতিবো।”
[36] য়েই সমত হান্না নামর একজন মাইয়্যাফোয়া নবি আছিল্। তেঁই আশের বংশর ফনুয়েলর মাইয়্যা। তেঁইর বউত বয়স অইয়্যেল্। সাত বছর জামাইর ঘর গরিবার ফরদি চুরাশি বছর বয়স ফইয্যন্ত তেঁই রারির জিবন হাডাইয়্যেল্। বায়তুল মোকাদ্যস ছারিয়েনে তেঁই হনঅ মিক্যা নঅ যাইতো কিন্তু রোজা আর মুনাজাতর মইধ্য দিয়েনে দিন রাইত আল্লাহ্র এবাদত গইত্যো।
[38] তেঁইঅ ঠিগ য়েই সমত আগাই আইয়েনে আল্লাহ্র শুকরিয়া আদায় গইত্যো লাগিল্, আর আল্লাহ্ জেরুজালেমরে মুক্ত গরিবো বুলি যারা অফেক্যা গইত্যো আছিল্ য়িতারার হাছে য়েই লেদাফোয়াউয়ার হতা হইতো লাগিল্।
[39] মাবুদর শরিয়ত মতন বেক কিছু শেষ গরিয়েনে মরিয়াম আর ইউসুফ গালিলত য়িতারার নিজরার গেরাম নাসরতত ফিরি গেল্।
[40] লেদা ইসা বয়সে বারিয়েনে শক্তিমান অই উঢিল্ আর গেয়ানে ফুরন অইতো থাকিল্। তেঁইর উঅরে আল্লাহ্র রহমত আছিল্।
[41] উদ্যার ইদর সমত ইসার মা-বাবা ফত্যি বছর জেরুজালেমত যাইতো।
[42] ইসার বয়স যহন বার বছর তহন নিয়ম মতনই য়িতারা য়েই ইদত গেল্।
[43] ইদর শেষদি য়িতারা যহন বাড়িত ফিত্যো আছিল্ তহন ইসা জেরুজালেমতই থাকি গেল্। তেঁইর মা-বাবা কিন্তু য়েই হতা নঅ জাইন্তো।
[44] তেঁই লগর মানুষঅক্যলর মইধ্যে আছে মনে গরিয়েনে য়িতারা একদিনর ফথ গেল্ গই। ফরদি য়িতারা য়িতারার আত্যিয় আর জানাউনা মানুষঅক্যলর মইধ্যে ইসার তালাইশ গইত্যো লাগিল্।
[45] কিন্তু তালাইশ গরি নঅ ফাইয়েনে তেঁইরে তালাইশ গইত্যে গইত্যে য়িতারা আবার জেরুজালেমত ফিরি গেল্।
[46] শেষদি তিন দিন ফরে য়িতারা তেঁইরে বায়তুল মোকাদ্যসত ফাইল্। তেঁই আলেমঅক্যলর মইধ্যে বইয়েনে য়িতারার হতা উইন্তো আছিল্ আর য়িতারারে ফশ্ন ফুছার গইত্যো আছিল্।
[47] যারা ইসার হতা উইন্তো আছিল্ য়িতারা বেক্যিনে তেঁইর বুদ্যি দেকিয়েনে আর তেঁইর জোয়াব উনিয়েনে তাইজ্যব অইতো আছিল্।
[48] তেঁইর মা-বাবা তেঁইরে দেকিয়েনে আচ্যাইয্য অইল্। তেঁইর মা তেঁইরে হইল্, “বাবা, তুঁই আঁরার লগে এন্ কিআ গইল্যা? তোঁয়ার বাবা আর আঁই হত বেকুল অইয়েনে তোঁয়ার তালাইশ গইত্যাম আছিলাম।”
[49] ইসা য়িতারারে হইল্, “তোঁয়ারা কিঅর লাই আঁর তালাইশ গইত্যা আছিলা? তোঁয়ারা কি নঅ জাইন্তা দে, আঁর বাবার ঘরত আঁর ত্যুন থাকন ফরিবো?”
[50] ইসা যেগিন হইল্ তেঁইর মা-বাবা য়েগিন নঅ বুঝিল্।
[51] ইয়ার ফরদি তেঁই য়িতারার লগে নাসরতত ফিরি গেল্ আর য়িতারার বাইধ্য অই রইল্। তেঁইর মা এই বিষয়গিন মনত গাঁথি রাকিল্।
[52] ইসা গেয়ানে, বয়সে আর আল্লাহ্ ও মানুষর মহব্যতে বারি উইট্যো লাগিল্।