[1] ইসা জেরিকো শঅরর মইধ্য দিয়েনে যাইতো আছিল্।
[2] য়েডে সক্যেয় নামর একজন মানুষ আছিল্। য়িবা আছিল্ মেইন হ্যাজানা আদায়হারি আর একজন ফুইসাআলা মানুষ।
[3] ইসা হঅন, য়িয়ান য়িবা চাইতো চেষ্টা গইত্যো আছিল্, কিন্তু বাঁইট্যা আছিল্ বুলি ভিরর লাই ইসারে দেকিত্ ফাইত্যো নঅ আছিল্।
[4] য়িয়ানর লাই তেঁই ইসারে চাইবার লাই সাম্নদি দুঁরি যাইয়েনে উগ্যুয়া ডোংগুলা গাছত উঢিল্, হারন ইসা য়েই ফথদিই যাইতো আছিল্।
[5] ইসা য়েই ডোংগুলা গাছর হাছে আইয়েনে উঅরর মিক্যা চাইল্ আর সক্যেয়রে হইল্, “সক্যেয়, তরাতরি লামি আইয়্যো, হারন আজিয়া তোঁয়ার বাড়িত আঁর ত্যুন থাকন ফরিবো।”
[6] সক্যেয় তরাতরি লামি আইল্ আর আনন্দর লগে ইসারে গ্রঅন গরিল্।
[7] ইয়ান দেকিয়েনে বেক্যিনে বক্বকাইয়েনে হইল্, “য়িবা একজন গুনাহ্গার মানুষর মেঅমান অইতো গেল্।”
[8] সক্যেয় য়েডে থিয়াইয়েনে ইসারে হইল্, “উজুর, আঁই আঁর ধন-সম্বত্যির অদ্যক গরিবঅক্যলরে দিই দিইর আর যুদি কেউঅরে ঠগাই থাকি তইলে য়েগিনর চাইর গুন ফিরাই দিইর।”
[9] তহন ইসা হইল্, “এই বাড়িত আজিয়া নাজাত আইল্, হারন ইবাঅ তঅ ইব্রাহিমর বংশর একজন।
[10] যারা আআজি গেইয়্যে য়িতারারে তালাইশ গইত্যে আর নাজাত গইত্যেই ইব্নে আদম আইস্যে।”
[11] ইসা তহন যেডে আছিল্ য়েডের ত্যুন জেরুজালেম বেশি দুরে নঅ আছিল্, আর যারা তেঁইর হতা উইন্তো আছিল্ য়িতারা ভাইব্তো আছিল্ আল্লাহ্র রাইজ্য বউত তরাতরিই দেহ্যা যাইবো। য়িয়ানর লাই ইসা য়িতারারে শিক্যা দিবার লাই এই হতা হইল্:
[12] “একজন উচুল বংশর মানুষ রাজ-ফদ নিয়েনে ফিরি আইবো বুলি দুর দেশত গেল্।
[13] যাইবার আগদি তেঁই তেঁইর দশজন গোলামরে ডাকিল্ আর ফত্যি জনরে একশ দিনার গরি দিয়েনে হইল্, ‘আঁই ফিরি নঅ আইয়্যোন ফইয্যন্ত এগিন দিয়েনে বেবসা গর।’
[14] “য়িবার দেশর মানুষঅক্যলে কিন্তু য়িবারে ঘিনা গইত্যো। ইয়ানর লাই য়িতারা য়িবার ফিছদি মানুষ ফাটাইয়েনে হ্যবর দিল্, ‘আঁরা নঅ চাই এই মানুষ্যুয়া আঁরার উঅর রাজত্য গরক।’
[15] “তঅঅ তেঁই বাদশা নিযুক্ত অইয়েনে ফিরি আইল্ আর যে দশজন গোলামরে টিঁয়া দিয়্যেল্ য়িতারারে ডাকি আনিবার লাই উকুম দিল্। তেঁই জাইন্তো চাইল্ বেবসা গরিয়েনে য়িতারা হনে হত লাভ গইজ্যে।
[16] ফইল্যাজন আইয়েনে হইল্, ‘উজুর, অনর টিঁয়া দিয়েনে আঁই দশগুন লাভ গজ্যি।’
[17] “বাদশা য়িবারে হইল্, ‘শাব্যাশ! তুঁই ভালা গোলাম। তুঁই সামাইন্য বিষয়ে বিশ্যস্ত অইয়্যো বুলি আঁই তোঁয়ারে দোশ্যুয়া গেরামর ভার দিলাম।’
[18] “দিতিয় গোলাম্যুয়া আইয়েনে হইল্, ‘উজুর, অনর টিঁয়া দিয়েনে আঁই ফাঁচগুন লাভ গজ্যি।’
[19] “তেঁই য়েই গোলামরে হইল্, ‘তুঁই ফাঁচ্যুয়া গেরামর ভার ফাইবা।’
[20] “তার ফর অইন্য আরেকজন গোলাম আইয়েনে হইল্, ‘উজুর, আঁই অনর টিঁয়া নুয়ালত্ বাঁধি রাকি দিয়্যিলাম।
[21] অনর সমন্দে আঁর ডর আছিল্ হারন অনে বঅর হরা মানুষ; অনে যেগিন জমা নঅঅ গরন য়েগিন লই থাকন আর যেগিন নঅঅ রুকন য়েগিন হাডন।’
[22] “তহন বাদশা হইল্, ‘ওরে দুষ্ট গোলাম! তোর মুকর হতা দিয়েনেই আঁই তোর বিচার গইজ্যোম। তুই তঅ জান্তি দে, আঁই হরা মানুষ; যেগিন জমা নঅঅ গরি য়েগিন নিই থাকি আর যেগিন নঅঅ রুকি য়েগিন হাডি।
[23] তইলে আঁর টিঁয়া তুই মাআজনর হাছে নঅঅ রাকস কিঅর লাই? তইলে তঅ আঁই আইয়েনে টিঁয়াগিনঅ ফাইতাম আর লগে এক্যানা সুদঅ ফাইতাম।’
[24] “যারা বাদশার হাছে থিয়াই আছিল্ বাদশা য়িতারারে হইল্, ‘তার হাছর ত্যুন য়েই একশ দিনার লই লঅ আর যিবার এক আজার দিনার আছে য়িবারে দঅ।’
[25] “তহন য়েই মানুষঅক্যলে বাদশারে হইল্, ‘উজুর, য়িবার তঅ এক আজার দিনার আছে।’
[26] “বাদশা হইল্, ‘আঁই তোঁয়ারারে হইর, যার আছে তারে আরো দেয়া অইবো, কিন্তু যার নাই তার যেগিন আছে য়েগিনঅ তার হাছর ত্যুন নিই নেয়া অইবো।
[27] আঁর শত্রুঅক্যল যারা নঅঅ চাআ আঁই বাদশা অই, য়িতারারে এডে লই আইয়্যো আর আঁর সাম্নদি মারি ফেল।’”
[28] এই হতাগিন হইবার ফরদি ইসা য়িতারার আগদি আগদি জেরুজালেমর মিক্যা চলিল্।
[29] যহন তেঁই জৈতুন ফাআরর গাআত বৈত্ফগি আর বেথানিয়া গেরামর হাছে আইল্ তহন তেঁইর দুইজন উম্যতরে এই বুলি ফাটাই দিল্,
[30] “তোঁয়ারা সাম্নর উই গেরামত যঅ। য়েডে ঢুকিবার সমত দেকিত্ ফাইবা উগ্যুয়া গাধার বাইচ্যা বাঁধা আছে। য়িয়ানর উঅরদি কেউ হনঅ দিনঅ নঅঅ চড়ে। য়িয়ান খুলিয়েনে এডে লই আইয়্যো।
[31] যুদি কেউ ফুছার গরে, ‘য়িয়ান খুইল্তা লাইগ্যো কিঅর লাই?’ তইলে হইয়্যো, ‘উজুরর দরহার আছে।’”
[32] যে উম্যতঅক্যলরে ফাটাআ অইয়্যেল্ য়িতারা যাইয়েনে ইসার হতামতনই বেক কিছু দেকিত্ ফাইল্।
[33] য়িতারা যহন য়েই বাইচ্যাউয়া খুইল্তো আছিল্ তহন মালিকঅক্যলে য়িতারারে ফুছার গরিল্, “তোঁয়ারা বাইচ্যাউয়া খুইল্তা লাইগ্যো কিঅর লাই?”
[34] য়িতারা হইল্, “উজুরর দরহার আছে।”
[35] তার ফর উম্যতঅক্যলে য়েই গাধার বাইচ্যাউয়া ইসার হাছে আনিল্ আর য়িয়ানর উঅরদি য়িতারার গাআর চাদ্যর বিছাই দিয়েনে ইসারে বোয়াইল্।
[36] তেঁই যহন যাইতো আছিল্ তহন মানুষঅক্যলে নিজরার গাআর চাদ্যর ফথত বিছাই দিতো লাগিল্।
[37] এন্ গরিয়েনে ইসা জেরুজালেমর হাছে আই যে রাস্তাগান জৈতুন ফাআরর ত্যুন লামি গেইয়্যে য়েই রাস্তাত আইল্। ইসার লগে তেঁইর বউত উম্যত আছিল্। য়েই উম্যতঅক্যলে তেঁইর যে কেরামতি হামগিন দেইক্যেল্ য়েগিনর লাই খুশিতে চিল্যাইয়েনে আল্লাহ্র ফশংসা গরি হইতো লাগিল্,
[38] “মাবুদর নামে যে বাদশা আইয়্যের, তেঁইর ফশংসা অক! বেহেস্ততই শান্তি, আর য়েডে আল্লাহ্র মইমা দেহ্যা যাআ।”
[39] ভিরর মইধ্যর ত্যুন হয়েকজন ফরিশি ইসারে হইল্, “উজুর, অনর উম্যতঅক্যলরে চুব গইত্যো হঅন।”
[40] ইসা য়িতারারে হইল্, “আঁই অনরারে হইর, ইতারা যুদি চুব গরি থাকে তইলে ফাত্যোরগিন চিল্যাই উঢিবো।”
[41] য়িতারা যহন জেরুজালেমর হাছে আইল্ তহন ইসা শঅরগান দেকিয়েনে হাঁদিল্।
[42] তেঁই হইল্, “আয়-হায়, শান্তি ফাইবার লাই যেগিন দরহার, তুঁই, জি তুঁই যুদি আজিয়া য়েগিন বুঝিত্ ফাইত্যা! কিন্তু এহন য়েগিন তোঁয়ার চোগর আড়ালত রইয়্যে।
[43] এন্ সময় তোঁয়ার আইবো যহন শত্রুঅক্যল তোঁয়ার বিরুদ্যে বাধার দেবাল তুলিবো আর তোঁয়ারে ঘিরি রাকিবো ও বেক মিক্যার ত্যুন তোঁয়ারে চাবি ধরিবো।
[44] য়িতারা তোঁয়ারে আর তোঁয়ার ভিতরর বেক মানুষরে ধরিয়েনে মেডিত আছার মারিবো ও উগ্যুয়া ফাত্যোরর উঅরদি আর উগ্যুয়া ফাত্যোর রাইকতো নঅ, হারন আল্লাহ্ যে সমত তোঁয়ার মিক্যা মনোযোগ দিয়্যেল্ য়েই সময়গান তুঁই চিনি নঅঅ লঅ।”
[45] ইয়ার ফরদি ইসা বায়তুল মোকাদ্যসত ঢুকিয়েনে বেবসায়িঅক্যলরে দুঁরাই দিল্।
[46] তেঁই য়েই বেবসায়িঅক্যলরে হইল্, “ফাক কিতাবত লেহ্যা আছে, ‘আঁর ঘর মুনাজাতর ঘর অইবো,’ কিন্তু তোঁয়ারা য়িয়ানরে ডাহাইতোর আড্যাহ্যানা গরি তুইল্যো।”
[47] ইসা ফত্যিদিনই বায়তুল মোকাদ্যসত যাইয়েনে শিক্যা দিতো লাগিল্। মেইন ইমামঅক্যল, আলেমঅক্যল আর মানুষঅক্যলর নেতাঅক্যলে তেঁইরে মারি ফেইল্তো চাইল্,
[48] কিন্তু কেন্ গরিয়েনে য়িয়ান গরিবো য়িয়ানর হনঅ উফায় য়িতারা টোয়াই নঅ ফাইল্, হারন মানুষঅক্যলে মন দিয়েনে তেঁইর ফত্যিউয়া হতা উইন্তো।