[1] Ayiwa Josue ye Israɛl bɔnsɔn bɛɛ lajɛ Sisɛm ka Israɛl cɛkɔrɔbaw ni u ka kuntigiw ni u ka kiritigɛlaw ani u ka jalatigiw wele ka u jɔ Ala ɲɛ kɔrɔ.
[2] Josue y'a fɔ jama bɛɛ ye ko: «Matigi, Israɛl ka Ala kumana, ko: ‹Aw bɛnbaw Ibrahima ni Nakɔr fa Terak sigilen tun bɛ ba kɔ fɛ kabini waati jan ka baara kɛ bato fɛn wɛrɛw ye.
[3] Nka ne ye aw bɛnba Ibrahima ta ka bɔ o ba kɔ fɛ ka a ci ka taa Kanan jamana bɛɛ yaalayaala. Ne ye a bɔnsɔn caya ka Isaka di a ma.
[4] Ne ye Yakuba ni Esau di Isaka ma. Ne ye Seir kulu jamana di Esau bɔnsɔn ma ka kɛ u ta ye, nka Yakuba ni a denw jiginna ka taa Misira.
[5] ‹O kɔ, ne ye Musa ni Aron ci ani ne ye Misirakaw gosi ni tɔɔrɔ kobaw ye o jamana kɔnɔ. O kɔ, ne ye aw labɔ yen.
[6] O tuma la ne ye aw bɛnbaw labɔ Misira jamana la, aw taamana ka na fo kɔgɔji da la. Misirakaw ye aw bɛnbaw nɔgɛn ni wotorow ni sotigiw ye fo ka taa se Kɔgɔji Bilen ma.
[7] O tuma la aw bɛnbaw kulola Matigi nɔ fɛ. A ye dibi don Misirakaw ni aw cɛ, ka kɔgɔji segin u kan ka u tunun. Ne ye min kɛ Misirakaw la, aw ɲɛw ye o ye. Aw fana tora kungokolon kɔnɔ ka waati jan kɛ.
[8] ‹O kɔ, ne ye aw ɲɛ minɛ ka taa Amɔr siya ka jamana la, olu minw sigilen tun bɛ Jurdɛn ba kɔ fɛ. U ye aw kɛlɛ, ne ye u don aw bolo. Aw ye o jamana minɛ ka kɛ aw ta ye, ne ye olu halaki ka u ban aw ɲɛ.
[9] Moab bɔnsɔn ka masakɛ, Zipɔr denkɛ Balak wulila ka Israɛl kɛlɛ. A ye ci bila ka taa Beɔr denkɛ Balam wele ko a ka aw danga.
[10] Nka ne tun t'a fɛ ka Balam lamɛn fewu. A ye dubaw kɛ aw ye. Ne ye aw tila Balak la.
[11] ‹Aw ye Jurdɛn ba tigɛ ka taa se Jeriko da fɛ. Minw sigilen tun bɛ Jeriko, Amɔr siya ni Ferɛz siya ni Kanankaw ni Hɛti bɔnsɔn ni Girgas siya ni Hev siya ani Jebuskaw ye aw kɛlɛ. Ne ye olu don aw bolo.
[12] Ne ye dondoliw ci aw ɲɛ, olu ye Amɔr siya ka masakɛ fila gɛn ka bɔ aw ɲɛ. O ma kɛ ni aw ka npan ye wala aw ka kala.
[13] Ne ye dugukolo di aw ma, aw ma min sɛnɛ fɔlɔ, ani dugubaw, aw ma minw sigi. Rezɛn ani olive nakɔw dira aw ma, aw ma minw turu. Olu kɛra aw balo ye.›
[14] «Ayiwa sisan, aw ka siran Matigi ɲɛ ka baara kɛ a ye ni tilennenya ni kantigiya ye. Aw bɛnbaw ye bato fɛn minw bato o ba kɔ fɛ ani Misira jamana la, aw ka olu ko dabila ka baara kɛ Matigi ye.
[15] Ni a man di aw ye ka baara kɛ Matigi ye, aw b'a fɛ ka baara kɛ min ye, aw ka o ɲɛnatɔmɔ bi, aw bɛnbaw ye baara kɛ bato fɛn minw ye o ba kɔ fɛ wala Amɔr siya ka bato fɛnw, aw sigilen bɛ olu minw cɛma, nka ne kɔni, ne ni ne ka so mɔgɔw na baara kɛ Matigi ye.»
[16] O tuma la jama ye jaabili kɛ ko: «Ka muruti Matigi ma ka baara kɛ bato fɛn wɛrɛw ye, Ala ma an kisira o ma.
[17] Matigi de ye an ka Ala ye. Ale de ye an ni an bɛnbaw labɔ Misira jamana la ka bɔ jɔnya so kɔnɔ. Ale de ye o kabakow kɛ an ye ka an mara an ka taama siraw bɛɛ la. An tɛmɛnna siya minw cɛma, a ye an mara olu bɛɛ cɛma.
[18] Matigi ye o siyaw bɛɛ gɛn ka bɔ anɲɛ, hali Amɔr siya min sigilen tun bɛ o jamana la. O de kosɔn an fana na baara kɛ Matigi ye, sabu ale de ye an ka Ala ye.»
[19] Josue y'a fɔ jama ye ko: «Aw tɛ se ka baara kɛ Matigi ye, sabu ale ye Ala senuma ye. Keleya bɛ a la, a tɛna aw ka murutili ni aw ka jurumuw yafa aw ma.
[20] Ni aw murutira Matigi ma ka siya wɛrɛw ka bato fɛnw bato, a na yɛlɛma aw kama ka ko jugu kɛ aw la ka aw halaki, hali k'a sɔrɔ a tun ye ko ɲuman kɛ aw ye.»
[21] O tuma la jama y'a fɔ Josue ye ko: «Ayi, nka an na baara kɛ Matigi ye.»
[22] Josue y'a fɔ mɔgɔw ye ko: «Aw kɛra aw yɛrɛw seere ye ko aw yɛrɛw ye Matigi ɲɛnatɔmɔ ka baara kɛ a ye.» U y'a jaabi ko: «An yɛrɛw ye o seerew ye.»
[23] Josue ko: «Ayiwa, siya wɛrɛw ka bato fɛn minw bɛ aw cɛma, a' ye olu ko dabila ka aw dusu yɛlɛma Matigi, Israɛl ka Ala fan fɛ.»
[24] Mɔgɔw ye Josue jaabi ko: «An na baara kɛ Matigi, an ka Ala ye ka a kan minɛ.»
[25] Josue ye layidu ta jama ye o don na ka sariyaw ni ci fɔlenw di u ma Sisɛm.
[26] O kɔ, Josue ye o kow sɛbɛn Ala ka sariya kitabu la. O kɔ, a ye kabakurunba dɔ ta ka o jɔ Matigi ka yɔrɔ senuma la sensun jiri kɔrɔ Sisɛm da fɛ.
[27] O kɔ, Josue y'a fɔ jama bɛɛ ye ko: «A filɛ, nin kabakurun na kɛ an seere ye, k'a masɔrɔ Matigi ye kuma minw fɔ an ye, a ye olu bɛɛ mɛn. A na kɛ seere ye aw kama walisa aw kana muruti aw ka Ala ma.»
[28] O kɔ, Josue ye mɔgɔw labila, bɛɛ kelen-kelen taara u ciyɛn kun na.
[29] O bɛɛ kɛlen kɔ, Nun denkɛ Josue, Matigi ka baaraden sara a si san kɛmɛ ni tannan la.
[30] U y'a su don a yɛrɛ ciyɛn la Timnak-Serak, Efrayim kulu jamana la, Gas kulu ni saheli cɛ.
[31] Israɛl bɔnsɔn ye baara kɛ Matigi ye Josue si bɛɛ la ani cɛkɔrɔbaw si bɛɛ la, olu minw tora Josue kɔ, olu tun ye Matigi ka kɛwale kɛlenw bɛɛ dɔn Israɛl ta fan fɛ.
[32] Israɛl bɔnsɔn tun ye Yusufu kolo minw cɛ ka bɔ Misira jamana la, u ye olu don Sisɛm, Yakuba tun ye dugukolo min san warijɛ kɛmɛ la Sisɛm dugusigibaa Hamɔr denkɛw fɛ. O kɛra Yusufu denkɛw ciyɛn ye.
[33] Arɔn denkɛ Eleazar fana sara. U y'a su don Gibeat-Fineɛs. O tun dira a denkɛ Fineɛs ma Efrayim kulu jamana la.