[1] ইয়ার ফরদি ইসা চাই দেকিল্, ফুইসাআলা মানুষঅক্যলে বায়তুল মোকাদ্যসর দানর বক্সত য়িতারার দান রাকের।
[2] তেঁই দেকিল্, একজন গরিব রারি আইয়েনে দুয়া ফুইসা রাকিল্।
[3] তহন ইসা তেঁইর উম্যতঅক্যলরে হইল্, “আঁই তোঁয়ারারে আঁসাই হইর, এই গরিব রারি অইন্য বেক্যিনর ত্যুন বউত বেশি রাকিল্।
[4] হারন অইন্যতারা বেক্যিনে য়িতারার বউত ধনর ত্যুন দান গইজ্যে, কিন্তু এই মাইয়্যাফোয়াউয়ার অভাব থাকিলেঅ বাঁচি থাকিবার লাই য়িবার যেগিন আছিল্ বেক্যিনই দিই দিল্।”
[5] উম্যতঅক্যলর মইধ্যে হয়েকজন বায়তুল মোকাদ্যসর বিষয়ে আলোচানা গইত্যো আছিল্। য়িতারা হইতো আছিল্, সুন্দর সুন্দর ফাত্যোর আর দানর জিনিস দিয়েনে দালানগান কেন্ সাজাইন্যা অইয়্যে। তহন ইসা হইল্,
[6] “তোঁয়ারা তঅ এগিন দেইক্তা লাইগ্যো, কিন্তু এন্ দিন আইবো যহন ইয়ানর উগ্যুয়া ফাত্যোরর উঅরদি আর উগ্যুয়া ফাত্যোর থাইক্তো নঅ; গোডাগানই ভাঁগি ফেলা অইবো।”
[7] উম্যতঅক্যলে ইসারে ফুছার গরিল্, “উজুর, হঁত্যে এগিন অইবো আর হন্ চিন্য দেকিয়েনে আঁরা বুঝিত্ ফাইজ্যোম দে, এগিন ঘটিবার সময় আইস্যে?”
[8] জোয়াবে ইসা হইল্, “চাইয়্যো, কেউ যেন্ তোঁয়ারারে নঅ ঠগাআ, হারন বউত কেউ আঁর নাম নিই আইয়েনে হইবো, ‘আঁইই মসিহ্ বা সময় হাছে আইস্যে।’ য়িতারার ফিছদি নঅ যাইয়্যো।
[9] তোঁয়ারা যহন যুদ্যর আর বিদ্রোওর হ্যবর উনিবা তহন নঅ ডরাইয়ো, হারন ফইল্যাদি এগিন অইবোই; কিন্তু তহনই দে শেষ সময় আইবো য়িয়ান নঅ।”
[10] তার ফর ইসা য়িতারারে হইল্, “এক জাতি আরেক জাতির বিরুদ্যে ও এক রাইজ্য অইন্য রাইজ্যর বিরুদ্যে যুদ্য গরিবো।
[11] বিরাট ভুসাল্ অইবো আর বিন্য বিন্য জাগাত দুবির্ক্য ও মআমারি অইবো। এগিন বাদে আসমানত এন্ হতাক্যিন ঘটনা ঘটিবো আর চিন্য দেহ্যা যাইবো যেগিন বিরাট আর ভয়ংকর।
[12] “এগিন অইবার আগদি মানুষঅক্যলে তোঁয়ারারে ধরিবো আর তোঁয়ারার উঅর জুলুম গরিবো। বিচারর লাই য়িতারা তোঁয়ারারে মজলিস হ্যানাত লই যাইবো আর জেলত্ দিবো। আঁর লাই বাদশাঅক্যলর আর শাসনহত্যাঅক্যলর সাম্নদি তোঁয়ারারে নেয়া অইবো,
[13] আর য়িয়ানত আঁর সমন্দে সাক্যি দিবার লাই তোঁয়ারার সুযোগ অইবো।
[14] তোঁয়ারা এহনই মনে মনে ঠিগ গরি ফেল, তহন নিজর ফক্যে হতা হইবার লাই তোঁয়ারা আগর ত্যুন রেডি নঅ অইবা,
[15] হারন আঁই তোঁয়ারারে এন্ গেয়ান যোগাই দিয়োম যেগিনর জোয়াবে তোঁয়ারার শত্রুঅক্যলে কিছু হইত্অ ফাইত্যো নঅ আর য়েগিন অসিকারঅ গরিত্ ফাইত্যো নঅ।
[16] তোঁয়ারার মা-বাবা, ভাই-বন্ধু আর আত্যিয়-সজনঅক্যলে তোঁয়ারারে ধরাই দিবো। য়িতারা তোঁয়ারার কেউ কেউঅরে মারিঅ ফেলাইবো।
[17] আঁর লাই বেক্যিনে তোঁয়ারারে ঘিনা গরিবো,
[18] কিন্তু হনঅ মতেই তোঁয়ারার এক্যান চুলঅ তচনচ অইতো নঅ।
[19] তোঁয়ারা ইস্তির থাকিলে তোঁয়ারার আসল জিবন ফুন্যতা ফাইবো।
[20] “যহন তোঁয়ারা দেকিবা জেরুজালেমরে সৈন্যঅক্যলে ঘিরি ফেইল্যে তহন বুঝিবা দে, জেরুজালেমর তচনচ অইবার সময় হাছে আইস্যে।
[21] য়েই সমত যারা এহুদিয়াত থাকিবো য়িতারা ফাআরি এলাহাত ধাই যক। যারা শঅরর মইধ্যে থাকিবো য়িতারা শঅরর বাইরে যক গই। যারা গেরামর মিক্যা থাকিবো য়িতারা হনঅ মতেই শঅরত নঅ আইয়্যোক,
[22] হারন এই দিনগিন অইবো গজবর দিন, আর ইয়ানত ফাক কিতাবত যেগিন লেহ্যা আছে য়েগিন ফুরন অইবো।
[23] তহন যারা গভির্তা আর যারা ফোয়াছারে বুগর দুধ হ্যাবাআ য়িতারার অবস্তা কি বিরাটই না অইবো! দেশত বিরাট হষ্ট আজির অইবো আর ইহুদি মানুষঅক্যলর উঅরদি আল্লাহ্র গজব লামি আইবো।
[24] তলোয়ার দিয়েনে য়িতারারে মারি ফেলা অইবো আর বেক জাতির মইধ্যে য়িতারা বন্দি ইসাবে ছরাই ছিঁডাই থাকিবো। যেতদিন না অ-ইহুদিঅক্যলর সময় ফুরন অঅ য়েতদিন ফইয্যন্ত অ-ইহুদিঅক্যলে জেরুজালেমরে য়িতারার ঠেংগর নিচদি মাড়াইতো থাকিবো।
[25] “তহন সুয্য, চাঁন আর তারাগিনর মইধ্যে বউত চিন্য দেহ্যা যাইবো। দুনিয়ার বেক জাতি হষ্ট ফাইবো আর সমুদ্রর গজ্যন ও ঢেউঅর লাই য়িতারা বউত অস্তির অই উঢিবো।
[26] দুনিয়াত কি আইয়্যের ভাবিয়েনে ডরে মাইন্ষ্যে অগ্যেয়ান অই ফরিবো, হারন চাঁন-সুয্য-তারা ইত্যাদি আর ইস্তির থাইক্তো নঅ।
[27] য়েই সমত মআকুদরতি আর মইমার লগে ইব্নে আদমরে য়িতারা মেউলার মইধ্যে আইস্তো দেকিবো।
[28] এই ঘটনাগিন ঘইট্যো শুরু গইল্যে ফর তোঁয়ারা উঢিয়েনে থিয়াইয়্যো আর মুক তুইল্যো, হারন তোঁয়ারার মুক্তির সময় হাছে আইস্যে।”
[29] ইয়ার ফরদি ইসা তেঁইর উম্যতঅক্যলরে শিক্যা দিবার লাই এই হতা হইল্, “ডোংগুলা গাছ আর অইন্যাইন্য গাছগিনরে খিয়াল গর।
[30] ফাতা বাইর অইতো দেকিলে ফর তোঁয়ারা বুঝিত্ ফার দে, গরমহাল হাছে আইস্যে।
[31] য়েন্ গরিয়েনে যহন তোঁয়ারা এগিন ঘইট্যো দেকিবা তহন বুঝিত্ ফারিবা দে, আল্লাহ্র রাইজ্য হাছে আই গেইয়্যে।
[32] আঁই তোঁয়ারারে আঁসাই হইর, যহন এগিন অইবো তহনঅ এই হালর কিছু মানুষ বাঁচি থাকিবো।
[33] আসমান আর জবিনর শেষ অইবো, কিন্তু আঁর হতা চিরদিন থাকিবো।
[34] “তোঁয়ারা সাবধান থাইক্যো যেন্ তোঁয়ারার দিল্ উশৃংকলতাত, মাতালামিত আর সংসারর চিন্তার ভারে নুই নঅ ফরে। য়েইল্যা নঅ অইলে ফাঁদ্ যেইল্যা আতিক্যা বন্ধ অই যাআ য়েইল্যা আতিক্যা য়েই দিনগান তোঁয়ারার উঅরদি, এন্ কি, দুনিয়ার বেক মানুষর উঅরদি আই ফরিবো।
[36] অঅজাগ থাইক্যো আর অক্যল সমত মুনাজাত গইজ্যো যেন্ যেতকিছু ঘটিবো য়েগিন ফার অই যাইতে আর ইব্নে আদমর সাম্নদি যাইয়েনে থিয়াইতে তোঁয়ারা শক্তি ফঅ।”
[37] য়েই সমত ইসা ফত্যিদিনই বায়তুল মোকাদ্যসত শিক্যা দিতো, কিন্তু রাতিয়া বাইরে যাইয়েনে জৈতুন ফাআরত থাইক্তো।
[38] বেক মানুষ তেঁইর হতা উনিবার লাই বেইন্যা ফজরতই বায়তুল মোকাদ্যসত আজির অইতো।